Itirriay Ĩthĩmaĩlĩ
16
Athii balna cĩ ayak Tharaĩ ngaa cĩ Abramĩ dõõlĩ. Ĩthõng thĩ, nẽnnẽ balna ayak ngaa cĩnnẽ nyakapanait cĩ ngayyi cĩ athĩ Hagar, cĩ baa ayaha nẽ Ijiba.
2 Ma balna kõr ĩmma, ũtũvvũwa Tharaĩ maac cĩnnĩ, ĩthõng ethek ne, “Kĩ yoko ngĩ abilnia aneeta Makayyioiti Nyekuci athii cĩ kayai dõõlĩ wo, ataguuth bõng thẽk kĩ nyakapanait cannĩ wo, kĩĩ katĩ kayak na dõõlĩ ĩcĩnnĩ.”
Ngaatĩ ẽlẽmĩ Abramĩ thõõth cĩ Tharaĩ wo, ĩthõng ẽlẽm Hagar kĩĩ ngaa cĩnnĩ.
3 Ma baa vurtia cĩ erkinya õmmõtõ balna ngĩ aavĩ Abramĩ looca cĩ Kananĩ, ĩdĩma Tharaĩ ngaa cĩ Abramĩ nyakapanait wĩnnĩ Hagar wũ ngayyi, wũ ẽẽn Ijibenit, ĩthõng anyĩk maac cĩnnĩ kitik kĩĩ ngaa cĩnnĩ.
4 Ngaatĩ arũmẽẽnĩ Abramĩ kĩ Hagar kuumuc kikiyyia kanyawõy nẽ.
Ma baa ngĩ acĩn nẽ ngatĩ anyaini wo, ikiyyia ẽbẽlbẽl õrrõt, ĩthõng engerenek nẽ Tharaĩ.
5 Ma natẽ, ethek Tharaĩ Abram ne, “Kaanyi balna na aniitia ũrũmtẽ kĩ Hagar, ma yoko ma ngĩ anyakcie wo, ikiyyia ẽngẽrẽn õrrõt, ĩthõng atararia aneeta. Aniitia thẽk cĩ amaaraca thõõth coo vẽlẽk koo. Anyĩk Makayyioit Nyekuc kũmũda ngẽnẽ cĩ ẽẽn gẽrẽthannioit aniitia, kõdẽ aneeta.”
6 Ẽdẽcĩ Abramĩ athĩ ne, “Ẽẽn nõ ngaa coo nyakapanait cunni, dĩmanek niia thẽk gii cĩ adiimi niia.” Ngaatĩ õgõrgõrranĩ Tharaĩ nyakapanait cĩnnĩ wo kuumuc, ĩthõng ivir Hagarĩ.
7 Ma natẽ, ikiyyia ijiowa anjĩlõ cĩ Makayyiokto Hagar ngatĩ õbõwõy kĩ duwwo baatha gõõla ĩcĩ õkkõ ngatĩ athĩ Thur.
8 Ĩthõng ijin anjĩlõ ĩnõõnõ ethek ne, “Hagar, ticciannioit cĩ Tharaĩ, akuni niia nga, ĩthõng õkkõ ngatdang?”
Ẽdẽcĩ Hagarĩ ethei ne, “Kaviri na ĩcĩ Tharaĩ eta wannĩ.”
9 Ĩthõng uduwak anjĩlõ cĩ Makayyiokto Hagar ethek ne, “Miirie bĩt õlõõ cĩ Tharaĩ, ĩthõng õtõngõlẽ ĩnõõnõ.
10 Kaanyi katĩ na aniitia dõõlĩ cĩk meelĩk õrrõt cĩk woccia athii cĩ ekebji nẽẽgẽ.”
11 Ma natẽ, uduwak anjĩlõ cĩ Makayyiokto ĩnõõnõ naboo ethek ne,
“Adingdingi yoko niia,
ũũkca katĩ niia logoo cĩ maacĩ.
Kateek katĩ ĩnõõnõ thar cĩk athĩ Ĩthĩmaĩl,a
nyatarka ĩthĩrar Makayyioiti canan cunni.
12 Aavĩ katĩ nẽ kĩ thigiriecĩ cĩ moutĩ.
Aaburneei katĩ gõõ nẽ eet cĩk looc nĩcẽ vẽlẽk,
ĩthõng aaburneei eeta buu ĩnõõnõ õrrõt.
Engeryie katĩ gõõ nẽ kĩ gõtõõnõgĩ.”
13 Ngaatĩ akanẽcĩ Hagarĩ Makayyioit wũ balna õthõõthõy kĩ ĩnõõnõ thar cĩk athĩ ne, “Eeni niia Nyekuc cĩ acĩnna aneeta. Kĩcĩna wanĩco Nyekuc cĩ acĩnna aneeta.”
14 Ĩnõõnõ thĩ yoko cĩ akanẽcĩ eeta duwwo nĩcẽ thar cĩk athĩ ne, Beer Lahai Roi,b ĩthõng aavĩ duwwua neccie kõrgẽna cĩ ngatĩ athĩ Kadẽth kĩ cĩ athĩ Bered kĩĩ kõr coo.