Nyaraga cĩ
Thianantõ
Gõõl cĩ ẽngẽnycanĩ Nyekuci looc
1
Baa thiananta, ẽngẽnyca balna Nyekuci tammutiddin kĩ looc.
2 Ĩthõng ma balna nganĩ kẽtẽngẽnya Nyekuci tammutiddin kĩ looc, kothii balna gii cĩ aavĩ loota ngato. Muwur balna dõ kĩ maam cĩk akuuwa looc, ĩthõng thĩ, balna õwõ Ririwacĩ cĩ Nyekuco õyõkõn maam tiddina.
3 Ĩthõng thĩ, õthõõth Nyekuci ĩthĩ ne, “Anyĩk lanyĩt katalany.” Ngaatĩ alanycĩ lanyĩtĩ nĩco noko.
4 Ĩthõng ma balna mĩ acĩn Nyekuci ngatĩ abũnnanĩ lanyĩtĩ wo, ikiyyia ẽngẽr nẽ lanyĩt kĩ muwur kaavutõ mĩn,
5 ĩthõng akatek Nyekuci lanyĩt thar cĩk athĩ “Waathĩn.” Ĩthõng akatek muwur thar cĩk a “Baalin.” Ĩthõng balna ikiyyia jiatĩnĩ kĩ ngerethietĩn, kõr thĩ baa cĩ owu neccie.
6 Ĩthõng thĩ, õthõõth Nyekuci naboo ĩthĩ ne, “Anyĩk kaavu ngini ĩmma kaganoko kẽngẽr maam kĩĩtõ goolliok ramma, maam cĩk aatĩ tammuatiddina kĩ maam cĩk loocu.”
7 Ngaatĩ aarĩcẽ Nyekuci ngĩtĩ aavĩ kaganoko cĩ ẽngẽr maam cĩk diinu kĩ cĩk loocu kaavutõ mĩn. Ĩthõng thẽk utugu noko dĩdĩ.
8 Ikiyyia akatek Nyekuci ngĩtĩ aavĩ kaganoko wo ethek ne, “Tammutiddin.” Ĩthõng balna ikiyyia jiatĩnĩ kĩ ngerethietĩn kõr thĩ baa cĩ ẽẽn ramma neccie.
9 Ikiyyia õthõõth Nyekuci naboo ĩthĩ ne, “Anyĩk maam cĩk aatĩ loota kuluttie ngatĩ odoi, kĩĩ katĩ kedenyciay tõdõwa.” Ĩthõng balna utugu noko dĩdĩ.
10 Ngaatĩ akanẽcĩ Nyekuci tõdõwa ẽthẽcĩ ne, “Looc,” ĩthõng akatek maam ethek ne, “Bũlũc.” Ĩthõng balna ĩcĩn Nyekuci ngatĩ abũnnanĩ kaala cĩkkõ vẽlẽk.
11 Ĩthõng thĩ, õthõõth Nyekuci naboo ĩthĩ ne, “Anyĩk looc vẽlẽk kibir, ĩthõng kinyomona cĩk abiiri kibiritõ jurrung.” Ĩthõng balna utugu noko dĩdĩ.
12 Ĩthõng ukullia kẽẽna cĩk abiiri, kẽẽn cĩk ayak nyegerua mĩn mĩn kĩ cĩk ayak bur mĩn mĩn kĩ kartẽ cĩk ayak nyegerua mĩn mĩn. Ĩthõng balna ĩcĩn Nyekuci ngatĩ abũnnanĩ kaala cĩkkõ vẽlẽk.
13 Ĩthõng balna ikiyyia aavu jiatĩnĩ kĩ ngerethietĩn, kõr thĩ baa cĩ ẽẽn iyyio neccie.
14 Ĩthõng thĩ, õthõõth Nyekuci naboo ĩthĩ ne, “Anyĩk kedenyciay lanyĩttiowua tammuatiddina, kengerit waathĩn kĩ baalin, kĩĩ katĩ keyeliay gõõl cĩ agawini wathinniowa kĩ erkinya kĩ wathinniok cĩk agawini attienĩ kĩ lõõlõ,
15 ĩthõng anyĩk ĩnõõgõ kũtũkũlĩt looc.” Ĩthõng balna utugu noko dĩdĩ.
16 Ẽngẽnyca Nyekuci lanyĩttiok cĩk tiirtik ramma, kõr kĩ nyĩĩlok kũtũkũlĩt looc. Cobbi kõrra kũtũkũlõy waath, cĩ dĩcĩ nyĩĩloĩ kũtũkũlõy baal. Ẽngẽnyca nẽ mũnyũny buu.
