Ĩdĩmanit Nyekuci kĩ Nõõwa ngẽrẽmngẽrẽm
9
Agatan balna Nyekuci Nõõwa kĩ lõgõõ cĩgĩnĩk ethei ne, “Ayait dõõlĩ cĩk meelĩk õrrõt. Anycĩk dõõlĩ cuguk buu kivitia kayait dõõlĩ cĩk meelĩk, kĩĩ katĩ kĩbbĩtĩt looc nĩco vẽlẽk.
2 Avvu katĩ ongolinung kẽlẽgẽ, kĩ kĩballĩ, kĩ kaal cĩk õvõvõt loota, kĩ kulugua vẽlẽk. Aatĩ katĩ nẽẽgẽ vẽlẽk attia cunni.
3 Kaanyung na agiitia kaal vẽlẽk cĩk arũgĩ cĩk õwõ kĩĩ dainit cunung. Kĩ baa kaanyung na agiitia kẽẽn cĩk abiiri vẽlẽk kĩĩ dainit cunung.”
4 “Ĩthõng thĩ, gii codoi doo cĩ kaduwacung na coo, nyĩ adakcu kiding cĩ nganĩ ayak biyyie, nyatarka aavĩ rũgẽtĩ vẽlẽk biyyietĩy.
5 Kadiimi katĩ na biyyie cĩk et cĩ aruk et. Ma ngĩ aruk kelegiti et adaaĩ katĩ nẽ buu, ĩthõng eeti ĩmma cĩ aruk et aruwue katĩ nẽ buu, nyatarka aruk nẽ et.
6 “Ma ngĩ aruk eeti et,
aruwue katĩ eeti neccie buu,
nyatarka balna ẽngẽnyca Nyekuci
et kaavu kĩ nẽ.”
7 “Ĩthõng thĩ, kadiimnyung na agiitia ayait dõõlĩ cĩk meelĩk õrrõt, kĩĩ katĩ kivitia kabaaitõ doolia cĩk dõõlĩ cuguk looca coo vẽlẽk.”
8 Ĩthõng naboo uduwak Nyekuci Nõõwa kĩ lõgõõ cĩgĩnĩk ethek ne,
9 “Kadĩmani katĩ na kõr coo ngẽrẽmngẽrẽm kĩ agiitia kĩ eet vẽlẽk cĩk vurut cunung,
10 kĩ kaal vẽlẽk cĩk arũgĩ, kĩballĩ, kaal cĩk olu kĩ kẽlẽgẽ cĩk bõõnak, wũk balna ẽẽktanu kĩ agiitia kovowola ĩcĩtõ kõdõwẽ.
11 Kadĩman na kĩ agiitia ngẽrẽmngẽrẽm, ĩthõng ĩthĩnga katĩ na kitionacung tõwõn kikiyyia kĩgĩĩra kaal vẽlẽk cĩk arũgĩ naboo, ĩthĩnga katĩ tõwõnĩ agĩĩra looc naboo.”
12 Athĩ Nyekuci ne, “Ẽẽn katĩ coo yelinit cĩ ngẽrẽmngẽrẽm cĩ kadĩmani na kĩ agiitia kĩ kaal vẽlẽk cĩk arũgĩ. Ngẽrẽmngẽrẽm cĩ katĩ alna kũdũt kuumuc dõõlẽnĩy cĩk dõõlĩ cuguk vẽlẽk.
13 Kõwõrani katĩ na borowec cĩ ẽẽn yelinit cĩ ngẽrẽmngẽrẽm cĩ kadĩman na kĩ agiitia kĩ kẽlẽgẽ vẽlẽk cĩk arũgĩ.
14 Ma kaari katĩ gõõ na diithiok tiddina kũmũtĩt looc, edenyiay borowecĩ diithiowẽy,
15 kahada katĩ na ngẽrẽmngẽrẽm wũ balna kadĩman na kĩ agiitia kĩ kaal vẽlẽk cĩk arũgĩ. Ĩthĩnga katĩ na kagĩĩra eet kĩ kaal cĩk arũgĩ vẽlẽk loota ngato naboo tõwõna.
16 Thõõth cannĩ coo, ma thẽk kĩcĩna borowec õwõranẽ diitha, kacini katĩ na, ĩthõng kahada thẽk katĩ gõõ na ngẽrẽmngẽrẽm wũ balna kadĩmani na Nyekuci kĩ kaal vẽlẽk cĩk arũgĩ loota ngato.”
17 Ngaatĩ ẽthẽcĩ Nyekuci Nõõwa ne, “Yelinit cĩ ngẽrẽmngẽrẽm cĩ kadĩmanei na kaal cĩk arũgĩ vẽlẽk loota ngato coo.”
Nõõwa kĩ lõgõõ cĩgĩnĩk
18 Ẽẽn balna lõgõõ cĩk Nõõwa iyyio Thẽm, Ham kĩ Javeth wũk balna ẽẽkta kĩ ĩnõõnõ kovowola ĩcĩtõ. Ẽẽn balna Hamĩ baatĩ Kananĩ.
19 Ẽẽn eeta vẽlẽk cĩk athanothi looc vẽlẽk ngato wo, vurut cĩ tatũk cĩ lõgõõ cĩk Nõõwa.
20 Ĩthõng balna ẽẽn Nõõwa evyioit, cĩ ẽẽv mana cĩ kẽẽn cĩk adĩmanianĩ mertia cĩ athĩ vĩnõ wo.
21 Ma baa kõr ĩmma, ũwũd nẽ vĩnõ õrrõt ngaatĩ ĩbbaĩnie katangu tdilanyany ciitha cĩnnĩ.
22 Ma baa ngĩ aku ngẽrĩnẽ Hamĩ ẽẽ, amũdaai kẽnnẽ baatĩnnĩ õõngĩ tdilanyany, ngaatĩ ẽẽktanẽ ciitha õkõyyĩ aduwacĩ gõtõõnõgĩ cĩgĩnĩk ngatĩvõrĩ.
23 Ma natẽ, itiothõ gotoonogua cĩgĩnnẽk Thẽm kĩ Javeth ciith, ĩthõng ataddik cẽrẽm gaavũanĩy, ĩthõng õtõõthõ ĩcĩ bowucinu, kĩĩ katĩ athii cĩ acĩnĩ baatĩnnẽ, ĩthõng ubungit ĩnõõnõ.
24 Ma balna ngĩ ĩtĩnga Nõõwa, ithii mertia õõwa ĩcĩnnĩ, ikiyyia ũmũda thõõth wũ baa adĩmaneei ngẽrĩnẽ cĩ dĩcĩ ẽẽ, ĩnõõnõ.
25 Ĩthõng ĩthĩ nẽ ne,
“Kaciini na Kanan.
Akuni katĩ niia eeni nyakapanait
cĩ aticanothi gotoonogu õrrõt.”
26 Ĩthõng naboo ĩthĩ ne,
“Anycĩk Makayyioit Nyekuc cĩ Thẽmĩ kagatanẽ,
ĩthõng anycĩk Kanan kĩĩ nyakapanait cĩnnĩ.
27 Kala na Nyekuc woccia kaanyĩk Javeth looc cĩ obbi,
ĩthõng kaanyĩk ĩnõõnõ kũrũmtẽ kĩ Thẽm.
Anyĩk Kanan kĩĩ nyakapanait cĩ Javethĩ.”