17
1 Sɩ Pol na Sɩlasɩ kɔɔ kpaarɛ Ãfɩpolɩsɩ na Apolonɩ sa dã Tesalonɩkɩ, ka Juifisɔ hananɩ awɩ Thãgba fʋɔr cɔ.
2 Dɩ mɔ̃kɛ Pol mɩlna gɩnɩ a lʋʋn le. Dɩ hɩɩr wire yẽther fɛʋ a gbaar Thãgbaa sɛbɛ da-n yɩrna wɩ wɩ yɛ kɩrʋ,
3 da-n jɩɩ mɩɛ wɩ da-n nɩna wɩ kɩrʋ, mɔ̃kɛ gɩ teenanɩ Kirisiti n yɩ gaarɛ ɔɔ khi pa sɩ a ɩɩr a the khirera; dɩ a so warɛ Jejuulera dɔ Kirisitiikɛ ɩnɩ-n mɩɩ wɩnɩ.
4 Ɩkhasɔ wɛrra jɩrɛ tue dɩ wa-n kpaar kha na Pol, na Sɩlasɩ, na dakha Gɩrɛkɩsɔ bərəəmkɛ n cʋɔnnɩ Thãgba, na khɛ jɔjʋɔɔkɛ jɩɛnnɩ too.
5 Sɩ gɩdonɩ gbugi fʋrɛ Juifisɔ, wɩ kpar konaakɛ dɔnɩ ƴatɛ tɔɔkɛ dɔnɩ nɔ ɓaardara, dɩ wɩ ɩɩr a kpa tɩbɩla jɛ sa cʋʋ dɩ wɩ ɩɩr na ɓɔɓɔlɔlɛ dɩɩra. Dɩ wɩ kɔɔ jaal a sɔbɩ Jajɔ̃ɔ cɔ, wɩ ƴaal Pol na Sɩlasɩ, wɩ kpa wɩra wɩ jalna tibil jɔɔ ƴɛra.
6 Sɩ gɩdonɩ wa yɩ wa', wɩ kɔɔ kpar Jajɔ̃ na wɩ̃ omisɔ a jalna kɔ̃tɩnaa pa dɩɩra a hulẽ ayɩ: Tɩbɩlaakɛ n fenɩ dɩɩ fɛʋ ɩnɛ kɛ, dɩ Jajɔ̃ tee wɩ.
7 Wɛr fɛʋ n kʋɛa Sejaarɩ jɔfʋ dɩ wa-n sona dɩ wɩ yɩ fãgadaar kpɩɩ haleekɛ dɔnɩ Jeju.
8 Ɔbɔɔkɛ tibil jɔɔle na kɔ̃tɩnasɔ nɩɛnɩ thɩmɩɩrɩle, haar ɓʋ̃ɓʋna wɛr.
9 Sɩ wɩ kɔɔ fʋrɛ Jajɔ̃ na wɛ a to helula, sɩ agɩpɩ wɩ faa wɛr dɩ wɩ kɔ̃.
10 Dɩ dapaara omɩna cʋʋrɛ Pol na Sɩlasɩ dɩ wɩ ɩɩr kɔrɔ, a the le a jal Bere dɩtɩnɔ. Ɔbɔɔkɛ wɩ danɩ le, wɩ kɔɔ lʋʋn Juifisɔɔ Thãgba fʋɔr cɔra.
11 Wa Juifisɔɔle hananɛ fɩlɛ a jɔ Tesalonɩkɩdara; wɩ kɔɔ 'lɛr Thãgbaa thɩmɩɩ na ha bʋɔ, dɩ wɩ 'lo wire fɛʋ Thãgbaa sɛbɛra na hɩɩn, ado gɩrɛɛkɛ wɩ-n so warnɩ otirə gɩ ha.
12 Tibil jɔjʋɔɔ wɛrra kɔɔ pɛrɛ haar, na Gɩrɛkɩ khɛrasɔ bərəəmkɛ jɩɛnnɩ too, na konasɔ jɔɔjɔɔ.
13 Sɩ ɔbɔɔkɛ Tesalonɩkɩ Juifisɔ nɩɛnɩ dɩ Pol n mɩɩrɛ Thãgbaa thɩmɩɩ dakha Bere, wɩ kɔɔ pɔr a nyanyãa tɩbɩlaa kpɩɛr sa cʋr wɩ a pɛ war.
14 Sɩ dapaara omɩna kɔɔ cʋʋrɛ Pol wo dɩ ɩɩr jalna lanyɔ̃ khʋʋ. Sɩ Sɩlasɩ na Timothe toore Bere.
15 Sɩ wɩrɛ kɔɔ thɔɔnɩ Pol, Atɛn wɩ kɔɔ danaa sɩ na kɔ̃, dɩ Pol thɔ̃ wɩ wɩ sɔ Sɩlasɩra na Timothera wɩ pɔ kɔrɔ.
16 Ɔbɔɔkɛ Pol toonɩ Atɛn da-n pɩɛr wɩ, haar n heluule mɔ̃kɛ a yɩnɩ thɩla dɩɩ hi dɩɩle.
17 Gɛr gɩ dɩ lõ Juifisɔɔ Thãgba fʋɔr cʋɔra da-n yɩrna Juifisɔ wɩ yɛ kɩrʋ, na dakha wɩrɛɛkɛ n cʋɔnnɩ Thãgba, dɩ ƴatɔɔ dakha mɛ̃ a-n yɩrna wɩrɛɛkɛ a-n caananɩ wire fɛʋ.
