Ĩgĩĩra Nyekuci eet maamĩy
7
Ma natẽ, uduwak Makayyioiti Nõõwa ethek ne, “Aniitia dõ cĩ kamũdanĩ loota ngato vẽlẽk ngatĩ ẽnnẽ et cĩ abũnna õrrõt. Bĩt kovowolatõ kĩ kõrõõk cunni vẽlẽk.
2 Bĩtĩ kẽlẽgẽ cĩk dĩhĩmĩk cĩk ẽẽn kaal cĩk cavawu tũrgẽrẽm mĩn mĩn, ĩthõng õngõtanu thõng, cĩk ngayyik kĩ cĩk maacĩk. Ĩthõng thĩ, ũũwẽ kẽlẽgẽ ramma ramma cĩk ngayyik kĩ cĩk maacĩk wũk gõõ athii cĩ dĩhĩmẽ.
3 Ĩthõng naboo, bẽra kĩballĩ tũrgẽrẽm cĩk aatĩ mĩn mĩn, cĩk ngayyik kĩ cĩk maacĩk. Dĩman kĩcĩ kaduwaci na wo, kĩĩ katĩ kivitia kitirrit kẽlẽgẽ cĩkkõ vurtia cĩ ukuuwi tõwõnĩ looc.
4 Kitiona katĩ na tammu cĩ obbi õrrõt vurtia cĩ wathinniok tũrgẽrẽm, cĩ katĩ aku atĩĩlĩ waathĩn kĩ baalin wathinniok eet ramma kuumuc kĩgĩĩra kaal wũk balna kẽngẽnyca na loota ngato vẽlẽk kĩĩ lõõcĩ ĩĩr.”
5 Ngaatĩ adĩmanĩ Nõõwa thõõth cĩ aduwaai Makayyioiti wo vẽlẽk jurrung.
6 Baa ngĩ ĩĩtõ erkinya cĩk Nõõwa eet etĩmma kĩ eet õmmõtõ (600) ikiyyia balna ukuuwa tõwõnĩ looc vẽlẽk.
7 Ĩthõng ẽhẽẽt balna Nõõwa kovowol kĩ ngaa cĩnnĩ kĩ lõgõõ cĩgĩnĩk kĩ ngaay cĩk lõgõõ cĩgĩnĩk, kĩĩ katĩ kilittia nẽẽgẽ tõwõn.
8 Ngaatĩ iithiowĩ kẽlẽgẽ cĩk dĩhĩmĩk kĩ cĩk athii cĩ dĩhĩmẽ kĩ kĩballĩ kĩ kaal cĩk õvõvõt loota vẽlẽk kovowol.
9 Eteektothĩk balna kẽlẽgẽ cĩk ngayyik kĩ cĩk maacĩk Nõõwa gõõla wũ balna aduwacĩ Nyekuci ĩnõõnõ.
10 Ma vurtia cĩ wathinniok tũrgẽrẽm, ikiyyia tõwõnĩ cĩ akuuwa looc vẽlẽk.
11 Ĩthõng balna ngĩĩ erkinya cĩk Nõõwa eet etĩmma kĩ eet õmmõtõ (600) balna ngĩ ẽẽn waathĩnĩ õmmõtõ kĩ tũrgẽrẽm cĩ nyĩĩlok cĩ ramma erkita nĩcẽ, oyyie kẽbẽrẽ cĩk duwwenu, ĩthõng ilibtia maama, ĩthõng ithianaĩ tammu cobbi õrrõt ĩtĩĩla.
12 Ĩthõng balna ĩtĩĩl tammu baalinniok eet ramma kĩ wathinniok eet ramma looca.
13 Ma kõr nĩcẽ, ivitia itiothõ Nõõwa kĩ ngaa cĩnnĩ kĩ lõgõõ cĩgĩnĩk cĩk ẽẽn iyyio ẽẽ, Thẽm, Ham kĩ Javeth kĩ ngaay cĩgĩk kovowol.
14 Õvõyyĩ balna nẽẽgẽ kẽlẽgẽ buu cĩk abal eeta õlõõ, kĩ cĩk bõõnak, kĩ kĩballĩ, kĩ kaal cĩk õvõvõt loota vẽlẽk, wũk balna ẽbẽra nẽ kovowola ĩcĩtõ.
15 Ngaatĩ eektothĩcẽ kẽlẽgẽ vẽlẽk cĩk ẽẽn gõõ ramma ramma Nõõwa, cĩ maacĩ kĩ cĩ ngayyi kovowola ĩcĩtõ.
16 Ma baa ngĩ itiothõ kẽlẽgẽ kovowol kĩ baa ngĩ aduwaai Nyekuci Nõõwa, ikiyyia ũnyũk Makayyioiti katũk cĩ kovowolo.
17 Atĩĩlĩ balna tammu wathinniok cĩk ẽẽn eet ramma ẽẽ, kuumuc kĩbbĩtĩt maama looc, kataadiay kovowolĩ tiddina.
18 Arik balna tõwõnĩ, ĩthõng ĩtõõrẽ kĩbbĩt looc bĩthĩhĩnyĩk kataadiay kovowolĩ maamĩy tiddina.
19 Ma baa vurtia, ĩtooryie maama kukwẽcõ thiiryiok vẽlẽk.
20 Ĩthõng balna nga ĩtooryi maama noko kuumuc kõdõlan wuunthẽt cĩ ẽẽn thoo etĩmma thiiryiowẽy tiddina.
21 Ngaatĩ agĩĩranẽ maama neekie eet vẽlẽk kĩ kẽlẽgẽ cĩk bõõnak kĩ kaal cĩk olu kĩ kĩballĩ kĩ kaal cĩk õvõvõt loota vẽlẽk.
22 Kaala vẽlẽk cĩk aatĩ loota ngatĩ odoi, cĩk ayak tivongi cĩ rũgẽtõ adaaitõ.
23 Ĩgĩĩra thẽk balna Nyekuci kaal wũk balna ẽngẽnyca nẽ vẽlẽk, kĩĩ kũtũngek Nõõwa dõ kĩ kõrõõk cĩnnĩ, kĩ kẽlẽgẽ kĩ kĩballĩ wũk balna õkõyyĩ nẽ kovowola ĩcĩtõ.
24 Akuuwa balna maama looc wathinniok eet tur kĩ eet ramma kõmmõtõ (150).