Engeryiõy Abramĩ kĩ Lõõt
13
Ma balna natẽ, ĩtĩngathõ Abramĩ kĩ ngaa cĩnnĩ Ijiba, ĩthõng ayait kaal vẽlẽk cĩgĩk, ĩthõng imiiryie õõt looca cĩ Nẽgẽvĩ. Ngaanĩ thĩ baa nẽ iriok kĩ Lõõt noko.
2 Ẽẽn balna Abramĩ et cĩ aballie õrrõt. Abal balna nẽ athaa cĩk meelĩk, ẽẽtha cĩk meelĩk kĩ tĩĩn cĩk meelĩk, ĩthõng naboo ayak thĩĩk cĩk athĩ kathalkathala kĩ daab buu cobbi õrrõt.
3 Ma natẽ, ũũk Abramĩ looca ĩcĩ Nẽgẽvĩ aara looc, ĩĩthõng kõdõlan Bethel ngatĩ balna ẽngẽnycĩ nẽ tuggu, kõrgẽna cĩ Bethelĩ kĩ Ai,
4 nginiwa wũ balna aavẽ nẽ, ĩthõng ẽtẽngẽny nẽ ngĩtĩ todongintio. Ĩthõng ala Abramĩ Makayyioit natẽ.
5 Iriok balna Lõõtĩ kĩ Abram, ĩthõng aballie ayak balna nẽ buu athaa, ẽẽtha kĩ tĩĩna. Ĩthõng ayak tugguet buu.
6 Ĩthõng nyatarka balna ayak nẽẽgẽ kaal cĩk meelĩk õrrõt, ikiyyia ĩĩ dĩc kartienti cĩ ẽggẽ kaala cĩgĩk kõdõwẽ ngatĩ odoi.
7 Ma natẽ, ivitia ẽgẽrẽnycõy tũwayyiowa cĩk Abramĩ kĩ cĩk Lõõtĩ. Nganĩ thĩ balna aatĩ eeta cĩk Kananĩ buu natẽ kĩ eet cĩk Perithiti looca nĩĩcẽ.
8 Ma balna ngĩ acĩn Abramĩ gẽrtha avuthiti coo wo, ikiyyia uduwak Lõõt ethek ne, “Laang, keegin naaga eet cĩk tatũk codoi, wũ woccia athii cĩ kẽgẽrẽnyõy naaga, kõdẽ tũwayyiowa cĩgaac, nyatarka kartienit.
9 Maka lõõcĩ õrrõt, bẽra tõõn cĩ awũpanni aniitia, ĩthõng ũũwẽ, kĩĩ katĩ kengeryie. Mĩ adiimi õkõyyẽ looc tõõn cĩ athiit cĩ angettio õkõyyẽ, kõkõyyẽ katĩ na tõõn cĩ athiit cĩ athio. Mĩ adiimi õkõyyẽ looc tõõn cĩ athiit cĩ athio õkõyyẽ, kõkõyyẽ katĩ na tõõn cĩ athiit cĩ angettio.”
10 Ma natẽ, ĩtĩnga Lõõtĩ ĩcĩn looru cĩ Yordanĩ cĩ ayak maam kĩ kartienit cĩ cũlaĩ kĩc õgõõn kĩ mana cĩ Makayyiokto, kõdẽ kĩ lõõcĩ cĩ Ijibi tõõna ĩcĩ Thõarĩ. Aku balna thõõth coo baa nga kũtũth Makayyioiti korookjiok cĩk gaalawu cĩk Thõdõmĩ kĩ cĩ Gõmõra.
11 Ngaatĩ balna ẽbẽranĩ Lõõtĩ looru cĩ Yordanĩ kĩĩ cĩnnĩ, ĩthõng ĩtĩnga ũũk tõõna ĩcĩ alibanĩ kõrra. Gõõl cĩ balna avvu ẽngẽrõõnĩ Abrahamĩ kĩ Lõõt wo coo.
12 Abaak balna Abramĩ looca cĩ Kananĩ, ĩthõng ũũk abaak kẽnnẽ Lõõtĩ kõrgẽna cĩ korookjiok cĩk gaalawu cĩk obbitik cĩk aatĩ looria ĩcĩ Yordanĩ, ngaatĩ õkkõ ẽngẽnycĩ tugguet ngatĩ õbõwõy kĩ Thõdõm.
13 Ẽẽn balna eeta cĩk Thõdõmĩ wo gẽrẽthanniok õrrõt nguuma cĩ Makayyiokto.
Uluuk Abramĩ ũũk Hẽbõrõna
14 Ma balna vurtia cĩ ũũwĩ Lõõtĩ, ikiyyia ethek Makayyioiti Abram ne, “Cĩn da nõõnõ looc ĩcĩ lootu kĩ ĩcĩ okolothĩcẽ kõrra kĩ ĩcĩ diinu kĩ ĩcĩ alibanĩ kõrra, ĩthõng kĩ ĩcĩ lootu vẽlẽk jurrung.
15 Kõkkõ katĩ na kaanyi aniitia kĩ dõõlĩ cĩk dõõlĩ cugunik looc cĩ acini niia wo vẽlẽk kĩĩ cunung kũdũt.
16 Kaanyi katĩ na aniitia dõõlĩ cĩk meelĩk cĩk woccia aduwõy kĩ tõdõwa loota ngato thõng. Ĩthõng katĩ mĩ aavĩ eeti cĩ ẽkẽb tõdõwa, ẽkẽb woccia katĩ nẽ dõõlĩ cugunik buu.
17 Ĩthõng yoko, ketheci ne, bĩt tõõĩ looc nĩcẽ vẽlẽk, nyatarka kõkkõ katĩ kaanyi na kĩĩ cunni.”
18 Ma balna õtõõĩ Abramĩ looc vẽlẽk, ikiyyia uluugi kõrõõk cĩnnĩ, ĩthõng ũũk abaak ngatĩ õjõõn kĩ kẽẽn cĩk obbitik ngatĩ athĩ Mamrẽ ngatĩ õbõwõy kĩ Hẽbõrõn. Ngaatĩ ẽngẽnycanĩ ngĩtĩ õtõdõngẽcĩ Makayyioit kaal cĩk cavawu natẽ.