Ngẽrẽmngẽrẽm cĩ teedinet cĩ eleetinu
17
Ma balna ngĩ õdõlanit erkinya cĩk Abramĩ ĩĩtõ eet wec kõmmõtõ kĩ tõrkõwẽc (99), ilibak Makayyioiti ĩnõõnõ, ĩthõng ethek ne, “Aneeta Nyekuc cĩ Tiiri cĩ Kijiari vẽlẽk cĩ kothoothici wo. Thĩrara aneeta, ĩthõng ĩdĩmanu thoothonniok cĩk abũnna dõõkĩthĩ.
2 Kathũnnẽ katĩ na ngẽrẽmngẽrẽm cannĩ kĩ aniitia, ĩthõng kĩtõõra dõõlĩ cugunik kĩĩtõ mẽẽlĩ õrrõt.”
3 Ngaatĩ akannĩ Abramĩ õõ looc, ĩthõng ethek Nyekuci ĩnõõnõ ne,
4 “Yoko kadait na kĩ aniitia ngẽrẽmngẽrẽm cannĩ wo, kaduwa na kathĩ ne, eeni katĩ niia baatĩ eet cĩk loociok cĩk meelĩk loota ngato.
5 Ĩthĩnga katĩ athinni aniitia Abram naboo, ĩĩ katĩ thar cugunik Abraham,a nyatarka kaanyi na aniitia ĩthĩ baatĩ loociok cĩk meelĩk loota ngato.
6 Kaanyi katĩ na aniitia dõõlĩ cĩk meelĩk õrrõt. Ĩthõng dõõlẽnĩy nĩĩkẽ, avvu katĩ alaanẽta cĩk agam loociok cĩk meelĩk õrrõt ĩcunni.
7 Kathũnnẽ katĩ na ngẽrẽmngẽrẽm cĩk kadak, kĩ aniitia, kĩ dõõlĩ cugunik, kĩ dõõlĩ cĩk dõõlĩ cugunik vẽlẽk erkinya, kĩ erkinya. Keeni katĩ na Nyekuc cunni, kĩ Nyekuc cĩ dõõlĩ cĩk dõõlĩ cugunik vurtia cunni buu.
8 Kaanyi katĩ na aniitia kĩ dõõlĩ cugunik looc cĩ Kananĩ cĩ yoko aavẽ niia wo kĩĩ cunung kũdũt. Keeni katĩ na Nyekuc cĩ dõõlĩ cĩ dõõlĩ cugunik.”
9 Ĩthõng ethek Nyekuci Abraham ne, “Thũũtĩ niia ngẽrẽmngẽrẽm cannĩ kĩ aniitia wo jurrung, ĩthõng naboo anyiwu dõõlĩ cugunik buu kĩ dõõlĩ cĩk katĩ avvu vurtia cĩnĩng vẽlẽk, kuthutti ngẽrẽmngẽrẽm coo kũdũt.
10 Ẽẽn coo ngẽrẽmngẽrẽm cannĩ kĩ aniitia kĩ dõõlĩ cugunik, kĩ dõõlĩ cĩk ngaanĩ katĩ arittiay erkinyiay vẽlẽk, tẽẽd eleeti cĩk dõõlĩ cĩk maacĩk kĩ eet cĩk maacĩk cĩk aatĩ õlõõ cunni vẽlẽk.
11 Ẽtẽrẽhanĩ kõr coo, adiim ngĩ eteddi eleeti cuguk vẽlẽk, ĩthõng katĩ ĩthĩ coo yelinit cĩ ngẽrẽmngẽrẽm cĩ kadak naaga kĩ agiitia wo.
12 Anyĩk dõõlĩ cĩk maacĩk vẽlẽk cĩk katĩ arittiay erkinyiay, keteddie katĩ ngĩ ayait wathinniok turgi vurtia cĩ tuwuanto, kĩ cĩk arittiay õlõõ cunni, kõdẽ cĩk uutiay nyarobinyay loociowẽy ĩcĩk kĩrẽẽng wũk athii cĩ ẽnnẽ dõõlĩ cugunik.
13 Adiim nyakapanak cĩk katĩ arittiay õlõõ cunni, kõdẽ cĩk uutiay loociowẽy buu keteddie eleeti cĩgĩk. Ẽẽn katĩ teedinetĩ cĩ eleeti cuguk wo yelinit cĩ ngẽrẽmngẽrẽm cĩ katĩ alna erkinya kĩ erkinya kũdũt.