17 Ngaatĩ aarĩcẽ nẽ ĩnõõgõ tammuatiddina kũtũkũlĩt looc,
18 ĩthõng ikiyyia aanyĩk kõr katalany waath, ĩthõng aanyĩk nyĩĩlok katalany baal, kẽngẽr lanyĩt kĩ muwur. Ĩthõng balna ĩcĩn Nyekuci ngatĩ abũnnanĩ kaala cĩkkõ vẽlẽk.
19 Ĩthõng balna ikiyyia aavu jiatĩnĩ kĩ ngerethietĩn, kõr thĩ baa cĩ ẽẽn wec neccie.
20 Ĩthõng thĩ, õthõõth Nyekuci naboo ĩthĩ ne, “Anyĩk kaal cĩk meelĩk õrrõt cĩk arũgĩ kaavutõ maamĩytõ, ĩthõng anyĩk kĩballĩ kukulit tammuatiddina.”
21 Ikiyyia ẽtẽngẽnya Nyekuci kaal vẽlẽk cĩk arũgĩ cĩk õwõ maamĩytõ, kĩ kẽlẽgẽ cĩk obbitik vẽlẽk maamĩytõ cĩk aatĩ mĩn mĩn, kĩ kĩballĩ cĩk aatĩ mĩn mĩn cĩk akul kavutẽnẽy tammuatiddina. Ĩthõng balna ĩcĩn Nyekuci ngatĩ abũnnanĩ kaala cĩkkõ vẽlẽk.
22 Ma balna ngĩ ikiyyia agatan Nyekuci ĩnõõgõ, ĩthõng ethek ne, “Itirrit ĩĩtõ mẽẽlĩ maamĩytõ, ĩthõng anyĩk kĩballĩ buu kitirrit kĩbbĩtĩt looc.”
23 Ĩthõng balna ikiyyia aavu jiatĩnĩ kĩ ngerethietĩn, kõr thĩ baa cĩ ẽẽn tur neccie.
24 Ĩthõng thĩ, ikiyyia õthõõth Nyekuci naboo ĩthĩ ne, “Anyĩk kẽlẽgẽ cĩk bõõnak kĩ cĩk olu cĩk obbitik kĩ cĩk kĩdĩk kedenyciay loota vẽlẽk.” Ĩthõng balna utugu noko dĩdĩ.
25 Ngaatĩ ẽngẽnycanĩ Nyekuci kẽlẽgẽ cĩk bõõnak cĩk aatĩ mĩn mĩn, kĩ cĩk olu buu cĩk aatĩ mĩn mĩn, kĩ kaal vẽlẽk cĩk kĩdĩk cĩk õwõ loota. Ĩthõng balna ĩcĩn Nyekuci ngatĩ abũnnanĩ kaala cĩkkõ vẽlẽk.
26 Ĩthõng õthõõth Nyekuci naboo ĩthĩ ne, “Kẽtẽngẽnyca eet cĩk aatĩ kĩ naaga, kĩĩ katĩ kuthutti kulugua, kĩballĩ kĩ kẽlẽgẽ cĩk obbitik kĩ cĩk kĩdĩk vẽlẽk cĩk õwõ loota.”
27 Ĩthõng ẽtẽngẽnya Nyekuci et colli kaavu kĩ nẽ, ẽngẽnyca balna nẽ et cĩ maacĩ kĩ et cĩ ngayyi kaavutõ kĩ nẽ.
28 Ikiyyia agatan nẽ ĩnõõgõ ethek ne, “Ayait dõõlĩ cĩk meelĩk, kĩĩ katĩ kivitia kagamit looc, kĩ kulugua cĩk aatĩ bũlũcatõ, kĩ kĩballĩ cĩk aatĩ tammuatiddina, kĩ kẽlẽgẽ cĩk loocu vẽlẽk.”
29 Ĩthõng thĩ, õthõõth Nyekuci naboo ĩthĩ ne, “Kaanyung na kinyomo kĩ kẽẽn cĩk abiiri vẽlẽk kĩĩ dainit cunung.
30 Ĩthõng kaanyĩha kẽlẽgẽ kĩ kĩballĩ kĩ kaal vẽlẽk cĩk õwõ loota, kegeco kartẽ kĩ kẽẽn cĩk cũlaĩk vẽlẽk loota ngato.” Ĩthõng balna utugu noko dĩdĩ.
31 Ikiyyia ĩcĩn Nyekuci ngatĩ abũnnanĩ kaala wũk balna ẽngẽnyca nẽ wo vẽlẽk. Ĩthõng balna ikiyyia aavu jiatĩnĩ kĩ ngerethietĩn, kõr thĩ baa cĩ ẽẽn tõrkõnõm neccie.