Irionĩk Aĩthaĩ Yokob
28
Ngaatĩ avaanĩ Aĩthaĩ ngẽrĩnĩ Yokob, ĩthõng agatan ĩnõõnõ kĩĩ kirionĩk kethek ne, “Nyĩ atihi thẽk ngaa cĩ looc cĩ Kananĩ.
2 Bĩt tamanoko ĩcĩ Bethuele baatĩ yaaya looca ĩcĩ Paddan Aramĩ, ĩthõng uuwu icinu malotunni Laban. Bẽra doo ĩmma cĩnnĩ natẽ, ĩthõng ayaha kĩĩ ngaa cunni.
3 Anyĩk woccia kagatani Nyekuci cĩ Tiiri cĩ Ijiar vẽlẽk, ĩthõng anyi tirra dõõlĩ cĩk meelĩk, ĩthõng anyi Nyekuci aniitia yak eet cĩk meelĩk.
4 Anyĩk woccia Nyekuc kaanyi aniitia kĩ tionniok cugunik gatan cĩ õgõõn kĩ wũ balna anyi nẽ Abraham, kĩĩ katĩ bĩtĩ niia looc coo cĩ kaatẽ naaga keeginnie eet cĩk kĩrẽẽng wo.”
5 Ĩthõng thĩ, balna ition Aĩthaĩ Yokob kõõt kũrũmtẽ kĩ Laban gõtõnĩ Rẽbẽka, ngẽrtĩ Bethuele cĩ ẽẽn et cĩ Aramĩ.
Itik Ethau bũwẽnyĩ Ĩthĩmaĩl
6 Ma baa ngĩ athĩrar Ethau ngatĩ agatanĩ Aĩthaĩ Yokob ẽthẽcĩ ne, “Nyĩ atihi niia ngaa cĩ Kananĩ,” Ĩthõng ition nẽ Yokob kũũk kitiha ngaa looca cĩ Paddan Aramĩ ẽẽ,
7 ĩthõng balna ongollie Yokobĩ thõõth cĩ baatĩnnĩ kĩ cĩ yaatĩnnĩ, ĩthõng ũũk Paddan Arama.
8 Ikiyyia aga Ethau ngatĩ athii cĩ adiim baatĩnnẽ Aĩthak ngaay cĩk looc cĩ Kananĩ,
9 ngaatĩ õkõyyĩ Ethau ĩcĩ kõrõõk cĩ Ĩthĩmaĩlĩ gõtõnĩ baatĩnnĩ, ĩthõng ũũk itik ngaa ĩmma cĩ ẽẽn bũwẽnyĩ Ĩthĩmaĩlĩ cĩ athĩ Mahalath cĩ ẽẽn ngõõnĩ Nebaiothĩ cĩ ẽẽn ngẽrtĩ Ĩthĩmaĩlĩ, wũ balna ẽẽn ngẽrtĩ Abrahamĩ.
Ngonothinet cĩ Yokobĩ
10 Ma natẽ, ĩtĩnga Yokobĩ Beerthebatẽy, ĩthõng ũũk õlõõ cĩ gaalawu ĩcĩ Haranĩ.
11 Ma baa ngĩ okolothĩk kõr, ikiyyia arawak ngini ĩmma, ngaatĩ ongiyyie natẽ, nyatarka balna iriri lõõcĩ. Ma natẽ, ĩdĩma bĩĩ ĩmma, ĩthõng uruwaaĩ õõ cĩnnĩ, ĩthõng atangu.
12 Ma baa kĩnyaaĩy, õngõnõthẽ nẽ acĩn lotdirtdir ĩmma cĩ akatĩ looc õkkõ kõdõlan tammutiddin. Ĩthõng balna acĩn nẽ anjĩlẽt cĩk Nyekucak ngatĩ õtõdĩ õvõyyĩ tammuatiddina, ĩthõng ulucciay loota lotdirtdira nĩĩcẽ.
13 Abĩlĩ balna Makayyioiti lotdirtdira kabanyca, ĩthõng ĩthĩ nẽ ne, “Aneeta Makayyioit Nyekuc cĩ baaba Abrahamĩ kĩ cĩ Aĩthaĩ. Kaanyi katĩ na aniitia kĩ dõõlĩ cugunik looc cĩ yoko õõngẽ niia wo.
14 Avvu katĩ doolia cĩk dõõlĩ cĩk dõõlĩ cugunik ẽẽn kĩ tõdõwa loota ngato. Ĩthõng athanothicu katĩ niigia looc cĩ tõõn cĩ okolothĩcẽ kõrra, kĩ cĩ alibanĩ kõrra, kĩ cĩ lootu, kĩ ĩcĩ diinu vẽlẽk. Agatanni katĩ eeta vẽlẽk loota ngato, nyatarka aniitia kĩ dõõlĩ cĩk dõõlĩ cĩk dõõlĩ cugunik.
15 Karũmẽ katĩ na kĩ aniitia, ĩthõng kebeei aniitia goolliowẽy vẽlẽk ĩcĩk õkõyyẽ niia, ĩthõng kõbõdani katĩ na aniitia looc coo. Athii katĩ na cĩ kuungnici aniitia gii ngĩ kĩdĩmana kaal cĩk kaduwaci na wo.”
16 Ĩthõng ma balna ngĩ acĩnẽ Yokobĩ kĩnyaaĩy wo, ikiyyia umuk nẽ ĩthĩ ne, “Monogo aavĩ Makayyioiti ngato dĩdĩ, ĩthõng athii na cĩ kagga!”
17 Ngaatĩ baa ongolini nẽ Nyekuc, ĩthõng ĩthĩ ne, “Ngĩtĩ dĩhĩmĩ gõõ õrrõt coo! Ẽẽn woccia coo ciith cĩ Nyekuco, ĩthõng ẽẽn araan cĩ kõvvõyyĩ tammuatiddina!”
18 Ma balna ngerenniet, ĩtĩnga Yokobĩ, ĩthõng ĩdĩma bĩĩ wũ balna aruwanĩ nẽ õõ cĩnnĩ, ĩthõng adaweek kĩbĩl mũrũũr kĩĩ ngĩtĩ lawintio. Ĩthõng utduutik ngooroc tiddina bĩĩya kĩĩ kĩdĩhĩth Nyekuc.
19 Ĩthõng akatek nẽ nginicẽ thar cĩk athĩ Bethel,a avvẽ balna nõ nginicie athĩ ne, Luuth.
20 Ma natẽ, ũbũtan Yokobĩ nguuma cĩ Nyekuco ĩthĩ ne, “Ma ngĩ aavĩ Nyekuci kĩ aneeta, ĩthõng uthuutia nẽ aneeta gõõla cĩ kõkõyyẽ wo, ĩthõng anya ahat kĩ ceremua buu,
21 ĩthõng katĩ anya kõbõda jurrung kõdõlan kõrõõk cĩ baangĩ, ẽẽn katĩ Makayyioiti Nyekuc cannĩ kũdũt.
22 Ĩthõng ẽẽn katĩ bĩĩ coo ciith cĩ Nyekuco, ĩthõng kaanyi katĩ na aniitia gii cĩ dĩcĩlĩmb ĩcĩk kaal vẽlẽk cĩk anya niia aneeta.”