14 Ĩthõng eeti ĩmma cĩ ngaanĩ kẽtẽdẽ ẽlẽ cĩnnẽ, ingkayyi katĩ nẽ kõrgẽna cunung, nyatarka abũrĩ nẽ ngẽrẽmngẽrẽm cannĩ wo.”
Akatek Nyekuci Tharaĩ thar cĩk athĩ Thaara
15 Ma natẽ, othoothĩk Nyekuci Abraham naboo ethek ne, “Ithianaĩ kõr coo, ĩthĩnga katĩ niia avvũ ngaa cunni wo athĩ ne, Tharaĩ naboo. Ĩĩtõ katĩ thar cĩgĩnĩk Thaara.
16 Kagatani katĩ na ĩnõõnõ kittiria doolec cĩ maacĩ, ĩthõng kagatana ĩnõõnõ kikiyyia kĩĩ yaatĩ eet cĩk loociok cĩk meelĩk loota ngato, avvu katĩ alaanẽta cĩk loociowu ĩcĩ Thaara.”
17 Ma natẽ, ululie Abrahamĩ kĩĩ katarar, ĩthõng ikidan ĩthĩ ẽla cĩnnĩ ne, “Yoko nõ na kayaha erkinya eet tur, ĩthõng karita woccia gõõ ngẽrnanĩ cannĩ kuu? Arittia woccia Thaara buu doolec ngaa cĩ ayak erkinya eet wec kõmmõtõ wo kuu?”
18 Ngaatĩ ẽthẽcĩ Abrahamĩ Nyekuc ne, “Anyĩk niia baai kũwũpan Ĩthĩmaĩlĩ dõ gatan cunni wo.”
19 Ẽdẽcĩ kẽnnẽ Nyekuci ethei ne, “Athii woccia cĩ õgõõn noko, arittia katĩ Thaara ngaa cunnie kir ngeruni cĩ katĩ akaneei thar cĩk athĩ Aĩthak. Kathũnnẽ katĩ na ngẽrẽmngẽrẽm cannĩ kĩ ĩnõõnõ kĩ dõõlĩ cĩk dõõlĩ cĩgĩnĩk vẽlẽk kũdũt.
20 Ĩthõng ma yoko kĩthĩrara na thõõth cunni wo, kagatani katĩ na Ĩthĩmaĩl buu, ĩthõng kaanyĩha ĩnõõnõ dõõlĩ cĩk meelĩk. Aku katĩ Ĩthĩmaĩlĩ ẽẽn baatĩ lõgõõ cĩk ẽẽn õmmõtõ kĩ ramma cĩk katĩ avvu ẽẽn alaanẽta. Kaanyi katĩ na dõõlĩ cĩgĩnĩk kĩĩtõ eet cĩk looc cĩ abulie.
21 Ĩthõng thĩ, kadĩmani katĩ na ngẽrẽmngẽrẽm cannĩ kĩ Aĩthak cĩ katĩ arittiaci Thaara wo. Arittiay katĩ Aĩthaĩ erkit cĩ gõlla.”
22 Ma balna ngĩ ẽdẽcak Nyekuci ngatĩ õthõõthõnẽ kĩ Abraham wo, ikiyyia ũtũngek nẽ Abraham natẽ.
23 Ma kõr nĩcẽ, ikiyyia ẽlẽm Abrahamĩ thõõth cĩ Nyekuco, ngaatĩ ẽtẽẽdĩ ngẽrĩnĩ cĩnnĩ Ĩthĩmaĩl kĩ lõgõõ cĩk maacĩk vẽlẽk cĩk aatĩ õlõõ cĩnnĩ, kĩ nyakapanak cĩk arittiay õlõõ cĩnnĩ, kĩ cĩk ũũta nẽ thõng buu.
24 Eteddi balna Abrahamĩ baa ngĩ ĩĩtõ erkinya cĩgĩnnẽk eet wec kõmmõtõ kĩ tõrkõwẽc,
25 ĩthõng balna ẽẽn ngẽrĩnẽ Ĩthĩmaĩlĩ buu erkinya cĩgĩnnẽk õmmõtõ kĩ iyyio.
26 Eteddi balna Abrahamĩ kĩ ngẽrĩnĩ Ĩthĩmaĩlĩ kõr codoi.
27 Ĩthõng balna eteddi eleeti cĩk eet vẽlẽk, cĩk maacĩk cĩk arittiay õlõõ cĩ Abrahamĩ, kĩ nyakapanak, kĩ cĩk balna uutiay loociowẽy, kĩ Abraham kõr codoi.