Aĩthak kĩ Abimẽlẽk
26
Aavĩ balna butuny ĩmma cobbi õrrõt cĩ õwõbẽcĩ wũ balna ĩcĩ owu wathinniowẽy wũk balna Abrahamĩ. Ngaatĩ õkõyyĩ Aĩthaĩ ĩcĩ Abimẽlẽĩ alaan cĩ eet cĩk Vilithia ngatĩ athĩ Gẽrar.
2 Ma natẽ, ilibak Makayyioiti Aĩthak, ĩthõng ethek ne, “Nyĩ õkkõ Ijiba, avvu looca ĩcĩ ketheci na ne, aavue wo.
3 Avvu nõõnõ looca ĩcoo, ĩthõng kathunni katĩ na aniitia, ĩthõng kagatanina. Kaanyi katĩ na aniitia kĩ dõõlĩ cugunik vẽlẽk looc coo, ĩthõng katĩ kũthũtẽ thõõth wũ balna kabũtaneei na baaba Abraham.
4 Kaanyi katĩ na dõõlĩ cugunik kivitia kĩĩtõ mẽẽlĩ õrrõt kaavutõ kĩ mũnyũnya cĩk tammutiddinak, ĩthõng katĩ kaanyĩha ĩnõõgõ looc coo vẽlẽk. Ĩthõng amũda katĩ eeta cĩk loociowu vẽlẽk gataninit, dõõlẽnĩy cĩk dõõlĩ cĩk dõõlĩ cugunik,
5 nyatarka balna athĩkna Abrahamĩ aneeta, ĩthõng ũthũũtĩ tĩrĩthẽntiok kĩ ngirantiok cĩganĩk vẽlẽk.”
6 Ngaatĩ abaaĩ Aĩthaĩ Gẽrara.
7 Ma balna ngĩ ajin eeta cĩk nginicẽ ĩnõõnõ thõõth cĩ ngaa cĩnnĩ wo, ẽdẽcĩ kẽnnẽ nẽ ĩnõõgõ ethei ne, “Ẽẽn coo ngõõna,” nyatarka balna ongollie nẽ ngatĩ aduwacĩ ĩnõõgõ ẽthẽcĩ ne, “Ẽẽn nẽ ngaa cannĩ.” Amuk balna nẽ athĩ ne, “Arukca katĩ eeta cĩk ngittio, nyatarka dihimitin cĩ Rẽbẽka.”
8 Ma balna ngĩ aavu Aĩthaĩ natẽ kuumuc, ẽdẽnya Abimẽlẽĩ alaanĩ cĩ Vilithia Aĩthak kĩ Rẽbẽka bẽlẽtha cĩnnĩ ngatĩ awumi nẽ ngaa cĩnnĩ mĩnana.
9 Ma natẽ, ũtũvvũ Abimẽlẽĩ Aĩthak, ĩthõng ethek ne, “Monogo ẽẽn Rẽbẽka ngaa cunni? Ĩthõng thĩ, da ennehet ne, ẽẽn nẽ ngoonu nyia?”
Ẽdẽcĩ Aĩthaĩ ĩnõõnõ ethei ne, “Kongollie balna na kathĩ ne, arukcangũ katĩ, ĩthõng kĩĩ ootti ngaa cannĩ wo.”
10 Ẽdẽcĩ Abimẽlẽĩ ethei ne, “Nyia yoko thẽk coo cĩ adĩmanecet niia ageeta wo? Yoko thẽk baalia mĩ kataguthõ eeti ĩmma kĩ ngaa cunni, ayahacet woyyia niia ageeta thõõth cĩ gerthe.”
11 Ngaatĩ irionĩcẽ alaanĩ eet cĩgĩnĩk ẽthẽcĩ ne, “Mĩ uwum eeti ĩmma et coo, kõdẽ ngaa cĩnnĩ, aruwue katĩ nẽ kadaak.”
12 Ma natẽ, ẽẽv Aĩthaĩ mana natẽ erkit nĩcẽ, ngaatĩ abiirni mana cĩnnẽ õrrõt, ĩthõng ẽtẽda labĩ ngõnana eet tur, nyatarka balna agatan Makayyioiti ĩnõõnõ.
13 Ma natẽ, ikiyyia balna ĩthĩ Aĩthaĩ et cĩ aballie õrrõt, ĩthõng ikiyyia ĩthĩ nẽ et cĩ abulie õrrõt.
14 Abal balna nẽ athaa kĩ tĩĩn cĩk meelĩk õrrõt, ĩthõng ĩĩtõ mẽẽlĩ ticcianniowa buu õrrõt. Ma natẽ, ililiyiek balna eeta cĩk Vilithia balinit cĩnnĩ.
15 Ngaatĩ avvu aarĩcẽ eeta cĩk Vilithia taaha duwwuẽn vẽlẽk, wũk balna adawa ticcianniowa cĩk baatĩ Aĩthaĩ baa nga arũgĩ Abrahamĩ.
16 Ma balna natẽ, ikiyyia uduwak Abimẽlẽĩ Aĩthak ethek ne, “Tũngek looc cĩnang wo, nyatarka ikiyyia naboo niia ĩthĩ tiir ĩcĩnang õrrõt.”
17 Ngaatĩ ũũngnĩcẽ Aĩthaĩ looc nĩcẽ, ĩthõng ũũk abaak toloowa cĩ Gẽrarĩ.
18 Ma balna ngĩ õkkõ acĩn nẽ duwwo wũ balna adawa baatĩnnẽ ẽẽ, arubothi kẽnnẽ ĩdĩtanit eeta cĩk Vilithia. Ngaatĩ adawanĩ naboo, ĩthõng akatek thaaryiok wũk baa akaneei baatĩnnẽ.
