Ẽẽla Abramĩ Lõõt
14
Wathinniowẽy nĩĩkẽ ẽẽn balna Amrapelĩ alaan cĩ Thinaarĩ, ĩthõng Ariokĩ ẽẽn alaan cĩ Ẽllatharĩ, ĩthõng ẽẽn Kedorlaomerĩ alaan cĩ Elamĩ, ĩthõng ẽẽn Tidalĩ alaan cĩ Goiimi,
2 avvu balna alaanẽta cĩkkõ ẽẽn wec wo alũtẽ kõdõwẽ, ĩthõng aito jore cĩ uukõnẽ kĩ alaanẽt cĩk ẽẽn tur cĩk athĩ Bẽraa cĩ Thõdõmĩ, kĩ Birtha cĩ Gõmõra, kĩ Thĩnab cĩ Adma, kĩ Themeber cĩ Theboimi, ĩthõng kĩ alaan cĩ Bẽẽla. Athĩ thar õõgĩ cĩk Bẽẽla Thõar.
3 Ivitia balna alaanẽta cĩk ẽẽn tur wo, ũrũmĩt eleeti looria ĩcĩ Thiddimi, cĩ athĩ naboo, Bũlũc cĩ ẽẽn Balang.
4 Agam balna Kedorlaomerĩ kĩ alaanẽt cĩk ẽẽn iyyio wo alaanẽt cĩk ẽẽn tur erkinya õmmõtõ kĩ ramma. Ma baa erkita cĩ ẽẽn õmmõtõ kĩ iyyio, ivitia ũrũmĩt alaanẽta cĩk ẽẽn tur wo eleeti, ĩthõng ũtũbũrĩt nẽẽgẽ Kedorlaomer kĩ alaanẽt cĩk ẽẽn iyyio ẽẽ, ĩnõõnõ.
5 Ma naboo erkita cĩ ẽẽn õmmõtõ kĩ wec, ikiyyia Kedorlaomerĩ kĩ alaanẽt cĩk arũm nyĩcẽkẽr kĩ ĩnõõnõ wo uuktõy, ĩthõng ijiaritõ eet cĩk athĩ Rẽvaĩt, ngatĩ athĩ Atheroth Karanaim, ĩthõng naboo atamaacitõ eet cĩk athĩ Thuthĩm ngatĩ athĩ Ham, kĩ eet cĩk athĩ Ẽẽm ngatĩ athĩ Thave Kiriathaim,
6 kĩ eet cĩk Hõõrĩ tõõna ĩcĩ Thẽĩrĩ cĩ tõõn cĩ õkkõ ĩcĩ El Paran ngatĩ õbõwõy kĩ baath.
7 Ma balna ngĩ imiiryie Kedorlaomerĩ kĩ alaanẽt iyyio õõt ngatĩ athĩ En Mithpat, cĩ athĩ thar õõgĩ Kadẽth, õõt nẽẽgẽ agamit looc cĩ eet cĩk Amaleki, ĩthõng ijiaritõ eet cĩk Amõrĩ wũk balna abaak ngatĩ athĩ Hathathon Tamar.
8 Ĩthõng ivitia aito alaanẽta wũk balna ẽẽn tur cĩ Thõdõmĩ, kĩ cĩ Gõmõra, kĩ cĩ Adma, kĩ cĩ Theboimi, kĩ cĩ Bẽẽla cĩ athĩ thar õõgĩ Thõar, kĩ jore toloowa cĩ Thiddimi,
9 uukõy nẽẽgẽ kĩ alaanẽt cĩkkõ Kedorlaomerĩ cĩ Elamĩ kĩ Tidalĩ cĩ Goiimi kĩ Amrapelĩ cĩ Thinaarĩ kĩ Ariokĩ cĩ Ẽllatharĩ. Ẽẽn balna jore neccie jore cĩ uukõnẽ alaanẽta tur kĩ alaanẽt wec.
10 Uukõy balna alaanẽta cĩkkõ, ayak balna looru cĩ Thiddimi loowua cĩk ayak gimma cĩ athĩ madahanyak cĩ aduwõy kĩ thoyyie. Ma balna ngĩ athĩ alaanẽta cĩk Thõdõmĩ kĩ cĩ Gõmõra ne, kilittiaha jore ẽẽ, atdukothi kẽnnẽ nyĩcẽkẽrĩ cĩgĩk gwuak loowua cĩk gii cĩ athĩ madahanyak wo, ĩthõng agam gii neccie ĩnõõgõ, ĩthõng õõt ulugunycie gwuak thiiryiowẽy tõ.
11 Ngaatĩ avvu agĩĩranẽ alaanẽta cĩk ẽẽn wec wo kaal vẽlẽk korookjiowẽy ĩcĩ gaalawu ĩcĩk Thõdõmĩ kĩ cĩ Gõmõra kĩ lõõcĩ ĩĩr ngaatĩ õvõyyĩ gõõla cĩnĩng.