18 Wɩ̃ thɩ̃ jɩnaakɛ n kpaanɛnɩ Epikuuri too dɩɩrra na Sɩtoyɩsɩɩ too dɩɩrra n mɩɩnaanɛ. Dɩ wɛ na-n so: Anyee thɩmɩɩ ca nɔdadaarɩkɛ n ƴaal a mɩɩ thakɛ? Sɩ ɩkhasɔɔkɛ nɩɛnɛnɩ da-n mɩɩ Jejuuda na khi ɩɩrɛɛda wɩ sor: Gɩ hor thãgba kpɩɩsɔɔda a-n mɩɩ.
19 Dɩ gɛr gɩ dɩ wɩ kpaa jalna Atɛndaraa so gʋʋr pa, a sʋʋraa: Sɩ punone jɩ dɩɩr phaakɛra fɩ-n dɩɩrnɩɩ kɩr ya?
20 Gɩdonɩ sɩ nɩɛrɛ dɩɩr phanaakɛ fɩ-n dɩɩrnɩ, gɛr gɩ dɩ sa-n ƴaal sɩ jɩ kɩrʋ.
21 Gɩdonɩ Atɛndara fɛʋ na kpakpalaakɛ hanɩle, awɩda dʋɔn wɩ tɔɔ a na pɛ so phana nũu, agɩbo a na mɩa gɩ dɔrɔɔm.
22 Dɩ Pol ɩɩr jɩɩl Atɛndaraa so gʋʋr pa thɩ̃thɩɩn, a so ayɩ: Nɛr Atɛndara, mɩ yɩ nɛr waa dɩ nɩ do thãgba ƴala gel.
23 Gɩdonɩ mɔ̃kɛ mɩ-n kpaarnɩ anɩ dɩra, mɩ yɩrɛ thɩ̃ɛɛkɛ dɔnɩ anɩ thɩl ji thɩ̃sɔ; mɩ phurore bonɩ ji pa bɩɛlla dɩɩ khere ayɩ: Thãgbaakɛ tibil na jɩna', ɔr hɩna. Dɩ gɩrɛra nɩ-n fʋɔrnɩ sɩ na jɩ gɩ wa', gɛrra mɩ-n mɩɩ nar gɩrɛ.
24 Thãgbaakɛ kɔɔ cʋɛnɩ thɩɩ na gɩrɛ fɛʋʋkɛ ha garnɩ, ɔrra dɔ Kɔ̃tɩn ƴũ na kɛ thɩɩra, aa-n cɔ Thãgba fʋɔr cʋɔrraakɛ wɩ mɩnɩ na tibil nyɛ̃a';
25 dɩ tibil na puno a na-n dʋʋraa thɔma gɩ ho thɩ̃ɛ n ɓɔraa ga, gɩdonɩ ɔr n 'laanɛ yire na fesue na thɩ̃ɛ fɛʋ.
26 Ɔr cʋɛ tibil caar fɛʋʋkɛ dɔnɩ tibil bɩɛlɩ məl wɩ hana paar fɛʋ thɩɩraakɛ, a kɔɔ mãa pɛrɛ mɔ̃ bɔɔkɛ wa pʋɔrnɩ na hanɩ, na mɔ̃ awɩ cɔ pa pɛl na hanɩ dakha.
27 Ɔɔ ƴaal dʋɔn, wa-n ƴaalɛ ɩnɛr Thãgba a dɔ bʋɔ a bəəre phaphapha a yɛ nɩ, sɩrakɛ aa hʋnɔ kha na sɛrɛ bɩɛla'.
28 Gɩdonɩ ɔr dɔ nɔɔ dɩ sɩ hana yire, ɔr n cʋɛ sɩ dɩ sa-n jal, ɔr dɔ nɔɔ dɩ sɩ hakɛ thɩɩra. Mee, mɛ̃ anɩ nɩ pɛdara ɩkhasɔ kɔɔ so ayɩ: «Ɔɔ bɩsãsɔ sɩ do.»
29 Dɩ mɔ̃ sɩ donɩ ɔɔ bɩsãsɔ mɛ̃, ga teena sa-n kpɩɛrɛ dɩ mɔ̃ Thãgba hanɩ, a hor thɩlɩkɛ thɩ̃ jɩn n cʋʋnɩ na dɛ, na dɛ bulo, na bokaar mɔ̃ ɔɔ kpɛsɛ hana'.
30 Sɩ kpɩɛr 'lee bɔɔle Thãgba na-n therna ga, sɩ nɛnɛ̃ dɩphã a-n sor tɩbɩlala paar fɛʋ dɩ yɩ, wa-n deba haar;
31 gɩdonɩ wi bɩɛl hale a dʋnɩ a na gba tibilikɛ a phiirni a kɩɩlna tɩbɩla fɛʋ na fɩl sarʋ, ɔr dɔ ʋrɛɛkɛra a kɔɔ ɩɩrnɩ khirera dɩɩ nɩna tɩbɩla fɛʋ casɩ dɩ thalera ga ha.
32 Ɔbɔɔkɛ wɩ nɩɛnɩ da-n mɩɩ khi ɩɩr thɩmɩɩr, ɩkhasɔ n maan, sɩ ɩkhasɔ wer so aa: Dɩkhõo sa bire a na pɛ afɩda nũu wo.
33 Mɛ̃ Pol the dɩphã awɩ thɩ̃thɩɩn.
34 Sɩ ɩkhasɔ borrakɛ sa maa a pɛr haar, khɛ bɩɛlɩkɛ wɩ-n wenɩ Damarɩsɩ gɩ, na Atɛndaraa so gʋʋrdaar bɩɛlɩkɛ wɩ-n wenɩ Denisi, na wɩ̃ tibil ɩkhasɔ wo.