Itirriay Aĩthaĩ
21
Arĩcana balna Makayyioiti Thaara õrrõt, ngaatĩ adĩmanẽcĩ ĩnõõnõ thõõth wũ balna aduwa nẽnẽ.
2 Ĩthõng balna ikiyyia anyaawõy Thaara, ĩthõng ũtũwa ngẽrĩnĩ cĩnnĩ, baa thẽk ngĩ atangany Abrahamĩ õrrõt. Ĩthõng ĩdĩmantẽ thoothonniowa cĩkkõ itina wũ balna aduwacĩ Nyekuci ĩnõõnõ.
3 Ĩthõng balna akatek Abrahamĩ ngẽrĩnĩ cĩnnĩ cĩ arittia Thaara thar cĩk athĩ Aĩthak.a
4 Ma balna ngĩ ayak doolec wathinniok turgi, ikiyyia ẽtẽd baatĩnnẽ ẽlẽ cĩnnĩ kĩ balna ngĩ aduwaai Nyekuci ĩnõõnõ.
5 Ẽẽn balna erkinya cĩk Abrahamĩ eet tur, baa ngĩ arittia nẽẽgẽ Aĩthak.
6 Ma natẽ, õthõõth Thaara ĩthĩ ne, “Ayaha Nyekuci tarari cobbi õrrõt aneeta, ĩthõng eeta vẽlẽk cĩk athĩrar thõõth coo, karanna katĩ kĩ aneeta talintia.
7 Ngẽnẽ yoko balna ĩmma cĩ woccia ethei Abraham ne, ‘Ayak katĩ ngaa cunnie Thaara dõõlĩ cĩk õrõõktĩ?’ Cĩn da ngatĩ karitianẽ ngẽrĩnĩ baa ngĩ atangany nẽ.”
Itingka Abrahamĩ Hagar kĩ ngẽrĩnĩ
8 Ma balna ngĩ õtõ Aĩthaĩ, ĩthõng ĩthĩnga õrõõktĩ, ikiyyia arĩk baatĩnnẽ peyian cobbi õrrõt.
9 Ĩthõng thĩ, ma baa kõr cĩ peyiano ẽẽ, ikiyyia ĩcĩn Thaara ngatĩ adaacĩ Ĩthĩmaĩlĩ Aĩthak. Arittiai balna Hagarĩ Abraham ngẽrĩnĩ cĩnnĩ cĩ athĩ Ĩthĩmaĩl. Ẽẽn balna Hagarĩ Ijibenit.
10 Ngaatĩ ẽthẽcĩ Thaara Abraham ne, “Tingka nyakapanait nĩcẽ kĩ ngẽrĩnĩ vẽlẽk kõõt, nyatarka athii katĩ doolec cĩ ngaa nĩcẽ cĩ õthõl balinit cĩ katĩ abarĩc ngẽrnannie cannie Aĩthaĩ.”
11 Ĩthõng balna õngõngõ Abrahamĩ õrrõt, nyatarka balna ẽẽn Ĩthĩmaĩlĩ buu ngẽrĩnĩ cĩnnĩ.
12 Ma natẽ, othoothĩk Nyekuci Abraham ethek ne, “Nyĩ omoththie thõõth cĩ logoo coo kĩ nyakapanait cĩ ngayyi cunni wo, dĩman kĩ cĩ aduwaci Thaara wo, nyatarka aku katĩ Aĩthaĩ ẽẽn baatĩ dõõlĩ cĩk dõõlĩ cugunik wũk balna kaduwaci na.
13 Ĩthõng thĩ, nẽnnẽ thẽk kaanyi katĩ na buu ngẽrtĩ nyakapanait cĩ ngayyi wo, dõõlĩ cĩk meelĩk õrrõt, nyatarka ẽẽn nẽ buu ngeruni cunni.”
14 Ma balna ngerenniet ngaanĩ pĩny, ĩdĩma Abrahamĩ ahat kĩ deere cĩ abbĩththĩ maama, ĩthõng arĩhĩ nẽ Hagar kaal vẽlẽk gaavũanĩy cĩgĩnĩk kamaraak, ĩthõng anyĩk ĩnõõgõ kõõt. Ngaatĩ õvvõ ajalilẽnĩ nẽẽgẽ baatha ĩcĩ õdõõĩ kak ĩcĩ Beertheba.
15 Ma baa ngĩ edecciay maama deera, ikiyyia arĩk Hagarĩ ngẽrĩnĩ bõõnatõ.
16 Ĩthõng ũũk aavu nẽ kabanyca, ĩthõng õthõõth ĩthĩ ne, “Athii cĩ kadiimi kacini gõõl cĩ adaaknĩ doolec cannie.” Ma natẽ akatĩ ulua.
17 Ma natẽ, ĩthĩrar Nyekuci logoo cĩ maacĩ ngatĩ alue, ĩthõng othoothĩk anjĩlõ cĩ Nyekuco tammuatiddina ĩnõõnõ ethek ne, “Hagar, nyia cĩ gerthe? Nyĩ omoththie, ĩthĩrar Nyekuci logoo cunni ngatĩ alue ngatĩ aavẽ ẽẽ.
