1
1 Gɩrɛɛkɛ dʋɔn nɩrɔrɛɛkɛ Thãgba kɔɔ hanɩ Jeju Kirisiti a gba nɛna Thãgbaa thɔ̃darasɔ thɩ̃ɛɛkɛ na dananɩ kɔrɔ. Dɩ Kirisiti thʋɔn ɔɔ thɔ̃daar thu a cʋɛ ɔɔ thɔ̃daar Jã a jɩ gɩ,
2 kɛ dɔnɩ ʋrɛ mɩanɩ gɩrɛ fɛʋʋkɛ a yɩnɩ, kɛ dɔnɩ thɩmɩɩrɩkɛ thɛnɩ Thãgbaa pa na sobɔrɩkɛ Jeju Kirisiti kɔɔ mɩgʋʋnɩ.
3 Ga dar ʋrɛraakɛ n hɩnɛnɩ sɛbɛɛkɛ na wɩrɛraakɛ n pɛnɩ Thãgbaa bobonɩ thɩmɩɩkɛ nũu, dɩ wa-n nɩ nũu dakha gɩrɛraakɛ kherenenɩ, gɩdonɩ bɔɔkɛ ga thɩ̃sɔɔkɛra na danɩ gɩ daan.
4 Jã thɔna fʋɔrɛɛkɛ a ha we gbɛbɩdaraa cɔ makonyɔɔkɛ hanɩ Ajɩ ayɩ: Bɔ jɩɩr na ha ɩɩ n dana nɩ, kɛ n thɛnɩ Thãgbaraakɛ hanɩle gɩrɛ, kɛ dakha kɔɔ hanɩle, kɛ na ɩnanɩ, kɛ n thɛnɩ dakha thue makonyɔraakɛ hanɩ ɔɔ fãga too pa ƴɛ bʋrɔ,
5 kɛ dakha n thɛnɩ Jeju Kirisitii pa, kɛ dɔnɩ sobɔ so jɩdaar, na cacadaarɩkɛ Thãgba kɔnɩ, kɛ kɔɔ ɩrɛnɩ a the khirera, kɛ dɔnɩ gɩrɛ Fãgadaar kpɩɛ fãgadarara kɛ thɩɩra. Ʋrɛɛkɛ naan sɩnɩ a thʋbɩ sɩ sopugo pɔ̃ɔ na ɔɔ tɔmɩ̃,
6 ɔr gɩɩkɛ kɔɔ cʋɛ sɩnɩ dɩ sɩ do fãgadaraakɛ dɔnɩ bonɩ jidara Thãgbaraakɛ dɔnɩ ɔɔ Thɩ, dɔ ɔr n hɩ̃ i dʋbɩrɛ na fãga bɔɔ fɛʋ waa khorr vʋ̃ʋ. Amɛn.
7 Hɩnɛ a-n ɩnɛ na ndɔlɔ̃pana, dɩ tɩbɩla fɛʋ na yɩɩrɛ narakɛ wɩrɛ kɔɔ gʋɔnɩ na khalʋ, dɩ tibil caar fɛʋ thɩɩra na-n bɩrɛ ɔɔdara. Sobɔr gɩ thalera ga ha. Amɛn.
8 Mɛr dʋɔn Alfa na Omega, Kɔ̃tɩnɩkɛ dɔnɩ Thãgbaakɛ dɔnɩ fãga fɛʋʋ hɩ̃daar, kɛ hanɩle gɩrɛ, kɛ dakha kɔɔ hanɩle, kɛ na ɩnanɩ, mɛr sɔ.
9 Mɛr Jã anɩ omiikɛ buloni kha na nɛrɛ bɔ gaarɛ, na fãgadaar dɩɩ, nakha yɩrrɛ dɩɩ do asɩ bɩɛl dora na Jeju gɩ the, mɩ kɔɔ har yɔ dɩɩraakɛ wɩ-n wenɩ Patɩmɔsɩ gɩdonɩ Thãgbaa thɩmɩɩ na sobɔrɩkɛ dɔnɩ Jejuuda mɩ-n kɔɔ mɩɩ.
