Ĩtĩman Nyekuci Abraham
22
Ma baa vurtia cĩ wathinniok õõgĩ, ikiyyia ũtũvvũ Nyekuci Abraham, ĩthõng ĩtĩman ethek ne, “Abraham!” Ẽdẽc Abrahamĩ athĩ ne, “Ẽẽ! Aneeta coo!”
2 Ma natẽ, uduwak Nyekuci Abraham ethek ne, “Bĩtĩ ngeruni Aĩthak, cĩ odoi doo, cĩ amĩnani õrrõt wo ngatĩ athĩ Mõõrẽa, ĩthõng apaheha aneeta kĩĩ gii cĩ cavĩto, ĩthõng avadĩhanĩ. Bĩt pak ĩnõõnõ thiira ĩcĩ katĩ kõkkõ keyeleci nana.”
3 Ma baa ngerethietĩn cĩnnĩ ngaanĩ pĩny, ikiyyia apak Abrahamĩ rĩmma cĩk woccia awũpan ngatĩ avaadĩ gii cĩ cavĩto, ĩthõng ecebek thigirieca ngaatĩ õvõyyĩ nẽẽgẽ kĩ ticcianniok cĩgĩnĩk ramma kĩ ngẽrĩnĩ cĩnnĩ Aĩthak. Ĩthõng ũũk nginiwa wũ balna aduwaai Nyekuci ĩnõõnõ.
4 Ma vurtia cĩ wathinniok iyyio, ikiyyia ẽdẽnya Abrahamĩ nginicẽ rẽẽna.
5 Ngaatĩ ẽthẽcĩ Abrahamĩ ticcianniok cĩgĩnĩk wo ne, “Ereeyyiõĩ thigiriec ngato, nga kovvoyyia kalawina naaga kĩ logoo cannĩ wo, ĩthõng katĩ koboddiaha katĩna.”
6 Ma natẽ, anyĩk Abrahamĩ Aĩthak kõdõng rĩmma cĩk gii cĩ cavĩto ẽẽ, ĩthõng ayak nẽ kabath kĩ guo, ngaatĩ irioĩ nẽ kĩ ngẽrĩnĩ dõ,
7 ma natẽ, ethek Aĩthaĩ baatĩnnĩ ne, “Papa.” Ẽdẽcĩ Abrahamĩ athĩ ne, “Ẽẽ ngẽrnanĩ.”
Athĩ Aĩthaĩ ne, “Guo coo, ĩthõng rĩmma cĩkkõ, ĩthõng thĩ, atheet thĩ jaang cĩ kõvvõ kavaad kĩĩ gii cĩ cavĩto wo?”
8 Ẽdẽcĩ kẽnnẽ Abrahamĩ ngẽrĩnĩ ethei ne, “Anyet katĩ Nyekuci gii cĩ cavĩto cĩ kavaadĩ.”
Ngaatĩ õvõyyĩ ĩcĩ owu,
9 ma baa ngĩ õdõlanit nẽẽgẽ ngĩtĩ balna aduwa Nyekuci ẽẽ, ikiyyia ĩdĩmanek Abrahamĩ ngĩtĩ todongintio, ĩthõng ẽthẽdanẽk rĩmma tiddina. Ngaatĩ ẽcẽbĩ nẽ Aĩthak, ĩthõng atadĩk ĩnõõnõ rĩmmay tiddina ngatĩ todongintio.
10 Ĩthõng ĩdĩma nẽ kabath ĩthĩ ne, kucuwan ngẽrĩnĩ cĩnnĩ.
11 Ĩthõng thĩ, othoothĩk anjĩlõ cĩ Makayyiokto ĩnõõnõ tammuatiddina ethek ne, “Abraham! Abraham!”
Ẽdẽcĩ kẽnnẽ Abrahamĩ ĩnõõnõ ethei ne, “Ee, aneeta coo!”
12 Ĩthõng ethek anjĩlõ ĩnõõnõ ne, “Nyĩ arui doolec! Kagawa na ngatĩ ongolinie niia Nyekuc dĩdĩ, nyatarka athii cĩ ĩcacca niia ngeruni cĩ odoi wo.”