19 Ma toloowa cĩ abaaĩ Aĩthaĩ ẽẽ, ivitia adayyia ticcianniowa cĩgĩnnẽk duwwo cĩ arik nyarrata ĩcĩ callĩ maama,
20 ĩthõng ivitia ẽgẽrẽnycõy tũwayyiowa cĩk Gẽrarĩ kĩ tũwayyiok cĩk Aĩthaĩ duwwo nĩcẽ. Athĩ nẽẽgẽ ne, “Maam cĩgaak.” Ngaatĩ akanẽcĩ Aĩthaĩ duwwo nĩcẽ athĩnnĩ ne, Ẽthẽk,a nyatarka ẽgẽrẽnyõy nẽẽgẽ kĩ ĩnõõnõ, nyatarka duwwo.
21 Ma natẽ, adayyia ticcianniowa cĩk Aĩthaĩ duwwo ĩmma naboo, ĩthõng ivitia ẽgẽrẽnycõy eeta neekie kĩ ĩnõõnõ naboo, ngaatĩ akanẽcĩ Aĩthaĩ duwwo nĩcẽ thar cĩk a ne, Thĩtna.b
22 Ma natẽ, uluuk Aĩthaĩ, ĩthõng ũũk adawa duwwo ĩmma naboo. Ĩthĩnga wanĩco ẽgẽrẽnyõnĩ tũwayyiowa neekie duwwo nĩcẽ naboo. Ngaatĩ akanẽcĩ duwwo nĩcẽ thar cĩk athĩ Rehoboth.c Ĩthõng ĩthĩ ne, “Anyet Makayyioiti ngĩtĩ abũnna cĩ kabaaĩ jurrung.”
23 Ma natẽ, ĩtĩnga Aĩthaĩ ũũk ngatĩ athĩ Beertheba.
24 Ma baalin nĩcẽ, ikiyyia ilibak Makayyioiti ĩnõõnõ, ĩthõng ethek ne, “Keeni na Nyekuc cĩ baaba Abrahamĩ. Nyĩ ongollie, kathunni katĩ na aniitia, ĩthõng kagatanina, ĩthõng kaanyi dõõlĩ cĩk meelĩk, nyatarka thõõth wũ balna kaduwai na ticciannioit cannĩ Abraham.”
25 Ma natẽ, etengenyek Aĩthaĩ ngĩtĩ todongintio Makayyioit, ĩthõng ala ĩnõõnõ. Ĩthõng kĩĩ kẽtẽngẽny tuggu, ĩthõng thĩ, ẽtẽrẽktaĩ ticcianniowa cĩgĩnnẽk adayyia duwwo.
Ganõn cĩ Aĩthaĩ kĩ Abimẽlẽk
26 Ma baa kõr ĩmma, ĩtĩnga Abimẽlẽĩ Gẽrara, kĩ Ahuthath cĩ baa ẽẽn tirithioit cĩnnĩ kĩ Vikol cĩ ẽẽn gaalinit cobbi cĩ nyĩcẽkẽr cĩk Abimẽlẽĩ õõt ĩcĩnĩt Aĩthak.
27 Ngaatĩ ajini Aĩthaĩ ĩnõõgõ ẽthẽcĩ ne, “Avvunecangũ te niigia aneeta nyia? Ma balna ngĩ aaburneccangũ, ĩthõng itingkayyiangũ looca cunung?”
28 Ẽdẽcĩ Abimẽlẽĩ kĩ eet cĩgĩnĩk wo athĩ ne, “Kagayyia naaga dĩdĩ aavĩ Makayyioiti ĩcunni, ĩthõng kadiim naaga ngĩ kayak ngẽrẽmngẽrẽm cĩ ganono kĩ aniitia,
29 kĩĩ katĩ athii niia cĩ adĩmannet ageeta buth naboo kĩ baa ngĩ athii cĩ kadĩmanni naaga aniitia buth. Kuungnici balna naaga aniitia tĩnga jurrung looca cĩnang. Ĩthõng balna agatanni aniitia Makayyioiti buu bĩt jurrung.”
30 Ma thĩ balna natẽ, arĩhĩ Aĩthaĩ ĩnõõgõ peyian, ngaatĩ aduwẽẽnĩ, ĩthõng uwuddie jurrung.
31 Ma ngerenniet ngaanĩ pĩny, ĩdĩmanit nẽẽgẽ ngẽrẽmngẽrẽm kõdõwẽ. Ngaatĩ ĩthaawĩcẽ Aĩthaĩ ĩnõõgõ gõõl kõõt nẽẽgẽ jurrung, ĩthõng ũtũngtek nẽẽgẽ buu ĩnõõnõ kaavu jurrung.
32 Ma kõr nĩcẽ, ivitia uduktiak ticcianniowa cĩk Aĩthaĩ ĩnõõnõ entek ne, “Kijioktaha maam duwwua wũ balna kadawana.”
33 Ikiyyia akatek Aĩthaĩ duwwo nĩcẽ thar cĩk athĩ, Thiba.d Ĩthõng gõõl cĩ balna aku akanõthĩcẽ kõrõõk cĩ gaalawu Beertheba thara cĩkkõ kĩĩ kõr coo wo nẽẽn.
Ngaay cĩk Ethau cĩk ẽẽn mõdẽẽna