Ikiyyia lõõcĩ õdõõwa
8
Ma balna ikiyyia ahada Nyekuci Nõõwa, kĩ eet cĩk kõrõõk cĩnnĩ, kĩ kẽlẽgẽ wũk balna õkõyyĩ nẽ kovowola ĩcĩtõ vẽlẽk, wathinniowẽy wũk balna akuuwanẽ tõwõnĩ looc, ngaatĩ anyĩcẽ ngõõt kuvungan looc kõdõõk.
2 Ĩthõng balna thĩ ikiyyia ũnyũk Nyekuci kẽbẽrẽ cĩk duwwuẽn wũk balna arihanĩ maama loota, ĩthõng ĩbĩlĩ tammu buu.
3 Ngaatĩ thĩ balna aritanini maama kĩdĩĩc kĩdĩĩc, wathinniowẽy ĩcĩk ẽẽn eet tur kĩ eet ramma kõmmõtõ (150),
4 kõrra cĩ ẽẽn õmmõtõ kĩ tũrgẽrẽm cĩ nyĩĩlok cĩ tũrgẽrẽm cĩ erkit nĩcẽ, ikiyyia ĩbĩl kovowolĩ thiiryiowẽy ĩcĩk athĩ Ararat.
5 Ĩthõng nga baa arittanni maama noko kuumuc. Ma kõr cĩ owu cĩ nyĩĩlok cĩ õmmõtõ, ivitia edenyciay vatĩka cĩk lẽhẽdĩk cĩk thiiryiowu.
6 Ma vurtia cĩ wathinniok eet ramma, upuuk Nõõwa bẽlẽth cĩ kovowolo,
7 kĩĩ kition kũrrũũk kũũk kĩcĩn looc. Õkkõ kẽnnẽ õyõkõn kũrrũũk neccie looc kuumuc kõdõõk lõõcĩ.
8 Ma natẽ, ition Nõõwa ballo kũũk kĩcĩn katĩ ngĩ õdõõk lõõcĩ.
9 Arubothi kẽnnẽ ballo neccie maam nga abbĩththĩ looc vẽlẽk, ngaatĩ akulanĩ akuni kovowola ĩcĩtõ naboo, ĩthõng ition Nõõwa athiit cĩnnĩ, kĩĩ katĩ kẽdẽc ballo, ĩthõng imiirõĩ ũũwĩ ĩcĩtõ.
10 Ma natẽ, ẽrẽẽwõy Nõõwa wathinniok tũrgẽrẽm, ngaatĩ itionĩ ballo naboo.
11 Ma balna jiat, õbõda ballo neccie ayaha balloit cĩ kẽẽt cĩ athĩ oliva kũtũga cĩnnĩ. Ngaatĩ agawĩ Nõõwa ma ngĩ õdõõk lõõcĩ.
12 Ngaatĩ thĩ baa erewinie Nõõwa wathinniok tũrgẽrẽm, ĩthõng ition ballo naboo. Ma kõr nĩcẽ, ĩthĩnga õbõda ballo naboo.
13 Ma balna ngĩ õõ Nõõwa bẽlẽth cĩ kovowolo ẽẽ, acĩn kẽnnẽ ngĩ kothii tõwõn, ĩthõng õdõõk lõõcĩ buu. Ĩthõng kõr cĩ ẽẽn codoi cĩ erkit nĩcẽ õõt maama vẽlẽk loota. Ivitia õdõlanit erkinya cĩk Nõõwa cĩk aavẽ loota ngato ĩĩ, eet etĩmma kĩ eet õmmõtõ kĩ codoi (601).
14 Ma baa kõrra ĩcĩ ẽẽn etĩmma kĩ tũrgẽrẽm cĩ nyĩĩlok cĩ ramma cĩ erkit nĩcẽ, ikiyyia lõõcĩ õdõõk vẽlẽk vẽr.
15 Ma natẽ, uduwak Nyekuci Nõõwa ethek ne,
16 “Tẽẽha ngĩtĩvõrĩ kĩ ngaa cunni kĩ dõõlĩ cugunik kĩ ngaay cĩgĩk vẽlẽk.
17 Anyĩk kẽlẽgẽ buu kĩ kĩballĩ kĩ kaal cĩk õvõvõt loota wũk balna õkõyyẽ niia kovowola ĩcĩtõ kẽtẽkta ngĩtĩvõrĩ, kĩĩ katĩ kivitia kitirrit, ĩthõng athaantothĩk looc vẽlẽk.”
18 Ma baa ngĩ ẽẽkta Nõõwa kĩ ngaa cĩnnĩ kĩ dõõlĩ cĩgĩnĩk kĩ ngaay cĩgĩk ngĩtĩvõrĩ ẽẽ,
19 ẽtẽẽkta balna kẽlẽgẽ vẽlẽk cĩk aatĩ mĩn mĩn kĩballĩ buu kĩ kaal cĩk õvõvõt loota vẽlẽk ngĩtĩvõrĩ.
Otodongek Nõõwa Nyekuc gii cĩ cavĩto
20 Ma balna thĩna ikiyyia ẽtẽngẽnya Nõõwa ngĩtĩ õtõdõngẽcĩ Makayyioit kaal cĩk cavawu, ĩthõng ẽbẽra kẽlẽgẽ õõgĩ kĩ kĩballĩ õõgĩ cĩk dĩhĩmĩk buu, ngaatĩ avaadĩ ĩnõõgõ kĩĩ kaal cĩk cavawu cĩk Nyekucak.
21 Ma balna ngĩ õtõngõlak jirjiri cĩ avaadinie kẽlẽgẽ Makayyioit Nyekuc, ikiyyia atal nẽ õrrõt, ĩthõng ũbũtan naboo ĩthĩ ne, “Ĩthĩnga katĩ na kaciini looc naboo, nyatarka gerthetin cĩ eetu, kõdẽ woyyia kayait nẽẽgẽ muwẽẽntiok cĩk gerthek thinnetinẽy cĩgĩk rũgẽta cĩnĩng vẽlẽk, ĩthĩnga thẽk katĩ na athii cĩ kagĩĩra eet kĩ kaal cĩk arũgĩ naboo kĩ balna ĩcĩ owu,
22 “Ma thẽk nganĩ aavĩ lõõcĩ,
aatĩ katĩ wathinniowa cĩk evvintiak kĩ cĩk teedintiak,
aavĩ katĩ lalĩthĩ kĩ aburthẽt buu kũdũt,
aavĩ katĩ lõõlõ buu kĩ attien,
ĩthõng baalini kĩ waathĩn,
athii katĩ cĩ edeciay nẽẽgẽ kũdũt.”