Ilibtiak kerenniowa iyyio Abraham
18
Ilibak balna Makayyioiti Nyekuci Abraham tuggwa cĩnnĩ, kẽẽnĩy ĩcĩk Mamrẽĩ baa ngĩ aavĩ kõr tiddina. Aavĩ balna nẽ ngatĩ õbõwõy kĩ katũk cĩ tuggwo, nyatarka amũdaai aaburi kõr, kõr nĩcẽ õrrõt.
2 Ma balna ngĩ amuudi Abrahamĩ wo, acĩn kẽnnẽ eet iyyio abĩlĩ kabanyca natẽ. Ma baa ngĩ acĩn nẽ ĩnõõgõ wo, ĩtĩnga nẽ tuggwa ivirothĩk ĩnõõgõ, ĩthõng akatek kuthungti,
3 ĩthõng ethek nẽ ne, “Ma ngĩ kũmũda na talinit kẽbẽrẽnĩy ĩcugunik, makayyioit cannĩ, nyĩ edececu kaganoko, abũnna õrrõt ngatĩ ayuwuthu kĩdĩĩc õlõõ cannĩ, kĩĩ katĩ kaanyung dainit.
4 Anyĩk da nõ kayaktiawung maama cĩk ũũnyanu thoo, ĩthõng uyuwuththu kẽẽta coo vurtia kĩdĩĩc.
5 Anycangũ da nõõnõ kayahawung gimma cĩ dĩcĩ adait, kĩĩ katĩ kaanyung tiirthẽt cĩ ovvoyyu, kĩ yoko ngĩ avvunnu niigia acĩnnangũ aneeta wo.”
Ngaatĩ ẽthẽcĩ nẽẽgẽ ĩnõõnõ ne, “Ibalallẽ, dĩman kĩcĩ aduwa niia wo.”
6 Ma natẽ, iyik Abrahamĩ ũũk ittio tuggu, ĩthõng ethek ngaa cĩnnĩ Thaara ne, “Dĩma tũkan cobbi, ĩthõng ongonyu, ĩthõng ĩdĩmana ahat cĩ avaadiay tamanoko.”
7 Ma naboo natẽ, ivir nẽ ũũk ngatĩ aatẽ kaala, ĩthõng ẽbẽra moolet cĩ adĩhĩ õrrõt, ĩthõng anyĩk tũwayyioit kucuwanek, ĩthõng ahĩhĩ kerenniok nĩĩkẽ tamanoko.
8 Ma balna ngĩ ĩdĩmanek dainit vẽlẽk, ikiyyia ayaha ir cĩk amũcarĩ kĩ cĩk callĩk kĩ kiding cĩ avaaddi, ĩthõng ayawothĩk kerenniok nĩĩkẽ. Kĩĩ kĩbĩl nẽ kẽẽta vurtia natẽ baa ngĩ aduwue kerenniowa.
9 Ma natẽ, ijinit nẽẽgẽ Abraham ennei ne, “Aavĩ ngaa cunnie Thaara ngatdang?”
Ẽdẽcĩ Abrahamĩ ethei ne, “Ĩnõõnõ neccie aavĩ tuggwa ẽẽ.”
10 Ĩthõng õthõõth Makayyioiti ĩthĩ ne, “Kõkkõ katĩ kõbõda na erkit cĩ gõlla itin cĩ õgõõn kĩ coo, kamũdai katĩ ngaa cunni Thaara ũtũwa logoo cĩ maacĩ.”
Athĩrar balna Thaara buu thõõth coo, nyatarka balna aavĩ nẽ katũga cĩ tuggwo ĩcĩ bowuc cĩ Abrahamĩ.
11 Amũdaai balna atanganyitõ Abrahamĩ kĩ Thaara, ĩthõng õõt erkinya cĩk woccia aritianĩ Thaara doolec.
12 Ma natẽ, atarar Thaara mĩn ethek ẽlẽ cĩnnĩ ne, “Yoko naaga kĩ maac cannĩ katanganyca kaganoko wo, nganĩ woccia thẽk karitana doolec?”
