4
1 A gele pɩ, mɩ-n kɔɔ hɩɩnɛ dɩɩ do lõfonʋɔ gɩ a khɛr Thãgbaa dʋɔ, dɩ caca nʋɔɔkɛ mɩ kɔɔ nɩɛnɩ dɩ a-n mɩɩna mɩ a ho tutuu ʋʋn gɩ so marɛ ayɩ: Jʋnɛ kɛ, ma nɩ farɛ gɩrɛ teananɩ gɩ dana bɔɔraakɛ na kpaanɛnɩ.
2 Dapaara Thu Phuu kɔɔ ɩɩrna mɛr dɩ ɩ̃ yɩ fãga too paar dɩɩ hale Thãgbaa dʋɔ, dɩ tibil hale a too fãga too paarraalera.
3 Dɩ ʋrɛɛkɛra kɔɔ tɔɔrɔnɩ n carbararɛ jasɩpɩ boka khaa na sardʋan boka khaa, kɛ dɔnɩ bokanaakɛ khiinoni the nʋɔ ka, dɩ thãgba khalʋ kɔɔ hale a dii fãga too paarraalera dɩ a-n hona emərodi bokaarɩkɛ khiinoni dakha the nʋɔ ka.
4 Dɩ fãga too pa kpelẽ yenã hale a dii fãga too paarraalera, dɩ kɔ̃tɩna kpelẽ yenã hale a too fãga too paarsɔrara, a to kẽkẽ bulona, a suunə dɛ fãgadaar kpɩɛr yʋɔ.
5 Dɩ thãgba jʋ khor, na nɔ khena, na thãgba tiire n ther le fãga too paarraalera; dɩ lãphã makonyɔ hale a do dɔ haar dɩ ga-n le fãga too pa ƴɩɛraalera, gɛr dʋɔn Thãgbaa Thu makonyɔ.
6 Dɩ fãga too pa ƴɩɛraalera thɩ̃ɛ hale dɩ ga-n hona lanyʋɔn wɩwɩwɩl sa ho hɩɩnʋ. Dɩ fãga too pa thɩ̃thɩɩn thɩ̃ ye yenã hale a diiro, dɩ yinə hire awɩ tomɩra ƴɛbʋrɔ na khiru fɛʋ.
7 Caca thɩ̃ yire hor sidũ'ũu, balanyɔ thɩ̃ yire ho na ɓolʋ, balãther thɩ̃ yire hana tibil ƴɩɛ, sɩ balanã thɩ̃ yire ho gbʋɔrɛɛkɛ n dɩɛnnɩ.
8 Dɩ thɩ̃ ye yenãale bɩɛlbɩɛl hananɛ gbɛla maadõ maadõ, wɩ hinəne yinə bɩnɔ na tomɩrra dakha, dɩ wa hana pɩrrɛ kpɩɩ dɩwɩlʋ na dɩtɩnɔa', sɩ mɛ̃ wɩ-n so aa: «Daphuu, daphuu, daphuu, Thãgba Kɔ̃tɩnɩkɛ dɔnɩ fãga fɛʋʋ hɩ̃daar do, kɛ kɔɔ hanɩle, kɛ hanɩle gɩrɛ, kɛ na ɩnanɩ.»
9 Dɩ ɔbɔɔkɛ thɩ̃ yeele n dʋbɩnɩ ʋrɛ tɔɔnɩ fãga too paar, kɛ hɩnanɩ yire bɔɔ fɛʋ waa khorr vʋ̃ʋ, dɩ wa-n kpãganaa, dɩ wa-n khɩɩnaa,
10 kɔ̃tɩna kpelẽ yenãale gburõkure ʋrɛraakɛ tɔɔnɩ fãga too paarraale ƴɩɛra, dɩ wa-n fʋɔr ɔrkɛra hɩnanɩ yire bɔɔ fɛʋ waa khorr vʋ̃ʋ, dɩ wɩ phubire awɩ fãgadaar kpɛsɔ a kpɛɛ fãga too pa ƴɛ thɩ̃thɩɩn sɩ wa-n so:
11 Asɩ Kɔ̃tɩ̃ na asɩ Thãgba wei, fɛr teana a na 'lɛ i dʋbɩrɛ, na cʋʋr, na punone; gɩdonɩ fɛr kɔɔ te thɩ̃ɛ fɛʋ, dɩ afɩ tuur dɔ nɔɔ dɩ gɩ hale gɩrɛ a hana yire.