12 Ivitia agamit mĩrõwa cĩkkõ Lõõt ngẽrtĩ gõtõnĩ Abramĩ buu, nyatarka balna aavĩ nẽ Thõdõma, ngaatĩ angĩdĩ ĩnõõnõ kaalĩy cĩgĩnĩk noko.
13 Ma natẽ, ikiyyia uduwak eeti ĩmma cĩ avira jora thõõth cĩ agamini Lõõtĩ Abram cĩ ẽẽn Heburenit. Abaak balna Abramĩ joonui kẽẽnĩy ĩcĩk ẽẽn riet cĩk alalĩ kũc ĩcĩk Mamrẽĩ, et wũ Amõrĩ kĩ gõtõnĩ Ethkol kĩ Aner, athĩ balna eeta cĩk ẽẽn iyyio wo ne, ẽẽl nẽẽgẽ Abram katĩ ngĩ aavĩ jore tõ.
14 Ma balna ngĩ athĩrar Abramĩ athĩ ne, agamẽ Lõõtĩ ẽẽ, ũtũvvũwa nẽ eet cĩk jorak cĩk balna arittiay õlõõ cĩnnĩ, cĩk ẽẽn balna eet õmmõtõ kĩ eet tur kõmmõtõ kĩ turgi (318). Ngaatĩ õwõbĩ mĩrõk kõdõlanit ngĩtĩ athĩ Daan.
15 Ma baa baal, ikiyyia Abramĩ ẽngẽr eet cĩk õvvõ jora kõõt kuuktõy kĩ mĩrõk, ngaatĩ amaacĩ nẽẽgẽ ĩnõõgõ, ĩthõng itingkayyiek ngĩtĩ athĩ Hooba cĩ aavĩ tõõna ĩcĩ lootu cĩ Damathkathĩ.
16 Ngaatĩ thĩ balna ijiowanĩ Abramĩ kaal vẽlẽk, ĩthõng õbõdaĩ nẽ Lõõt kĩ kaal cĩgĩnĩk kĩ ngaay kĩ eet õõgĩ wũk balna agam mĩrõwa vẽlẽk.
Agatan Mẽlthĩthẽdẽĩ Abram
17 Ma balna ngĩ õbõda Abramĩ wũ balna ijiar Kedorlaomer kĩ alaanẽt wũk balna arũmẽ kĩ ĩnõõnõ, ĩtĩnga alaanĩ cĩ Thõdõmĩ õõt urumtõy kĩ Abram looria cĩ athĩ Thave, cĩ athĩ thar õõgĩ looru cĩ alaanetu.
18 Ĩthõng balna ayahak Mẽlthĩthẽdẽĩa Abram ahat cĩ avaadiay kĩ mẽrtẽ cĩ vĩnõwo. Ẽẽn balna Mẽlthĩthẽdẽĩ alaan cĩ Thalẽmĩ, ĩthõng naboo ẽẽn paadĩrb cĩ Nyekuc cĩ Ijiar Vẽlẽk.
19 Ngaatĩ agatanĩ nẽ Abram ẽthẽcĩ ne, “Anyĩk Nyekuc cĩ Ijiar Vẽlẽk, Tengenyioit cĩ tammutiddin kĩ cĩ loocu, kagatanina.
20 Anyĩk Nyekuc cĩ Ijiar Vẽlẽk wũ balna anyi tiirthẽt cĩ ijiarẽ mĩrõk cugunik kagatanẽ.” Ma natẽ, angaarak Abramĩ Mẽlthĩthẽdẽk tõõn ĩmmac ijjionẽy vẽlẽk wũk balna õbõdanĩ nẽnẽ.
21 Ma natẽ, ethek alaanĩ cĩ Thõdõmĩ Abram ne, “Bĩtĩ baai niia ijjio, ĩthõng bõdahia eet cĩganĩk dõ.”
22 Ẽdẽcĩ kẽnnẽ Abramĩ alaan cĩ Thõdõmĩ ethei ne, “Athii katĩ cĩ kawumeei na kaal cugunik koo athiit cannĩ. Kabũtani nguuma cĩ Makayyiokto Nyekuc cĩ Ijiar Vẽlẽk, Tengenyioit cĩ tammutiddin kĩ cĩ loocu,
23 athii katĩ cĩ kelemi ngatĩ kõkõyyẽ gimma cunni kũdũt, kõdẽ woyyia looron cĩ dĩcĩ, kõdẽ laamũc cĩ cavĩto kaganoko, kĩĩ katĩ athii cĩ athinnu ne, ‘Aneeta cĩ kaanyi Abram kabalõy wo.’
24 Athii katĩ na cĩ kelemi gii ĩmma, ĩthõng thĩ, anyĩk niia dainit dõ wũ balna aduk eeta cĩganniek cĩk jorak kĩĩ gii cĩ woccia kõkõyyẽ nana. Ĩthõng thĩ, balna kiiriokca naaga kĩ Aner, Ethkol kĩ Mamrẽ, ĩthõng engeru niia kĩ ĩnõõgõ kaal wũk balna kõbõdania naaga mĩrõwẽy, kĩĩ katĩ kootti nẽẽgẽ.”