Inyigaran Racẽlĩ Lẽha
30
Ma balna ma ngĩ acĩn Racẽlĩ ngatĩ athii cĩ aritacĩ Yokobĩ ĩnõõnõ dõõlĩ wo, ikiyyia inyigaran nẽ ngõõnĩ cĩnnĩ, ĩthõng ethek nẽ Yokob ne, “Anya dõõlĩ mĩ athii tõ, kadaai katĩ na.”
2 Ĩthõng avaracĩk Yokobĩ ĩnõõnõ õrrõt, ĩthõng ethek ne, “Keeni na Nyekuc, cĩ abilni aniitia athii cĩ anyi yak dõõlĩ wo?”
3 Ma natẽ, uduwak Racẽlĩ ĩnõõnõ ethek ne, “Bĩtĩ thĩ Bĩlha, nyakapanait cannĩ wo. Ataguuth kĩ ĩnõõnõ, kĩĩ katĩ kitirraha nẽ aneeta dõõlĩ, kĩĩ katĩ kẽnnẽ na buu kũmũda eet cĩk ciith cannĩ ĩcĩnnĩ.”
4 Ĩthõng thĩna, anyĩk Racẽlĩ Bĩlha nyakapanait cĩnnĩ kataguthõ kĩ Yokob.
5 Ma natẽ, ikiyyia anyaawõy Bĩlha, ĩthõng itiriak nẽ Yokob ngẽrĩnĩ.
6 Ĩthõng õthõõth Racẽlĩ ĩthĩ ne, “Ĩthĩrar Nyekuci lawinit cannĩ, ĩthõng anya ngẽrnanĩ.” Ngaatĩ akanẽcĩ nẽ ĩnõõnõ thar cĩk athĩ Daan.a
7 Ma thĩ balna natẽ anyaawõy Bĩlha wũ ẽẽn ticciannioit cĩ Racẽlĩ naboo, ĩthõng naboo itiriak nẽ Yokob ngẽrĩnĩ.
8 Ngaatĩ thĩ baa õthõõthĩ Racẽlĩ athĩ ne, “Kongonycowa kĩ ngõõna õrrõt, ĩthõng kijiara ĩnõõnõ.” Ngaatĩ akanẽcĩ doolec thar cĩk athĩ Navtali.b
9 Ma balna mĩ acĩn Lẽha ngatĩ abĩlnĩ nẽ athii cĩ arinni wo, ikiyyia ĩdĩma nẽ Thĩlpa, ticciannioit cĩnnĩ anyĩk kitik Yokobĩ.
10 Ngaatĩ thĩ balna aritacĩ Thĩlpa ticciannioiti cĩ Lẽha Yokob ngẽrĩnĩ.
11 Ĩthõng õthõõth Lẽha ĩthĩ ne, “Ikiyyia thõõth cĩ abũnna ĩcannĩ.” Ngaatĩ akanẽcĩ ĩnõõnõ thar cĩk athĩ Gad.c
12 Ma natẽ, ikiyyia itiriak ticciannioiti cĩ Lẽha Thĩlpa Yokob ngẽrĩnĩ ĩmma.
13 Ĩthõng õthõõth Lẽha ĩthĩ ne, “Kẽbẽlbẽla yoko na! Ĩthõng kõr coo, etheca katĩ ngaay vẽlẽk ne, katali na.” Ngaatĩ akanẽcĩ doolec thar cĩk athĩ Athẽr.d
14 Ma balna itin cĩ ẽtẽdanẽ eeta gẽẽmẽ, amũda balna Ruubenĩ kẽẽt ĩmma cĩ ayak nyegerua,e ĩthõng ũũk ayahawothik ĩnõõgõ yaatĩnnĩ cĩnnĩ Lẽha. Ĩthõng ijin Racẽlĩ Lẽha nyegerua õõgĩ.
15 Ĩthõng thĩ, ẽdẽcĩ kẽnnẽ Lẽha athĩ ne, “Nga balna ẽlẽntõy ngatĩ ayahẽ niia maac cannĩ, ĩthõng yoko naboo adiimi nyegerua õõgĩ ĩcĩ ngẽrnanĩ wo buu?”
Ẽdẽcĩ kẽnnẽ Racẽlĩ ĩnõõnõ ethei ne, “Anya thĩ niia aneeta nyegerua õõgĩ, ĩthõng thĩ, ataguththu niia kĩ Yokob baalin coo.”
16 Ma balna jiatĩn nĩcẽ baa ngĩ õbõda Yokobĩ manatõ, ikiyyia uduwak Lẽha ĩnõõnõ ethek ne, “Koogin na kĩ aniitia baalin coo. Nyatarka kadũmanni na aniitia nyegeruanĩy ĩcĩk mĩnan cĩ ngẽrnanĩ.” Ĩthõng balna ataguuthõ nẽẽgẽ kõdõwẽ baalin nĩcẽ.
