9
1 Ma hana hʋɛ na cʋʋ mɔ̃ mɩ pɛrnɩ haaraa? Ga do thɔ̃thɔn ha maa? Ma kɔɔ yɩ Jeju asɩ Kɔ̃tãa? Ga do nɛr dɔ ɩ̃ nyɛ̃kɩɛr thɔ̃ Kɔ̃tɩnna gaa?
2 Ado ma do thɔ̃thɔn ɩkhasɔra ga, sɩ ne wer mɩ thʋnɛ do nar thɔ̃thɔn, gɩdonɩ nɛr dɔ jɩɩnɩkɛ n nɛnanɩ dɩ thɔ̃thɔn ha mɩ, gɩrɛraakɛ nɩ donɩ Kɔ̃tɩnɩda.
3 Gɛr dɔ ɩ̃ birseekɛ mɩ-n birseni wɛkɛ n pɛ marnɩ sor.
4 Sa hana hʋɛ sɩ kho sa-n yɔna gaa?
5 Sa hana hʋɛ na kpa ha pɛdaarɩkɛ dɔnɩ asɩ khɛr sa-n kpaarna, mɔ̃kɛ wɩ̃ thɔ̃thɔna n cʋʋnɩ, na mɔ̃kɛ Kɔ̃tɩnɩ õkuunsɔ na Sefasɩ n cʋʋnaa?
6 Dɩ agɩbo mɛrra dɩbara na Barnabasɩ, ser na hana hʋɛ na ba faa asɩ nyɛ̃kɩɛr thɔ̃ dora gaa yaa?
7 Amɛ na gbaan ɔɔ thɛthɛɛ war a na-n lɩmɩ dɩbara sɩ a na-n cʋʋ sɔrasɩ? Amɛ na kʋlɛ lɩɛ sa a na kho ga thã? Amɛ na-n khɛ nʋma sɩ ga do nʋmaa ilẽ n haanɛa?
8 Gɩrɛ mɩ sonɩ, tibil kpɩɛrɛ gɩ dɩbara ya? Ga do thalera jɔfʋ soaa?
9 Mee gɩ kherere Mʋɩjɩɩ jɔfʋra ayɩ: «Nakɩɩrɩkɛ na-n sanɩ jɔ, fa-n lii nʋɔa'.» Nakena Thãgba n kpɩɛrna dɩbara ya?
10 Agɩbo, ga do sɛr dɔ nɔɔ dɩɩ mɩɩrɔ thalaa yaa? Ɔɔ, sɛr dɔ nɔɔ dɩɩ kherero ayɩ: Ʋrɛɛkɛ n kʋlɛnɩ a teenanɛ a na-n kʋlɛ na nũ pɛrɛ, dɩ ʋrɛ na-n thɔnɩ jɔ, a na-n thɔ na nũ pɛrɛ mɔ̃ a na yɩrɔnɩ ɔɔda.
11 Ado sɩ kɔɔ diire anɩ thɩ̃thɩɩn thɩ̃ɛɛkɛ dɔnɩ thudaa, ga dor thɩ̃ kʋkʋʋ ado sa 'lɛ nar nɛnɛ̃ bɔɔkɛɛ thɩ̃sɔa bɛ?
12 Ado ʋkhasɔ hananɛ hʋɛ a na 'lɛ nar thɩ̃ɛ, ga do sɛr ka teena gaa? Sɩ sa kɔɔ cʋʋ mɔ̃kɛra sɩ hananɩ hʋɛa', sɩ sɩ-n fʋrɛ haar thɩ̃ɛ fɛʋra, dɩ mɛ̃ sa var Kirisitii tutugo bʋɔɔ thɩmɩɩ ga-n kpaaraa ga.
13 Na jɩ dɩɩ do wɩrɛɛkɛ n dɔnɩ Thãgba fʋɔr cɔ thɔma, thɩ̃ɛɛkɛ n thɛnɩ Thãgba fʋɔr cʋɔrɔ wɩ-n khoaa? Na wɩrɛ n jenɩ bonɩɛ, bonɩ ji thɩɛna n haanɛ waa?
14 Dɩ mɛna Kɔ̃tɩn kɔɔ pɛr oti, dɩ wɩrɛ n mɩanɩ tutugo bʋɔɔ thɩmɩɩ, tutugo bʋɔ na-n haanɛ wɩ.
15 Sɩ mɛrɛ ma kɔɔ cʋʋrakɛ dɩɩ ho mɩ hananɛ ga hʋʋla'. Sɩ ma khere nar gɩrɛ nɩ cʋɛ ɔmɛ̃ mɛrɛra gaa koe, gɩdonɩ khir ka ba marɛ gɩrɛɛkɛ tibil na cʋʋnɩ dɩ a tɔ̃ mɩ ga məbiile.
