Ciith cĩ wuuni Babẽla
11
Õthõõth balna eeta thiananta, loota ngato vẽlẽk thõõth codoi doo.
2 Ma balna ngĩ õvvõ eeta tõõna ĩcĩ alibanĩ kõr ẽẽ, õõt umuddiothĩk ngini ĩmma cĩ tẽltẽlĩ cĩ athĩ thar Thinaar ngaatĩ abaaĩ natẽ.
3 Ma natẽ, othoothitõ ĩĩtõ ne, “Kĩdĩmanta namatavalĩnya, ĩthõng kavaaditõ jurrung.” Aticanini balna nẽẽgẽ namatavalĩnya, ĩthõng ũtũngĩt bĩĩyẽn, ĩthõng iticantõõĩ gimma cĩ athĩ madahanyak cĩ aduwõy kĩ thoyyie kagam namatavalĩnya kokomit kak.
4 Ĩthõng othoothitõ nẽẽgẽ ĩĩtõ ne, “Ĩthõng thĩ yoko, kẽtẽngẽnyca kõrõõk cĩ gaalawu cĩnac cĩ ayak ciith cĩ wuuni cĩ õdõlan tammutiddin, kĩĩ katĩ kubullie thara cĩgaac kũdũt, ĩthõng athii cĩ kathanothii vatĩk cĩk meelĩk looc vẽlẽk.”
5 Ma natẽ, ulucciay Makayyioiti Nyekuci loota kikiyyia kĩcĩn kõrõõk cĩ gaalawu kĩ ciith cĩ wuuni cĩ nga ẽngẽnyẽt eeta neekie ẽẽ.
6 Ĩthõng umuk Makayyioiti ĩthĩ ne, “Aticanni eeta cĩkkõ ketee, nyatarka õthõõth nẽẽgẽ vẽlẽk thõõth codoi doo. Ẽẽn yoko coo thiananĩt cĩ kaal cĩk katĩ õvvõ adĩman nẽẽgẽ. Ĩthõng mĩ arki nẽẽgẽ adĩman thõõth coo noko, ivitia katĩ agaacõ nẽẽgẽ thõõth, ĩthõng iticanit nẽẽgẽ kaal vẽlẽk cĩk adiim adĩman nẽẽgẽ!
7 Kõõt katalmanyanit ĩnõõgõ kothoothitõ thoothonniok mĩn mĩn, kĩĩ katĩ athii cĩ athĩknõnĩ nẽẽgẽ vẽlẽk naboo codoi codoi.”
8 Ma balna natẽ, athaanĩk Makayyioiti ĩnõõgõ vatĩk cĩk meelĩk looc vẽlẽk, ĩthõng ibilli nẽẽgẽ tengenyinit cĩ kõrõõk cĩ gaalawu cobbi ẽẽ.
9 Ĩnõõnõ thĩ cĩ akanõthĩcẽ kõrõõk cĩ gaalawu nĩcẽ thara cĩk athĩ Babẽla ẽẽ, nyatarka atalmanyan balna Makayyioiti thõõth cĩ eetu natẽ aanyĩk ĩnõõgõ kothoothitõ mĩn mĩn, ĩthõng athaanĩk ĩnõõgõ vatĩk cĩk meelĩk looc vẽlẽk.
Dõõlĩ cĩk Thẽmĩ
10 Ẽẽn eeta cĩkkõ vurtẽẽn cĩk Thẽmĩ. Ma balna vurtia cĩ erkinya cĩk ẽẽn ramma wũk baa akuui tõwõnĩ looc, balna ma ngĩĩ erkinya cĩk Thẽmĩ eet tur (100), ikiyyia ĩthĩ nẽ baatĩ Arpaththadĩ.
11 Ma vurtia cĩ baa ikiyyia itirria nẽ ngẽrĩnĩ cĩ athĩ Arpaththad, ikiyyia ayak nẽ lõgõõ cĩk maacĩk kĩ dõõlĩ cĩk ngayyik. Ĩthõng balna ikiyyia adaak baa ngĩ ĩĩtõ erkinya cĩgĩnnẽk eet etĩmma kĩ eet tur (500) vurtia cĩ baa itirriaĩ nẽ Arpaththad.
12 Ma balna ngĩ õdõlanit Arpaththad erkinya etĩmma kõmmõtõ kĩ tur (35), ikiyyia itirria nẽ ngẽrĩnĩ cĩ athĩ Thẽẽla.
13 Ma balna ngĩ ayak Arpaththadĩ lõgõõ cĩk maacĩk kĩ dõõlĩ cĩk ngayyik õõgĩ, ikiyyia adaak nẽ baa ngĩ ĩĩtõ ĩnõõnõ erkinya cĩgĩnnẽk eet etĩmma kĩ iyyio (403) vurtia balna ngĩ itirria nẽ Thẽẽla.
14 Ma balna ngĩ õdõlanit Thẽẽla erkinya cĩgĩnnẽk etĩmma kõmmõtõ (30), ikiyyia itirria ngẽrĩnĩ cĩ athĩ Ẽbẽr.
15 Ayak balna Thẽẽla lõgõõ cĩk maacĩk kĩ dõõlĩ cĩk ngayyik õõgĩ, ĩthõng ikiyyia adaak nẽ baa ngĩ ĩĩtõ ĩnõõnõ erkinya cĩgĩnnẽk eet etĩmma kĩ iyyio (403) vurtia cĩ baa itirria nẽ Ẽbẽr.
