2
1 Khera thakɛ a hana thɔ̃thɔ̃daar thuukɛ dɔnɩ Efɛjɩ we gbɛbɩdaraada. Hɩnɛ gɩrɛɛkɛ ʋrɛɛkɛ fɔrɔnɩ ƴepələ̃be makonyɔ ɔɔ nyɔ̃bɔra, kɛ dɔnɩ ʋrɛ n kpaarɛnɩ dɔ carã dɛ̃ɛ paarɩkɛ dɔnɩ dɛdaa makonyɔɔ thɩ̃thɩɩn sonɩ ayɩ:
2 Mɩ jɩrɛ afɩ thɩ̃ cʋʋ, na afɩ thɔ̃, na afɩ ha fʋ. Mɩ jɩrɛ mɔ̃ fa-n punoni a na bɔ kha na puu cʋʋdara ga. Wɩrɛ yɛnɩ thɔ̃thɔna ɩnɩ do sɩɩ do wa doa', fɩ kɔɔ be wer bɩnɛ a hɩɩn a yɩɛ dɩɩ do sõsodara wɩ do.
3 Fɩ hananɛ ha fʋrɛ, fɩ kɔɔ fʋrɛ dakha haar bʋɔraakɛ fɩ kɔɔ gaarnɩ dɩɩ do ɩ̃ i dɔ nɔɔ sɩ fa kɔɔ vɔa'.
4 Sɩ sorɩkɛ mɩ hana fɩnɩ dʋɔn mɔ̃ fɩ faanɩ naʋʋkɛ fɩ kɔɔ hananɩ cacara.
5 Jɛna ka fɩ thenɩ ɓoɓo a thʋ̃ ji sa deba haar, a birə na cʋɛ afɩ caca thɔ̃, agado mɛ̃ ga, ma pɔ farɛ dɩ ma gbaar afɩ dɔ carã dɛ̃ɛ pa, agado haar fɩ deba'.
6 Sɩ gɩrɛ fɩ hananɩ wer dʋɔn mɔ̃ fɩ-n laarnɩ Nɩkolayɩtɩsɔɔ thɔ̃ khələlələ, kɛ dɔnɩ thɔmaakɛ mɛrɛɛ thɛthɛ n laarnɩ dakha.
7 Ʋrɛɛkɛ hananɩ nũu, dɔ a na-n nɩ gɩrɛɛkɛ Thu Phuu n sonɩ we gbɛbɩdarasɔra. Ʋrɛɛkɛ na kəəneni, ma haarɛ hʋɛ dɩ na kho yi thɩrʋʋ biikɛ hanɩ hɩɩr paar Thãgbaa kal ƴɔɔ.
8 Khera thakɛ a hana thɔ̃thɔ̃daar thuukɛ dɔnɩ Sɩmɩrnɩ we gbɛbɩdaraada. Hɩnɛ gɩrɛɛkɛ ʋrɛɛkɛ dɔnɩ cacadaar na pɩpɩɩdaar, kɛ kɔɔ khenɩ sa bir ɩɩr a hana yire sonɩ ayɩ:
9 Mɩ jɩrɛ afɩ bɔ gaar na afɩ bɔdaar do phuphuphul, sɩɩ dorakɛ lẽledaar fɩ do. Mɩ jɩrɛ dakha i kʋɛrɛɛkɛ wɛkɛ yɛnɩ Juifisɔ ɩnɩ do n kʋɛ fɩnɩ, sɩɩ do wa do Juifisɔa', Satã wɩ-n kpa jɛ a na fʋɔr.
10 Fa-n do maar n fʋ fɩ gɩrɛraakɛ fa gaarna'. Hɩnɛ Satã na cʋʋrɛ dɩ wa fʋlɛ ɩkhasɔ anɩ thɩ̃thɩɩn a na to khaɩra gɩ be nɩ bɩnɛ gɩ hɩɩn, dɩ na gaarɛ bʋɔ wire yʋɔr. Dɔ sobɔ cʋʋdaar a danana khir dɩ fa 'lɛr ɩ̃ pa khorɩkɛ dɔnɩ yidaa.
11 Ʋrɛɛkɛ hananɩ nũu, dɔ a na-n nɩ gɩrɛɛkɛ Thu Phuu n sonɩ we gbɛbɩdarasɔra. Ʋrɛɛkɛ na kəəneni, balanyɔ khir na puno na cʋgʋʋ thɩ̃a'.
12 Khera thakɛ a hana thɔ̃thɔ̃daar thuukɛ dɔnɩ Pɛrgam we gbɛbɩdaraada. Hinɛ gɩrɛɛkɛ ʋrɛɛkɛ hananɩ khalgbãakɛ n khɛnɩ bilə yenyɔ fɛʋ sonɩ ayɩ:
13 Mɩ jɩrɛ ka fɩ-n cɔnɩ, dɩ liir Satãa fãga too pa ha, sɩ fɩ fʋrɔrɛ ɩ̃ i. Ãtɩpasɩɩ bɔɔrakɛ, sɩ fa kɔɔ faa ha pɛrɛɛkɛ fɩ hana marna'. Ãtɩpasɩra sobɔ tibil a kɔɔ do mar da-n mɩɩ ɩ̃ dabɔ, dɩ wɩ kɔɔ kʋʋ anɩ ƴɛ thɩ̃thɩɩn kãkɛ Satã n cɔnɩ.
