3
1 Khera thakɛ a hana thɔ̃thɔ̃daar thuukɛ dɔnɩ Saardɩ we gbɛbɩdaraada. Hɩnɛ gɩrɛɛkɛ ʋrɛɛkɛ hɩnanɩ Thãgbaa Thu makonyɔ na ƴepələ̃be makonyɔ sonɩ ayɩ: Mɩ jɩrɛ afɩ thɩ̃ cʋʋ. A wɩ yɩ fɩ wɩ-n ka jɩna yidaar ha fɩ sɩɩ do fɩ khire.
2 Jaga a cʋɛ gɩrɛ sɛnɩ sɩ dɩ ga-n jal khiir paar gɩ hana yire, gɩdonɩ ma yɩ afɩ thɔ̃ dɩɩ thʋ̃ bɔr a dã thu ɩ̃ Thãgbaa ƴɛra ga.
3 Jɛna gɩrɛ fɩ kɔɔ 'lɛnɩ a nɩɛna, dɩ na ɔ gar sa deba haar. A fa jaga, ma ɩnɛ yudaar khaa, dɩ fa jɩ bɔɔkɛ ma phuro fina'.
4 Sɩ ɩkhasɔ hale anɩ thɩ̃thɩɩn le Saardɩ, kɛ na kɔɔ biseneni awɩ kẽkẽsɔa'. Wɛr na-n ɩrɛ kha na mɛrɛ na kẽkẽ bulona gɩdonɩ wɩ teena gɛr.
5 Ʋrɛɛkɛ na kəəneni a na 'lɛr kẽkẽ bulo a na to, dɩ ma pɩɩn ɔɔ i yi sɛbɛra ga, sɩ ma caan ɩ̃ Thɩɩ ƴɛra na ɔɔ thɔ̃thɔ̃daar thusɔɔ ƴɛra nayɩ ɩ̃da a do.
6 Ʋrɛɛkɛ hananɩ nũu, dɔ a na-n nɩ gɩrɛɛkɛ Thu Phuu n sonɩ we gbɛbɩdarasɔra.
7 Khera thakɛ a hana thɔ̃thɔ̃daar thuukɛ dɔnɩ Fɩladɛlfɩ we gbɛbɩdaraada. Hɩnɛ gɩrɛɛkɛ ʋrɛɛkɛ dɔnɩ daphuu na sobɔdaar, ʋrɛɛkɛ fɔrɔnɩ Davɩdɩɩ lakile, ʋrɛɛkɛ n khɛranɩ dɩ tibil na-n puno dɩ khaana', kɛ dɔnɩ ʋrɛ n khaanɛnɩ dɩ tibil na-n puno dɩ khɛra' sonɩ ayɩ:
8 Mɩ jɩrɛ afɩ thɩ̃ cʋʋ. Afɩ fãga na kpɛra', sɩɩ do fɩ kɔɔ fʋrɛ ɩ̃ nɔ, fa kɔɔ bananɔ ɩ̃ iə'. Hɩnɛ mɩ faarɛ loo dɩɩ khɛr hoo afɩ ƴɛbʋrɔ, kɛ tibil na punoni na khaana'.
9 Hɩnɛ gɩrɛ ma cʋʋnɩ wɩrɛɛkɛ n kpanɩ jɛ a na fʋɔr Satã, kɛ n sõsonenɩ dɩ wɩ yɩ, Juifisɔ ha nɩ, sɩɩ do wa do Juifisɔa', ma cʋʋ wɛr dɩ wa tha na thʋnɔ sɩ na gburõku far, dɩ wa jɩrɛ dakha mɩ na fɛr.
10 Gɩdonɩ fɩ kɔɔ fʋrɛ ɩ̃ nɔ a hana ha fʋrɛ, mɛrɛ dakha ma bɛr fɛr bɔ gaar bɔɔkɛ na ɩnanɩ na gba thɩɩkɛ koo gɩ be tɩbɩla bɩnɛ gɩ hɩɩn.
