10
1 Omɩna, mɩ-n ƴaalɛ na-n dədinə ga, asɩ mama thɩ kɔ̃tɩ̃sɔ fɛʋ kɔɔ hale ndɔlɔ̃paarra, dɩ wɛr fɛʋ kɔɔ kpãsɛrɛ lanyʋɔnna;
2 dɩ wɛr fɛʋ kɔɔ 'lɛr yɔ kpɛɛrɛ ndɔlɔ̃paarra na lanyʋɔnna dɩɩ do awɩ 'li khara na Mʋɩjɩ gɩ the;
3 dɩ wɛr fɛʋ kɔɔ khor dɩko ca bɩɛlɩkɛ dɔnɩ thudaa,
4 dɩ wɛr fɛʋ kɔɔ yɔr thɩ̃ yɔna ca bɩɛlɩkɛ dɔnɩ thudaa. Gɩdonɩ wɩ-n kɔɔ yɔr gɩrɛ thɛnɩ thu boka kɔ̃tɩɩnaakɛ n kɔɔ kpaan warnɩ, dɩ bokaarɩlera Kirisiti gɩ.
5 Sɩ tɩbɩla bərəəm wɛrra na kɔɔ da Thãgba haarra ga, gɩdonɩ wɩ kɔɔ thiire le bəənnə.
6 Dɩ ga thɩ̃sɔɔle daan gɩ do sar thɩ̃ nɩrɔrɛ, dɩ mɛ̃ sa-n do thɩ̃ puu ƴaal thue na-n fʋ sɩ awɩ kha ga.
7 Na-n debi do thɩl jidara, mɔ̃kɛ ɩkhasɔ wɛrra kɔɔ hana', mɔ̃kɛ gɩ kherenɩ Thãgbaa sɛbɛra ayɩ: «Tɩbɩlaale kɔɔ toore wɩ kho wa-n yɔna, sɩ agɩpɩ wɩ ɩɩr wa-n sa bɩna.»
8 Sa-n do dakha bɔdɛl cʋʋdara mɔ̃kɛ ɩkhasɔ wɛrra kɔɔ cʋʋna', dɩ mɛ̃ tɩbɩla gbɩlanɩ kpelẽ yẽther kɔɔ ji khiir wi bɩɛlla.
9 Sa-n fifilə dakha Kɔ̃tɩn a na hɩɩn, mɔ̃kɛ ɩkhasɔ wɛrra kɔɔ cʋʋnɩ dɩ siisɔ kɔɔ kʋʋr wa'.
10 Na-n hũhuun dakha mɔ̃kɛ ɩkhasɔ wɛrra n kɔɔ hũhuunni, dɩ gbõgolõdaar kɔɔ kʋʋr wa'.
11 Ga thɩ̃sɔɔkɛ kɔɔ dã wɛr gɩ nɩ sar thɩ̃ɛ, dɩ wɩ khere ger ga-n dɩɩr sɩ fɩlɛ, sɛrɛɛkɛ dananɩ nɛnɛ̃ pɩpɩɩ bɔɔkɛ.
12 Gɛr gɩ dɔ ʋrɛɛkɛ n pɩɛrnɩ haar ɩnɩ jɩɛ jɩɩl, n jɩɩ hɩɩn, a na-n jəə koe.
13 Fifiləle na-n dã nɩ saagado gɩrɛ tibil n yɩnaa ga; sɩ Thãgbaakɛ dɔnɩ sobɔdaar a na tu dɩ na yɩ bɩ̃ ber gɩ jɔ anɩ fãgara ga, sɩ fifiləlela a na gbɛbɩrɛ the paar dɩ mɛ̃ na puno na fʋ gar dɩbara.
14 Gɛr gɩ nɛrɛɛkɛ mɩ-n nanɩ, a nɩ jɩ nɩ fuo hʋnɔnɛ na thɩl jir.
15 Mɩ mɩɩna nɛr mɔ̃kɛ nɩ donɩ tɩɩ kpɛsɛsɔ; nɛrɛɛ thɛthɛ n jʋrɛ gɩrɛra mɩ-n sonɩ na hɩnɛ.
16 Bɔ̃bɔna thɩ̃ yɔnanɛɛkɛ sɩ-n gbanɩ dɩ sa-n khɩɩna Thãgba, ga do Kirisitira sɩ bulnə kha ɔɔ tɔmãa? Dɩ buruukɛ sɩ-n kuurni, ga do Kirisitira sɩ bulnə kha ɔɔ tomaa?