10 Thu Phuu kɔɔ ɩɩrna mɛr Kɔ̃tɩnɩ wi dɩ mɩ kɔɔ nɩrɛ nɔ khɩɩr ɩ̃ khiro dɩɩ ho mɔ̃ wɩ-n ʋnɩ tutuu,
11 dɩɩ so ayɩ: Gɩrɛra fɩ yɩnɩ, khera gɩ sɛbɛra, a thɔna hana we gbɛbɩdaraa cɔ makonyɔɔkɛ hanɩ Efɛjɩ, na Sɩmɩrnɩ, na Pɛrgam, na Tɩatɩɩr, na Saardɩ, na Fɩladɛlfɩ, na Laʋdɩse.
12 Dɩ mɩ kɔɔ kɩɩlɛ ɩ̃ hɩɩn wi dɔɔlera n mɩana mɩnɩ, dɩ ɔbɔɔkɛ mɩ kɩɩlnɩ, mɩ yɩrɛ dɔ carã dɛ̃ɛ paarɩkɛ dɔnɩ dɛdaa makonyɔ,
13 dɩ tibil hale a jɩɩl thɩ̃thɩɩn da-n hona tibili bikuun, a to kẽkẽ gbãa dɩɩ dã nɛɛ, sa khɩmɩ dɛ lo phɛrɛ kũkuno.
14 Ɔɔ yʋsũ bulolole phɩphɩphɩl a ho phũgə̃, a hona dakha mɩlɛ, sɩ ɔɔ yisɔ hʋrɛ dɔlɩnanɛ.
15 Ɔɔ nɛsɔ n carbararɛ mɔ̃kɛ the sɩɛ n hɩlnɩ dɔɔra, sɩ ɔɔ nɔ so pa ho yɔ jɔ helle.
16 Ɔɔ nyɔ̃bɔra ƴepələ̃be makonyɔ hale dɩ fʋrɔ, dɩ khalgbãakɛ n khɛnɩ bilə yenyɔ fɛʋ kɔɔ hale a thɩɩ nʋɔra, sɩ ɔɔ ƴɛ wer hʋrɛ mɔ̃ wire n carbaranɩ ʋlkhɔɔ.
17 Dɩ ɔbɔɔkɛ mɩ yɩɩnɩ mɩ jire ɔɔ ƴɛ thɩ̃thɩɩn a ho khire, sɩ a tha marɛ na nyɔ̃bɔɔ sa so ayɩ: Fa-n do maar n fʋ fa'. Mɛr dɔ cacadaar na pɩpɩɩdaar,
18 a dona yidaar. Mɩ kɔɔ khire, sɩ hɩnɛ mɩ hananɛ yire gɩrɛ waa khorr vʋ̃ʋ, dɩ mɛr n punone khir na khĩdi dɩɩ dakha.
19 Gɛr gɩ khera gɩrɛɛkɛra fɩ yɩnɩ, kɛ hanɩle gɩrɛ, na gɩrɛ na pɩrɔnɛnɩ na kpaan.
20 Ado ƴepələ̃be makonyɔɔdaakɛ fɩ yɩnɩ ɩ̃ nyɔ̃bɔra gɩ, na dɔ carã dɛ̃ɛ paarɩkɛ dɔnɩ dɛdaa makonyɔɔda, thɩ̃ gbul gɩ, dɩ ga kɩr dʋɔn: Ƴepələ̃be makonyɔɔle dʋɔn thɔ̃thɔ̃daar thusɔɔkɛ hanɩ we gbɛbɩdaraa cɔ makonyɔ, sɩ dɔ carã dɛ̃ɛ paar makonyɔɔle dʋɔn we gbɛbɩdaraa cɔ makonyɔ.