9
1 Ado gɩrɛraakɛ dɔnɩ tɩɩ phuusɔɔ bul thɔ̃ gɩ, ma laar 'lo na khere nar sɛba'.
2 Gɩdonɩ mɩ jɩrɛ anɩ ƴaal bɔ, dɩ gɛr mɩ-n məbiro anɩdara Masedʋandaraa thɩ̃thɩɩn a so war ayɩ: Akaɩdara kɔɔ gbɛbɩrɛ pɩ kɛkɛkɛ ƴakhɛrɔ. Dɩ anɩ gbɛ̃gbɛrɛna kɔɔ jaa tibil jɔjʋɔ.
3 Mɩ-n thʋɔn omɩna dɩ mɛ̃ anɩdaakɛ mɩ-n məbironi gelelala na do mɔlɔa', dɩ dakha wɩ yɩ nɩ nɩ gbɛbɩrɩ nɩ pɩ mɔna mɩ kɔɔ sonɩ.
4 Ado mɛ̃ ga, sɩ dɩ sɩ pɔ kha na Masedʋandara dɩ na gbɛbɩ a pa', ga dor mɔ̃ sɩ yɩnɩ sɩ jɩrɛ anɩ ti, na dor asɩ yicur na anɩda.
5 Mɩ kɔɔ kpɩɛrɛ gɩ bɔrɛ gɛr gɩ dɩ ɩ̃ kɔɔ bɩɛl omɩna wɩ kʋʋl nɩ ƴɩɛ wɩ pɔ anɩ pa, wɩ kɔɔ gbɛbɩ ha bulo khaardaakɛ nɩ kɔɔ 'lini sor na 'laarɛ; mɩ-n ƴaalɛ gɩ dɔ ha bulo khaardaa ga-n ho bɩ̃ puudaa ga.
6 Nɩ jɛ ʋrɛ direni fɩɩʋ, fɩɩʋra a na kha, sɩ ʋrɛ direni jɔɔ, jɔɔra a na kha.
7 Tɩbɩla fɛʋ bɩɛlbɩɛl na-n 'laanɛ mɔ̃ ntɛɛ bɩ̃ kpɩɛr hanɩ, wa-n 'laa na gbobira', ga-n ho tɔ pɛr gɩ woa'; gɩdonɩ Thãgba n nar ʋrɛɛkɛ n 'laanɛnɩ na kãkar.
8 Thãgba hananɛ punone a na bɔna nɩ na bɔna caar fɛʋ dɩɩdɩɩ, dɩ mɛ̃ na-n hana wire fɛʋ gɩrɛ fɛʋʋkɛ na-n dana nɩnɩ, na hana gɛr dɩ a jɔr na ka, na-n cʋʋna thɔ̃ bʋɔ fɛʋ,
9 mɔ̃kɛ gɩ kherenɩ Thãgbaa sɛbɛra ayɩ: «Ha bulole a-n 'laana khaardaa jɔɔ bɔdarara, ɔɔ fɩl sar khorr gɩ too.»
10 Ʋrɛ n 'laanɛnɩ be bi jaldaarra na dɩkɔ a khɔ, ɔr na 'laanɛ be na ha nɩ dɩ a dɛbɩrɔ, dɩ ɔr na cʋɛ dɩ ha bulo be na se nar ga-n pɛr.
11 Dɩ mɔ̃ nɩ hananɩ thɩ̃ɛ jɔɔ na punone na-n 'laa thɩ̃ɛ na ha bulole, dɩ anɩ khaardasɔɔkɛra sɩ-n 'laanɩ ga 'laarɛ Thãgba khɩɩrɛ.
12 Gɩdonɩ bul thɩ̃ɛɛkɛra n 'laanɛnɩ, ga do tɩɩ phuusɔ gɩ-n bul thɩ̃ ɓɔrɛra dɩbara ga, sɩ dakha ga tɔr Thãgba khɩɩrɛ jɔɔ ga-n pɛr.
13 Ga bul thɔ̃ɔkɛ n nɛna mɔ̃ nɩ hanɩ, dɩ wa-n khɩɩ Thãgba anɩ nũ nɩra mɔ̃kɛ nɩ tuni Kirisitii tutugo bɔ thɩmɩɩ, na ha bulo thɩ̃ 'laarɛraakɛra n nɛnanɩ anɩ kũu bɩnɔ do na wɛr, na tɩbɩla fɛʋ.
14 Dɩ wɩ-n bɩɛlɛ Thãgba dɩ wa-n pɛ nar gɩdonɩ nɩ lõ wer haar, dɩɩ the bɔ jɩɩrraakɛ thʋnanɩ kar, kɛ Thãgba jɩ nɩnɩ.
15 Thãgba hɩna khɩɩrɛ ɔɔ khaardaraakɛ na hanɩ mɩɛrɛra ga.