Abraham kĩ Abimẽlẽk
20
Ma balna uluuk Abrahamĩ ũũk ĩcĩ baath cĩ Nẽgẽvĩ ĩcĩ diinu, ĩthõng ũũk abaak kõrgẽna cĩ Kadẽthĩ kĩ Thur. Ma vurtia cĩnnĩ, ikiyyia ũũk ngatĩ athĩ Gẽrar,
2 ma natẽ, ĩgõõl Abrahamĩ eet natẽ ethek ne, “Ẽẽn Thaara ngõõna.” Ngaatĩ itionĩ Abimẽlẽĩ alaanĩ cĩ Gẽrarĩ eet kõõt kayakta ĩnõõnõ Thaara.
3 Ma baalin ĩmma, ilibak Nyekuci Abimẽlẽk ngonothintia, ĩthõng ethek ne, “Ĩthĩ niia et cĩ adaawu vẽlẽk, nyatarka thõõth cĩ õkõyyẽ niia ngaa cĩ eeto.”
4 Ĩthõng kẽnnẽ ngaanĩ kataguthõ Abimẽlẽĩ balna kĩ Thaara, ngaatĩ ẽthẽcĩ nẽ Nyekuc ne, “Makayyioit, arui woccia thẽk niia eet cĩk abũnna õrrõt?
5 Ma balna ngĩ aduwacca Abrahamĩ aneeta athĩ ne, ‘Ẽẽn Thaara ngõõna cannĩ,’ ĩthõng ẽdẽc Thaara buu athĩ ne, ‘Ẽẽn nẽ gõtõna’? Ĩthõng yoko kamiri na, ĩthõng ngaanĩ kĩdĩman thõõth cĩ gerthe buu.”
6 Ngaatĩ ẽdẽcĩ Nyekuci ĩnõõnõ ngonothintia ẽthẽcĩ ne, “Ii, kagga na amiri niia, ĩnõõnõ cĩ kathunni na aniitia, kĩĩ katĩ athii cĩ adĩmanẽ gerthetin, ĩthõng athii woccia cĩ kaanyi wum Thaara.
7 Ĩthõng yoko, bõdẽẽĩ niia Abraham ngaa cĩnnĩ, nyatarka ẽẽn nẽ et cĩ õthõõth molook cĩ Nyekuco.a Alawini katĩ nẽ aniitia, kĩĩ katĩ athii cĩ adaai. Ĩthõng thĩ, mĩ athii cĩ õbõdẽcẽ ngaa coo maac cĩnnĩ, kaduwacina, adaai katĩ niia kĩ eet cugunik vẽlẽk!”
8 Ma balna ngerethietĩn nĩcẽ, ũtũvvũwa Abimẽlẽĩ gaala cĩgĩnĩk vẽlẽk, ĩthõng uduwak ĩnõõgõ thõõth coo. Ma baa ngĩ athĩrar nẽẽgẽ thõõth coo wo, ivitia otongollie õrrõt.
9 Ma natẽ, ũtũvvũ Abimẽlẽĩ Abraham, ĩthõng ijin ethek ne, “Nyia cĩ adĩmanecet niia ageeta wo? Nyia da cĩ kĩdĩmanei na aniitia cĩ gerthe õrrõt oo? Ayahaca niia thõõth cĩ gerthe aneeta wo.
10 Nyia thẽk dĩmanehet thõõth cĩ õgõõn ketee wo?”
11 Ẽdẽcĩ Abrahamĩ ĩnõõnõ ethei ne, “Kamui balna na kathĩ ne, ‘Athii eeti ĩmma ngato cĩ ongollie Nyekuc tõ, arukca katĩ nẽẽgẽ aneeta kĩĩ kayahit ngaa cannĩ wo.’
12 Ĩthõng dĩdĩ, ẽẽn ngaa coo ngõõna, nyatarka odoi baangĩ, ĩthõng ẽẽn õõ yaangĩ nyigar, ĩthõng balna kitiha na ĩnõõnõ.
13 Ma balna ngĩ itionana aneeta Nyekuci kũtũngek kõrõõk cĩ baangĩ, kaduwai balna na ngaa cannĩ kennei ne, ‘Ma ngĩ amĩnanna, duwak eet vẽlẽk vatĩkẽy cĩk kõvvõyyĩ ethek ne, keeni na gotonu.’ ”
14 Ngaatĩ õbõdẽcĩ Abimẽlẽĩ Abraham ngaa cĩnnĩ Thaara, ĩthõng naboo anyĩk ĩnõõnõ athaa kĩ tĩĩn kĩ nyakapanak cĩk ngayyik kĩ cĩk maacĩk,
15 ĩthõng ĩthĩ Abimẽlẽĩ ne, “Looc cannĩ coo ngato vẽlẽk, baak ngatĩ adiimi niinia.”
16 Ĩthõng uduwak nẽ Thaara ethek ne, “Kaanyĩha na gotonu Abraham nyarobinya cĩk ẽẽn thĩĩk cĩk athĩ kathalkathal cĩk ẽẽn vucciak codoi (1,000). Ẽẽn coo yelinit cĩ ẽyẽla athĩ ne, ithii thõõth ĩmma cĩ gerthe kõrgẽna cĩnac kĩ aniitia tõ.”
17 Ngaatĩ alawini Abrahamĩ, ĩthõng anyĩk Nyekuci Abimẽlẽk kũbũna, ĩthõng anyĩk Nyekuci ĩnõõnõ kĩ ngaa cĩnnĩ kĩ nyakapanak cĩk ngayyik vẽlẽk, kũbũnta, ĩthõng anyĩk ĩnõõgõ kayait dõõlĩ naboo,
18 nyatarka aanyĩk balna Makayyioiti ngaay cĩk kõrõõk cĩ Abimẽlẽĩ, kĩ nyakapanak cĩk ngayyik vẽlẽk kithiic cĩ anyaini, nyatarka thõõth cĩ adĩmanẽcĩ nẽ Thaara ngaa cĩ Abrahamĩ.