6
1 Wɩrɛ fɛʋʋkɛ dɔnɩ dea teenanɛ wa-n hɩnɛ awɩ kɔ̃tɩ̃sɔ mɔ̃kɛ wɩ teenanɩ cʋʋr na sobɔr, dɩ mɛ̃ Thãgbaa i na kʋɛ dɩ dɩɩrɛɛkɛ sɩ-n dɩɩrnɩ ga.
2 Dɩ dee ƴɩrɛ hananɩ kɔ̃tɩna dɩ wɩ do ha pɛdara, wa-n 'lar õkũu dʋʋrra sɩ na beesi wa', sɩ wɩ ka na jɩɛ do war thɔma gɩdonɩ wɩrɛ awɩ thɔ̃ɔle n bulni dɔ ha pɛdaraakɛ wɩ-n nanɩ. Na dɩrɛ ga thɩ̃ɩkɛ dɩ na kpãkpaanɛ gar.
3 Ado tibil na dɩɩr dɩɩr kpɩɩ, dɩ ado aa-n tu thɩmɩɩ bʋɔɔkɛ dɔnɩ asɩ Kɔ̃tɩ̃ Jeju Kirisitiida ga, na dɩɩrɛɛkɛ n jalanɩ kha na Thãgba fɩla',
4 ire ntɛ n ka mɔlɔ, aa jɩ thɩ̃a'; thɩ̃ bana tibil gɩ, na tɩɩ khɩɛsɩdaar, gɛr n ɩrɛna gbugi, na kɩla, na i kʋɛrɛ, na so jɩɩr na yinə,
5 na sɔ tə̃tə̃tə̃. Gɩrɛ fɛʋʋkɛ har tɩbɩlalaakɛ fɩlɛ gõgolonɩ, wa-n mar dɩ wɩ jɩ gɩrɛ dɔnɩ sobɔr bã, dɩ wɩ-n kpɩɛrɛ Thãgba fɩl hananɛ dor lẽle thɩ̃ 'lɛ paar.
6 Sobɔr gɩ wer Thãgba fɩl hananɛ dor lẽle thɩ̃ kɔ̃tɩ̃ɩ tibillə ado a tu dɩ gɩrɛ ɩnɩ hananr dã nɛr mɛ̃.
7 Gɩdonɩ sa kɔɔ hana thɩ̃ɛ a ɩna kɛ thɩɩra ga, dɩ a sa the sa puno a na gba thɩ̃ɛ dakha ga.
8 Dɩ gɛr gɩ ado sɩ hana dɩkor na kẽkena, gele dã sɛr.
9 Sɩ wɩrɛ n ƴaalɛnɩ ɩnɩ-n dɔ lẽledara, wɩ-n təəre ji fifiləlela, na pheruraakɛ dɔnɩ də̃bəəl thɩ̃ ƴaal jɔɔkɛ kpalanɩ ka, gɛr n hala tɩbɩla dɩ wɩ mʋʋ kʋɛrɛra na bũburonena.
10 Gɩdonɩ war naʋ dʋɔn sopugo jɔjʋɔɔ fʋ pa; dɩ ɩkhasɔɔkɛ kɔɔ ƴaalɛ gɩnɩ dɩ wa-n kpãkpaanɔ, wɩ faarɛ ha pɛrɛ sa gba dɩbara a mʋʋ ha hellela.
11 Sɩ fɛr Thãgbaa tibil, fe khiru pɛ ga thɩnaakɛ, sɩ na ƴaalɛ fɩl sarʋ, na Thãgba fɩlɛ, na ha pɛrɛ, na naʋ, na ha fʋrɛ, na hɛlɛlɛ fɩlɛ.
12 Na kɛ̃kɛrɛnɛ ha pɛ kɛ̃kɛrɛ̃ bʋɔ. Fɔrɔ yire khorr gɩrɛraakɛra Thãgba kɔɔ we fɩnɩ na gɩrɛraakɛ fɩ kɔɔ canɩ afɩ ha pɛ pasɩ tibil jɔjʋɔɔ ƴɛra.
13 Mɩ-n kpãkpãa farɛ Thãgbaa ƴɛra, ʋrɛɛkɛ n 'laanɛnɩ thɩ̃ɛ fɛʋra yire, na Jeju Kirisitii ƴɛra, ʋrɛ kɔɔ cananɩ ɔɔ ha pɛ pasɩ Pɔ̃sɩ Pɩlatɩɩ ƴɛra,
14 dɩ fa jɩɩ hɩɩn ga soolera ga hana sɩ paara', tibil na yɩrɔ dakha dɩa', phaphapha asɩ Kɔ̃tɩ̃ Jeju Kirisiti n ɩna,
15 kɛ dɔnɩ ʋrɛ̃ bɔɔ na danɩ dɩ Thãgba na nɩrɔ, Thãgbaakɛ dɔnɩ ʋrɛ hɩnanɩ bɔnanɛ, ɔr bɩɛl dʋɔn Fãga hɩ̃daar, ɔr dʋɔn Fãgadaar kpɩɛ fãgadarara, na Kɔ̃tɩ̃ kpɩɛ kɔ̃tɩnana,
16 ɔr dɩbara na dɔ dakhinənə', ɔr haan dahɩrɛraakɛ na dɔnɩ dadanana'; tibil bɩɛllakɛ na kɔɔ yɩa', dɩ tibil bɩɛllakɛ na puno na yɩa'. Ɔr teana a hɩna cʋrɛ na fãga khorr. Amɛn.
17 Kpãkpaanɛ nɛnɛ̃ bɔɔkɛɛ lẽledarara wa-n ti gunə', wa-n gba awɩ nũ pɛ faa lẽle thɩɛnaakɛ na dɔ̃nɩ dapʋɔrnaa gaaga, sɩ wɩ faa Thãgbaraakɛ n 'laanɛnɩ thɩ̃ɛ fɛ̃ʋ dɩɩ dã sɩ thu, sɩ puno sɩ gba gɩ gɩ do asɩ kãkada.
18 Sɔ war wa-n cʋɛ bɔɔ, wɩ dɔ lẽledara thɔ̃ bɔ cnʋrɛra, wa-n 'laanɛ thɩ̃ɛ na haar, wa-n bulo tɩbɩla;
19 gɩ do mɛ̃ wɩ khɩɩ lẽle thɩ̃ɛɛkɛ dɔnɩ dapʋɔrnaa a thɩɩn dɩɩ do bɔɔkɛ na ɩnanɩɩda, gɩ do yireekɛ wa 'lɛnɩ mɛ̃ gɩ jɩɩ do yi hana bɔ.
20 Timothe wei, jɩɛ fʋ gɩrɛ wɩ kɔɔ gbanɩ a dʋ fɩ nyɔ̃kɔɔ. Golone folo folola na khaakhaar thɩmɩara, na thɩ̃ banaasɔraakɛ thɛnɩ jɩɩrraakɛ tɩbɩla n wenɩ jɩɩr sɩ ga do jɩɩr ga;
21 dɩ ɩkhasɔɔkɛ yɛnɩ ɩnɩ hana gɛr wɩ kɔɔ dɩrɛ hʋɛra, a lɛ̃, sa faa ha pɛrɛ. Thãgba na-n jɛ nɩ bʋɔra.