6
1 Gɛr gɩ dɔ sɩ sɩrɔ gɩrɛ dɔnɩ Kirisitii thɩmɩɩ tɔ̃tʋ̃ɔ pa, sɩ sɩ bãba sa-n ƴaal dɩɩrɛɛkɛ na cʋɛ sɩnɩ dɩ sa bɩ̃; sa-n bir 'lo a na jɩɩl gɩrɛraakɛ dɔnɩ tɔ̃tʋ̃ɔ paar, kɛ dɔnɩ thɔ̃ khi faarɛ, na ha pɛrɛ Thãgbara ga,
2 na dɩɩrɛ yɔ kpɛɛrɛsɔra na nyɛ̃ dɛɛna', na khee ɩɩr na khorr kɩɩla'.
3 Gɛr dɔ gɩrɛ sa cʋʋnɩ a Thãgba tu.
4 Gɩdonɩ ado wɩrɛ kɔɔ 'lɛnɩ Thãgbaa dahɩrɛ gɩ, kɛ 'lɛnɩ khaardaakɛ thɛnɩ Thãgbaa dʋɔ a hɩɩn, kɛ 'lɛnɩ dakha awɩda Thu Phuurə,
5 a 'lɛna dakha Thãgbaa thɩmɩɩkɛ bʋɔnɔnɩ a hɩɩn, na fãgaakɛ dɔnɩ bɔɔkɛ n ɩnanɩɩda;
6 a tibil ca wele kɛr bir, wa puno na bir na debi haar bã, gɩdonɩ we wer wɩ bire gba Thãgbaa Bikuun dɩ wa-n kpa kʋkʋ thɩrʋra, dɩɩ do yicuru wɩ-n pɩɛraa tɩbɩlaa ƴɛra.
7 Thɩɩkɛ thãgba nyʋɔn n sɛnɩ wire wire dɩ phu thɩ̃ khonanɛ wɩrɛraakɛ kʋlɛɛnɩ, Thãgba bɔnanɛ a 'lɛ.
8 Sɩ ado a phu uu na sɩkajɩɩl, bɔ taa thɩɩ gɩ bã, sɔ̃ togʋʋ a too dɩ pɩpɩɩ paar dɔɔ a na caanna.
9 Nɛrɛɛkɛ mɩ-n nanɩ, sɩ-n mɩɩnɩnakɛ thakɛ sɩ sɩ hana narɛ tu jɩɩr dɩ nɩ har hʋ bʋɔraakɛ dɔnɩ taa hʋɛ.
10 Gɩdonɩ Thãgba na gõgolõ a na diinə anɩ thɔ̃ na naʋʋkɛ nɩ-n nɩnanɩ ɔɔ irə, mɔ̃kɛ nɩ kɔɔ cʋʋnɩ thɩ̃ɛ ɔɔ tɩɩ phusɔra a ba harakɛ cʋʋrɔ gɩra'.
11 Sɩ-n ƴaalɛ nɛrɛ fɛʋ bɩɛlbɩɛl n hanana ga gbɛ̃gbɛrɛ̃ ca gɩ dana khu paar; dɩ mɛ̃ gɩrɛ nɩ-n pɛnɩ nũu na dã na ha otirə.
12 Sa-n ƴaal dokhʋʋr n fɔ na', sɩ na-n phɛla wɩrɛ 'lɛnɩ gɩrɛ Thãgba kɔɔ ʋlfɛna wɩnɩ ɩna ha wɛr, gɩ the awɩ ha pɛra na awɩ ha fʋra.
13 Ɔbɔɔkɛ Thãgba kɔɔ ʋlfɛnanɩ Abɩraham, gɩ hʋrɛ nʋɔ gɩ dɩ so, dɩ ire na hanɩle a kɔ̃tɩ̃ jɔ ɔɔda dɩ na wa', ɔɔ thɛthɛɛ i a we a sona nʋɔɔle,
14 ayɩ: «Sobɔr gɩ, ma bɔna fɛr dɩ a kɔ̃tɩ̃, dɩ ma cʋʋrɛ afɩ məl dɩ wa ler na jɔr.»
15 Thale Abɩraham n kɔɔ pɩɛr na ha fʋrɛ a 'lɛ gɩrɛ Thãgba kɔɔ ʋlfɛnaanɩ ɩna haarɛ.
16 Tɩbɩla ireekɛ kãasɩnɛnɩ awɩdara wɩ-n soro nʋɔ, dɩ thɩ̃ banaa fɛʋʋkɛ hanɩ awɩ thɩ̃thɩɩn ga pɩrɛ nɔ sorraale.
17 Dɩ gɛr gɩ mɔ̃ Thãgba n ƴaalnɩ a jɩɩ nɩna ɔɔ ʋlfɛ 'lɛdara dɩ gɩrɛ a pɛrnɩ haar ɩna cʋʋrɛ na do daphɩlanaa ga, gɛr gɩ dɩ ɓaan nɔ sor.
18 Dɩ mɛ̃ thɩ̃ɛ yenyɔɔkɛ na dɔnɩ daphɩlanaa ga, kɛ Thãgba na punoni na kuro sõsora', na cʋʋ sɩ dɩ sa hana 'lar dɩ a jɔr na ka, sɛrkɛ asɩ phɩ pa donɩ nũ pɛ hananɛ gɩrɛraakɛ thɩnɛ sarnɩ ƴɛ kʋʋlɔ.
19 Ga nũ pɛ caakɛ sɩ hananɩ gɩ hʋrɛ gborõ fʋ therɩkɛ n fɔnɩ gborõo dɩɩ ma, gɩ-n kpãsɛrɛ kɩ̃kɩɩnna dɩɩ lõ a dã bɩnɔ,
20 ka Jejn do sarnɩ ƴɛ kʋl a lõ mɔ̃ a donɩ gbõdaar khorr mɔ̃kɛ Mɛlkɩsɛdɛkɩɩ kpam hanɩ.