11 Ma ɩnɛ kɔrɔ. Jɩɛ fʋ gɩrɛ fɩ hananɩ kĩkĩkĩ, dɩ mɛ̃ tibil na taa far khorɩkɛ fa 'lɛna'.
12 Ʋrɛɛkɛ na kəəneni ma cʋgʋʋrɛ dɩ na do thɩkarʋ cʋɔrraakɛ dɔnɩ ɩ̃ Thãgbaada, dɩ a na the le bã. Ma gbaar ɩ̃ Thãgbaa i a na khereraa, na ɩ̃ Thãgbaa dɩɩ i, kɛ dɔnɩ Jerujalɛm phaakɛ thɛnɩ ɩ̃ Thãgbaa pa ƴũ a gbũ, ɩ̃ kherenanaa dakha ɩ̃ i pha.
13 Ʋrɛɛkɛ hananɩ nũu, dɔ a na-n nɩ gɩrɛɛkɛ Thu Phuu n sonɩ we gbɛbɩdarasɔra.
14 Khera thakɛ a hana thɔ̃thɔ̃daar thuukɛ dɔnɩ Laʋdɩse we gbɛbɩdaraada. Hɩnɛ gɩrɛɛkɛ ʋrɛɛkɛ dɔnɩ Amɛn, a dona sobɔ so jɩdaar bʋɔ, a dona Thãgbaa thɩ̃ tinə fɛʋʋ the pa sonɩ ayɩ:
15 Mɩ jɩrɛ afɩ thɩ̃ cʋʋ. Fa ɩa', fa kpora'; mɩ-n ƴaalɛ fɩ ie agɩbo fɩ kpor.
16 Sɩ gɩdonɩ fɩ har bɔnɔnɔnɔ, fa ɩa', fa kpora', ma kpee fer na faa.
17 Gɩdonɩ fɩ sor ayɩ, fɩ ler aa, thɩ̃ɛ fɩ 'lɛ a le, dɩ dakha wo thɩ̃ɛ na-n ɓɔr fa', sɩɩ do fa jɩ dɩ fɛrɛ, fa do tibiləə ga, bɔ kʋ tibil ha fɩ, fɩ dor dakha bɔdaar bulo, a dona yaarʋ, a hanana sãɓɔlɔ̃.
18 Gɛr gɩ mɩ-n ha fɛr fɩlɛ, a fɩ jɩ thɛ mar dɛɛkɛ wɩ thiini dɔɔ dɩɩ bɔr, mɛ̃ fa debi na do lẽledaar dɩphã; na kẽkẽ bulo dakha fɩ to fɩ kɛɛna yicuru, tibil na yɩ afɩ sãɓɔlɔ̃a'; na dakha wo yi thɩɩkɛ fa pɛnɩ yiro fɩ puno fa-n yɩ.
19 Mɛrɛ, wɩrɛ fɛʋʋkɛ mɩ-n nanɩ wɛr mɩ-n nɩna dɩ paar dɩ ma-n wɛbɩna wɩ. Gɛr gɩ hanana ƴaalɛ jɔɔ a deba haar.
20 Hɩnɛ, mɩ hakɛ a jɩɩl lõfonɔɔ dɩ ma-n be. Ado tibil nɩ ɩ̃ nɔ, a khɛr mɩ loo, ma lʋʋn na too ntɛɛ pa sa-n kho kha dɩkɔ.
21 Ʋrɛɛkɛ na kəəneni ma haarɛ hʋɛ da too kha na mɛrɛ ɩ̃ fãga too para, mɔ̃kɛ mɛrɛ dakha kəəni sa too gɩrɛ na ɩ̃ Thɩ ɔɔ fãga too para.
22 Ʋrɛɛkɛ hananɩ nũu, dɔ a na-n nɩ gɩrɛɛkɛ Thʋ Phuu n sonɩ we gbɛbɩdarasɔra.