18
1 A gele pɩ, Pol ther Atɛn a jal Korɛ̃tɩ.
2 Dɩ le a caana Juifi kũu bɩɛlɩkɛ wɩ-n wenɩ Akɩlasɩ; Pɔ̃ dɩɩra wɩ kʋ̃ɔ. Ga maan a kɔɔ thenɩ Ɩtalɩ na ɔɔ khɛr Pirisil a pɔa', gɩdonɩ Kʋloodɩ fãgadaar kɔ̃tɩ̃ɩ kɔɔ sor Juifisɔra fɛʋ wɩ thɛ Rɔm. Dɩ wɛr Pol n kɔɔ toona.
3 Dɩ gɩdonɩ wa kẽkẽ thɔma wɩ-n do, wɩ gbɛbɩrɛ too dɩ wa-n do kha thɔma.
4 Hɩɩr wire fɛʋ Pol n gba Thãgbaa thɩmɩɩ Juifisɔɔ Thãgba fʋɔr cɔra da-n yɩrna Gɩrɛkɩsɔ na Juifisɔ wɩ pɩɛr haar.
5 Dɩ ɔhɔɔkɛ Sɩlasɩ na Timothe kɔɔ thenɩ Masedʋan a pɔ, gɛr Pol jɩɩ tooro Thãgbaa thɩmɩɩ togʋʋ waa vʋ̃ʋ, da-n jɩɩ nɩna Juifisɔ dɩ Jeju dʋɔn Kirisiti.
6 Sɩ mɔ̃kɛ Juifisɔ gbɔnaanɩ dɩ wa-n nɩɩrnaa, Pol kpɛɛrɛ thɩlãkobe ɔɔ kẽkena sa so war: A nɩ buur, anɩ so na heen ma', ga 'lɛ ma'. Nɛnɛ̃ dɩphã thɩldarara ma-n jal.
7 Dɩ ɔbɔɔkɛ a thenɩ le a jaal kũu bɩɛlɩkɛ wɩ-n wenɩ Tɩtusi Jusitusii pa, kɛ n cʋɔnnɩ Thãgba. Ɔɔ cɔ, cɔ ɓãa gɩ na Juifisɔɔ Thãgba fʋɔr cɔ.
8 Sɩ Kirisipusiikɛ dɔnɩ kɔ̃tɩn Juifisɔɔ Thãgba fʋɔr cɔra kɔɔ pɛr Kɔ̃tɩn haar na ɔɔ cɔdara fɛʋ. Dɩ Korɛ̃tɩda jɔjʋɔɔkɛ kɔɔ pɛnɩ Polɩ thɩmɩɩ nũu kɔɔ pɛrɛ haar dakha dɩ wɩ kpɛɛ wɩ nyʋɔnɔ.
9 Sɩ dɩtɩnɔ, Kɔ̃tɩn cʋʋrɛ Pol dɩ yɩ thɩ̃ɛ sɩ dɩ sʋʋraa ayɩ: Fa-n do maar n fʋ fa'. Na mɩa ɩ̃ thɩmɩɩ, fa-n pɩr pɔba',
10 gɩdonɩ mɩ ha kha na fɛrɛ, dɩ tibil na tha far nyɔ̃ɔ a na cʋʋ fɩ puurə'; na mɩa gɩdonɩ tɩbɩla jɔɔ har dɩɩraakɛ, kɛ dɔnɩ ɩ̃ too.
11 Dɩ a toore le yɛ bɩɛl na pora maadõ, da-n dɩɩr Korɛ̃tɩdara Thãgbaa thɩmɩɩ.
12 Ɔbɔɔkɛ Galɩyɔ̃ kɔɔ donɩ gobanɛr Akaɩ dɩɩra, Juifisɔ kɔɔ dor nɔ bɩɛl sa ɩɩrna thɩmɩɩr Polla, a kpaa a jalna kɩɩl paar a so ayɩ:
13 Tibilikɛ n tɔr tɩbɩla dɩ pɛr wa-n fʋɔrɛ Thãgba, dɩ ga-n 'li kha kpɩɩ na gɩrɛ jɔfʋ n sona'.
14 Dɩ Pol harra nʋɔ a mɩɩ dɩɩ do Galɩyɔ̃ sor Juifisɔra: Adora gɩ hanɩ gɩrɛ thɩ̃ɛɛkɛ na sarana' a cʋʋ, agɩbo dɩkhaa thɩ̃ puu gɩ ga dor, ma pɛ nɛr nũu ka nɛr Juifisɔ;
15 sɩ ado thɩ̃ banaa gɩ thɩmɩɩrra, na ierasɔ, na anɩ jɔfʋra, nɛr gele ba dɛ; ma ƴaal ɩ̃ do so kɩɩldaar ga thɩnaala';
16 sa weele wɩ le kɩɩl paar a faa.
