Agatan Aĩthaĩ Yokob
27
Ma balna ngĩ atangany Aĩthaĩ, ĩthõng ĩthĩ ruben nẽ. Ma kõr ĩmma, ikiyyia ũtũvvũ nẽ ngẽrĩnĩ cobbi Ethau, ĩthõng ethek ne, “Ngẽrnanĩ.” Ẽdẽcĩ kẽnnẽ Ethau a ne, “Ee, aneeta coo.”
2 Ma natẽ, ikiyyia õthõõth Aĩthaĩ ĩthĩ ne, “Katanganya yoko nana, ĩthõng athii cĩ kagga kõr cĩ daaĩth cannĩ.
3 Ĩthõng thĩ, yoko dĩma kirihit kĩ nyarangĩt cugunik, ĩthõng uuwu ĩlĩha kelegit cĩ boono, ĩthõng icciawu.
4 Ĩthõng ikiyyia ĩdĩmanea gõõla wũ gõõ kamĩnanẽ na õrrõt, ĩthõng ayahaha aneeta. Kadiimi kadai, ĩthõng kagatani na aniitia nga kadaak na.”
5 Athĩrar balna Rẽbẽka thõõth cĩ õthõõth Aĩthaĩ kĩ Ethau ẽẽ. Ma baa ma ĩngathĩ Ethau õkkõ lĩha wo,
6 uduwak Rẽbẽka Yokob ethek ne, “Kathĩrari viyyio na baaba ethei Ethau ne,
7 ‘Bĩt lĩhaha kelegit, ĩthõng ikiyyia ĩdĩmanea gõõla wũ gõõ kamĩnanẽ na õrrõt, ĩthõng ayahahanĩ, kĩĩ katĩ kagatani nguuma cĩ Makayyiokto nga kadaawũ.’ ”
8 Ngaatĩ ẽthẽcĩ Rẽbẽka Yokob ne, “Ngẽrnanĩ thĩrar thõõth cĩ kaduwaci na wo jurrung, ĩthõng ĩdĩmanu.
9 Bĩt kaalĩy, ĩthõng ẽbẽra ẽẽtha ramma cĩk nga dĩcẽ, ĩthõng ayahahanĩ, kĩĩ katĩ kĩdĩmanek na baaba gõõla wũ gõõ amĩnanĩ nẽ õrrõt.
10 Ĩthõng katĩ ayawothiwu niia ĩnõõnõ kũũk kadak ne, kĩĩ katĩ kagatani nẽ aniitia ngaanĩ kadaak nẽ.”
11 Ẽdẽcĩ kẽnnẽ Yokobĩ Rẽbẽka yaatĩnnĩ cĩnnĩ ethei ne, “Aga niia buu õlõ Ethau ẽlẽ, ĩthõng athii aneeta cĩ õlõ ẽlẽ.
12 Ma katĩ ngĩ uwuma baangĩ, ĩthõng ĩthĩ ne, kĩgooli na ĩnõõnõ thõng, ayahaca katĩ aneeta thõõth coo cĩĩnẽnẽt thõng moko woyyia gatan?”
13 Ẽdẽcĩ yaatĩnnẽ ĩnõõnõ ethei ne, “Anyĩk niia cĩĩnẽnẽt nĩcẽ kikiyyiaha aneeta. Dĩman nẽnnẽ niia kĩcĩ kaduwaci na wo. Bĩt yahaha ẽẽtha cĩk ketheci na wo.”
14 Ngaatĩ õkkõ ayahanĩ Yokobĩ ẽẽtha cĩk ethei yaatĩnnẽ ẽẽ, ĩthõng anyĩk ĩnõõnõ kĩdĩmanei baatĩnnĩ gõõla cĩ gõõ amĩnan nẽ ẽẽ.
15 Ma natẽ, ĩdĩma Rẽbẽka ceremua cĩk Ethau cĩk dĩhĩmĩk õrrõt, cĩk gõõ aatĩ ciiatõ, ĩthõng itihimẽẽĩ ngẽrĩnĩ wũnnĩ wũ dĩcĩ Yokob.
16 Ĩthõng ũmmũt nẽ inyia kĩ athĩn cĩ Yokobĩ buu ceremuanĩy ĩcĩk ẽẽthak.
17 Ngaatĩ anyĩcẽ Rẽbẽka Yokob ahat cĩ ẽmẽdẽ kĩ ahat cĩ avaadiay kayawothĩk baatĩnnĩ.
18 Ma natẽ, ũũk Yokobĩ ĩcĩ baatĩnnĩ, ĩthõng ethek ne, “Papa.” Avvẽ kẽnnẽ Aĩthaĩ a ne, “Ee, ngẽrnanĩ, eeni niia ngẽrnanĩ jang?”