17 Ĩthõng ĩthĩrar Nyekuci lawinit cĩ Lẽha, ĩthõng anyĩk nẽ Yokob ngẽrĩnĩ ĩmma naboo kĩĩtõ tur.
18 Ngaatĩ õthõõthĩ Lẽha athĩnnĩ ne, “Aanya wanĩco Nyekuci anyinit ngatĩ kaanyĩcẽ Yokob kitik ticciannioit cannĩ.” Ĩthõng akatek nẽ ngẽrĩnĩ thar cĩk athĩ Ithacar.f
19 Ĩthõng anyaawõy naboo Lẽha, ĩthõng itiriak nẽ Yokob ngẽrĩnĩ cĩ ẽẽn tõrkõnõm.
20 Ngaatĩ õthõõthĩ Lẽha athĩnnĩ ne, “Anya wanĩco Nyekuci anyinit ĩmma naboo cĩ abũnna. Ĩthõng kõr coo, ikiyyia katĩ otongoleha maac cannie aneeta õrrõt, nyatarka kittiriaha na ĩnõõnõ lõgõõ cĩk maacĩk tõrkõnõm.” Ngaatĩ akanẽcĩ nẽ ngẽrĩnĩ thar cĩk athĩ Thebulun.g
21 Ma balna vurtia cĩnnĩ naboo, ikiyyia itirria Lẽha doo cĩ ngayyi cĩ athĩ thar Diina.
22 Ĩthõng balna ikiyyia ahada Nyekuci Racẽl, ĩthõng ĩthĩrar ĩnõõnõ, ĩthõng anyĩk ĩnõõnõ kanyawõy.
23 Ma natẽ, anyaawõy Racẽlĩ, ĩthõng ikiyyia ũtũwa ngẽrĩnĩ, ĩthõng õthõõth ĩthĩ ne, “Ĩdĩm Nyekuci ngawani wũnanĩ ngatĩvõrĩ.”
24 Ĩthõng akatek nẽ ĩnõõnõ thar cĩk athĩ Yothẽbõ,h ĩthõng ĩthĩ ne, “Anya woccia Makayyioiti kĩtoorĩha aneeta doolec ĩmma.”
Yokob kĩ Laban
25 Ma balna ngĩ itirriay Yothẽbõ vẽlẽk, ikiyyia ethek Yokobĩ Laban ne, “Anya aneeta kũũk, kĩĩ katĩ kũũk na looca ĩcĩnanĩ.
26 Anya aneeta ngaay cĩganĩk kĩ dõõlĩ cĩganĩk, nyatarka balna kiticanothihi na aniitia, ĩthõng katĩ kũwa na gõõla ĩcannĩ. Aga thẽk niia noko ẽẽn tiici wũ balna katicanothici na aniitia kuu.”
27 Ĩthõng thĩ, ẽdẽc Labanĩ Yokob ethei ne, “Ma ngĩ kũrũba na thõõth cĩ abũnna kẽbẽrẽnĩy ĩcugunik, avvu baai ngato. Kũrũba balna na gõõla ĩcĩ katĩmanẽ kagũra ngatĩ agatania Makayyioiti aneeta, nyatarka aniitia.”i
28 Ĩthõng balna ĩthĩ naboo nẽ ne, “Duwa da yoko ẽẽn nyarobinya cugunniek, ĩthõng kĩĩ katĩ kũdũmaneei na aniitia.”
29 Ẽdẽcĩ Yokobĩ ĩnõõnõ ethei ne, “Aga thẽk niia buu kiticanothihi na aniitia õrrõt, ĩthõng aga ngatĩ kapahai na aniitia athaa kĩ ẽẽtha cugunik.
30 Nga balna dĩcẽ kaala cugunniek kaganoko, baa nganĩ kakuni na thõng, ĩthõng yoko ivitia ĩĩtõ mẽẽlĩ õrrõt. Agatan Makayyioiti kaal cugunik kitirrit jurrung, nyatarka aneeta. Ĩthõng yoko, kereyyie na kĩĩ tĩngan, kĩĩ katĩ kĩcĩn thõõth cĩ kõrõõk cannĩ nyiangũ?”
31 Ngaatĩ ajini Labanĩ ĩnõõnõ ẽthẽcĩ ne, “Ẽẽn koccia gii cĩ kadũmanni na aniitia kuu?”
Ẽdẽcĩ Yokobĩ ethei ne, “Athii gii cĩ kadiimi na cĩ adũmania niia aneeta tõ, ma ngĩ ĩdĩmanu niia gii codoi coo dõ, kĩĩ thĩ katĩ kũtũwwa na athaa kĩ ẽẽtha cugunik.