17 Dɩ gɩdonɩ buru bɩɛl gɩ-n do, sɛrɛɛkɛ jʋɔnɔnɩ tomɩ bɩɛl sɩ do, gɩdonɩ buru bɩɛlla sɩ-n bul kha fɛʋ kho.
18 Nɩ hɩnɛ wɩrɛ dɔnɩ Ɩjɩrayɛldara tibil yinəna: Wɩrɛ n khɔnɩ bonɩ ji thɩ̃ɛ, ga do Thãgbara wɩ bulnə kha mɔ̃ wa-n jiirəəni bonɩɛɛle bonɩ ji paaraa?
19 Dɩ anyera mɩ-n so thakɛra? A thɩɛna gaa, bonɩ ji nʋʋn dɔ thɩ̃ɛ wɛ? Dɩ agɩbo thɩl dɔ thɩ̃ɛ wɛ? Kpei.
20 Sɩ gɩrɛ wɩ-n jinəni bonɩɛ, kɔ̃tɛɛbiisɔra wɩ-n ji, ga do Thãgbara ga, dɩ ma-n ƴaal nɩ bulo kha na kɔ̃tɛɛbiisɔa'.
21 Na puno na-n yɔ Kɔ̃tɩnɩ thɩ̃ yɔna, nɩ bir na-n yɔna kɔ̃tɛɛbiisɔɔ thɩ̃ yɔna ga; na puno na bul kha na-n kho Kɔ̃tɩnɩ dɩko, sɩ nɩ bir na-n khona kɔ̃tɛɛbiisɔɔ dɩkoa'.
22 Gbugi sɩ-n cʋʋ gɩ fɔ Kɔ̃tɩn yaa? Dɩ sɛr ba hana fãga a jʋɔ yaa?
23 Hʋɛ hale thɩ̃ɛ fɛʋʋ cʋʋra, sɩ ga do thɩ̃ɛ fɛʋ bʋɔnɔa'. Hʋɛ hale thɩ̃ɛ fɛʋʋ cʋʋra, sɩ ga do thɩ̃ɛ fɛʋ n cʋɛ tibil dɩ khɔ̃ da-n pɛra'.
24 Tibil na-n ƴaal thɩ̃ɛ na-n bɔ ɩnɛr bɩɛlla dɩbara ga, sɩ tɩbɩla fɛʋ bɩɛlbɩɛl n ka na ƴaalɛ gɩrɛ na bɔnɩ ʋkhara.
25 Nʋʋn wo nʋʋnɩkɛ wɩ-n dolonɩ ƴaa na-n khɔ, sɩ na-n bule thɩ̃ɛ a gba kpɩɛrnɔa';
26 gɩdonɩ gɩ kherere Thãgbaa sɛbɛra ayɩ: «Thɩɩ na thɩ̃ɛ fɛʋʋkɛ harɔnɩ, Kɔ̃tɩn hɩna.»
27 Ado tibilikɛ na dɔnɩ ha pɛdaara' we nɩ dɩko khʋʋ, dɩɩ da nar dɩ nɩ jal, nɩ khɔ thɩ̃ɛ fɛʋʋkɛ wa ha nɩnɩ, sɩ na-n bule thɩ̃ɛ a gba kpɩɛrnɔa'.
28 Sɩ ado tibil so nar aa: Bonɩɛ wɩ jinə; na-n khoa koe, gɩdonɩ ntɛɛle khɛ narnɩ gɛr dɔ nɔɔ, na kpɩɛrnɔɔkɛ ga ɩnanɩ.
29 Sɩ kpɩɛrnɔɔkɛ mɩ sonɩ, ga do afɩ thɛthɛɛda mɩ soa', sɩ tɩɩ kpɩɩleeda. Anyeraakɛ tɩɩ kpɩɩ na 'laa na yɩ dɩɩ ɩ̃ hʋ hanana a na-n so.
30 Ado mɩ taa fʋɔr Thãgba sɩ na kho, mɔ̃ ga do wa-n mɩɩ ɩ̃da puu gekɛrara mɩ-n fʋɔrɔnɩ Thãgba?
31 Dɩ gɛr gɩ thɩ̃ɛ wo thɩ̃ɛɛkɛ nɩ-n khonɩ, agɩbo nɩ-n yɔnɩ, na thɩ̃ doo wo thɩ̃ dookɛ nɩ-n cʋʋnɩ, na-n cʋɛ thɩɛna fɛʋ ga-n dʋbɩ Thãgbaa i.
32 Na-n do nɛ baradaa Juifisɔra, dɩ wɩrɛraakɛ na dɔnɩ Juifisɔa wɛ, dɩ Thãgbaa we gbɛbɩdarara wa';
33 mɔ̃kɛ mɛrɛɛ thɛthɛ n donɩ bʋɔ gɩrɛ thɩ̃ɛ fɛʋra, dɩ ma da tɩbɩla fɛʋ haar; ma-n ƴaal gɩrɛ na bɔ marna', sɩ gɩrɛ na bɔnɩ tibil jɔjʋɔra dɩ wa 'lɛ taarɛ.