13 Ma baa ngĩ amuudi Abrahamĩ wo, acĩn kẽnnẽ mĩrkĩc cĩ aavĩ bõõnatõ cĩ agam kẽẽna otoo cĩgĩnĩk. Ma natẽ, ũũk utugura mĩrkĩc nĩcẽ, ĩthõng apaek Nyekuc kĩĩ gii cĩ cavĩto cĩ avaaddi, kabarĩc ngĩtĩ ngẽrĩnĩ cĩnnĩ ẽẽ.
14 Ngaatĩ akanẽcĩ Abrahamĩ nginicẽ thar cĩk athĩ ne, “Anya katĩ Makayyioiti.” Ĩthõng kĩĩ itin coo buu, nga õthõõth eeta athĩ ne, “Anyet katĩ Makayyioiti thiira cĩnnĩ.”
15 Ma natẽ, othoothĩk anjĩlõ cĩ Makayyiokto Abraham tammuatiddina naboo,
16 ĩthõng ethek ne, “Kabũtani thaarĩy ĩcĩganĩk, aneeta Makayyioit Nyekuc cĩ kothoothi wo, kagatanni katĩ na aniitia õrrõt, nyatarka thõõth cĩ athii cĩ ĩcacca ngeruni cunni cĩ odoi doo wo.
17 Kagatanni katĩ thẽk yoko na aniitia, kaanyi katĩ na dõõlĩ cĩk meelĩk õrrõt cĩk katĩ ẽẽn kĩ mũnyũny cĩk tammutiddin, kõdẽ cĩk meelĩk cĩk ẽẽn kĩ kathaac cĩk aatĩ titimma cĩ bũlũco. Ijiar katĩ doolia cugunniek mĩrõk, ĩthõng agamit nẽẽgẽ korookjiok cĩk gaalawu cĩk mĩrõk cĩgĩk.
18 Ĩthõng nyatarka athĩkna niia aneeta, amũda katĩ eeta cĩk loociowu vẽlẽk gataninit dõõlẽnĩy ĩcĩk dõõlĩ cĩk dõõlĩ cugunik.”
19 Ma natẽ, ikiyyia imiirothĩk Abrahamĩ ticcianniok cĩgĩnĩk, ĩthõng imiiryie õõt õlõõ cĩ Abrahamĩ Beerthebatẽy.
Lõgõõ cĩk Nahõrĩ
20 Ma baa vurtia cĩ wathinniok õõgĩ, ikiyyia ĩthĩrar Abrahamĩ ngĩ athĩ ne, itiwõõy gotonia Nahõrĩ buu. Athĩ balna ngaa cĩnnĩ Milka, ĩthõng baa ayak nẽẽgẽ lõgõõ cĩk maacĩk.
21 Athĩ balna cĩ owu Uth, ĩthõng balna athĩ gõtõnĩ ĩmma Buuth, ĩthõng athĩ ĩmma Kẽmũẽl. Ma balna ikiyyia ayak Kẽmũẽlĩ buu ngẽrĩnĩ cĩ athĩ Aram.
22 Ayak balna Nahõrĩ kĩ Milka lõgõõ cĩk maacĩk õõgĩ naboo cĩk athĩ Kethed, Hatho, Pildath, Jidlav kĩ Bethuele.
23 Ma balna ikiyyia itirria Bethuele buu bũweec cĩ athĩ Rẽbẽka. Ĩthõng thĩ, arittia balna Milka lõgõõ cĩk maacĩk cĩkkõ cĩk ẽẽn turgi ẽẽ, kĩ Nahõr gõtõnĩ Abrahamĩ.
24 Ayak balna Nahõrĩ ngaa cĩ dĩcĩ cĩ athĩ Reuma. Arittia baa nẽ kĩ ngaa coo buu lõgõõ cĩk maacĩk cĩk athĩ Teba, Gaham, Tahath kĩ Maca.