Itik Abrahamĩ Ketura
25
Ma balna ikiyyia itik Abrahamĩ naboo ngaa ĩmma cĩ athĩ thar Ketura,
2 ĩthõng ivitia itiryia nẽẽgẽ lõgõõ cĩk maacĩk cĩk ẽẽn tõrkõnõm cĩk athĩ thar cĩgĩk Thĩmran, Jokthan, Medan, Midian, Ithbak kĩ Thuaa.
3 Ẽẽn balna Jokthanĩ baatĩ õõ Thẽbaa kĩ Dedan. Ẽẽn cĩkkõ dõõlĩ cĩk dõõlĩ cĩk Dedanĩ eet cĩk Athuri, Letuthi kĩ cĩk Leummi.
4 Ĩthõng ẽẽn balna lõgõõ cĩk maacĩk cĩk Midianĩ tur, cĩk athĩ Ẽvva, Ẽvẽr, Hẽnõc, Abida kĩ Eldaa. Ẽẽn balna cĩkkõ vẽlẽk lõgõõ cĩk lõgõõ cĩk Ketura.
5 Aduwa balna Abrahamĩ athĩ ne, abarĩc katĩ Aĩthaĩ kaal cĩgĩnĩk vẽlẽk.
6 Ĩthõng thĩ, balna nga arũgĩ Abrahamĩ, aanyĩk balna nẽ kaal cĩgĩnĩk õõgĩ lõgõõ cĩk maacĩk kĩ ngaay cĩgĩnĩk, ĩthõng itionĩk ĩnõõgõ kõõt tõõna ĩcĩ alibanĩ kõrra, kĩĩtõ rẽẽntĩ kĩ ngẽrĩnĩ Aĩthak.
Daaĩth cĩ Abrahamĩ
7 Ma balna natẽ, ikiyyia adaak Abrahamĩ baa ngĩĩ erkinya cĩgĩnnẽk eet tur kĩ eet iyyio kõmmõtõ kĩ tur (175).
8 Adaaĩ balna nẽ baa ngĩ atangany odowuay tdutduk, ĩthõng ũũk nẽ ũrũmtẽ kĩ eet cĩgĩnĩk cĩk adaaitõ.
9 Ivitia adaacõ Aĩthaĩ kĩ Ĩthĩmaĩl ĩnõõnõ ngiloma cĩ Makpẽla ngatĩ õbõwõy kĩ Mamrẽ, mana wũ balna Evronĩ ngẽrtĩ Thoharĩ wũ balna ẽẽn et cĩ Hiiti.
10 Mana wũ balna ũũta Abrahamĩ kĩ eet cĩk Hiiti neccie. Ivitia adaacõ nẽẽgẽ Abraham nginiwa wũ balna adawini ngaa cĩnnẽ Thaara.
11 Ma balna ngĩ adaak Abrahamĩ, ikiyyia agatan Nyekuci Aĩthak, ngaatĩ aku aarĩcẽ Aĩthaĩ kõrõõk cĩnnĩ ngatĩ õbõwõy kĩ duwwo cĩ Beer Lahai Roi.
Tatũk cĩ Ĩthĩmaĩlĩ
12 Ẽẽn balna Ĩthĩmaĩlĩ ngẽrtĩ Abrahamĩ cĩ balna arittia Hagarĩ, ngaa wũ balna ẽẽn nyakapanait cĩ Thaara. Ayaha balna Thaara Hagar Ijiba.
13 Ẽẽn balna lõgõõ cĩk Ĩthĩmaĩlĩ õmmõtõ kĩ ramma. Athĩ cĩ owu Nebaioth, ĩthõng ĩĩtõ cĩk õwõbẽcĩ Kedar, Adbeel, Mibtham,
14 Mithma, Duma, Matha,
15 Hadad, Tema, Jetur, Navith, kĩ Kedema.
16 Thaaryiok cĩk lõgõõ cĩk Ĩthĩmaĩlĩ wo balna cĩkkõ. Avvu baa nẽẽgẽ agam kabicõnĩnẽ cĩk ẽẽn õmmõtõ kĩ ramma, cĩ balna akanothi thaaryiowa cĩgĩk koo kabicõnĩnẽ cĩgĩk.
17 Adaaĩ baa Ĩthĩmaĩlĩ baa ngĩ ĩĩtõ erkinya cĩgĩnnẽk eet tur kĩ etĩmma kõmmõtõ kĩ tũrgẽrẽm (137), ĩthõng ũũk nẽ ũrũmtẽ kĩ eet cĩgĩnĩk cĩk adaaitõ.
18 Abaak balna doolia cĩk dõõlĩ cĩk Ĩthĩmaĩlĩ kõrgẽna cĩ looc cĩ Havila kĩ Thur, ngatĩ õbõwõy kĩ Ijib gõõla cĩ õkkõ Athuri. Abaak balna nẽẽgẽ uukõy kĩ gõtõõnõgĩ cĩgĩk vẽlẽk.
Yokob kĩ Ethau
19 Ẽẽn coo, tatũk cĩ Aĩthaĩ ngẽrtĩ Abrahamĩ.
