16
1 Agɩpɩ dɩ Pol gba jal Dɛɛrbɩ na Lisitiri, dɩ kpãkpãadaar bɩɛl gɩ a hale dɩ wa-n wɩɩ Timothe; ɔɔ nɩ dʋɔn Juifi khɛrɩkɛ pɩɛrnɩ Thãgba haar, sɩ ɔɔ thɩ do Gɩrɛkɩ.
2 Omɩnaakɛ hanɩ Lisitiri na Ɩkɔn n mɩɩrɛ ɔɔda bɔ.
3 Dɩ Pol kɔɔ ƴaalɛ a kpaa wɩ ha kha, dɩ gɛr gɩ dɩ gbaa a kur khʋ̃ʋ, gɩdonɩ Juifisɔ kɔɔ har paarɩle dɩɩ do wɛr fɛʋ jɩrɛ dɩ Gɩrɛkɩ ɔɔ thɩ do.
4 Dɩ mɔ̃kɛ wɩ-n kpaarnɩ dɩɩra, wɩ-n sor omɩnana wa-n hɩnɛ gɩrɛɛkɛ thɔ̃thɔna na we gbɛbɩdaraa kɔ̃tɩ̃sɔ kɔɔ gʋʋrnɩ Jerujalɛm.
5 Dɩ we gbɛbɩdara n 'lɛr fãga ha pɛrɛra dɩ wɩ jɔrna na pɛr wire wire.
6 Sɩ mɔ̃kɛ Thu Phuu kɔɔ pɩɛr wɩnɩ wa-n mɩɩ Thãgbaa thɩmɩɩ Ajɩra ga, wɩ kpãasɛrɛ Firiji na Galasɩ dɩɩ.
7 Ɔbɔɔkɛ wɩ thɔɔnɩ Mɩsɩ wɩ kɔɔ ƴaalɛ wɩ lõ Bitini, sɩ Jejuu Thu na kɔɔ ha wɩ hʋɛa'.
8 Dɩ le wɩ kpãsɛ Mɩsɩ sa dã Tʋrʋasɩ.
9 Dɩtɩnɔ Pol kɔɔ yɩrɛ Thãgbaa thɩ̃ yɩr dɩɩ do Masedʋandaar gɩ, a jɩɩlaa da-n bɩɛlɛɛ thakɛ ayɩ: Seere kɛ Masedʋan a taa sɩ.
10 Ɔbɔɔkɛ Pol yɩnɩ thɩ̃ɛɛle pɩ, sɩ kɔɔ ƴaalɛ dapaara kɔrɔ sɩ jal Masedʋan, gɩdonɩ sɩ jɩrɛ tue dɩ Kɔ̃tɩn gɩɩkɛ n wɛ sɩnɩ sɩ mɩa le tutugo bʋɔɔ thɩmɩɩ.
11 Ɔbɔɔkɛ sɩ kɔɔ thenɩ Tʋrʋasɩ, sɩ gbaar bato a jal dẽdẽdẽ Samɔtɩrasɩ, dɩ ga dɩ wɩlla sɩ jal Neapolɩsɩ.
12 Dɩ le sɩ kɔɔ gba jal Eilipi dɩɩraakɛ hanɩ Masedʋan caca marara, kolonɩ gɩ kɔɔ do dakha, dɩ sɩ kɔɔ toore dɩɩraale a pʋɔr gbe.
13 Hɩɩr wire sɩ kɔɔ ther dɩ khuirə mɩɩr nʋɔra, ka sɩ kɔɔ kpɩɛrnanɩ Thãgba fʋɔr paar na yɩrɛ. Dɩ sɩ kɔɔ toore dɩ sa-n mɩɩna khɛrasɔɔkɛ n gbɛbanɩ kha le.
14 Dɩ khɛ bɩɛl hale kɛ wɩ-n wenɩ Lidi, a do gbɩlã kẽkẽ ƴaƴabɩdaar, a the Tɩatɩɩr da-n cʋ Thãgba; dɩ a-n pɛr nũu, dɩ Kɔ̃tɩn khɛrʋʋ haar dɩ pɛ nũu gɩrɛraakɛ Pol n sonɩ.
15 Ɔbɔɔkɛ a kɔɔ kpɛɛnɩ nyʋɔnɔ na ɔɔ cɔdara pɩ, a kɔɔ bɩɛl sɛr thakɛ ayɩ: Ado sobɔ tibil nɩ-n we mɩ mɔ̃ mɩ donɩ Kɔ̃tɩnɩda, nɩ lona ɩ̃ cɔ a tɔɔ; dɩ a kɔɔ bɩɛl sɛr da-n gbɛ̃gbɛrɛna.
16 A gele ka pɩ, sɩ jaal Thãgba fʋɔr paar, dɩ thɔ̃daar khɛ bɩɛl gɩ, a hale dɩ sɩ caanaa, dɩ hana Pɩtɔ̃ kɔ̃tɛɛbuukɛ cʋgɛɛnɩ da-n bo, dɩ a-n 'lɛr war jɔɔ ɔɔ borara da-n ha ɔɔ kɔ̃tɩ̃sɔ;
17 dɩ a mar da-n kpaan Pol na sɛrɛ khiro sɩ da-n hulẽ ayɩ: Tɩbɩlaakɛ Thãgba Kəkəədaarɩ thɔ̃dara wɩ do dɩ wa-n mɩɩ nar taa hʋɛ.
