9
1 Dɩ balamɔɩ thɔ̃thɔ̃daar thu kɔɔ ʋnɛ ɔɔ tutuu, dɩ ɩ̃ yɩ ƴepələ̃bireekɛ kɔɔ thɛnɩ ƴũ a ji thɩɩra, a 'lɛ thɛrɛ 'lee kõkor lakile.
2 Dɩ a gbaar a khɛrna thɛrɛ 'lee kõkorʋra, dɩ isiir the le dɩ ga-n jʋʋn a ho dɔ kɔ̃tɩ̃ isiir, dɩ wire na jɩɛ birəre kõkor isiirraale.
3 Dɩ toosõosɔ kɔɔ ther isiirraale a bɩ̃bɩlã thɩɩra, dɩ wɩ kɔɔ 'lɛr punone dɩɩ mãkhana punoneekɛ lana thɩɩra n hananɩ.
4 Dɩ wɩ kɔɔ so warɛ ayɩ, wa-n cʋʋ hʋɔn thɩɩra thɩ̃ɛ, dɩ thɩ̃ɛɛkɛ phonɩ gɩ, dɩ thɩra ga, sɩ tɩbɩla dɩbara, kɛ na hananɩ Thãgbaa jẽ awɩ kobirə ga.
5 Wa kɔɔ 'lɛ hʋɛ a na kʋ tibilə', sɩ kpoore wa kpoo war a na cʋʋna pora yemɔɩ; dɩ kpooreekɛra wa kpoo warnɩ mɔ̃ laan n thanɩ tibil dɩ a-n khʋʋ, mɛ̃ ga ha.
6 Ga bɔɔle tɩbɩla na-n ƴaalɛ khir sɩ wa yɩ ga; khi thue na fʋ wɛr, sɩ khir na car sɩ na sɩ war.
7 Toosõosɔɔle hʋrɛ gãgʋʋsɔɔkɛ wɩ-n gbɛbɩnɩ wɩ jalna kʋʋr. Wɩ subire thɩ̃ɛɛkɛ hɔnɩ dɛ fãgadaar kpɩɛr awɩ yʋɔ, sɩ awɩ ƴɛ ho tibil ƴɩɛ.
8 Wɩ hananɛ yʋsuune dɩɩ ho khɛraa yʋsũ, sɩ awɩ nyɩ̃ ho sidũ'ũ nyɩma.
9 Dɩ wɩ hananɛ dakha kũkũ kɛɛdaa dɩɩ ho thɛ dɩ wɩ kɛɛ, dɩ awɩ gbɛl n helle mɔ̃kɛ gãgo hotoro jɔjʋɔ n canɩ lõ kʋʋrra dɩ a-n tii.
10 Wɩ hananɛ sʋʋ dɩɩ ho lã sʋʋ a hana tha paar cɩba cɩba, dɩ awɩ sʋraalera awɩ puno ha, kɛ wa-n cʋʋnanɩ tɩbɩla puure gɩ dana pora yemɔɩ.
11 Awɩ fãgadaarɩkɛ dɔ warnɩ yʋʋ dʋɔn thɛrɛ 'lee kõkorʋʋ thɔ̃thɔ̃daar thu. Ɔɔ i na ebirə thɩmɩɩr n dʋɔn Abadɔ̃, sɩ gɩrɛkɩ thɩmɩɩr wɩ-n wena Apolɩyɔ̃; i kɩrʋ dʋɔn gbõgolõdaar.
12 Caca puu 'lɛr kar, sɩ agɩpɩ yenyɔ puu 'lɛr hale wo a na kpaan.
13 Dɩ thɔ̃thɔ̃daar thu maadõdaar kɔɔ ʋnɛ ɔɔ tutuu, dɩ ɩ̃ nɩɛ nʋɔ dɩɩ the dɛ bonɩ ji paar ʋma yenana, kɛ hanɩ Thãgbaa ƴɛra,
14 a so thɔ̃thɔ̃daar thu maadõdaarraakɛ hananɩ tutuu ayɩ: Thʋba thɔ̃thɔ̃daar thu yenãakɛ wɩ lini Efɩratɩ mɩɩr kɔ̃tɩɩna a faa.
15 Dɩ wɩ kɔɔ thʋbɩrɛ thɔ̃thɔ̃daar thu yenãale kɛ gbɛbanɩ pɩ ga lɩɛrraale, na ga wirəəle, na ga poraale, na ga yɛraale, wɩ kʋrɛ tibil der pa bɩɛl der paar yẽtherra.
16 Dɩ awɩ sɔrasɩsɔɔkɛ tɔɔnɩ gãgʋʋsɔra kɔɔ har gbɩlanɩ der paar gbɩlanɩ ɔɔ der pa taanyɔ. Thale mɩ kɔɔ nɩɛ dɩ wɩ ha.
17 Ɩ̃ thɩ̃ nɩrɔra thakɛ mɩ kɔɔ yɩ gãgʋʋsɔ na wɩrɛ jʋnɛ wɩnɩ dɩ wɩ ha: Wɩ kɔɔ hananɛ kũkũ kɛɛda sɩɛsɔ dɩɩ ho dɔɔ, na dathʋ̃phʋaasɔ, na dodaasɔɔkɛ hɔnɩ girbi. Sɩ gãgʋʋsɔɔ yʋʋle hor sidũ'ũ yʋʋ, sɩ dɔɔ na-n the awɩ nɔɔ, na isiir, na girbi.
18 Dɩ tibil der pa bɩɛl der paar yẽtherra kɔɔ khiire thɩlkena yẽtherraale kɛ dɔnɩ dɔɔ, na isiir, na girbi, kɛ n thɛnɩ gãgonaalee nɔɔ.
19 Gɩdonɩ gãgʋʋsɔɔlee puno, awɩ nɔra gɩ ha na awɩ sʋra. Awɩ sʋ hor siisɔ, a hana yʋʋ, dɩ gɛrra wɩ-n cʋʋna puurera.
20 Sɩ tibil ƴɩrɛ sɛnɩ, kɛ thɩlke caale na kʋna', wa-n debi haarrakɛ sɩ wɩ faa gɩrɛ awɩ nyɛ̃ n cʋʋna', na mɔ̃ wɩ-n fʋɔrnɩ kɔ̃tɛɛbiisɔa', na thɩlaakɛ dɔnɩ dɛ na dɛ buloə', na thɛ na bokana ga, na thɩra ga, kɛ na hananɩ yire dɩ wɩ yɩna ga, dɩ nũu gɩ dɩ wɩ nɩna ga, dɩ nɛɛ gɩ dɩ wɩ ɩɩrna ga.
21 Wa-n debi haar dakha sɩ wɩ faa awɩ tɩɩ kʋa', na awɩ sidumo thɩ̃ cʋa', na awɩ bɔdɛl cʋa', na awɩ yuə'.