13 Ngaatĩ ajini Makayyioiti Abraham ẽthẽcĩ ne, “Nyia Thaara katarar õrrõt kĩthĩ ne, ‘Woccia thẽk na kir ngaanĩ kanyakcie ngaa cĩ katanganya wo?’
14 Aavĩ woccia thẽk gii ĩmma cĩ amaacĩ Makayyioit tõ? Kõbõda katĩ na erkit cĩ gõlla kõr cĩ aavĩ kĩ coo, kũmũdaha katĩ na Thaara ayak logoo cĩ maacĩ.”
15 Õtõngõlẽ balna Thaara õrrõt ngatĩ õvõlõngẽcĩ Makayyioit ẽnnẽcĩ ne, “Ngaanĩ katararũ.” Ĩthõng ẽdẽc Makayyioiti ethek ne, “Ii, viyyio thẽk atararu.”
Ĩlalek Abrahamĩ Makayyioit
16 Ma balna ngĩ edecciak eeta cĩkkõ dainit, ivitia ĩtĩngathõ, ĩthõng ẽdẽnyca tõõn cĩ Thõdõmĩ, ĩthõng õtõõthõ nẽẽgẽ kĩ Abraham, kĩĩ katĩ kitionĩk nẽ ĩnõõgõ gõõla.
17 Ĩthõng umuk Makayyioiti ĩthĩ ne, “Kamigẽẽnẽ koccia na Abraham thõõth cĩ katĩ kõkkõ kadĩmani nana?
18 Aku katĩ Abrahamĩ ẽẽn baatĩ looc cĩ eet cĩk muotĩk, ĩthõng ubulie õrrõt. Kagatani katĩ na eet loociowẽy vẽlẽk, nyatarka ĩnõõnõ.
19 Nyatarka balna kẽbẽra na ĩnõõnõ, kĩĩ katĩ keyelek dõõlĩ cĩgĩnĩk kĩ dõõlĩ cĩk dõõlĩ cĩgĩnĩk, katĩ gõõ kĩthĩraritõ thõõth cĩ Makayyiokto, ĩthõng ĩdĩmanit thoothonniok cĩk abũnna. Ĩnõõnõ cĩ katĩ kadĩmanẽcẽ na Makayyioiti Abraham thoothonniok vẽlẽk wũk balna kaduwai na ĩnõõnõ.”
20 Ma natẽ, õthõõth Makayyioiti ĩthĩ ne, “Abraham, kĩthĩrara na ngatĩ adĩmanĩ eeta cĩk Thõdõmĩ kĩ cĩk Gõmõra thoothonniok cĩk gerthek õrrõt kũdũt.
21 Kadiimi yoko na ngĩ kõkkõ kacini nyemut cĩ gerthe cĩ kathĩkna wo, katĩ ma ngĩ ẽẽn dĩdĩ, ma ngĩ kothii, kadiimi ngĩ kagga.”
22 Ma natẽ, ĩtĩngathõ kerenniowa ramma õõt ĩcĩ Thõdõmĩ, ĩthõng aavutõ Abrahamĩ kĩ Makayyioit vurtia kĩdĩĩc.
23 Ngaatĩ avĩjawõthĩcẽ Abrahamĩ ĩnõõnõ, ĩthõng ijin ethek ne, “Õkkõ yoko thẽk niia arui eet cĩk ẽẽn gẽrẽthanniok kĩ eet cĩk abũnna õrrõt buu kõdõwẽ?
24 Ma ngĩ aatĩ eeta cĩk ẽẽn eet ramma kõmmõtõ cĩk amĩrĩ, athii woccia thẽk cĩ amanni eet õlõõ cĩ gaalawu vẽlẽk, nyatarka eet cĩk ẽẽn eet ramma kõmmõtõ cĩk abũnna õrrõt ẽẽ?
