Kein kĩ Abẽl
4
Ĩthõng thĩ, balna õõt ataguuthõ Adamĩ kĩ ngaa cĩnnĩ Ẽva ngaatĩ anyaini. Ma balna ngĩ utuwuay wo, ikiyyia atal nẽ ĩthĩ ne, “Elintia cĩ Makayyiokto, kũmũda na doolec cĩ maacĩ.” Ngaatĩ akanẽcĩ doolec thar cĩk athĩ Kein.a
2 Ma vurtia, ikiyyia itirria nẽ Abẽl,b cĩ ẽẽn gõtõnĩ Kein.
Ẽẽn balna Abẽlĩ tũwayyioit, ĩthõng ĩthĩ Keini evyioit.
3 Ma baa kõr ĩmma, ikiyyia ẽbẽra Keini dainit manatõ, ĩthõng anyĩk Makayyioit Nyekuc kĩĩ anyinit.
4 Ĩthõng balna ayaha Abẽlĩ atheet cĩ dĩhĩmĩ ngaatĩ acuwanĩ, ĩthõng ẽbẽra kiding cĩ adĩhĩ, ĩthõng anyĩk Makayyioit kĩĩ anyinit. Atalĩ balna Makayyioiti anyinit cĩ Abẽlĩ ẽẽ, õrrõt,
5 ĩthõng ũtũbũr anyinit cĩ Keini ẽẽ, ma natẽ, ikiyyia Keini ũcũdũrẽ, ĩthõng avarac õrrõt.
6 Ngaatĩ ajini Makayyioiti ĩnõõnõ ẽthẽcĩ ne, “Laang Kein, avaraci nyia? Angarunyana nguum cunni õrrõt noko nyia?
7 Mĩ da kĩĩ cĩ atĩcanẽ niia gii cĩ abũnna, athii woyyia yoko cĩ ebelbeli? Ĩthõng thĩ, nyatarka balna ĩdĩmanu niia thõõth cĩ gerthe, õtõgõlaai aniitia gerthetini katũga cunni, adiim agamnyi aniitia, nyĩ ẽlẽmacẽ ĩnõõnõ kijiari aniitia.”
8 Ma natẽ, uduwak Keini gõtõnĩ ethek ne, “Kõõt da kotoththi mana.” Monogo alab nẽ ĩnõõnõ thõng. Ma baa ngĩ õvvõ nẽẽgẽ õwõyyĩ mana wo, ilibothĩk Keini gõtõnĩ, ngaatĩ arui ĩnõõnõ kadaak.
9 Ma natẽ, ijin Makayyioiti Kein ethek ne, “Aavĩ gotonu Abẽlĩ ngatdang?”
Ẽdẽcĩ kẽnnẽ Keini ethei ne, “Athii cĩ kagga nana. Aneeta thẽk gõõ cĩ kebeei ĩnõõnõ?”
10 Ĩthõng othoothĩk Makayyioiti Kein ethek ne, “Nyia neccie adĩmani niia noko ẽẽ? Alueca aneeta biyyieta cĩk gotononu daaĩtha cĩnnĩ loota tõdõway.
11 Kaciinni na aniitia, kĩĩ katĩ kithii cĩ eevi mana naboo kibir jurrung, nyatarka irihit biyyieta cĩk gotononu wo loota tõdõway.
12 Ma ngĩ eevi niia mana, athii katĩ cĩ abiiri buu, ĩthõng ĩĩthĩ katĩ niia et cĩ õwõ jiena kaganoko looca nĩco.”
13 Ẽdẽcĩ Keini Makayyioit ethei ne, “Maka cĩĩnẽnẽtĩ coo kĩ aneeta õrrõt, ĩthõng woccia atamaaca ngatĩ kayahẽ.
14 Itingkawa yoko niia looca wũ balna kaavẽ na wo, ĩthõng ĩnĩnga katĩ na kedenyiay nginiwa ĩcĩ aavẽ niinia, kikiyyia katĩ na kõtõõwa jiena kaganoko, ĩthõng ngĩ ũmũdaha eeti ĩmma uruwa katĩ aneeta gõõla kaganoko.”
15 Ẽdẽcĩ Makayyioiti ĩnõõnõ ethei ne, “Athii tõ, mĩ urui eeti ĩmma aniitia, kedethi katĩ na et nĩcẽ buu ngõnana tũrgẽrẽm kijiar ukwẽẽnĩt cunni wo.” Ngaatĩ aarĩcẽ Makayyioiti Nyekuci nyamacar ẽla cĩ Keini, kĩĩ katĩ athii cĩ aruwi eeti ĩmma ĩnõõnõ katĩ ngĩ aruumõy.
