Ũtũũthẽ Thõdõmĩ kĩ Gõmõra
19
Ma balna jiatĩn nĩcẽ, ivitia anjĩlẽta wũk balna ẽẽn ramma õlõõ cĩ gaalawu ĩcĩ Thõdõmĩ, ĩthõng õõt umuddiothĩk Lõõt aavĩ ngatĩ õbõwõy kĩ katũk cobbi cĩ kõrõõk cĩ gaalawu. Ĩthõng ma baa ngĩ acĩn Lõõtĩ ĩnõõgõ wo, ĩtĩnga iyiwothĩk ĩnõõgõ, ĩthõng ulul õõwa,
2 ĩthõng othoothĩk ĩnõõgõ ethek ne, “Makayyiok cĩganĩk, ivitia baai kõõt õlõõ cannĩ, kĩĩ katĩ kĩdĩmanewung dainit cĩ dĩcĩ. Õõt thẽk ũtũũnyca thoo, ĩthõng ataguththu, ĩthõng thẽk katĩ icintu gõõl cĩ ovvoyyu lootha ngerenniet ngaanĩ pĩny.”
Ẽdẽcĩ anjĩlẽta neekie ethei ne, “Athiitõ, kooginna katĩ naaga ngatĩvõrĩ nginiwa wũ gõõ ayuwuthi eeta.”
3 Ĩthõng thĩ, ĩlalek Lõõtĩ ĩnõõgõ kuumuc kelemit thõõth cĩnnĩ, ngaatĩ irioĩ õvõyyĩ ĩcĩ olu. Ma natẽ, ĩdĩmana Lõõtĩ dainit kĩ ahat cĩ avaadiay cĩ kothii nyĩgĩt ĩmma noko, ĩthõng anyĩk ĩnõõgõ kuduit.
4 Ma balna nganĩ kõõt nẽẽgẽ kĩnyaaĩy, ivitia ĩlĩkta eeta vẽlẽk cĩk nyaatĩk kĩ lõgõõ cĩk kĩdĩk vẽlẽk cĩk Thõdõmĩ ciith cĩ Lõõtĩ,
5 ĩthõng ũtũvvẽcõ Lõõt, ĩthõng ijinit entek ne, “Aatĩ eeta wũk avvu kõrõõk cunni wo ngatdang? Yahaet ĩnõõgõ ngatĩvõrĩ ngato kĩĩ karyia kĩĩtõ ngaay cĩgaak.”
6 Ma baa ngĩ athĩrar Lõõtĩ wo, ĩtĩnga ẽtẽha ngĩtĩvõrĩ, ĩthõng ũnyũk katũk,
7 ĩthõng ethek ĩnõõgõ ne, “Lõgõth, kamanicung baai thõng, nyĩ adĩmannu thõõth cĩ gerthe cĩ õgõõn noko!
8 Ĩthĩrarit da yoko nõõnõ, kayai na dõõ cĩganĩk ramma cĩk ngaanĩ kataguthõ kĩ eet kũdũt, nyẽ thẽk kayahawung ĩnõõgõ, ĩthõng ĩdĩmantu gii cĩ adiimnyu wo. Nyĩ adĩmanecangũ eet cĩkkõ buth, ẽẽn eeta cĩkkõ kerenniok cĩganĩk, kadiimi thẽk kathũnnẽ ĩnõõgõ.”
9 Ẽdẽcĩ kẽnnẽ eeta neekie ĩnõõnõ ethei ne, “Nyẽhẽ gõõla cĩnang! Eeni nõ niia modeenit kaganoko, aniitia yoko thẽk ngẽnẽ cĩ woccia aduwacet ageeta gii cĩ woccia thẽk kadĩmanna wo? Tũngehet ageeta mĩn. Mĩ athii cĩ athĩknẽ kadĩmanni yoko katĩ aniitia buth kijiar ĩnõõgõ.” Ma natẽ, iyiottik eeta neekie Lõõt kabanyca, ngaatĩ adiim alib katũk cĩ ciitho.
10 Ma natẽ, utugurit kerenniowa Lõõt ootti ciiatõ, ĩthõng ũnyũgĩtõ katũk.
11 Ma natẽ noko, aanycĩk nẽẽgẽ eet vẽlẽk cĩk adiim ĩnõõgõ wo kĩĩtõ rubẽnẽ, eet cĩk nyaatĩk kĩ ngĩthõrõk, kĩĩ katĩ athii cĩ acĩn gõõl cĩ aavẽ katũk buu.
