6
1 Dɩ mɩ yɩɛrɛ ɔbɔɔkɛ Bana bii kɔɔ cʋɔrnɩ caca jɩɩn jena makonyɔraale, mɩ nɩɛrɛ thɩ̃ yi bɩɛl thɩ̃ ye yenanaale dɩ so nʋɔ dɩɩ ho thãgba phɛɛrɛ ayɩ: Ɩna.
2 Dɩ ma hɩɩn dɩɩ do gãgo bulo gɩ a the, dɩ ʋrɛ kɔɔ jʋnɛɛnɩ kɔɔ hananɛ thaa na tʋʋ, dɩ wɩ haarɛ fãgadaar kpɩɛr dɩ a ther mɔ̃ a donɩ kəkəədaar a 'lɛ kəəre.
3 Dɩ ɔbɔɔkɛ a cʋɔrnɩ balanyɔ jɩɩn, mɩ nɩɛrɛ balanyɔ thɩ̃ yire dɩ so: Ɩna.
4 Dɩ gãgo sɩɛ khəkhəkhə ther, dɩ ʋrɛ jʋnɛɛnɩ kɔɔ 'lɛr punone a na tinə ha ɩɩ thɩɩra na faa, dɩ mɛ̃ tɩbɩla na-n kʋʋr kha; dɩ a 'lɛr dakha bajɩna kɔ̃tɩ̃ɩ.
5 Dɩ ɔbɔɔkɛ a kɔɔ cʋɔrnɩ balãther jɩɩn, mɩ nɩɛrɛ balãther thɩ̃ yire dɩ so ayɩ: Ɩna. Dɩ ma hɩɩn a yɩ gãgo biru, dɩ ʋrɛ jʋnɛɛnɩ fʋrɔrɛ thɩ̃ mɩɛdaa ɔɔ nyɔ̃kɔɔ.
6 Dɩ mɩ nɩrɛ nʋɔ dɩɩ the thɩ̃ ye yenãa thɩ̃thɩɩnɩle a so ayɩ: Jʋ mɩɛ nɔ bɩɛl, gɛr dɔ wi bɩɛl thɔ̃ lɩmɩnɛ; ɔljʋ mɩɛ nʋɔ yẽther, gɛr dɔ wi bɩɛl thɔ̃ lɩmɩnɛ; sɩ niin wer na taan, fa-n cʋʋrɔ thɩ̃a'.
7 Dɩ ɔbɔɔkɛ a kɔɔ cʋɔrnɩ balanã jɩɩn, mɩ nɩɛrɛ balanã thɩ̃ yire dɩ so ayɩ: Ɩna.
8 Dɩ ma hɩɩn a yɩ gãgʋʋkɛ hanɩ phʋaphʋa, dɩ ʋrɛ jʋnɛɛnɩɩ i n dʋɔn khir, dɩ khĩdi dɩɩ na-n kpaaraa sɩkaar, dɩ wɩ 'lɛr punone a na gbana bajɩna, na kɔmɛr, na kho puu, na hɔ̃ nʋma thɩɩra a na bũburona tɩbɩla thɩ phɛrɛ yenana bɩɛlbɩɛl.
9 Dɩ ɔbɔɔkɛ a kɔɔ cʋɔrnɩ balamɔɩ jɩɩn, mɩ yɩrɛ tɩbɩlaa thusɔ bonɩ ji pa ballɔ, kɛ dɔnɩ wɩrɛ wɩ kɔɔ kʋʋrnɩ Thãgbaa sora, na awɩ sobɔdaar doraakɛ wɩ jɩɩlnɩ.
10 Dɩ wɩ hulene dɩɩ khɩɩr ka ayɩ: Kɔ̃tɩn, daphuu na sobɔdaar, ka ga dã sɩ fa kɩɩl kɩɩlʋ a na tiir asɩ tɔmɩ̃ hel thɩdarara?
11 Dɩ wɛr fɛʋ bɩɛlbɩɛl 'lɛr kẽkẽ bulo gbana a to, sɩ dɩ wɩ so war ayɩ, wɩ tɔɔ ɓo cɔcɔcɔ phaphapha wɩrɛ dɔnɩ thɔ̃ dona awɩ kha, na awɩ omisɔɔkɛ wa kʋʋrnɩ awɩ kha, awɩ nɔ n dã ɓo.
12 Dɩ mɩ yɩɛrɛ ɔbɔɔkɛ a kɔɔ cʋɔrnɩ maadõ jɩɩn, thɩ jɩɩn kɔɔ hale a kɔ̃tɩ̃ ka, dɩ wire debire a biiro tĩtĩtĩ a ho bʋ bir lokaar, dɩ por biləni debi a sɩɛrɔ a ho tɔmɩn.
13 Dɩ ƴepələ̃be na-n jɛ thɩɩra, mɔ̃kɛ jɩɛ na-n və̃viləni thɩr khonanɛ dɩ bi pholoo na-n jɛ.
14 Dɩ thãgbara ƴũ pur kʋla kʋla mɔ̃ wɩ-n purni dɛbɛ, dɩ gɔ̃gɔnasɔ fɛʋ na yɔ dɩɩsɔ fɛʋ kɔɔ əəle a ha dɩkhãa pa.
15 Dɩ le fãgadara thɩɩra, na kɔ̃tɩnasɔ, na sɔrasɛɛ kɔ̃tɩ̃sɔ, na lẽledara, na fãga hɩ̃dara, na dea ɓibi, na waɩasɔ n wɔ̃ wɩwɩl kanana na boka kɔ̃tɩ̃ ballɔsɔɔkɛ hanɩ gɔ̃gɔnana;
16 sɩ wa-n so gɔ̃gɔnana na boka kɔ̃tɩnana ayɩ: Nɩ je the sarrakɛ a phe sɩ, sɩ hʋnɔna ʋrɛɛkɛ tɔɔnɩ fãga too paar na Bana bii nĩkhirə.
17 Gɩdonɩ awɩ nĩkhi wi kɔ̃tɩ̃ phaan, dɩ ʋmɔ̃ hale na jɩɩl?