19 Ẽdẽcĩ Yokobĩ ethei ne, “Aneeta ngeruni wũ ẽẽn abuu Ethau, kũmũda kelegit wũ adiimi niinia. Tĩnga dak kelegit coo, ĩthõng thĩ, agatananĩ.”
20 Ĩthõng thĩ, ẽdẽcĩ kẽnnẽ Aĩthaĩ ngẽrĩnĩ ethei ne, “Õkkõ kette niia amũda kelegit tamanoko kuu?” Ẽdẽcĩ Yokobĩ athĩ ne, “Ẽẽla Makayyioiti Nyekuci cunnie kũmũda.”
21 Ma natẽ, uduwak Aĩthaĩ Yokob ethek ne, “Vĩjaha da ngato, kĩĩ katĩ kuwumi na aniitia katĩ ngĩ eeni Ethau dĩdĩ?”
22 Ngaatĩ avĩjawõthĩcẽ Yokobĩ baatĩnnĩ Aĩthak, ĩthõng uwum baatĩnnẽ ĩnõõnõ, ĩthõng ethek ne, “Õgõõn moloowĩ cunnie kĩcĩ Yokobĩ, ĩthõng aavutõ athĩna cugunniek kĩ cĩk Ethau.”
23 Athii balna cĩ aga Aĩthaĩ ngatĩ ẽnnẽ Yokob neccie, nyatarka balna õlõ athĩna cĩgĩnnẽk kĩ cĩk Ethau, ĩthõng agatan ĩnõõnõ.
24 Ĩthõng naboo ijin ethek ne, “Eeni thẽk niia ngẽrnanĩ Ethau dĩdĩ?” Ẽdẽcĩ Yokobĩ athĩ ne, “Ii! Aneeta thẽk kir coo!”
25 Ngaatĩ ẽthẽcĩ Aĩthaĩ Yokob ne, “Jaaĩ thĩ da yoko kelegit cunni wo, kĩĩ katĩ kagatanina.”
Ma natẽ, anyĩk Yokobĩ baatĩnnĩ kelegit kĩ mẽrtẽ cĩ vĩnõwo kũwũd.
26 Ma natẽ, ethek Aĩthaĩ ĩnõõnõ ne, “Vĩjaha ngato, ijjia thawaanĩ ngẽrnanĩ.”
27 Ma natẽ ĩvĩjaha Yokobĩ ikiyyia kĩthaa baatĩnnĩ natẽ, ikiyyia õcõõ Aĩthaĩ ceremua cĩk Ethau cĩk ahimit Yokobĩ ẽẽ, ngaatĩ agatanĩ ĩnõõnõ athĩ ne, “Õngõlĩ doolec cannie ẽmmẽdẽ õgõõn kĩ bõõnõ cĩ agatan Makayyioiti.
28 Anyĩk woccia kaanyi Nyekuci tammu, kĩĩ katĩ kukula mana cunnie jurrung. Anyĩk ĩnõõnõ kaanyi dainit kĩ mẽrtẽ kũdũt cobbi õrrõt!
29 Anyĩk woccia eet cĩk loociok nĩĩko kiticatothihi aniitia, ĩthõng akatit kuthungti nguuma cunni. Anyĩk Nyekuc kaanyi ĩthĩ makayyioit cĩ gotoonogu vẽlẽk. Anyĩk ĩnõõgõ kakatit kuthungti nguuma cunni. Anyĩk Nyekuc kagatan eet cĩk agatanni aniitia, ĩthõng ĩcĩĩn eet cĩk aciinni aniitia.”
Ala Ethau Aĩthak gatan
30 Ma balna ngĩ ẽdẽcak Aĩthaĩ gatan cĩnnĩ ẽẽ, ĩtĩnga Yokobĩ ũũwa. Ma baa ngaanĩ ĩngathĩ nẽ thõng, õbõda kẽnnẽ Ethau lĩha wũ balna õkõyyĩ nẽ ẽẽ.
31 Ngaatĩ aku aaĩ nẽ buu kelegit cĩ ayaha wo, ĩthõng ayawothĩk baatĩnnĩ, ĩthõng ethek ne, “Papa, tĩnga dak kelegit coo kayahai na wo, kĩĩ katĩ gatananĩ.”
32 Ẽdẽcĩ kẽnnẽ baatĩnnẽ Aĩthaĩ ethei ne, “Ngẽnẽ naboo niia?”
Ĩthõng ẽdẽc Ethau baatĩnnĩ ethek ne, “Aneeta Ethau, ngeruni wũ ẽẽn abuu.”
33 Ngaatĩ abarriti Aĩthaĩ õrrõt, ĩthõng ijin ngẽrĩnĩ ethek ne, “Ngẽnẽ kette wũ viyyio ayahaca kelegit ngato? Kadaha na kelegit nĩcẽ viyyio nga ijjia niia, ĩthõng kagatana na ĩnõõnõ vẽlẽk, agatanni katĩ nẽ kũdũt.”