16 Gɩdonɩ ado ma mɩɩ tutugo bʋɔɔ thɩmɩɩ, ga do mar məbidaa ga; gɩdonɩ thɩ̃ɛ gɩɩkɛ teananɩ ɩ̃ cʋɛ phubi, dɩ ga puu marɛ ado ma-n mɩɩ tutugo bʋɔɔ thɩmɩa'.
17 Sɩ ado ɩ̃ ƴaalla gɩ the, ma 'lɛr lɩmɩnɛ; sɩ ado ga the ɩ̃ ƴaalla ga, thɔma gɩ a heen mɩ.
18 Dɩ anye dɔrakɛ ɩ̃ lɩmɩ tɔr? Gɛr dɔ mɔ̃ mɩ-n mɩɩnɩ tutugo bʋɔɔ thɩmɩɩ, ɩ̃ mɩa gɩ na 'laanɛ khaar, sɩ ma-n bo na kpãkpãa hʋ hananɛnaakɛ tutugo bʋɔɔ thɩmɩɩ na ha mɩna'.
19 Waʋ mɩ do tɩbɩla fɛʋra wer, sɩ mɩ debire do tɩbɩla fɛʋʋ dee dɩ mɛ̃ ma 'lɛ wɩ waa 'lɛ paar.
20 A mɩ hana Juifisɔ, mɩ-n debire dɩ ɩ̃ ho Juifi, dɩ mɛ̃ ma 'lɛ Juifisɔ. A mɩ hana wɩrɛ hanɩ jɔfʋra, mɩ-n debire dɩ ɩ̃ ho jɔfʋ hɩ̃hɩn, sɩrakɛ ga do jɔfʋra mɩ ha ga, dɩ mɛ̃ ma 'lɛ wɩrɛ hanɩ jɔfʋra.
21 A mɩ hana jɔfʋ 'leedara, mɩ-n debire dɩ ɩ̃ ho ma hana jɔfʋa', sɩrakɛ ga do mɩ faarɛ Thãgbaa jɔfʋa', sɩ Kirisitn jɔfʋ biro mɩ ha, dɩ mɛ̃ ma 'lɛ wɩrɛɛkɛ na hananɩ jɔfʋa'.
22 A mɩ hana yɔyɔa, mɩ-n debire dɩ ɩ̃ ho mɩ yɔɔrɛ, dɩ mɛ̃ ma 'lɛ yɔyɔa; mɩ-n debire dɩ ɩ̃ do thɩ̃ɛ fɛʋ tɩbɩlala fɛʋ, dɩ mɛ̃ ado gɩ ha mɔnakɛ, ma thʋnɛ na taa ɩkhasɔ.
23 Tutugo bʋɔɔ thɩmɩɩ dɔ nɔɔ dɩ ma-n cʋʋrɔ thɩɛna fɛʋ, dɩ mɛ̃ ma 'lɛrɔ dakha ɩ̃da mer.
24 Na jɩ dɩɩ do wɩrɛ n caannɩ kɔlɔ̃kɔɔ ca paar, fɛʋ n caan, sɩ tɩɩ bɩɛl dɩbara n 'lɛ khoraa? Mɛ̃ gɩ, na-n ca ga 'lɛ'lɛ ca.
25 Tibil wo tibilikɛ dɔnɩ nɔnɔɔ, a-n fʋrɛ dɩbara thɩ̃ɛ fɛʋra; sɩ wɛr wɩ-n cʋʋrɛ wɩ 'lɛ khor cacadaar dʋʋrra sɩɩ dorakɛ dakʋɛnaa gɩ, sɩ se wer, khorɩkɛ na dɔnɩ dakʋɛnaa ga sa 'lɛ.
26 Gɛr gɩ me wer mɩ-n car, sɩ ga do baba ga, mɩ-n thʋrɛ, sɩ ga do pɔɩ mɩ-n ja';
27 sɩ ɩ̃ tomɩ mɩ-n ka ma-n ʋʋnnɔ, ma-n cʋgʋʋ a jo, saagado mɛ̃ ga, ma mɩɩrɛ Thãgbaa thɩmɩɩ tɩbɩlala wer ker na pɩ, sɩɩ do me wer wɩ bo mer faa.