17 Dɩ tɩbɩla fɛʋ fʋ Sɔsɩtɛnɩkɛ dɔnɩ kɔ̃tɩn Juifisɔɔ Thãgba fʋɔr cɔra a bɩɩr le kɩɩl paar, sɩ Galɩyɔ̃ na therna gɩraka'.
18 Dɩ Pol toore Korɛ̃tɩ a pʋɔr; agɩpɩ dɩ fʋɔr omɩna sa gba bato a jal Siri dɩɩra nakha Pirisil na Akɩlasɩ. Sɩ Sãkɩrɛ a kɔɔ bel yʋʋ gɩdonɩ nʋɔ a kɔɔ so.
19 Dɩ wɩ kɔɔ daan Efɛjɩ; le Pol faa ɔɔ kpãkpãadara sa lõ Juifisɔɔ Thãgba fʋɔr cɔra da-n yɩrna Juifisɔ wɩ yɛ kɩrʋ;
20 dɩ wɩ kɔɔ bɩɛlʋʋlɛ a tɔɔ a pʋɔrɛ gbe sɩ aa kɔɔ tuə',
21 a fʋɔr wɛr sa so ayɩ, gɩ teenanɛ ɩnɩ-n jala fɛtɩraakɛ na hanɩ Jerujalɛm sɩ a Thãgba tu ɩna bire na pɔ; sa gba bato Efɛjɩ a jal.
22 Ɔbɔɔkɛ a danɩ Sejare, a gbaar jal Jerujalɛm. Dɩ ɔbɔɔkɛ a fʋɔrnɩ we gbɛbɩdara pɩ, a gbaar jal Ãtɩyɔsɩ.
23 Ɔbɔɔkɛ a toonɩ Ãtɩyɔsɩ a pʋɔr gbe, a gbaar hʋɛ a jal da-n kpaar Galasɩ a kpaan Firiji a cʋʋ kpãkpãadara fɛʋ dɩ wɩ tɩ.
24 Sɩ Juifi bɩɛl gɩ dɩ wa-n wɩɩ Apolɔsɩ, Alesãdɩɩr dɩɩra wɩ kʋ̃ɔ; a dor tɩɩ kpɛsɛɛ a dona Thãgbaa sɛbɛ jɩ kɔ̃tɩn, a pɔ Efɛjɩ.
25 Wɩ kɔɔ dɩɩrʋʋrɛ mɔ̃ Kɔ̃tɩnɩ hʋ hanɩ, dɩ mɔ̃ a donɩ tibilikɛ hanɩ phãphãphã, a-n mɩɩrɛ da-n dɩɩrna gɩrɛ dɔnɩ Jejuuda bɔɔbɔɔ; sɩrakɛ Jãa yɔ kpɛɛ a kɔɔ jɩ dɩbara.
26 Dɩ a mar da-n mɩɩ na 'lar Juifisɔɔ Thãgba fʋɔr cɔra. Dɩ ɔbɔɔkɛ Pirisil na Akɩlasɩ kɔɔ nɩɛnɩ gɩrɛ a-n mɩɩnɩ, wɩ kpaarɛ dɩ wɩ ha kha, dɩ wɩ jɩɩ nɩnaa kɩrʋ mɔ̃ Thãgbaa hʋ hanɩ bɔɔbɔɔ.
27 Mɔ̃kɛ a ƴaalnɩ a kpãasɛ a jal Akaɩ, omɩna kɔɔ pɩɛraarɛ 'lar. Dɩ wɩ kherere sɛbɛ a ha kpãkpãadara wɩ teaa. Dɩ ɔbɔɔkɛ a kɔɔ danɩ le, a bulle wɩrɛ Thãgbaa bɔ jɩ donɩ nɔɔ dɩ wɩ pɛr haar;
28 gɩdonɩ a-n punone Juifisɔ thɩ̃ banaana ka tɩbɩlaa ƴɛra, dɩ gba Thãgbaa sɛbɛ da-n nɩna wɩ dɩ Jeju dʋɔn Kirisiti.