8
1 Ɔbɔɔkɛ Bana biirə kɔɔ cʋɔrnɩ makonyɔ jɩɩn, pɩrrɛ kɔɔ hale Thãgbaa dʋɔ a cʋ lɩɛr kuru.
2 Dɩ mɩ kɔɔ yɩrɛ Thãgbaa thɔ̃thɔ̃daar thu makonyɔɔkɛ n jɩlɛnɩ Thãgbaa ƴɛra, dɩ wɩ 'lɛr tutuu makonyɔ.
3 Dɩ thɔ̃thɔ̃daar thu kpɩɩ pɔr a jɩɩl bonɩ ji pa kɩrɔ, a hana latɩkolo 'wiidaakɛ wɩ cʋʋnanɩ dɛ; dɩ a 'lɛr latɩkolo jɔɔ a gba a na-n 'laa, nakha tɩɩ phuu fɛʋʋ Thãgba bɩɛl, dɛ bonɩ ji paarraalera hanɩ fãga too pa ƴɩɛra.
4 Dɩ latɩkoloolee isi gbɛbɩnanɛ tɩɩ phuusɔɔ Thãgba bɩɛl a the thɔ̃thɔ̃daar thuulee nyɔ̃kɔɔ, dɩ ga-n jʋʋn Thãgbara.
5 Dɩ thɔ̃thɔ̃daar thuule gbaar latɩkolo 'wiidaale a ti bonɩ ji dɔɔ pɛr dɩɩ hi, dɩ dʋna faa thɩɩra, dɩ thãgba tiire kɔɔ hale na nɔ khena, na thãgba jʋ khor na thɩ jɩɩn.
6 Dɩ thɔ̃thɔ̃daar thu makonyɔɔkɛ fɔrɔnɩ tutuu makonyɔ kɔɔ gbɛbɩrɛ ʋ̃ ʋ̃ gbɛbɩrʋʋ.
7 Dɩ cacadaar kɔɔ ʋnɛ ɔɔ tutuu, dɩ thãgba bara hale na dɔɔ a nyanyaana tɔmɩn dɩ ga-n cʋr thɩɩra, dɩ thɩ phɛrɛ bɩɛl thɩ phɛrɛ yẽtherra kɔɔ hɩnɛ koo, dɩ thɩr der pa bɩɛl der paar yẽtherra kɔɔ hɩnɛ dakha, dɩ hɔ̃ ƴolosɔ fɛʋ kɔɔ hɩnɛ.
8 Dɩ balanyɔ thɔ̃thɔ̃daar thu kɔɔ ʋnɛ ɔɔ tutuu, dɩ dɩkha gɩ, a ho gɔ̃gɔ̃ kɔ̃tɩ̃ɩ, a do dɔ haar, a əl ji lanyʋɔnna, dɩ lanyɔ̃ phɛrɛ bɩɛl yẽtherra debi a do tɔmɩn.
9 Dɩ thɩ̃ tinə der pa bɩɛl der paar yẽtherra, kɛ hanɩ lanyʋɔnna a do yidara kɔɔ khiire, dɩ bato kɔ̃tĩ jɛ pa bɩɛl jɛ paar yẽtherra kɔɔ wɩɛlɛ fɛʋ.
10 Dɩ balãther thɔ̃thɔ̃daar thu kɔɔ ʋnɛ ɔɔ tutuu, dɩ ƴepələ̃bi kɔ̃tɩ̃ɩ gɩ, a hana dɔɔ dɔlɩna khaa, a the ƴũ, a ji mɩɩr phɛrɛ bɩɛl mɩɩr phɛrɛ yẽtherra na yɔ bu kanasɔra.
11 Ƴepələ̃biree iilera n dʋɔn Dakhaa, dɩ yɔ ɓɛl bɩɛl yɔ kuur paar yẽtherra debire a khar kpakpakpa, dɩ tibil jɔjʋɔ kɔɔ khiire, dɩɩ do nyʋɔnɩlera debanɩ a khar dɔ nɔɔ.
12 Dɩ balanã thɔ̃thɔ̃daar thu kɔɔ ʋnɛ ɔɔ tutuu, dɩ thɩ̃ɛ kɔɔ cʋʋrɛ wi ɓɛl bɩɛl ɓɛl paar yẽtherra, na po ɓɛl bɩɛl daɓɛla yẽtherra, na ƴepələ̃bi der pa bɩɛl der paar yẽtherra, dɩ ga ɓɛlsɔɔle fɛʋ debire a birə, dɩ dɩwɩl ɓɛl bɩɛl ɓɛl paar yẽtherraa dahɩrɛ bure, mɛna gɩ ha dakha na dɩtɩnɛ.
13 Dɩ mɩ-n kɔɔ hɩɩnɛ a nɩɛ dɩ gbʋɔrɛ ubi da-n ka thãgbara ƴũ fii, sɩ da-n so nɔ khɩɩr ayɩ: Ga puurore, ga puurore, ga puure thɩdarara ɔbɔɔkɛ thɔ̃thɔ̃daar thu yẽtherɩkɛ sɛnɩ na ʋnɩ awɩ tutuu.