16 Ma natẽ, ĩtĩnga Keini ũũk looca ĩmmanĩ ĩcĩ athii cĩ õthõõthõnẽ nẽ kĩ Makayyioit. Ĩthõng ũũk abaak looca cĩ athĩ Nood ĩcĩ aavĩ tõõna ĩcĩ alibanĩ kõrra ĩcĩ looc cĩ Ẽdẽnĩ.
Tatũk cĩ kõrõõk cĩ Keini
17 Ivitia thĩ, balna õõt ataguuthõ Keini kĩ ngaa cĩnnĩ, ĩthõng anyaawõy, ĩthõng ayait ngẽrĩnĩ, ĩthõng akattiek ĩnõõnõ thar cĩk athĩ Ẽnõk. Ngaatĩ ẽngẽnycĩ Keini kõrõõk cĩ gaalawu ĩmma cobbi, ĩthõng akattiek ĩnõõnõ thar cĩk ngẽrĩnĩ cĩnnĩ Ẽnõk.
18 Ĩthõng ikiyyia itirria Ẽnõkĩ ngẽrĩnĩ cĩ athĩ Iraad. Ma vurtia cĩnnĩ, ikiyyia itirria Iraadĩ buu ngẽrĩnĩ cĩ athĩ Mehujaẽl. Ĩthõng ikiyyia itirria Mehujaẽlĩ ngẽrĩnĩ cĩ athĩ Methuthaẽlĩ, ĩthõng ikiyyia itirria Methuthaẽlĩ ngẽrĩnĩ cĩ athĩ Lamẽk.
19 Atik balna Lamẽĩ ngaay ramma. Athĩ cobbi Adaa, ĩthõng athĩ ĩmma Thĩla.
20 Ikiyyia itirria Adaa ngẽrĩnĩ cĩ athĩ Jabal cĩ baa aku ẽẽn baatĩ eet cĩk balna abal kaal, ĩthõng abaaitõ ciithẽnẽy ĩcĩk ẽẽn tuggweta.
21 Ĩthõng ayak baa nẽ gõtõnĩ cĩ athĩ Jubal cĩ baa aku ẽẽn baatĩ eet cĩk ẽẽn belliok, ĩthõng amĩcĩ ngatĩ arui kidori kĩ ngatĩ abũẽ nyalomoru.
22 Ĩthõng itirria Thĩla ngẽrĩnĩ buu cĩ athĩ Tubal Kein cĩ baa aku ẽẽn et cĩ atura kolianĩna, meleewua, dĩlanya kĩ ijjio thẽk õõgĩ vẽlẽk cĩk atura nyekiteta. Ĩthõng baa ayak nẽ ngõõnĩ cĩ athĩ Naama.
23 Ĩthõng uduwak Lamẽĩ ngaay cĩgĩnĩk ethek ne,
“Niigia Adaa kĩ Thĩla, ĩthĩktangũ niigia aneeta,
niigia ngaay cĩk Lamẽĩ, ĩthĩktangũ da nõõnõ.
Kuruwa na et wũ anya aneeta kĩthĩ botoit,
ngĩthorowoc cĩ maacĩ cĩ uukca aneeta.
24 Mĩ ngĩ uruk eeti ĩmma Kein,
uuki katĩ nẽ ngõnana tũrgẽrẽm kijiar,
ĩthõng ma ngĩ uruk eeti Lamẽk,
uuki woccia nẽ ngõnana eet iyyio kõmmõtõ kĩ tũrgẽrẽm.”
25 Ma vurtia cĩ daaĩth cĩ Abẽlĩ, itiryia Adamĩ kĩ ngaa cĩnnĩ ngẽrĩnĩ ĩmma naboo. Atalĩ baa Ẽva õrrõt ngatĩ anyĩcẽ Nyekuci ĩnõõnõ ngẽrĩnĩ ĩmma naboo, kabarĩc Abẽl wũ baa aruk gotonia cĩnnẽ Keini. Ĩthõng akatek nẽ ĩnõõnõ thar cĩk athĩ Thẽth.c
26 Ma balna ngĩ itiwõõy Thẽthĩ, ikiyyia itirria ngẽrĩnĩ, ĩthõng akatek thar cĩk athĩ Ẽnõth. Ĩthõng ngaatĩ, thĩ baa avvu alawini eeta thaarĩy cĩk Makayyioktak.