32 Anya da yoko kiiyieth kaal cugunik wo vẽlẽk, kĩĩ katĩ kẽbẽra athaa kĩ ẽẽtha cĩk buthẽnĩk, kĩ nyio cĩk kollik vẽlẽk kĩĩ dũmaniniet cĩ tiic cĩnanĩ.
33 Akuni katĩ aga niia mĩn athĩ ne, athii na cĩ kĩgoolli aniitia, katĩ ngĩ acini niia athaa kĩ ẽẽtha cĩganĩk, ĩthõng ma ngĩ kayai na ẽẽth cĩ athii cĩ buthen, kõdẽ cĩ labaacĩ, kõdẽ atheet cĩ athii cĩ ollia kaalĩy ĩcĩganĩk. Gaa ĩthĩ ne, ogorothiay ĩcunni.”
34 Ẽdẽcĩ kẽnnẽ Labanĩ athĩ ne, “Kẽlẽma thõõth cunni wo, ĩthõng anyĩk kaavu kĩcĩ aduwa niia wo.”
35 Ma kõr nĩcẽ, atangala Labanĩ kõõnyĩ kĩ ẽẽtha cĩk ngayyik cĩk buthẽnĩk, kõdẽ cĩk labaacĩk vẽlẽk kĩ nyio cĩk kollik vẽlẽk kaavutõ mĩn. Ma natẽ, ĩdĩma lõgõõ cĩgĩnĩk kõõt kũtũwacõ ẽẽtha kĩ nyio cĩkkõ.
36 Ngaatĩ itionĩ Labanĩ lõgõõ cĩgĩnĩk kĩ ẽẽtha kĩ athaa cĩkkõ hẽẽrõna cĩ ayak wathinniok iyyio, ĩthõng ũtũngẽẽĩ nẽ Yokob ẽẽtha kĩ athaa cĩgĩnĩk õõgĩ kũtũwwa.
37 Ma balna natẽ, ẽtẽngẽda Yokobĩ taliibanẽ cĩk kẽẽn cĩk cũlaĩk, ĩthõng ũpũrũc õõgĩ kĩĩ kaanyĩk ngĩtĩ apũrũc nẽ kẽẽta ẽẽ, kedenyiay kĩĩ võõra.
38 Ma natẽ, ĩdĩma taliibanẽ nĩĩkẽ arĩk kĩĩtõ õjõõntĩ kĩ kõvõwõlẽt, kĩĩ katĩ kĩcĩnĩt athaa kĩ ẽẽtha, katĩ ngĩ avvu awũdẽ kovowola katĩ ma ngĩ adiim ẽyẽwõĩ.
39 Ĩthõng thĩ, balna ẽyẽwõĩ athaa natẽ joonui taliibanẽy, ĩthõng itiryia nyio cĩk ariitik kĩ cĩk buthẽnĩk kĩ cĩk labaacĩk.
40 Atangala Yokobĩ athaa cĩkkõ, ĩthõng thĩ, anyĩk nẽ athaa õõgĩ kĩcĩnĩt athaa cĩk ariitik kĩ cĩk ollik cuc cĩk Labanĩ. Gõõla ĩcoo ẽngẽra Yokobĩ athaa cĩgĩnĩk athaanẽy ĩcĩk Labanĩ, kĩĩ katĩ athii cĩ arũmẽ nẽẽgẽ ngatĩ odoi.
41 Ma balna ma ngĩ ẽyẽwõĩ athaa cĩk adĩhĩ joonui ngatĩ awũdẽẽnĩ ẽẽ, ĩdĩma Yokobĩ taliibanẽ cĩk abacũwa ẽẽ, ĩthõng arĩk kĩĩtõ õjõõntĩ kĩ kõvõwõlẽt cĩk awũdẽẽnĩ kaala.
42 Ĩthõng thĩ, athii Yokobĩ cĩ aari taliibanẽ nĩĩkẽ katĩ ma ngĩ ẽyẽwõĩ kaala cĩk akaranĩ. Ĩthõng ũũwĩ Yokobĩ kaal cĩk adĩhĩ, ĩthõng ũũwĩ Labanĩ kaal cĩk akaran ẽẽ.
43 Ngaatĩ akuni abalini Yokobĩ õrrõt gõõla nĩcẽ. Ayak boore cĩ ẽẽthawu, kĩ cĩ athaanu, kĩ cĩ nyaakalnyawu, kĩ cĩ thigirienu, kĩ ticcianniok cĩk maacĩk, kĩ cĩk ngayyik cĩk meelĩk õrrõt buu.