Arawothĩk Yokobĩ Paddan Aram
29
Ma balna ngĩ õwõ Yokobĩ õkkõ gõõla ĩcĩ alibanĩ kõr,
2 ĩcĩn nẽ duwwo rẽẽna cĩ õvõyyĩ tũwayyiowa athaa kõõt kũwũdĩt maam. Ẽẽlĩ balna teenyuana iyyio cĩk athaanu duwwuaa nĩcẽ joonui, cĩ balna anyũgĩ nyugeca.
3 Ma ngĩ ivitia athaa vẽlẽk natẽ duwwo ẽnyẽktĩ thĩ tũwayyiowa nyugec cĩ duwwo. Ĩthõng ma katĩ mĩ uwuddie athaa vẽlẽk, ũnyũgĩtõ tũwayyiowa duwwo.
4 Ngaatĩ ajini Yokobĩ tũwayyiok ẽthẽcĩ ne, “Avvunnu nga lõgõth?” Ẽdẽcĩ tũwayyiowa athĩ ne, “Kavvunna Harana.”
5 Ĩthõng ijin nẽ ĩnõõgõ ethek ne, “Agayyu woccia et ĩmma cĩ athĩ Laban, logoo cĩ ngẽrtĩ Nahõrĩ?” Ẽdẽcĩ nẽẽgẽ ethei ne, “Ii, kagayya ĩnõõnõ.”
6 Ĩthõng ijin ĩnõõgõ ethek ne, “Ma ngĩ acĩnnu ĩnõõnõ abũnna nẽ?” Ẽdẽcĩ tũwayyiowa ethei ne, “Abũnna nẽ jurrung. Bũwanyĩnĩ wĩnnĩ neccie Racẽl aku ẽẽ, angĩda athaa ẽẽ.”
7 Ngaatĩ ẽthẽcĩ Yokobĩ ĩnõõgõ ne, “Nga aavĩ kõr tiddina, ngaanĩ kĩĩ itin cĩ angĩdanu kaal kivitia keelitõ. Ellik athaa, ĩthõng imiiryiowu oottu gewwua.”
8 Ẽdẽcĩ kẽnnẽ tũwayyiowa athĩ ne, “Athii cĩ keelicia, nga nõõnõ kẽrẽyya athaa vẽlẽk kivitia ngato, kĩĩ thĩ kenyektia nyugec duwwua.”
9 Ma balna nga õthõõthõy Yokobĩ kĩ ĩnõõgõ, ikiyyia Racẽlĩ angĩda athaa cĩk baatĩnnĩ, ẽẽn nẽ tũwayyioit.
10 Ma baa ngĩ acĩn Yokobĩ bũwẽnyĩ Labanĩ ẽẽ, ivir ũũk ẽnyẽẽĩ nyugec, ĩthõng eelĩk athaa cĩk malõtĩnnĩ ẽẽ.
11 Ĩthõng thĩ, ũcũcũ Yokobĩ Racẽl, kĩĩ kutulu õrrõt.
12 Ĩthõng uduwak nẽ Racẽl ethek ne, “Keeni na ngẽrtĩ Rẽbẽka, ngõõnĩ baaba.” Ĩthõng ivir Racẽlĩ ũũk uduwak baatĩnnĩ thõõth cĩnnĩ.
13 Ma balna ngĩ athĩrar Labanĩ nyemut cĩ ngẽrtĩ ngõõnõnĩ wo, ivir nẽ buu õõt urumtõy kĩ Yokob, ngaatĩ ĩthaawĩ ĩnõõnõ talia, ĩthõng ũũwĩ ĩcĩ olu, ngaatĩ aduwacĩ Yokobĩ ĩnõõnõ thoothonniok vẽlẽk.
14 Ĩthõng ĩthĩ Labanĩ ne, “Eeni niia ẽlẽ kĩ biyyie cĩganĩk kir.”
Itik Yokobĩ Lẽha kĩ Racẽl
Baa ngĩ aavu Yokobĩ nyĩĩlok codoi,
15 ikiyyia uduwak Labanĩ ĩnõõnõ ethek ne, “Athii woccia niia cĩ aticanothicia aneeta kaganoko athii cĩ adũmannie, nyatarka eeni niia tionnioit cannĩ. Nyia yoko cĩ adiimi niia kaanyi na aniitia.”
16 Ĩthõng ayak balna Labanĩ dõõlĩ ramma cĩk ngayyik. Athĩ cobbi thar cĩgĩnĩk Lẽha, ĩthõng athĩ cĩ dĩcĩ thar cĩgĩnĩk Racẽl.
17 Athii balna cĩ võõrĩ kẽbẽrẽ cĩk Lẽha, ĩthõng balna Racẽlĩ dĩhĩm õrrõt, ĩthõng ayak ẽlẽ cĩ dĩhĩmĩ õrrõt.
18 Amĩnan balna Yokobĩ Racẽl ngaatĩ aduwacĩ Laban ẽthẽcĩ ne, “Kadiimi katicanothici na aniitia erkinya tũrgẽrẽm, ĩthõng anya kitik Racẽl.”