Ũtũngek Lõõtĩ Thõdõm
12 Ma natẽ, uduktiak anjĩlẽta neekie Lõõt entek ne, “Mĩ ayahi tionniok cugunik õlõõ cĩ gaalawu ngato, kaawũnya, lõgõõ cĩk maacĩk kĩ dõõlĩ cĩk ngayyik kĩ eet õõgĩ cugunik, duwak ĩnõõgõ kõõt.
13 Itionanet ageeta Makayyioiti kivitiaha kututhia kõrõõk cĩ gaalawu coo, nyatarka ĩthĩrar nẽ ngatĩ gẽrthẽ thoothiowa cĩk atican eeta cĩkkõ wo õrrõt.”
14 Ngaatĩ õkkõ aduwacĩ Lõõtĩ lõgõõ cĩk balna adiim ngĩ atik dõõ cĩgĩnĩk wo, ẽthẽcĩ ne, “Ĩtĩngath ngato tamanoko, idiim Makayyioiti akatĩ kõrõõk cĩ gaalawu coo guo!” Ahad kẽnnẽ nẽẽgẽ athĩ ne, amĩcĩ Lõõtĩ kĩ ĩnõõgõ thõng.
15 Ma balna ngaanĩ ngerethietĩna, angarngaranit anjĩlẽta Lõõt entek ne, “Bĩtĩ ngaa kĩ dõõlĩ cugunik vẽlẽk tamanoko ngatĩvõrĩ cĩ kõrõõk cĩ gaalawu, kĩĩ katĩ athii cĩ atuuthenu katĩ ngĩ ũtũũthẽ kõrõõgĩ cĩ gaalawu.”
16 Amũdaai balna õyõkõn Lõõtĩ looc noko, ngaatĩ agamĩ anjĩlẽta athiit cĩnnĩ, athiit cĩ ngaa cĩnnĩ, kĩ athĩn cĩk dõõ cĩgĩnĩk, ĩthõng ootti ĩnõõgõ ngatĩvõrĩ ĩcĩ kõrõõk cĩ gaalawu, nyatarka balna amanni Makayyioiti ĩnõõgõ.
17 Ma baa ngĩ õdõlanit nẽẽgẽ ngĩtĩvõrĩ cĩ kõrõõk cĩ gaalawu, uduwak anjĩlõ ĩmma ĩnõõgõ ethek ne, “Ivirit thõng, õõt ulugunycie, ĩthõng nyĩ amuudenu, kõdẽ nyĩ abilnu ngamanĩ looria kũdũt! Ivirit thẽk edecciek thiiryiowẽy tiddina, kĩĩ katĩ athii cĩ arumonu kĩ daaĩth.”
18 Ẽdẽcĩ kẽnnẽ Lõõtĩ ĩnõõgõ ethei ne, “Makayyiok cĩganĩk, athiitõ, nyĩ adĩmannangũ kĩyokowẽ.
19 Kĩ yoko eyeliawu tamati cunung ngatĩ athunniangũ aneeta ticciannioit cunung kuumuc ngato wo, rẽẽntĩ thiiryiowa neekie õrrõt, kadaai kẽnnẽ katĩ ngaanĩ kõdõlan nginicẽ.
20 Aavĩ kõrõõgĩ cĩ gaalawu ĩmma cĩ dĩcĩ natẽ, anycangũ da aneeta koottia kĩ eet cĩk kõrõõk cannĩ wo natẽ. Athii cĩ acĩnnu niigia ngĩtĩ dĩcĩ? Ĩthõng thĩ, eliay rũgẽtĩ cĩnang natẽ.”
21 Ẽdẽcĩ anjĩlõ ethei ne, “Ii, kĩthĩrara thõõth cunni wo, athii katĩ na cĩ kathaani kõrõõk cĩ gaalawu nĩcẽ.
22 Ĩthõng thĩ, vir tamanoko! Athii katĩ na cĩ kadĩmani thõõth ĩmma gii ngĩ õdõlantu niigia nginicẽ.” Ĩnõõnõ thĩ cĩ athĩ thar cĩk kõrõõk cĩ gaalawu cĩ dĩcĩ coo ne, Thõar, nyatarka athĩ ne, ngĩtĩ dĩcĩ.
23 Ngaatĩ õkkõ õdõlanĩ Lõõtĩ Thõar ngerenniet baa ngĩ iliba kõrra.
24 Ma natẽ, itiona Makayyioiti guo cĩ aaburi patdahac tammuatiddina kũtũth Thõdõm kĩ Gõmõra.
25 Ngaatĩ athaanĩ nẽ korookjiok cĩk gaalawu kĩ korookjiok cĩk eetu, kẽẽna, kartẽ vẽlẽk cĩk aatĩ toloowa nĩcẽ buu kĩĩ lõõcĩ ĩĩr.