14 Sɩ dɩ pa ɩkhaakɛ mɩ yɩ farnɩ dʋɔn mɔ̃ ɩkhaa tibilsɔ hanɩ afɩ pa, dɩ wɩ bo dɩ wa-n ma Balamɩ dɩɩrra, kɛ dɔnɩ ʋrɛ kɔɔ dɩrɛnɩ Balakɩ dɩ pɛr bara paar Ɩjɩrayɛl bɩsanana dɩ wa kho thɩl thɩ̃ɛ, a na faana dakha dɩbara bɔdɛl cʋʋrɛra.
15 Mɛna gɩ ha gɩrɛ dakha, fɩ hananɛ tɩbɩla afɩ pa kɛ n bɔnɩ dɩ wa-n ma Nɩkolayɩtɩsɔɔ dɩɩrra.
16 Gɛr gɩ deba haar dɛ, ado mɛ̃ ga, ma pɔ farɛ kɔrɔ a na kɛ̃kɛrɛna wɩ na ɩ̃ nɔ khalgbã.
17 Ʋrɛɛkɛ hananɩ nũu, dɔ a na-n nɩ gɩrɛɛkɛ Thu Phuu n sonɩ we gbɛbɩdarasɔra. Ʋrɛɛkɛ na kəəneni ma haarɛ maan kɛ keranɩ, ma haarɛ dakha boka bulo, dɩ boka bulolaalera i phaa na khere, kɛ tibil na jɩnɩ saagado ɔrkɛra 'lɛnɩ gaaga.
18 Khera thakɛ a hana thɔ̃thɔ̃daar thuukɛ dɔnɩ Tɩatɩɩrdaraada. Hɩnɛ gɩrɛɛkɛ Thãgbaa Bikuunikɛ ɔɔ yisɔ honɩ dɔlɩnanɛ, dɩ nɛɛ na-n carbara mɔ̃kɛ the sɩɛ n hɩlnɩ dɔɔra sonɩ ayɩ:
19 Mɩ jɩrɛ afɩ thɩ̃ cʋʋ, na afɩ naʋ, na afɩ ha pɛ, na afɩ thɔ̃ do, na afɩ ha fʋ, na afɩ nɛnɛ̃ thɔ̃ɔkɛ jɔnɩ mamadaa.
20 Sɩ sorɩkɛ mɩ hana fɩnɩ dʋɔn mɔ̃ fɩ sɩnɩ khɛrraakɛ wɩ-n wenɩ Jejabɛl, kɛ yɛnɩ khɛ bobon ha nɩ, da-n dɩɩr da-n fɩɩlna ɩ̃ thɔ̃daarsɔ dɩ wa faa dɩbara bɔdɛl cʋʋrɛra, wa-n kho dakha thɩl thɩ̃ɛ.
21 Mɩ kɔɔ haarɛ bɔɔ dɩ a na debi haar, sɩ aa-n ƴaal a deba haar ɔɔ bɔdɛl cʋʋrara ga.
22 Fa yɩ gaa, ma tʋɔrɛ na kpɛɛ phɩ̃ paar sɩ ɩ̃ thɔnanaa bɔ gaarɛ, gɩ wabɩ na wɛkɛrara n phɩnanaanɩ dakha. agado haar wɩ debi a faa ɔɔ thɔ̃ɔlera ga.
23 Ma cʋʋrɛ ɔɔ bɩsãsɔ dɩ wa khiir, dɩ we gbɛbɩdara fɛʋ na jɩrɛ dɩ mɛr dʋɔn bɩɛlɩkɛ n bəəreni tibili kpɩɛr na ɔɔ ha, dɩ ma 'laa narɛ fɛʋ bɩɛlbɩɛl thɩ̃ɛ mɔ̃ anɩ thɩ̃ cʋʋ hanɩ.
24 Sɩ ado nɛrkɛ sɛnɩ Tɩatɩɩr, kɛ na-n tuonni ga dɩɩrɩla', kɛ na jɛnɩ thɩ̃ dookɛ welela n wenɩ Satãa thɩ̃ hulõə', ma gba heenda kpɩɩ na heen nɩ bã;
25 sɩ gɩrɛ nɩ hananɩ, nɩ jɩɛ fʋ gɩ kĩkĩkĩ phaphapha ɩ̃ pɔ.
26 Ʋrɛɛkɛ na kəəneni, kɛ dɔnɩ ʋrɛ fɔrɔnɩ ɩ̃ thɔ̃ a dana khu paar, ma haarɛ punone tibil caarra,
27 dɩ ga ha mɔ̃kɛra mɩ 'lɛ gɩnɩ ɩ̃ Thɩɩ nyɔ̃kɔɔ, dɩ «ɔr na khɛ wɩ na the gbʋʋl, a na-n cɔ wɩ khʋma khʋma ce khaa»,
28 dɩ ma haarɛ dakha dɩwɩl ƴepələ̃bire.
29 Ʋrɛɛkɛ hananɩ nũu, dɔ a na-n nɩ gɩrɛɛkɛ Thu Phuu n sonɩ we gbɛbɩdarasɔra.