34 Ma balna ngĩ athĩrar Ethau thõõth coo wo, utulu õrrõt ẽgẽrẽny wuciitha, ĩthõng ethek baatĩnnĩ ne, “Papa, gatana thĩ bõng thẽk aneeta buu baang.”
35 Ĩthõng thĩ, ẽdẽcĩ kẽnnẽ baatĩnnẽ ethei ne, “Ĩgõõla gotonu, ĩthõng ũũwĩ gatan cunni.”
36 Ẽdẽcĩ Ethau ethei ne, “Ĩgõõla yoko nẽ aneeta ĩthĩ ngõnana ramma, edeemothi thara cĩgĩnnẽk cĩk athĩ Yokob wo.a Agamana nẽ balna nõ ĩcĩ owu makathĩt cĩ kẽnnẽ abuu, ma thĩ wanĩco yoko, agamaha gataninit cannĩ.” Ĩthõng ijin Ethau baatĩnnĩ ethek ne, “Athii niia cĩ ngaanĩ ayahi gatan ĩmma cĩ ngaanĩ athuunicia niia?”
37 Ẽdẽc Aĩthaĩ Ethau ethek ne, “Kaanyĩha viyyio thẽk na ĩnõõnõ kĩĩ makayyioit cunni vẽlẽk, ĩthõng kaanyĩha tionniok cĩgĩnĩk vẽlẽk kĩĩtõ ticcianniok cĩgĩnĩk. Kagatanaha labĩ buu kĩ mẽrtẽ. Ithii gii cĩ woccia ngaanĩ kaanyi aniitia tõ ngẽrnanĩ!”
38 Õbõdẽcĩ Ethau naboo athĩ ne, “Papa, ayahi gõõ niia gataninit codoi doo? Gatana bõng thẽk aneeta buu.” Ngaatĩ thĩ baa alue Ethau õrrõt.
39 Ngaatĩ aduwacĩ baatĩnnẽ ĩnõõnõ ẽthẽcĩ ne, “Rẽẽn katĩ kõrõõgĩ cunnie looca ĩcĩ abũnnanĩ tõdõwa, ngatĩ kothii tammu cĩ aku tammuatiddina.
40 Amũda katĩ gõõ niia dainit cunni vẽlẽk jora, ĩthõng thĩ, ĩthĩ ticciannioit cĩ gotononu. Ĩthõng katĩ ma ngĩ idiimu niia ũtũngewu ĩnõõnõ, uungni thẽk katĩ niia ĩnõõnõ.”
Ũũk Yokobĩ õlõõ cĩ malõtĩnnĩ
41 Ma baa natẽ, aaburek Ethau Yokob, nyatarka thõõth cĩ agatanĩ baatĩnnẽ Yokob ẽẽ. Amuk balna Ethau athĩ ne, “Õbõwẽ kõr cĩ katĩ adaaknĩ baangĩ, ma katĩ ngĩ edecciay ulua, karui thẽk katĩ na gõtõna cannĩ Yokob.”
42 Ma balna ngĩ athĩrar Rẽbẽka thõõth cĩ atuui Ethau Yokob ẽẽ, ikiyyia ũtũvvũ nẽ Yokob, ĩthõng ethek ne, “Adiim gotonu Ethau ngĩ arukci aniitia.
43 Thĩk yoko thõõth cĩ kaduwaci na wo jurrung, bĩt õlõõ ĩcĩ gõtõnõna Labanĩ, õlõõ ĩcĩ gaalawu cĩ Haranĩ.
44 Bĩt nõõnõ õõt ũrũmtẽ kĩ ĩnõõnõ kĩdĩĩc gii ngĩ alal thĩnĩn cĩ gotononu.
45 Ĩthõng ma ngĩ ĩnĩnga avaracici gotonu aniitia, ĩthõng ũtũngek thõõth wũ baa adĩmaneei niia ĩnõõnõ ẽẽ, kitiona katĩ na et ĩmma kikiyyia kõbõdai aniitia. Nyia woccia gõõ katĩ cĩ katdukẽcẽ na lõgõõ cĩk ẽẽn ramma vẽlẽk tuu kõr codoi wo?”
46 Ngaatĩ ẽthẽcĩ Rẽbẽka maac cĩnnĩ Aĩthak ne, “Omoththie thĩnĩn cannie thõõth cĩ ngaay cĩk ẽẽn Hiiti cĩk looc coo wo, õrrõt. Ĩthõng ma ngĩ atik Yokobĩ buu ngaa codoi ngaanẽy ĩcĩkkõ, kadiimi woccia kadaai na.”