2
1 Omɩna, nɛrɛɛ thɛthɛ jɩrɛ dɩ asɩ pɔɔkɛ sɩ kɔɔ pɔnɩ anɩ pa na kɔɔ do mɔlɔa'.
2 Ɔbɔɔkɛ sɩ kɔɔ gaarnɩ bʋɔ a 'lɛna kpoore jɔɔ Filipira pɩ, mɔ̃kɛ nɩ jɩ gɩnɩ dɩɩ kɔɔ ha, sɩ Thãgba kɔɔ ha sɛr 'lar mɔ̃kɛ sɩ pɔnɩ dɩ sa-n mɩɩ nɩ Thãgbaa tutugo bʋɔɔ thɩmɩɩ bãbaranɛ jɔɔ thɩ̃thɩɩn.
3 Asɩ wewe Thãgba thɩmɩɩkɛ sɩ kɔɔ mɩɩ nɩnɩ na kɔɔ the dədirrə dɩ kpɩɛr puurə ga, dɩ ga kɔɔ do dakha fɩɩl thɩmɩa ga.
4 Gɩ ka har mɔ̃kɛ Thãgba kɔɔ jʋʋr sɩnɩ hɩɩn dɩ sɩ teena dɩ heen sɩ tutugo bʋɔɔle, mɛ̃ sɩ-n mɩɩ gɩ, ga do dɩ sa da tɩbɩla haara', sɩ dɩ sa da Thãgba haar, kɛ n bəəreni asɩ bɩ̃ dɩ jɩ mɔ̃kɛ gɩ hanɩ.
5 Nɩ jɩrɛ mɔ̃kɛ gɩ kɔɔ hanɩ, ga do fɩɩl thɩmɩɩr sɩ kɔɔ mɩɩ nɩ kpɩɩraka', dɩ sa kɔɔ phɩ̃ nar dakha fɩlɛ thʋnɔ, sɩ sa-n ƴaal nar dɩkha ga, Thãgbaa thɛthɛ torre yire;
6 dɩ dakha sa kɔɔ ƴaal i dʋbɩrɛɛkɛ thɛnɩ tɩbɩlaa pa, dɩ anɩ pa gɩ, dɩ ʋkhasɔɔ pa ga.
7 Mɔ̃kɛ sɩ donɩnakɛ Kirisitii thɔ̃thɔna, sɩ kɔɔ punone a na nɩna asɩ kɔ̃tɩ̃ do, sɩ sɩ ka har hɛlɛlɛlɛ anɩ thɩ̃thɩɩn. Mɔ̃kɛ nɩrɛ n haannɩ ɔɔ bɩsã bisɔ hɛlɛlɛlɛ,
8 mɛ̃ sɩ kɔɔ ha nar ha lʋʋnna, a ƴaal ga-n do Thãgbaa tutugo bʋɔɔ thɩmɩɩ sɩ-n ha nɩ dɩbara ga, sɩ sɩ faa asɩ thɛthɛɛ yi anɩ sora, gɩdonɩ nɩ lõ ser haar ka.
9 Omɩna, mee nɩ jɩnanɛ asɩ thɔ̃ do na asɩ vɔɔ; dɩtɩnɛ na dɩwɩlʋ sɩ-n kɔɔ do thɔma dɩ sa do heendaa tibil bɩɛllalakɛ anɩ pa ga, thale sɩ kɔɔ mɩɩ nar Thãgbaa tutugo bʋɔɔ thɩmɩɩ.
10 Nɛrɛɛ thɛthɛrakɛ kɔɔ to garɛ yire, na Thãgba dakha, dɩ nɛrɛɛkɛ pɩɛrnɩ haar, sɩ hana narɛ cʋʋ pa bʋɔ, na fɩl telẽe na dɩ pa 'leere.
11 Dɩ nɩ jɩrɛ dakha mɔ̃kɛ thɩrɛ n fʋnɩ ɔɔ bɩsãsɔ, mɛ̃ sɩ kɔɔ fʋ nɛrɛ fɛʋ bɩɛlbɩɛl bɔɔbɔɔ,
12 dɩ sa-n wɛ nɩ, dɩ sa-n ƴɔlna nɩ haar, dɩ sa-n fɛrɛna nɩ ayɩ: Na-n ɩrɛ ga-n da Thãgbaraakɛ kɔɔ wɛ nɩnɩ nɩ lona ɔɔ fãgadaar dora, a bulo kha na ɔɔ i dʋbɩ.
13 Gɛr dɔ kɩrʋ dɩ sa-n khɩɩ Thãgba wire fɛʋ, gɩrɛraakɛ nɩ kɔɔ tuni Thãgbaa thɩmɩɩkɛ sɩ kɔɔ mɩɩ narnɩ, mɔ̃kɛ ga donɩ tibil thɩmɩɩra', sɩɩ do Thãgbaa thɩmɩɩ bʋɔ gɩ na sobɔr, dɩ ga-n cʋʋ thɩ̃ɛ nɛrɛraakɛ pɩɛrnɩ haar.
14 Gɩdonɩ, nɛr omɩna, nɩ debire a ha mɔ̃kɛ Thãgbaa we gbɛbɩdaraakɛ dɔnɩ Jeju Kirisitii too, kɛ hanɩ Jude dɩɩra hanɩ, gaarɛraakɛ anɩ too n kɔɔ gaar nɩnɩ dɩɩ do bɩɛlla gɩ na gaarɛɛkɛ wɩrɛ dɔnɩ Juifisɔ n kɔɔ gaar wɩnɩ.
15 Juifisɔɔlera wɛr kɔɔ kɔ Jeju Kɔ̃tɩn, na Thãgbaa bobonasɔ, wɛr kɔɔ kpoone sar dakha, awɩda na-n da Thãgba haara', wɩ-n laarɛ dakha tɩbɩla fɛʋ.
16 Wɛrra n pɩɛrɛ sɩ aa, sa-n mɩɩna ca kpala wɩ 'lɛ taara', dɩ thalera wɩ-n cʋʋ dɩ awɩ sopugo thʋ̃ ɩ̃ waa a dã thu, dɩɩ do waa Thãgba gbana wɛr nĩkhii khorr.
17 Sɩ ado sɛr wɛ omɩna, mɔ̃kɛ sɩ 'lee nɩnɩ gɩrɛ bɔɔ gbe tomɩrra sɩ ga do haarra ga, anɩ thu thʋnɛ fʋ sɩ waa ka, dɩ sa-n ƴaal ka sɩ yɛ nɩ kɔrɔ.
18 Mɛ̃ sɩ-n ƴaal gɩrɛ dɩphã sɩ pɔ anɩ pa, dɩ mɛr Polɩ thɛthɛ ƴaalɛlakɛ balanyɔ fɛʋ, sɩ Satã kɔɔ pɩɛr sɛr dɩ sa kɔɔ yɩ hʋɛa'.
19 Gɩdonɩ ʋmɔ̃ dɔrakɛ gɩrɛ asɩ nũ pɛ, agɩbo asɩ kãkada na asɩ khookɛ dɔnɩ i dʋbɩdaa, ga do nɛr gɩ asɩ Kɔ̃tɩ̃ Jejuu bir ɩ̃ bɔaa?
20 Ɔɔ, nɛr dɔ asɩ i dʋbɩda na asɩ da.