Gerthetin cĩ Adamĩ kĩ Ẽva
3
Ĩthõng balna ẽẽn kũwaat geenyiait cĩ ijiar kẽlẽgẽ vẽlẽk wũk balna ẽngẽnyca Makayyioiti Nyekuci. Ma balna kõr ĩmma, ikiyyia ijin kũwaat ngaa ethek ne, “Ennecung da thẽk balna Nyekuci agiitia ne, ‘Nyĩ adukcu kẽẽn cĩk abiiri manatõ ĩcĩtõ wo dĩdĩ’?”
2 Ẽdẽcĩ ngaa ethei ne, “Enneccet nẽnnẽ thẽk Nyekuci ne, ‘Uduit kẽẽn cĩk manu wo,
3 ĩthõng thĩ, nyĩ adukcu kẽẽt cĩ aavĩ kõrgẽna cĩ manu wo, kõdẽ nẽnnẽ awumnyu kaganoko. Mĩ uwumtu kir, adaaknu katĩna!’ ”
4 Ẽdẽcĩ kũwaat ethei ne, “Athii katĩ cĩ adaaknu.
5 Õthõõth Nyekuci ketee, nyatarka aga athĩ ne, mĩ uduktu kẽẽt coo, oyyi katĩ kẽbẽrẽ cuguk, ĩthõng agayyu thoothonniok cĩk abũnna kĩ cĩk gerthek, kĩĩ katĩ aavut kĩ Nyekuci.”
6 Ngaatĩ thĩ baa acĩnĩ ngaa nyegerua cĩk kẽẽtak ngĩ dĩhĩmẽ ngatĩ aduwi, ĩthõng naboo umuk ngatĩ woccia ẽgẽẽnyĩ nẽ kaavu kĩ Nyekuci. Ngaatĩ aduucanẽ, ĩthõng uduwa, ĩthõng anyĩk maac cĩnnĩ õõgĩ kuduk, ngaatĩ aduwi maac.
7 Ma baa ngĩ uduit nẽẽgẽ kẽẽt nĩcẽ ẽẽ, ivitia iyiethia nẽẽgẽ ngatĩ aatẽ tdilanyany. Ngaatĩ adĩmananĩ ballõk cĩk kurrutocak, ĩthõng umutti eleeti cĩgĩk.
8 Ma jiatĩn nĩcẽ, ĩthĩraritõ nẽẽgẽ Makayyioit Nyekuc ngatĩ õwõyyĩ manatõ tõõ, ĩthõng otongollie nẽẽgẽ Makayyioit Nyekuc ngaatĩ õvvõ alugunyẽnĩ kẽẽnĩy ĩcĩtõ.
9 Ma natẽ, ũtũvvũ Makayyioiti Nyekuci Adam ethek ne, “Adam! Aavẽ ngatdang?”
10 Ẽdẽcĩ Adamĩ athĩ ne, “Kathikni na aniitia ngatĩ õwõyyẽ manatõ tõõ, ĩthõng kotongolei na aniitia, nyatarka kaavẽ tdilanyany ngaatĩ kalugunyẽnẽ.”
11 Ẽdẽcĩ Nyekuci ĩnõõnõ ethei ne, “Ngẽnẽ cĩ etheeci aniitia ne, aavẽ tdilanyany wo? Uduwu kette niia kẽẽt wũ balna ketheci na ne, nyĩ adui?”
12 Ẽdẽcĩ eeti ethei ne, “Ngaa wũ balna anya niia cĩ anya nyẽgẽr wo, ngaatĩ thĩ kaduwue.”
13 Ngaatĩ ajini Makayyioiti Nyekuci ngaa nĩcẽ ẽthẽcĩ ne, “Nyia kette cĩ ĩdĩmanu niia wo?”
Ẽdẽcĩ ngaa neccie Nyekuc ethei ne, “Anũmnũmmanna kũwaat aneeta, ĩthõng kuduwa.”