19 Ẽdẽcĩ Labanĩ athĩ ne, “Mayya ma kaanyi na aniitia ĩnõõnõ kĩcĩ woyyia ma ngĩ kaanyi et ĩmma. Avvu ngato ticanothĩha aneeta.”
20 Ngaatĩ aticanini Yokobĩ erkinya tũrgẽrẽm, kĩĩ katĩ kũmũda nẽ Racẽl. Ĩthõng acĩn nẽ erkinya nĩĩkẽ aatĩ kĩ iinyia cĩk kĩdĩk ĩcĩnnĩ, nyatarka amĩnan nẽ Racẽl õrrõt.
21 Ĩthõng uduwak Yokobĩ Laban ethek ne, ũtũbanẽ itini wannie kidiima na kitiha ngaa cannĩ Racẽl.
22 Ngaatĩ alũtanĩ Labanĩ eet cĩk nginicẽ vẽlẽk, ĩthõng ĩdĩmanek peyian cĩ tiẽnto.
23 Ĩthõng thĩ, ma balna jiatĩn nĩcẽ ayahak Labanĩ bũwẽnyĩ cĩnnĩ Lẽha, Yokob kõõt kataguthõ.
24 Ĩthõng balna anyĩk Labanĩ nyakapanait cĩnnĩ cĩ ngayyi cĩ athĩ Thĩlpa kĩĩ nyakapanait cĩ Lẽha.
25 Ma balna ngerenniet, acĩn kẽnnẽ Yokobĩ Lẽha, ĩthõng ethek Yokobĩ Laban ne, “Nyia coo cĩ adĩmaneca niia aneeta wo? Katicanothici balna na aniitia, nyatarka Racẽl, athii wõnõ cĩ õgõõn noko? Nyia gõõla niia aneeta wo?”
26 Ẽdẽcĩ kẽnnẽ Labanĩ ethei ne, “Angiranni ngirana cĩnang ngatĩ atihẽnĩ doolec cĩ vurtio katĩ ngaanĩ kitihe cĩ ẽẽn abuu.
27 Rẽẽwõy nõ dẽcak wathinniok tũrgẽrẽm cĩk tiẽnto, ĩthõng thĩ, katĩ kaanyi Racẽl buu, ĩthõng iticanõy naboo erkinya tũrgẽrẽm.”
28 Ma vurtia cĩ baa edeciaĩ Yokobĩ kĩ Lẽha wathinniok cĩk ẽẽn tũrgẽrẽm ẽẽ, ĩdĩma Labanĩ Racẽl anyĩk Yokob kĩĩ ngaa cĩnnĩ.
29 Aanyĩk balna Labanĩ nyakapanait cĩnnĩ cĩ ngayyi cĩ athĩ Bĩlha kũũk kĩĩ nyakapanait cĩ Racẽlĩ.
30 Ngaatĩ oginnie Yokobĩ kĩ Racẽl buu kĩĩ ngaa cĩnnĩ, ĩthõng ĩmĩnan ĩnõõnõ õrrõt kijiar Lẽha. Ĩthõng iticanothĩk nẽ Laban erkinya tũrgẽrẽm naboo.
Dõõlĩ cĩk Yokobĩ
31 Ma balna mĩ acĩn Makayyioiti ngatĩ athii cĩ amĩnanĩ Yokobĩ Lẽha wo, ikiyyia anyĩk nẽ Lẽha kẽyẽk dõõlĩ, ĩthõng aavu Racẽlĩ kaganoko.
32 Ĩthõng balna anyaawõy Lẽha, ikiyyia ũtũwa ngẽrĩnĩ, ĩthõng atal ĩthĩ ne, “Ĩdĩm Makayyioiti pĩrnanẽt cannĩ ngatĩvõrĩ, ĩthõng thĩ, dĩdĩ ĩmĩnana yoko katĩ aneeta maac cannie õrrõt.” Ngaatĩ akanẽcĩ doolec thar cĩk athĩ Ruuben.b
33 Ma vurtia cĩ erkit nĩcẽ, ikiyyia anyaawõy naboo, ĩthõng ũtũwa ngẽrĩnĩ, ĩthõng õthõõth ĩthĩ ne, “Nyatarka ĩthĩk Makayyioiti athĩ ne, athii cĩ amĩnanna aneeta maac cannie, anya nẽ aneeta doolec coo naboo.” Ngaatĩ akanẽcĩ nẽ doolec thar cĩk athĩ Thimion.c
34 Ma natẽ, ikiyyia itiriak ngẽrĩnĩ ĩmma naboo, ĩthõng ikiyyia umuk ĩthĩ ne, “Ikiyyia wanĩco katĩ ĩmĩnana maac, nyatarka kittiriaha lõgõõ cĩk maacĩk iyyio.” Ngaatĩ akanẽcĩ ĩnõõnõ thar cĩk athĩ Levi.d
35 Ma natẽ, ikiyyia anyaawõy naboo, ĩthõng ũtũwa ngẽrĩnĩ, ngaatĩ akanẽcĩ thar cĩk athĩ Yudaa,e nyatarka athĩ ne, kadihithi na Makayyioit. Ma ngato, ikiyyia ĩbĩl ngatĩ ayahĩ dõõlĩ.