20 Balna ngĩ ĩĩtõ erkinya cĩk Aĩthaĩ eet ramma, ikiyyia itik nẽ Rẽbẽka bũwẽnyĩ Bethuele, cĩ baa aku Paddan Arama looca cĩ Aramĩ, ĩthõng ẽẽn baa Rẽbẽka ngõõnĩ Laban.
21 Alawini balna Aĩthaĩ Rẽbẽka ĩcĩ Makayyiokto, nyatarka balna athii ĩnõõnõ doolia tõ. Ma balna nẽnnẽ ĩthĩrar Makayyioiti lawinit cĩ Aĩthaĩ ẽẽ, ngaatĩ thĩ baa aku anyaini Rẽbẽka.
22 Balna nga kutuuwuay Rẽbẽka, aga balna nẽ ngatĩ ayahĩ kĩballĩ, nyatarka balna athĩrar nẽ ngatĩ uukõnẽ kĩballĩ neekie kẽẽngatõ. Ngaatĩ amui Rẽbẽka athĩ ne, “Nyia kikiyyia thõõth cĩ õgõõn ketee wo?” Ma natẽ, ũũk ala nẽ Makayyioit, nyatarka thõõth coo.
23 Ĩthõng ẽdẽc Makayyioiti ĩnõõnõ ethei ne,
“Ayahi niia eet ramma kẽẽngatõ cunni,
cĩk katĩ ẽẽn meelitin cĩ eetu goolliok ramma,
ĩthõng ẽgẽrẽnyõy tĩna.
Tiir katĩ meelitini codoi ijiar ĩmma,
ĩthõng aticanothi katĩ logoo cobbi gõtõnĩ cĩ dĩcĩ.”
24 Ma baa ngĩ arawak kõr cĩ ũũkcanẽ nẽ dõõlĩ nĩĩkẽ ẽẽ, ikiyyia itirria nẽ lõgõõ cĩk maacĩk cĩk ẽẽn kĩballĩ.
25 Merik balna logoo cĩ owu, ĩthõng õlõ ẽlẽ kutugu kĩ atheetĩ. Ngaatĩ akanẽcĩ nẽẽgẽ thar cĩk athĩ Ethau.a
26 Ĩthõng utuwuay gotonia cĩ dĩcĩ cĩ vurtio agam gõtõnĩ cĩ owu wo ginyginyoc, ngaatĩ thĩ akanõthĩcẽ thara cĩk athĩ Yokob.b Ẽẽn balna erkinya cĩk Aĩthaĩ eet iyyio, balna ngĩ arittia Rẽbẽka ĩnõõgõ.
Ũtũwa Ethau dainit
27 Ma balna ngĩ ivitia itilithia lõgõõ neekie, ikiyyia Ethau ĩthĩ ngĩthorowoc cĩ aga lĩwõ kĩ gõõl cĩ õkõyyĩ bõõnatõ õrrõt. Ĩthõng balna ẽẽn Yokobĩ et cĩ ativanni cĩ alna õlõõ kaganoko.
28 Amĩnan baa Aĩthaĩ Ethau, nyatarka amĩnan nẽ ngatĩ adaĩ kiding cĩ bõõnõ cĩ alĩha Ethau. Amĩnan balna Rẽbẽka Yokob.
29 Ma kõr ĩmma, aak Yokobĩ adẽth, ĩthõng aku kẽnnẽ balna Ethau lĩha apĩrna, ĩthõng adak boobo ĩnõõnõ buu õrrõt.
30 Ngaatĩ ẽthẽcĩ nẽ Yokob ne, “Adaha boobo õrrõt, anya baai adẽth cĩk merihik õõgĩ kuduk.” Ĩnõõnõ cĩ akanõthĩcẽ ĩnõõnõ thara cĩk athĩ Ẽdõmc wo.
31 Ĩthõng thĩ, ẽdẽcĩ kẽnnẽ Yokobĩ gõtõnĩ ethei ne, “Anya nõõnõ niia makathĩt cunni cĩ ẽnnẽ logoo cĩ owu wo.”
32 Ĩthõng thĩ, ẽdẽcĩ Ethau ethei ne, “Cĩn da, kõbõwẽ na kadaaha, ĩthõng nga katĩ kadaẽ na makathĩt cannĩ wo nyia?”
33 Ẽdẽcĩ Yokobĩ Ethau ethei ne, “Bũtan nõõnõ niia ĩthĩ ne, anya katĩ niia makathĩt cunni aneeta.” Ngaatĩ abũtanĩ Ethau, ĩthõng anyĩk makathĩt cĩnnĩ Yokob.
34 Ma natẽ, anyĩk Yokobĩ Ethau ahat cĩ avaadiay kĩ adẽth. Ma natẽ, uduwõy Ethau, ĩthõng ũwũd maam ngaatĩ ĩngannĩ õkõyyĩ. Athii balna cĩ alnai Ethau makathĩt cĩnnĩ cĩ ẽnnẽ logoo cĩ owu ẽẽ, õrrõt.