18 Tĩnga bĩt dõnga ĩnõõnõ athĩnẽy cugunik, kaanyi katĩ na ĩnõõnõ kĩĩ baatĩ eet cĩk looc cobbi.”
19 Ma natẽ eyelek Nyekuci Hagar duwwo, ngaatĩ õkkõ atĩlanẽ Hagarĩ maam deera kĩbbĩt, ĩthõng ayawothĩk logoo cĩnnĩ.
20 Athũnnĩ balna Nyekuci logoo coo kuumuc kĩĩ maka. Aavĩ balna nẽ bõõnatõ, ĩthõng ikiyyia ĩthĩ et cĩ aga lĩwõ nyarangĩtẽy õrrõt.
21 Ma baa nga aavĩ nẽ baatha ĩcĩ õdõõĩ kak ĩcĩ athĩ Paran, ikiyyia itihak yaatĩnnẽ bũweec ĩmma cĩ aku looca cĩ Ijibi, ĩthõng anyĩk ĩnõõnõ kĩĩ ngaa cĩnnĩ.
Ngẽrẽmngẽrẽm cĩ Abrahamĩ kĩ Abimẽlẽk
22 Ma baa wathinniowẽy nĩĩkẽ, ivitia irioit Abimẽlẽĩ kĩ Vikol gaalinit cobbi cĩ nyĩcẽkẽr cĩgĩnĩk, ĩthõng õõt entek Abraham ne, “Ẽẽn dĩdĩ, elli aniitia Nyekuci kaalĩy vẽlẽk ĩcĩk aticani niia.
23 Ĩthõng yoko kõr coo, bũtan niia ngato nguuma cĩ Nyekuco, kĩĩ katĩ athii cĩ ĩgõõlla aneeta kĩ dõõlĩ cĩganĩk, kõdẽ dõõlĩ cĩk dõõlĩ cĩganĩk vẽlẽk. Eeni niia modeenit looca ĩcoo, ĩthõng thĩ yoko, dĩmanet niia buu ageeta jurrung, kĩ balna ngĩ kadĩmanni na aniitia jurrung.”
24 Ẽdẽcĩ Abrahamĩ ĩnõõnõ ethei ne, “Kũbũtana dĩdĩ.”
25 Ma natẽ, ikiyyia uduwak Abrahamĩ Abimẽlẽk thõõth cĩ agamanĩ ticcianniowa cĩgĩnnẽk duwwo cĩ adawuay ĩmma.
26 Ĩthõng thĩ, ẽdẽcĩ kẽnnẽ Abimẽlẽĩ athĩ ne, “Nga kĩthĩrar thõõth nĩcẽ, ngẽnẽ woccia balna cĩ atican thõõth cĩ õgõõn ketee wo? Ĩthõng nga duwahanĩ, kõr yoko kẽnnẽ cĩ kathĩknẽ na wo coo.”
27 Ma natẽ, anyĩk Abrahamĩ Abimẽlẽk athaa kĩ tĩĩna, ĩthõng ivitia adait Abrahamĩ kĩ ĩnõõnõ ngẽrẽmngẽrẽm.
28 Ma vurtia cĩnnĩ, ẽngẽra Abrahamĩ thibenua cĩk ẽẽn tũrgẽrẽm, ĩthõng arĩk ĩnõõgõ kabanyca,
29 ngaatĩ ajini Abimẽlẽĩ ĩnõõnõ ẽthẽcĩ ne, “Adĩmani kĩyokowẽ nyia?”
30 Ẽdẽcĩ Abrahamĩ athĩ ne, “Bĩtĩ thibenua cĩkkõ, cĩk ẽẽn tũrgẽrẽm, kĩĩ katĩ kĩĩ nẽẽgẽ yelinit cĩ agawẽ niia athĩ ne, aneeta cĩ balna kadawa duwwo coo.”
31 Ma nẽnnẽ balna ũtũvvẽcõ eeta nginicẽ athĩ ne, Beertheba,b nyatarka ẽẽn ngittio ngĩtĩ balna abũtanõnĩ eeta cĩkkõ cĩk ẽẽn ramma wo.
32 Ma vurtia cĩ ĩdĩmantĩ nẽẽgẽ ngẽrẽmngẽrẽm Beerthebatẽy vẽlẽk, ĩtĩngathõ Abimẽlẽĩ kĩ Vikol imiiryie õõt ĩcĩ olu looca cĩ athĩ Vilithia.
33 Ma natẽ, ikiyyia akat Abrahamĩ motoongec Beerthebatẽy, ĩthõng ĩdĩhĩth Makayyioit Nyekuc cĩ alna kũdũt natẽ.
34 Ngaatĩ aku aavẽ Abrahamĩ looca cĩ Vilithia erkinya cĩk meelĩk õrrõt.