Daaĩth cĩ Thaara
23
Arũgĩ balna Thaara kuumuc kõdõlanit erkinya cĩgĩnnẽk kĩĩtõ eet tur kĩ etĩmma kĩ tũrgẽrẽm (127),
2 ĩthõng ikiyyia adaak looca cĩ Kananĩ, õlõõ cĩ gaalawu cĩ athĩ Kiriath Arba cĩ yoko athĩ Hẽbõrõn ẽẽ. Ngaatĩ alue Abrahamĩ thõõth cĩ daaĩth cĩ ngaa cĩnnĩ wo õrrõt.
3 Ma natẽ, ĩtĩnga Abrahamĩ baa nga kadawẽ ngaa cĩnnẽ, ĩthõng othoothiõy kĩ baajigi loocu, cĩk athĩ Hiiti ethek ne,
4 “Keeni na modeenit ngato kaganoko, anycangũ looc ĩmma kũtũ, kĩĩ katĩ kadawĩ ngaa cannĩ.”
5 Ẽdẽcĩ eeta cĩk Hiiti wo Abraham ethei ne,
6 “Makayyioit, thihet da nõ ageeta, eeni niia et cobbi kõrgẽna cĩnang. Daa nẽnnẽ niia ngaa cunni ngatĩ adiimi niinia. Athii eeti cĩ woccia ĩcacci aniitia ngatĩ amũtẽẽ ngaa cunni tõ.”
7 Ngaatĩ ululi Abrahamĩ õõ cĩnnĩ nguuma cĩ eet cĩk Hiiti ẽẽ.
8 Ĩthõng ethek ĩnõõgõ ne, “Mĩ elemtu ngatĩ kadawẽ na ngaa cannĩ ngato, alayyiehangu baai nuun Evron ngẽrtĩ Thoharĩ,
9 kaanya kũtũwa ngilom cĩ Makpẽla, cĩ aturna mana cĩnnĩ ẽẽ. Uduktiak kaanya kũtũ mana cĩnnĩ vẽlẽk kẽbẽrẽnĩy cuguk ngato, kĩĩ katĩ cannĩ kũdũt, kadawĩ katĩ gõõ na eet cĩganĩk.”
10 Aavĩ balna Evronĩ loota kõrgẽna cĩ eet cĩk Hiiti ẽẽ, katũga cobbi cĩ kõrõõk cĩ gaalawu, ĩthõng ẽdẽc nẽ Abraham kẽbẽrẽnĩy ĩcĩk eetu vẽlẽk ethek ne,
11 “Athii cĩ õgõõn kĩyokowẽ makayyioit cannĩ, kaanyi katĩ na nginicẽ vẽlẽk kĩ ngilom buu kaganoko kẽbẽrẽnĩy ĩcĩk eet cĩganĩk koo vẽlẽk, kĩĩ katĩ mũtĩ ngaa cunni.”
12 Ma natẽ, ulul Abrahamĩ õõ nguumtẽnẽy cĩk baajigi loocu,
13 ĩthõng othoothĩk nẽ Evron kõrgẽna cĩ eet nĩĩkẽ vẽlẽk ethek ne, “Thĩrara da yoko nõõnõ, mĩ elemacia nginicẽ dĩdĩ, anya kũtũ thõng, athii woccia cĩ kõkõyyẽ kaganoko. Lẽm thẽk noko, kĩĩ katĩ kada ngaa cannĩ.”
14 Ẽdẽcĩ Evronĩ ethei ne,
15 “Makayyioit cannĩ, nyia cĩ omothinie õrrõt wo? Adak ngineccio nyarobinya cĩk ẽẽn thĩĩk cĩk athĩ kathalkathal eet etĩmma (400). Nyia woccia kẽpẽkantõĩ naaga thõõth cĩ nyarobinyawu wo? Bĩt nẽnnẽ niia daa ngaa cunni.”
16 Ngaatĩ ẽlẽmĩ Abrahamĩ thõõth cĩ Evronĩ wo, ĩthõng ekeebĩk ĩnõõnõ thĩĩk cĩk athĩ kathalkathal cĩk ẽẽn eet etĩmma (400) nguumtẽnẽy cĩk eet cĩk Hiiti, gõõla cĩ gõõ ẽlẽbthanĩ taaliowa kĩ baa ngĩ aduwa Evronĩ kõrgẽna cĩ meelitino ẽẽ.
17 Gõõl cĩ balna aku õkõyyĩ Abrahamĩ mana cĩ Evronĩ, kĩ ngilom, kĩ kẽẽn wũk balna aatĩ ngatĩ athĩ Makpẽla ngatĩ õbõwõy kĩ Mamrẽ wo coo.
18 Ma balna ivitia agaacõ eeta cĩk Hiiti vẽlẽk cĩk balna aatĩ ngatĩ õbõwõy kĩ katũk cobbi cĩ kõrõõk cĩ gaalawu, athĩ ne, ĩthĩ mana cĩ Abrahamĩ.