Itionĩk Makayyioiti Abram Kanana
12
Ennei balna Makayyioiti Abram ne, “Tũngek looc cunni kĩ eet cugunik kĩ kõrõõk cĩ baaba kĩ tionniok cugunik vẽlẽk, ĩthõng uuwu looca ĩcĩ katĩ kõkkõ keyeleci na aniitia.
2 Kõkkõ katĩ na kaanyi aniitia looc cobbi õrrõt, kagatanni katĩ na aniitia, ĩthõng kaanyĩha thar cugunik kubullie, kĩĩ katĩ kagatantẽ eeta vẽlẽk, nyatarka aniitia.
3 Kagatani katĩ na eet cĩk agatanni aniitia, ĩthõng kĩcĩĩna eet cĩk aciinni aniitia. Agatanni katĩ eeta vẽlẽk cĩk looc coo, nyatarka aniitia.”
4 Ma balna ngĩ ĩĩtõ erkinya cĩk Abramĩ eet iyyio kõmmõtõ kĩ tur (75), ũtũngtek nẽ kĩ Lõõt ngĩtĩ athĩ Haran kĩ balna ngĩ aduwaai Makayyioiti ĩnõõnõ.
5 Ma balna irioit nẽ kĩ ngaa cĩnnĩ Tharaĩ, ngẽrtĩ gõtõnõnĩ cĩ athĩ Lõõt, kĩ nyakapanak cĩgĩnĩk. Angĩd balna nẽ kaal cĩgĩk, ĩthõng ayak ijjio vẽlẽk wũk balna ayak nẽẽgẽ ngatĩ athĩ Haran buu. Ngaatĩ õdõlanĩ nẽẽgẽ looc cĩ athĩ Kanan.
6 Ma balna mĩ ngaanĩ õwõ Abramĩ, ũũk õdõlan nẽ kẽẽt cobbi ngatĩ athĩ Mõõrẽa joonui Thẽkẽma. Ĩthõng balna itin nĩcẽ abaak eeta cĩk Kananĩ looca nĩĩcẽ.
7 Ma natẽ, ilibak Makayyioiti Abram naboo, ĩthõng ethek ĩnõõnõ ne, “Ẽẽn lõõcĩ coo looc cĩ katĩ kaanyi na dõõlĩ cĩk dõõlĩ cugunik.” Ma natẽ, etengenyek Abramĩ ngĩtĩ todongintio Makayyioit cĩ alibai ĩnõõnõ.
8 Ma natẽ, ikiyyia nẽ ũũk ĩcĩ looc cĩ ẽẽn thiiryiok cĩ aavĩ ĩcĩ alibanĩ kõr Bethela, ĩthõng ũũk arĩk tuggu cĩnnĩ kõrgẽna cĩ tõõn cĩ okolothĩcẽ kõr Bethela kĩ ĩcĩ alibanĩ kõr ngatĩ athĩ Ai. Ma naboo natẽ, ikiyyia ẽtẽngẽnya nẽ ngĩtĩ õtõdõngẽcĩ Makayyioit Nyekuc gii cĩ cavĩto, ĩthõng ĩdĩhĩth Makayyioit natẽ.
9 Ma naboo natẽ, ikiyyia ũlũũcẽ Abramĩ ũũk ĩcĩ baath cĩ athĩ thar Nẽgẽv.
Arawak Abramĩ Ijib
10 Ma baa itin nĩcẽ, aavĩ baa butuny looca nĩcẽ wũ balna adangei Abram kĩtĩnga kũũk looca ĩcĩ Ijibi nginiwa wũ baa abaaĩ nẽ ẽnnẽ kerennioit.
11 Ma balna ngĩĩ õjõõn nẽ lõkõrẽa ĩcĩ Ijibi, ikiyyia ennek nẽ ngaa cĩnnĩ Tharaĩ ne, “Eeni niia ngaa cĩ dĩhĩmĩ õrrõt.
12 Ma ngĩ icinti aniitia eeta cĩk Ijibi, ahad katĩ nẽẽgẽ athĩ ne, ‘Eeni niia ngaa cannĩ.’ Ĩthõng katĩ ũrũkta aneeta kĩĩ kootti aniitia.
13 Duwak ĩnõõgõ ethek ne, eeni niia ngõõna, kĩĩ katĩ kĩdĩmanta nẽẽgẽ aneeta jurrung, nyatarka aniitia, athii katĩ nẽẽgẽ cĩ arukca aneeta.”
14 Ma balna ngĩ arawak Abramĩ lõkõrẽ cĩ Ijibi ẽẽ, acĩn kẽnnẽ eeta cĩk Ijibi dĩdĩ ngatĩ ẽnnẽ Tharaĩ ngaa cĩ dĩhĩmĩ õrrõt.
15 Ma balna ngĩ acĩn gaala cĩk alaanak ĩnõõnõ wo, õõt uduktiak nẽẽgẽ alaan cĩ Ijibia entek ne, “Dĩhĩm ngaa ĩmma ngato õrrõt.” Ngaatĩ avvu õvõyyĩ nẽẽgẽ Tharaĩ õlõõtõtõ cĩ alaano.
16 Ma balna thĩna ikiyyia ĩdĩmanek alaanĩ Abram jurrung, nyatarka Tharaĩ, ĩthõng aanyĩk ĩnõõnõ athaa kĩ ẽẽtha, tĩĩna, thigirie kĩ nyaakalnya kĩ nyakapanak cĩk maacĩk kĩ cĩk ngayyik cĩk meelĩk õrrõt.
17 Ĩthõng nyatarka thõõth cĩ õkõyyĩ alaanĩ Tharaĩ kĩĩ ngaa cĩnnĩ wo, ikiyyia itionak Makayyioiti Nyekuci ĩnõõnõ kĩ eet cĩk kõrõõk cĩnnĩ vẽlẽk moorithiok cĩk gerthek õrrõt.
18 Ma natẽ, õkõlak alaanĩ Abram thooc kikiyyia õlõõtõtõ cĩnnĩ, ĩthõng ijin ĩnõõnõ ethek ne, “Laang, adĩmanna kuu? Athii woccia da cĩ aduwacca jurrung etheca ne, ẽẽn coo ngaa cunni nyia?
19 Nyia ennea ne, ẽẽn nẽ ngoonu wo, ĩthõng anya kaar ĩnõõnõ kĩĩ ngaa cannĩ wo? Ĩthõng yoko thĩna, ngaa cunni wo coo, irie ĩnõõnõ ĩtĩngath õõtõ!”
20 Ngaatĩ anyĩcẽ alaanĩ gaala cĩgĩnĩk kitionitõ Abram kĩ ngaa cĩnnĩ, kĩ kaal cĩgĩnĩk vẽlẽk, kĩĩ katĩ kimiiryie nẽẽgẽ kõõt looca cĩ baa avvunni.