1
1 Mɛr Juudiikɛ dɔnɩ Jeju Kirisitii thɔ̃daar, a dona Jakɩɩ õkuun, thɔna sɛbɛɛkɛ a ha wɩrɛɛkɛ Thãgba Thɩrɛ wenɩ a na na wɩ dakha, kɛ dɔnɩ wɩrɛ Jeju Kirisiti n bɛrnɩ.
2 Thãgba na-n dɔna nɩ bʋɔ jɔɔ, a na-n hana nɩ dakha ha ɩɩ jɔɔ, a cʋɛ nɩ nɩ jɩɩ jɩ ɔɔ naʋ jɔɔ.
3 Nɛrɛɛkɛ mɩ-n nanɩ, ƴaalɛɛkɛ mɩ kɔɔ hananɩ ɩ̃ hara dʋɔn ɩ̃ khere nar sɛbɛ taarɛraakɛ sɩ bulni khaa thɩmɩɩra, dɩ mɩ yɩ gɛr dɩɩ do dɔ ɩ̃ khere nar ger phubi ɩ̃ kpãkpãa nar nɩ kɛ̃kɛrɛ̃ na-n pɛ ha pɛdaaraakɛ tɩɩ phuusɔ 'lɛnɩ babɩɛl khorr.
4 Gɩdonɩ ɩkhaa tibilsɔ kɔɔ wolone a lõ anɩ thɩ̃thɩɩn; tɩbɩla wɛɛkɛ na-n therananɩ Thãgba ga, wɩ debire Thãgbaa bɔ jɩ thɩmɩɩ ga-n jala mɔ̃kɛ awɩ khaakhaar thɩ̃ cʋʋ hanɩ, wɩ bor dakha Jeju Kirisiti asɩ Kɔ̃tɩ̃ bɩɛl 'lẽ'lẽ'lẽekɛ dɔnɩ fãgadaar. Wɛr dɔ tɩbɩlaakɛ awɩ so heen kɔɔ maanɩ kherere.
5 Nɛrkɛ jɩɛnnɩ ga thɩ̃sɔɔlera fɛʋ mɔ̃kɛ gɩ hanɩ, sɩ mɩ-n ƴaalɛ ɩ̃ bir ɩ̃ khe nar wo nɩ jɩna dɩ ɔbɔɔkɛ Kɔ̃tɩn kɔɔ taanɩ ɔɔ too Ejipiti dɩɩra pɩ, wɩrɛ na kɔɔ pɩɛnɩ haara', a kɔɔ bũburõ wer.
6 Nɩ jɛna dakha dɩ thɔ̃thɔ̃daar thusɔɔkɛ kɔɔ faanɩ gɩrɛ wɩ pɛ warnɩ, wa kɔɔ too dakha awɩ pa ga, a kɔɔ li wer khorr a faa dahulõ paar dabirəra, phaphapha gɩ dana wi kɔ̃tɩ̃ɩkɛ a na kɩɩlna wɩnɩ.
7 Nɩ jɛna dakha Sɔdɔm na Gɔmɔɔr na awɩ dɩ khudaraada, kɛ kɔɔ faanɩ awɩbara bɔdɛl cʋʋrɛra oti, dɩ wa-n cʋʋna gɩrɛ Thãgba na kɔɔ tini tibil a cʋɛa'; wɩ kɔɔ 'lɛr so heene khorr dɔɔra, dɩ gɩrɛra dana wɩnɩ dor gɩrɛ thɩ̃ nɩrɔrɛ tɩbɩlala fɛʋ.
8 Mɛna tɩbɩlaale n yɛnɩ thɩ̃ɛ ɩnɩ yɩ ha dakha, awɩ tomɩ wɩ-n bise, wɩ-n beesire dakha Kɔ̃tɩnɩ fãga hana dɩ wa-n kpɛna ƴũ fãgadarasɔ.
9 Mɩsɛlɩkɛrakɛ dɔnɩ Thãgbaa thɔ̃thɔ̃daar thu kɔ̃tɩ̃ɩ, ɔbɔɔkɛ sʋʋ kɔɔ ɩɩrnɩ dɩ wa-n bana kha na Satã Mʋɩjɩɩ forra, sɩrakɛ aa kɔɔ heenuu sor na kpɛra', sɩ gɩrɛ a sʋʋraanɩ dɩbara dʋɔn: Kɔ̃tɩn n pɛ far sor.
10 Sɩ tɩbɩlaale wer, gɩrɛ wa jɩnɩnaka' wɩ-n kpɛ gɛr, sɩ gɩrɛ wɩ jɩnɩ hɔ̃ nʋ̃ khaa dɩɩ do mɛ̃ gɩ-n do, gɛr dɔ gɩrɛ na kʋɛa wɩnɩ.
11 Ga puu warɛ dɛ, gɩdonɩ Kayɛ̃ɛ hʋ wɩ gba a lona dakha dɩ paarra war ƴaalɛla Balamɩ kha, wɩ bũburone mɔ̃ wɩ ɩɩrnanɩ lãʋ Koree kha.