Ĩcĩĩnõõy Nyekuci
14 Ngaatĩ ẽthẽcĩ Makayyioiti Nyekuci kũwaat ne,
“Kĩ yoko ngĩ ĩdĩmanu niia ketee wo,
kaciinni na aniitia õrrõt kõrgẽna cĩ kelegenu vẽlẽk loota ngato.
Ẽtẽrẽhanĩ kõr coo, ogoloti katĩ gõõ niia loota,
ĩthõng uduwu tõdõwa
rũgẽta cunni kũdũt.
15 Kaanyi katĩ na aniitia ĩthĩ miroit cĩ ngaa coo,
ĩthõng ĩĩtõ doolia cugunniek kĩ dõõlĩ cĩgĩnĩk mĩrõk.
Ĩthõng aaththi katĩ ngẽrĩnẽ aniitia õõ cunni, ĩthõng uruina,
ĩthõng adai katĩ niia ĩnõõnõ ginyginyoc cĩnnĩ.”
16 Ĩthõng ethek Nyekuci ngaa ne,
“Kĩtoori katĩ na wuciith katĩ ngĩ ũũkca doolec,
ĩthõng katĩ gõõ ũtũwa niia dõõlĩ wuciitha.
Adiimi katĩ gõõ niia maac cunni,
ĩthõng ĩnõõnõ katĩ cĩ agamnyi aniitia.”
17 Ĩthõng ennek Nyekuci Adam ne,
“Kĩ yoko kette ngĩ ithiwu niia thõõth cĩ ngaa cunni wo,
ĩthõng uduwu nyẽgẽr wũ balna kethecung na ne,
‘Nyĩ adukcu wo.’
“Kĩcĩĩna na tõdõwa, nyatarka thõõth cĩ ẽgẽrẽthani niia wo.
Amũda katĩ niia dainit cunni mũlũwẽy
wathinniowẽy ĩcĩk rũgẽt cunni vẽlẽk.
18 Ẽhẽcĩ katĩ gõõ dwuani mana cunni,
nyatarka gerthetin cunni wo,
ĩthõng katĩ gõõ urugu niia daintia cĩ manu.
19 Amũda katĩ gõõ niia dainit cunni vẽlẽk mũlũwẽy
kuumuc ngaatĩ amiirẽnẽ õkõyyẽ tõdõway.
Engenyciay balna niia tõdõwaca,
ĩthõng amiire katĩ niia õkkõ tõdõway.”
20 Ngaatĩ thĩ baa akanẽcĩ Adamĩ ngaa cĩnnĩ thar cĩk athĩ Ẽva, nyatarka aku katĩ nẽ ẽẽn yaatĩ eet vẽlẽk cĩk katĩ arũgĩ.
21 Ma natẽ, ĩdĩmana Makayyioiti Nyekuci ceremua cĩk ẽẽn ruccie cĩk kelegenu, ĩthõng anyĩk Adam kĩ Ẽva kitihimit.
22 Ĩthõng umuk Makayyioiti Nyekuci ĩthĩ ne, “Egeenyitõ eeta cĩkkõ aavutõ kĩ naaga, agaacõ thõõth cĩ abũnna kĩ cĩ gerthe. Adiim thẽk kĩcaac naaga ĩnõõgõ ngĩ aduk nẽẽgẽ kẽẽt cĩ rũgẽtõ, kĩĩ katĩ athii cĩ arũgĩ nẽẽgẽ kũdũt.”
23 Ngaatĩ ingkawĩ Makayyioiti Nyekuci ĩnõõgõ manatõ cĩ Ẽdẽnĩ wo, kõõt ngatĩvõrĩ, ĩthõng anyĩk ĩnõõgõ kevitõ tõdõwa wũk balna engenycianĩ nẽẽgẽ.
24 Ma balna ngĩ itingka Makayyioiti Nyekuci ĩnõõgõ manatõ cĩ Ẽdẽnĩ wo, ikiyyia uduwak nẽ anjĩlẽt kebeita tõõna ĩcĩ alibanĩ kõr mana nĩcẽ. Õmõnnĩ anjĩlẽta nyetubat cĩ alanyĩt kalaam eet cĩk avvu adiim aduk kẽẽt cĩ rũgẽtõb wo.