25 Ĩthõng dĩdĩ, athii woccia thẽk cĩ arui niia eet cĩk abũnna õrrõt kĩ gẽrẽthanniok kõdõwẽ. Aniitia loota ngato cĩ engeri thoothonniok jurrung cĩk looc vẽlẽk, adĩmani woccia niia eet cĩk amĩrĩ buth?”
26 Ẽdẽcĩ Makayyioiti ethei ne, “Mĩ kũwa na, ĩthõng kũmũdothĩha eet õõgĩ cĩk ẽẽn eet ramma kõmmõtõ cĩk abũnna õrrõt Thõdõma, kuungni katĩ na kõrõõk cĩ gaalawu vẽlẽk, nyatarka ĩnõõgõ.”
27 Ma natẽ, ĩlal Abrahamĩ naboo ĩthĩ ne, “Makayyioit, keeni na et looca coo kaganoko nyĩ aharnecanĩ, anya thẽk kijini naboo,
28 ma woccia katĩ ngĩ ẽẽn eeta, eet ramma kĩ tur cĩk abũnna õrrõt, nganĩ woccia katĩ atuuthi niia kõrõõk cĩ gaalawu noko?”
Ẽdẽcĩ Makayyioiti athĩ ne, “Mĩ kũmũda na eet cĩk ẽẽn eet ramma kĩ tur cĩk amĩrĩ, kuungni katĩ na kõrõõk cĩ gaalawu vẽlẽk, nyatarka ĩnõõgõ.”
29 Ẽdẽcĩ naboo Abrahamĩ athĩ ne, “Yoko mũdõthĩk eet cĩk amĩrĩ cĩk ẽẽn eet ramma dõ?”
Ẽdẽcĩ Makayyioiti athĩ ne, “Mĩ kamũdothi eet cĩk ẽẽn eet ramma cĩk amĩrĩ, athii woccia na cĩ katuthi kõrõõk cĩ gaalawu ẽẽ.”
30 Ngaatĩ ĩlalẽcĩ Abrahamĩ Makayyioit naboo ẽthẽcĩ ne, “Nyĩ thẽk aharnecanĩ ngatĩ katĩnganeci thõõth kũdũt, yoko thẽk mũdõthĩk eet cĩk ẽẽn etĩmma kõmmõtõ dõ?”
Ẽdẽcĩ Makayyioiti athĩ ne, “Mĩ kamũdothi eet cĩk ẽẽn etĩmma kõmmõtõ, athii woccia na cĩ katuthi kõrõõk cĩ gaalawu ẽẽ.”
31 Ĩthõng õthõõth Abrahamĩ naboo ĩthĩ ne, “Makayyioit, nyĩ thẽk aharneca thõõtha cĩ katĩnganeci wo, ma woccia thẽk mũdõthĩk eet cĩk ẽẽn etĩmma dõ?”
Ẽdẽcĩ Makayyioiti ethei ne, “Mĩ kamũdothi eet cĩk ẽẽn etĩmma thõng, athii woccia cĩ katuthi kõrõõk cĩ gaalawu ẽẽ.”
32 Ĩthõng ĩlalek Abrahamĩ ĩnõõnõ ethek ne, “Makayyioit cannĩ, nyĩ avaracĩcanĩ. Ma yoko thẽk mũdõthĩk eet cĩk ẽẽn õmmõtõ dõ?”
Ẽdẽcĩ Makayyioiti athĩ ne, “Ma ngĩ kamũdothi eet cĩk ẽẽn õmmõtõ dõ, kuungni woccia thẽk kõrõõk cĩ gaalawu vẽlẽk, nyatarka ĩnõõgõ.”
33 Ma balna ngĩ edecciak nẽẽgẽ ngatĩ õthõõthõnẽ, ĩtĩnga Makayyioiti ũũwa. Ĩthõng imiirie Abrahamĩ buu ũũk ĩcĩ kõrõõk cĩnnĩ.