12 Pheru wɩ do mɔ̃ wɩ-n hanɩ anɩ naʋ dɩko kho pa sɩ dɩ wɩ gɔ lõ khaakhaar cʋʋrɛra, sɩ yicuru na-n fʋ wa'; wa-n therna tibil saagado awɩbara gaaga. Wɩ hʋrɛ thãgbaakɛ n jonanɩ sɩ dɩ jɩɛ n ti gi; wɩ hʋrɛ dakha thɩraakɛ dananɩ sɩɩr sɩ ga-n sa'; thɩr khɩna yɛɛkɛ wɩ phiirni faa.
13 Wɩ hʋrɛ lanyʋɔnɩkɛ jɩɛ na-n sɩrɔnɩ cɔcɔa', awɩ yicur thɔ̃ cʋʋ n ther yɔkhɔrɔ̃ khaa. Wɩ hʋrɛ dakha ƴepələ̃beekɛ n fileneni bababa; pa hulõ paarɩkɛ birəneni tĩtĩtĩ Thãgba thɩɩn khorr dɩ ga-n pɩɛr wɩ.
14 Sɩ Enɔkɩ, mama kɔ̃tɩn, kɛ dɔnɩ makonyɔdaarɩkɛ Adã karɔnɩ sɩ dɩ kpaan, a kɔɔ mɩɩrɛ awɩda dɩɩ do bʋʋr gɩ dɩ bo ayɩ: «Kɔ̃tɩn ɩnɛ na ɔɔ thɔ̃thɔ̃daar thusɔ tə̃tə̃tə̃,
15 a kɩɩlna tɩbɩla fɛʋ, a heen wɩrɛ fɛʋʋkɛ na-n theranaana' sor, gɩ the awɩ thɔ̃ puurəəkɛ wɩ kɔɔ cʋʋnɩ Thãgbara, na awɩ thɩmɩɩ kpallaakɛ wɛr sopugodaraalera na-n theranaana' kɔɔ mɩɩraanɩ.»
16 Tɩbɩla wɛɛkɛ hũhuune donɩ awɩda na cɩ̃cɩmanɛ; wɩ-n ɩɩrɛ mɔ̃ awɩ ha pɩɛr hanɩ; i ƴaal thɩmɩɩ haar n thɛ wɩ nɔɔ; wɩ-n fɩɩlɛ tɩbɩla wa-n 'lɛrɔ khor.
17 Sɩ nɛrɛɛkɛ dɔnɩ omɩnaakɛ mɩ-n nanɩ, na-n jɛna thɩmɩaakɛ asɩ Kɔ̃tɩ̃ Jeju Kirisitii thɔ̃thɔ̃sɔ kɔɔ maanɩ mɩɩrɛ.
18 Wɩ-n kɔɔ so narɛ ayɩ: A pɩpɩɩ bɔɔ na dã, wɩrɛɛkɛ na-n maanɛ nɩnɩ na hale, wa-n ɩɩr mɔ̃kɛ awɩ thɩ̃ puu ƴaal n kʋ wɩnɩ thue.
19 Wɛr dɔ tɩbɩlaakɛ na-n pɩɛrnɩ leere; thɩɩkɛɛda wɩ do, wa hana Thãgbaa Thuə'.
20 Sɩ nɛrɛɛkɛ mɩ-n nanɩ, nɩ khɔna na pɩɛr anɩ ha pɛ bɔraakɛ nɩ hananɩ; na-n bɩɛlnɛ Thãgba na Thu Phuu fãga.
21 Nɩ jɩɛ too naʋraakɛ Thãgba na sɩnɩ, mɔ̃ nɩ-n pɩɛrnɩ yire khorrɩkɛ asɩ Kɔ̃tɩ̃ Jeju Kirisiti na ha nɩnɩ, gɩ do ɔɔ bɔ donana gɩ the.
22 Wɩrɛ n ƴeƴerenenɩ na-n bulo wi;
23 na-n taa wɩ a vənə wi dɔɔra na te; ɩkhasɔ wo, na-n jɛ wɩ bʋɔra sɩ nɩ dɔ gɩ do bɔ jɩɩrɩkɛ hananɩ maar, nɩ thʋ̃ na-n laarnanakɛ khələlələ kɩ̃kɩɩnɩkɛ thɩ̃ puu ƴaalɛɛkɛ n kɔ wɩnɩ thue cʋʋnɩ dɩɩ bise.
24 Ʋrɛɛkɛ na punoneni na fʋ nɩ dɩ na jə', a cʋʋ nɩ dakha nɩ jɩɩlna kãkar ɔɔ ƴɛraakɛ n carbaranɛnɩ, nɩ 'lee dɩ paar;
25 ʋrɛɛkɛra dɔnɩ Thãgba bɩɛl dɩbara gɩ, kɛ kɔɔ taa sɩnɩ dɩɩ do asɩ Kɔ̃tɩ̃ Jeju Kirisitii pa gɩ the, dɔ gɩ do ɔr hɩna i dʋbɩrɛ, na wabɩrɛ, na fãga, na punone, bɔɔ fɛʋraakɛ kɔɔ kanɩ, na nɛnɛ̃, na bɔɔ fɛʋ waa khorr vʋ̃ʋ. Amɛn.