26 Ma baa ngĩ õwõ nẽẽgẽ ẽẽ, aavu ngaa cĩ Lõõtĩ, ĩthõng ummudie ĩcĩn vurut, ngaatĩ ũũkcẽnẽ ẽlẽ cĩnnẽ kĩĩ balang kutugu kĩ kõrtõnĩ.
27 Ma ngerethietĩn cĩnnĩ, ĩtĩnga Abrahamĩ imiirie ũũk nginiwa wũ balna õthõõthõnẽ nẽ kĩ Makayyioit.
28 Ma balna ngĩ acĩn nẽ tolook cĩ Thõdõmĩ kĩ cĩ Gõmõra, acĩn kẽnnẽ burrut cobbi õrrõt cĩ ĩngathĩ loota kaavu kĩ burruti cĩ nyekiteto.
Lõõt kĩ dõõ cĩgĩnĩk
29 Ma baa ngĩ, athaan Nyekuci korookjiok cĩk gaalawu cĩk obbitik toloowa wũ balna aavẽ Lõõtĩ, ikiyyia ahada Nyekuci thõõth wũ balna õthõõthõnẽ nẽ kĩ Abraham, ĩthõng ikiyyia ẽẽla nẽ Lõõt thoothonniowẽy cĩk athaanĩ nẽ looc ẽẽ.
30 Ongollie balna Lõõtĩ ngatĩ aavẽ Thõara õrrõt, ngaatĩ ĩngannĩ kĩ dõõ cĩgĩnĩk cĩk ẽẽn ramma, ĩthõng õõt otodit thiiryiok, ĩthõng õõt abaaitõ ngiloma.
31 Ma kõr ĩmma, ĩtĩnga doo cobbi, ĩthõng ethek ngõõnĩ cĩ dĩcĩ ne, “Atangany yoko baangietĩ cĩnac, ĩthõng athii eeti ĩmma looca nĩco cĩ woccia atikcet ageeta, kĩĩ katĩ kitiryia dõõlĩ tõ.
32 Ijjia kõõt kalabtek baangiet mẽrtẽ cĩ vĩnõwo, ĩthõng kõõt kataguthõ kĩ ĩnõõnõ, kĩĩ katĩ ngĩ ĩbaaẽ nẽ kitirraet dõõlĩ.”
33 Ma baalin nĩcẽ, ĩdĩmta nẽẽgẽ mẽrtẽ, ĩthõng aanycĩk baatĩnnĩ kũwũd. Ma balna mĩ awũd baatĩnnẽ mẽrtẽ ẽẽ, ĩtĩnga bũwanyĩnẽ cobbi wo, ĩthõng ũũk ataguuthõ kĩ baatĩnnĩ. Athii balna baatĩnnẽ cĩ aga thõõth coo kũdũt.
34 Ma ngerethietĩn cĩnnĩ, uduwak bũwanyĩnẽ cobbi wo ngõõnĩ ethek ne, “Kataguthia viyyio na kĩ baangiet waabal, ĩthõng yoko, kõõt kalabtek ĩnõõnõ mẽrtẽ tijjia kĩbaaẽ naboo, ĩthõng ataguththu kĩ aniitia buu, kĩĩ katĩ kitirraet dõõlĩ cĩk katĩ ẽẽn kẽgẽrõ cĩk kõrõõk cĩnac.”
35 Ma jiatĩn nĩcẽ alabtẽk nẽẽgẽ baatĩnnĩ mẽrtẽ naboo, ma baa mĩ awũd baatĩnnẽ mẽrtẽ ẽẽ, ĩtĩnga bũwanyĩnẽ cĩ dĩcĩ wo buu ũũk ataguuthõ kĩ baatĩnnĩ. Athii baa baatĩnnẽ cĩ aga thõõth coo kũdũt.
36 Ngaatĩ avvu anyaini doolia cĩk Lõõtĩ gõõla cĩ oginnie kĩ baatĩnnĩ ẽẽ.
37 Ma balna ngĩ ikiyyia itirria bũwanyĩnẽ cobbi doolec cĩ maacĩ, ikiyyia akatek nẽ thar cĩk athĩ Mõab.a Ĩthõng ẽẽn Mõabĩ baatĩ dõõlĩ cĩk dõõlĩ cĩ eet cĩk athĩ Mõab.
38 Ĩthõng ikiyyia itirria bũwanyĩnẽ cĩ dĩcĩ wo buu doolec cĩ maacĩ buu, ĩthõng akatek nẽ thar cĩk athĩ Ben Ammõnĩ.b Ẽẽn Ben Ammõnĩ baatĩ eet cĩk Ammõnĩ cĩk yoko wo.