2
Ma baa ngĩ ẽdẽcak Nyekuci ngatĩ ẽngẽnycanĩ tammutiddin kĩ looc kĩ kaal vẽlẽk cĩk meelĩk.
2 Kõr balna cĩ ẽẽn tũrgẽrẽm, ẽdẽcak Nyekuci tiic vẽlẽk, ikiyyia uyuwuth balna ma ngĩ ẽẽn lõõcĩ tũrgẽrẽm.
3 Ĩthõng ikiyyia balna agatan Nyekuci kõr cĩ ẽẽn tũrgẽrẽm, ĩthõng anyĩk kĩĩ kõr cĩ dĩhĩmĩ, nyatarka ikiyyia uyuwuth nẽ tiica cĩ tengenyinit cĩnnĩ vẽlẽk.
4 Gõõl cĩ baa ẽngẽnycanĩ Makayyioitia Nyekuci tammutiddin kĩ looc wo coo.
Adam kĩ Ẽva
Ma baa ngĩ ẽngẽnyca Nyekuci Makayyioiti looc kĩ tammutiddin,
5 athii balna kẽẽna, ĩthõng athii kartẽ tõ, nyatarka balna nga kitiona Nyekuci Makayyioiti tammu, ĩthõng balna athii eeti cĩ ẽẽv looc buu tõ.
6 Ĩthõng balna anyĩk Nyekuci maam cĩk avvu tõdõway kocoit looc kĩĩ cũlak.
7 Ngaatĩ õngõnyanĩ Makayyioiti Nyekuci tõdõwac, ĩthõng ẽtẽngẽnyaaĩ et cĩ maacĩ, ĩthõng ĩtĩvongĩk ngõõt, ĩthõng ikiyyia eeti ũrũga.
8 Ngaatĩ ẽngẽnycanĩ Makayyioiti Nyekuci mana ĩmma tõõna ĩcĩ alibanĩ kõrra, looca cĩ athĩ Ẽdẽn, ĩthõng arĩk et cĩ ẽngẽnyca nẽ ẽẽ, natẽ.
9 Ẽngẽnyca balna Makayyioiti Nyekuci kẽẽn vẽlẽk cĩk abũnna õrrõt ngatĩ kacĩnĩ kĩ ngatĩ kadui kĩĩ dainit. Ĩthõng kõrgẽna cĩ manu, aatĩ balna kẽẽna ramma, kẽẽt cĩ rũgẽtõb kĩ kẽẽt cĩ kagawĩ thõõth cĩ abũnna kĩ cĩ gerthe.
10 Arik balna lĩĩlĩ ĩmma manatõ ĩcĩtõ Ẽdẽna, ĩthõng anyĩk mana kĩĩ cũlak. Ma baa ngĩ athanni duwwua neccie ẽẽ, ikiyyia ẽngẽrẽ ĩthĩ goolliok wec.
11 Athĩ baa lĩĩl cĩ owu Pithon, arik nẽ ẽdẽẽm looc cĩ athĩ Havila, ngĩtĩ aavẽ daabĩ.
12 Dĩhĩm daabĩ cĩ looc nĩcẽ, ĩthõng mõõcacĩ cĩ looc nĩcẽ õngõlĩ ẽmmẽdẽ, ĩthõng ataalĩth bĩĩyẽna õrrõt cĩk abũnna natẽ.
13 Athĩ lĩĩl cĩ ẽẽn ramma Gihõn, arik nẽ ẽdẽẽm looc cĩ athĩ Kuuth.
14 Athĩ lĩĩl cĩ ẽẽn iyyio Tigirith, arik nẽ õkkõ ĩcĩ tõõn cĩ alibanĩ kõrra ĩcĩ looc cĩ athĩ Athiria. Athĩ lĩĩl cĩ ẽẽn wec Yuvarẽth.
15 Ma baa natẽ, ũũwĩ Makayyioiti Nyekuci et wũ balna ẽngẽnyca nẽ ẽẽ, manatõ cĩ Ẽdẽnĩ kũũk eeti kẽẽvõy, ĩthõng ẽbẽk mana.
16 Ngaatĩ irionĩcẽ Makayyioiti Nyekuci ĩnõõnõ ẽthẽcĩ ne, “Duk kẽẽn cĩk abiiri cĩk aatĩ manatõ nĩco wo vẽlẽk,
17 ĩthõng thĩ, nyĩ adui kẽẽt cĩ anyi aniitia gaa thõõth cĩ abũnna kĩ cĩ gerthe wo. Mĩ uduwu kir, adaai katĩ niia dĩdĩ!”
18 Ma natẽ, õthõõth Makayyioiti Nyekuci ĩthĩ ne, “Athii cĩ abũnna ngatĩ aavẽ eeti cĩ maacĩ wo nẽdõ, nyẽ kẽtẽngẽnyak na gõõnĩ kẽẽl ĩnõõnõ.”
19 Ĩthõng, õngõnya Makayyioiti Nyekuci tõdõwac, ĩthõng ẽtẽngẽnya kẽlẽgẽ cĩk aatĩ mĩn mĩn kĩ kĩballĩ cĩk aatĩ mĩn mĩn, ĩthõng ayahak Adam kakatek thaaryiok.
20 Ngaatĩ akanẽcĩ Adamĩ kaal cĩk arũgĩ cĩk olu kĩ kĩballĩ cĩk akul ngõõta tammuatiddina kĩ kẽlẽgẽ vẽlẽk cĩk aatĩ bõõnatõ thara. Ĩthõng thĩ, balna nga kũmũda Adamĩ gõõnĩ cĩ woccia ẽẽl ĩnõõnõ.
21 Ngaatĩ anyĩcẽ Makayyioiti Nyekuci Adam kitihit kĩnyaha, ĩthõng ĩdĩm onyit cĩ Adamĩ codoi, ĩthõng ĩdĩĩt ngĩtĩ adĩmĩ nẽ onyit ẽẽ.
22 Ĩthõng thĩ, ĩdĩma Makayyioiti Nyekuci onyit nĩcẽ, ĩthõng ẽtẽngẽnyaaĩ ngaa cĩ ngayyi, ĩthõng ayahak ĩnõõnõ Adam.
23 Ngaatĩ õthõõthĩ Adamĩ athĩ ne,
“Et wanĩco cĩ aavĩ kĩ na coo,
cĩ engenyciay onyita cannĩ ẽla cannĩ!
Athĩ thar cĩgĩnĩk ‘Ngaa,’
nyatarka balna engenyciay nẽ eta ĩcĩ maacĩ.”
24 Ĩnõõnõ thĩ cĩ ũũngnĩcẽ eeti kõrõõk cĩ baatĩnnĩ kĩ cĩ yaatĩnnĩ, ĩthõng ũũk itiwõõy, ĩthõng õõt ũrũmtẽ kĩ ngaa cĩnnĩ kĩĩtõ ẽlẽ codoi doo.
25 Aatĩ baa eeti kĩ ngaa cĩnnĩ tdilanyany, ĩthõng athii balna nẽẽgẽ cĩ angawanĩ.