16 Ma balna ngĩ ĩĩtõ Ẽbẽr erkinya etĩmma kõmmõtõ kĩ wec (34), ikiyyia itirria nẽ buu ngẽrĩnĩ cĩ athĩ thar Pẽlẽk.
17 Ayak balna Ẽbẽrĩ lõgõõ cĩk maacĩk kĩ dõõlĩ cĩk ngayyik õõgĩ, ĩthõng balna ikiyyia adaak nẽ baa ngĩ õdõlanit erkinya cĩgĩnnẽk eet etĩmma kĩ etĩmma kõmmõtõ (430) vurtia cĩ baa itirria nẽ Pẽlẽk.
18 Ma balna ngĩ ĩĩtõ erkinya cĩk Pẽlẽẽĩ etĩmma kõmmõtõ, ikiyyia itirria ngẽrĩnĩ cĩ athĩ Reu.
19 Ayak balna Pẽlẽẽĩ lõgõõ cĩk maacĩk kĩ dõõlĩ cĩk ngayyik õõgĩ, ĩthõng balna ikiyyia adaak nẽ baa ngĩ ĩĩtõ erkinya cĩgĩnnẽk eet õmmõtõ kĩ tõrkõwẽc (209) vurtia cĩ balna itirria nẽ Reu.
20 Ma baa ngĩ ĩĩtõ erkinya cĩk Reu etĩmma kõmmõtõ kĩ ramma (32), ikiyyia itirria ngẽrĩnĩ cĩ athĩ Theruk.
21 Ayak balna Reu lõgõõ cĩk maacĩk kĩ dõõlĩ cĩk ngayyik õõgĩ, ĩthõng ikiyyia adaak nẽ baa ngĩ ĩĩtõ ĩnõõnõ erkinya cĩgĩnnẽk eet õmmõtõ kĩ tũrgẽrẽm (207) vurtia ĩcĩ balna itirriaĩ nẽ Theruk.
22 Ma baa thĩ ngĩ ĩĩtõ erkinya cĩk Theruui etĩmma kõmmõtõ (30), ikiyyia ayak ngẽrĩnĩ cĩ athĩ Nahõr.
23 Ayak balna Theruui lõgõõ cĩk maacĩk kĩ dõõlĩ cĩk ngayyik õõgĩ, ĩthõng ikiyyia balna adaak nẽ baa ngĩ ĩĩtõ ĩnõõnõ erkinya cĩgĩnnẽk eet õmmõtõ (200) vurtia cĩ baa itirria nẽ Nahõr.
24 Ma balna ngĩ ĩĩtõ erkinya cĩk Nahõrĩ etĩmma kĩ tõrkõwẽc, ikiyyia itirria ngẽrĩnĩ cĩ athĩ Tẽra.
25 Ayak balna Nahõrĩ lõgõõ cĩk maacĩk kĩ dõõlĩ cĩk ngayyik õõgĩ, ĩthõng ikiyyia balna adaak nẽ baa ngĩ ĩĩtõ ĩnõõnõ erkinya cĩgĩnnẽk eet tur kõmmõtõ kĩ tõrkõwẽc (119) vurtia cĩ balna itirria nẽ Tẽra.
Dõõlĩ cĩk Tẽra
26 Ma vurtia cĩ ĩĩtõ erkinya cĩk Tẽra eet iyyio kõmmõtõ (70), ikiyyia itirria nẽ Abram, Nahõr kĩ Haran.
27 Ẽẽn eeta cĩkkõ vurtẽẽn cĩk Tẽra. Ẽẽn balna Tẽra baatĩ Abramĩ, Nahõr kĩ Haran. Ẽẽn balna Haranĩ baatĩ Lõõtĩ.
28 Ma balna ngaanĩ arũgĩ Tẽra, ikiyyia adaak Haranĩ õlõõ cĩ gaalawu cĩ Uri, looca cĩ Kaldea nginiwa wũ balna aritianĩ nẽnẽ.
29 Ma natẽ, ivitia itiktõy Abramĩ kĩ Nahõr, athĩ balna ngaa cĩ Abramĩ thar Tharaĩ, ĩthõng athĩ ngaa cĩ Nahõrĩ thar Milka, ẽẽn balna nẽ doo cĩ Haranĩ, ẽẽn balna Haranĩ baatĩ Milka kĩ Ĩthka.
30 Amũdaai kẽnnẽ Tharaĩ abĩlĩ, athii cĩ ayak dõõlĩ.
31 Ayak balna Tẽra ngẽrĩnĩ cĩnnĩ Abram kĩ Lõõt wũ balna ẽẽn ngẽrtĩ Haranĩ, kĩ kalawan cĩnnĩ Tharaĩ ngaa cĩ Abramĩ, ĩthõng irioit kĩ ĩnõõgõ ũtũngtek kõrõõk cĩ gaalawu cĩ Uri cĩ Kaldea kĩĩ kõõt looca ĩcĩ Kananĩ. Ĩthõng thĩ, õõt nẽẽgẽ mẽẽny ngatĩ athĩ Haran, ĩthõng kĩĩ kabaaitõ natẽ.
32 Ngaatĩ aavẽ Tẽra natẽ kuumuc kadaak Harana balna ngĩĩ erkinya cĩgĩnnẽk eet õmmõtõ kĩ tur (205).