Gerthetin cĩ eetu
6
Ma baa ngĩ ivitia ĩĩ mẽẽlĩ eeta loota ngato, ivitia itiryia nẽẽgẽ dõõlĩ cĩk ngayyik.
2 Ĩthõng baa ivitia abarrittiek lõgõõ cĩk maacĩk cĩk Nyekucak dõõ cĩk ngayyik cĩk eetu wo õrrõt, ngaatĩ atihi õõgĩ.
3 Ĩthõng thĩ, õthõõth Makayyioiti Nyekuci ĩthĩ ne, “Ĩthĩnga katĩ athii cĩ kẽlẽmacẽ Ririwac cannĩ kaavu kĩ ĩnõõgõ kuumuc, nyatarka ẽẽn nẽẽgẽ eet cĩk adaaĩ. Ĩthõng athii katĩ cĩ arũgĩ eeti ĩmma kuumuc, ĩthĩnga katĩ arũgĩ eeti kĩĩtõ erkinya cĩgĩnnẽk eet tur kĩ etĩmma (120) kũdũt.”
4 Ma wathinniok nĩĩkẽ, ivitia itiryiay eeta cĩk jakimik õrrõt loota ngato. Athĩ balna eet nĩĩkẽ Nevilim. Ĩthõng thĩ, itihit lõgõõ cĩk maacĩk cĩk Nyekucak dõõ cĩk ngayyik cĩk eetu, ĩthõng itiryia dõõlĩ. Ẽẽn balna doolia cĩkkõ eet cĩk muotĩk õrrõt, ĩthõng abulie baa lõõla õrrõt kũdũt nga ahada eeta noko.
5 Aga balna Makayyioiti gerthetin cĩ atican eeta loota ngato vẽlẽk, ĩthõng aga naboo ngatĩ gẽrtha muwẽẽnĩtĩ cĩnĩng cĩ ayak eeta thinnetinẽy cĩgĩk vẽlẽk dõõkĩthĩ.
6 Ngaatĩ aku alue Makayyioiti, ĩthõng uwuc thĩnĩn cĩnnẽ õrrõt ngatĩ ẽngẽnycanĩ ĩnõõgõ.
7 Ngaatĩ athĩnnĩ Makayyioiti ne, “Awuci thĩnĩn cannie õrrõt ngatĩ kẽngẽnycanẽ eet, ĩthõng ivitia ĩdĩmanit kaal cĩk gerthek. Nyẽ kĩgĩĩra ĩnõõgõ kĩ kẽlẽgẽ kĩ kĩballĩ kĩ kaal cĩk õvõvõt loota buu kĩĩ lõõcĩ ĩĩr.”
8 Ĩthõng thĩ, baa amĩnan Makayyioiti Nyekuci Nõõwa.
9 Ẽẽn coo iyiainit cĩ rũgẽt cĩ Nõõwa kĩ eet cĩk kõrõõk cĩnnĩ. Ẽẽn balna Nõõwa et cĩ abũnna õrrõt, kothii balna thõõth cĩ gerthe cĩ adĩman nẽ eetĩnẽy, wathinniowẽy wũk baa aavẽ nẽ, ĩthõng õwõ nẽ iriok kĩ Nyekuc.
10 Ĩthõng balna ayak nẽ lõgõõ cĩk maacĩk iyyio, cĩk athĩ Thẽm kĩ Ham kĩ Javeth.
11 Ma wathinniowẽy nĩĩkẽ, adĩman balna eeta thoothonniok cĩk ẽẽn riiriny kẽbẽrẽnĩy cĩk Nyekucak, ĩthõng uuktõy õrrõt.
12 Ma balna ngĩ ĩcĩn Nyekuci ngatĩ akuni lõõcĩ ẽgẽrẽthanini, ĩthõng eeta buu vẽlẽk cĩk loocu ẽgẽrẽthanit nẽẽgẽ goolliok cĩgĩk,
13 ikiyyia uduwak nẽ Nõõwa ethek ne, “Nõõwa, kidiima na kẽdẽcaha eet kĩ looc vẽlẽk kĩĩ lõõcĩ ĩĩr, nyatarka gerthetin kĩ jore cĩ adĩman nẽẽgẽ ẽẽ.
14 Tẽngẽnya niia kovowol kẽẽnĩy ĩcĩk õkõmĩ, ĩthõng ngẽr kẽyẽk ciithi cĩk meelĩk, ĩthõng iddilu dooliana jurrung ĩcĩtõ kĩ ngĩtĩvõrĩ buu, kĩĩ katĩ kithii cĩ atĩĩlĩ.
15 Tẽngẽnya kovowol kĩĩ maka kẽyẽk thoo eet etĩmma kĩ eet ramma kõmmõtõ (450) wuunthẽtĩ, ĩthõng kĩ thoo eet iyyio kõmmõtõ kĩ tur (75) litẽnta thõng, ĩthõng kĩ thoo eet ramma kĩ tur (45) bĩlnẽta.
16 Dĩman ngĩtĩ abung kovowol tiddin jurrung, ĩthõng ũtũngewu ngini ĩmma cĩ dĩcĩ cĩ ẽlẽnõy kĩ thoo ramma kĩĩ bẽlẽth kabanyõy vẽlẽk kovowola. Tẽngẽny ĩcĩtõ katadĩthẽ kĩĩ goolliok iyyio tiddina, ĩthõng ariwu katũk kabanyca.
17 “Kitiona katĩ na tõwõn cĩ aku ẽgẽrẽthan rũgẽt vẽlẽk cĩ aavĩ looca ĩcoo, kĩĩ katĩ kaala vẽlẽk cĩk aavĩ rũgẽtĩ cĩnĩng looca coo adaaĩ katĩna nẽẽgẽ.
18 Ĩthõng thĩ, kadĩman katĩ na kĩ aniitia ngẽrẽmngẽrẽm, ĩthõng itiowu katĩ niia kovowol, kĩ ngaa cunni kĩ dõõlĩ cugunik vẽlẽk kĩ ngaay cĩgĩk buu.
19 Kaanyi katĩ na aniitia bẽra kaalĩy ĩcĩk arũgĩ loota ngato wo vẽlẽk cĩ ngayyi kĩ cĩ maacĩ, ĩthõng ũũwẽ kovowolatõ, kĩĩ katĩ kũrũgĩt nẽẽgẽ.
20 Ĩthõng avvu katĩ kẽlẽgẽ cĩk aatĩ mĩn mĩn, ramma ramma cĩk ngayyik kĩ cĩk maacĩk kĩ kĩballĩ buu noko kĩ kaal vẽlẽk cĩk õvõvõt loota ngato kovowolatõ, kĩĩ katĩ kivitia kũrũgĩt nẽẽgẽ.
21 Õkõyyẽ katĩ niia dainit mĩn mĩn cĩk kẽlẽgẽ vẽlẽk cĩk aatĩ kovowolatõ ẽẽ, kĩĩ cunung kĩ cĩnĩng.”
22 Ma natẽ, ĩdĩman Nõõwa thoothonniok cĩkkõ vẽlẽk kĩ baa ngĩ aduwaai Nyekuci ĩnõõnõ.