18 Wire jɔɔjɔɔ a-n kɔɔ cʋʋ ga thɩ̃ɩlera. Dɩ Pol thʋ̃ vɔɔ a kɛr a so kɔ̃tɛɛbuurəəle ayɩ: Mɩ so farɛ na Jeju Kirisitii i, thɛ khɛrraakɛ. Dɩ the liirrəə dapaara.
19 Mɔ̃kɛ thɔ̃daar khɛrɩ kɔ̃tɩ̃sɔ yɩɛnɩ dɩ awɩ war 'lɛ hʋ kʋɛrɛ, wɩ fʋrɛ Pol na Sɩlasɩ a hal wɩ jalna tɩɩ jɔ paar kɔ̃tɩnasɔɔ ƴɛra,
20 a nɩna so kɩɩldara a so: Tɩbɩlaakɛ nyanyãa sɛr dɩɩ;
21 Juifisɔ wɩ do dɩ wa-n mɩɩ gɩrɛɛkɛ sa hananɩ hʋɛ a na tu agɩbo sɩ kpaanɔa', gɩdonɩ Rɔmɛ̃sɔ ha sɩ.
22 Dɩ tibil jɔɔle ɩɩrɛ a mana wɩ, dɩ so kɩɩldara so wɩ ɓəəre wi kẽkena sa cile wi na khasa.
23 Ɔbɔɔkɛ wɩ kɔɔ bɩɩr wɩnɩ dakɔ̃tɩ̃ɩ pɩ, wɩ pɛ wɛr khaɩra sa kpãkpãa khaɩ bɛrdaarraakɛ a na-n jɩɛ hɩɩn wɩ.
24 Dɩ mɔ̃ khaɩ bɛrdaar nɩɛnɩ thɩmɩɩrɩle, a gba wɛr pɛ khaɩ du thɩ̃thɩɩn sa kpala wɩ nɛɛ na kpulole.
25 Ɔbɔɔkɛ dɩɩ nɩrɔnɩ, Pol na Sɩlasɩ bɩɛlɛ Thãgba dɩ wa-n khɩna nɩɛ dɩ wa-n kpãgana Thãgba, dɩ khaɩdara nɩɛ.
26 Dapaara thɩɩ kɔɔ jɩɩn dɩɩ khɩɩr ka, dɩ khaɩ cʋɔr gbugbuyo; dɩ bɔ bɩɛllala loosɔ fɛʋ kɔɔ khɛr, dɩ khaɩdara fɛʋʋ lidasɔ thʋbɩrɛ.
27 Dɩ ɔbɔɔkɛ khaɩ bɛrdaar na jaanɩ a yɩ khaɩ loosɔ dɩɩ khɛr, a pher bajɩna a kʋra dɩbara gɩdonɩ a ka jɩna khaɩdara kɔɔ fuulele.
28 Sɩ Pol phã nɔ khɩɩr ayɩ: Fa-n cʋʋ afɩ dɩbara puurə', sɩ hakɛ fɛʋ.
29 Dɩ khaɩ bɛrdaar bɩɛl dɔɔ a cana birbirbir lõ, a ji Pol na Sɩlasɩɩ ƴɛra da n jẽ kpakpakpa,
30 sa kpa wɩ thena a bule wi: Kɔ̃tɩna, anye teana ĩ cʋɛ a 'lɛ taarɛ?
31 Dɩ Pol na Sɩlasɩ birsee: Pɩɛr Jeju Kɔ̃tɩn haar dɩ fa 'lɛr taarɛ, fɛrɛ na afɩ cɔdara.
32 Dɩ wɩ kɔɔ mɩgʋʋrɛ Kɔ̃tɩnɩ so na wɩrɛ fɛʋʋkɛ hanɩ ɔɔ cɔ.
33 Dɩ a kpa wɛr ga dɩtɩnɔɔlera a thena a cɔcɔɔ wɩ khoisɔ, sɩ dapaara dɩ wɩ kpɛgʋʋ nyʋɔnɔ na ɔɔ cɔdara fɛʋ.
34 Dɩ a kpa wɛr a kɔna ɔɔ cɔ a ha wɩ dɩkɔ, dɩ gɩ kɔɔ daaraarɛ kpɛ ɔr na ɔɔ cɔdara fɛʋ mɔ̃ a pɛrnɩ Thãgba haar.
35 Ɔbɔɔkɛ dɩɩ wɩlnɩ, so kɩɩldara thʋɔn gardɛsɔ wɩ jala a sɔ khaɩ bɛrdaarra a faa tɩbɩlaale wɩ kɔ̃.
36 Dɩ bɛrdaar gbaar jal a so Polla ayɩ: So kɩɩldara thʋɔn ayɩ, wɩ faa nɩ; gɛr gɩ nɛnɛ̃ nɩ thɛ kɔna na ha ɩɩ.
37 Sɩ Pol so gardɛsɔra: Sɛr Rɔmɛ̃sɔɔkɛra wɩ kɔɔ ciilni tibil jɔɔ ƴɛra, sɩ kɩrʋ na yɩr dɩ wɩ jɩ gɩrɛ sɩ cʋʋna', sa to sɩ khaɩra, gɩ do wɩ cʋʋ sɛr dɩ sɩ the thaa waa gbul bɛɛ? Ga ha mã'. Wɛr thɛthɛra n ɩna dɩbara a faa sɩ.
38 Dɩ gardɛsɔ gba thɩmɩaale a jalna so kɩɩldarara, dɩ maar fʋlɛ wɩ mɔ̃ wɩ nɩɛnɩ dɩ Rɔmɛ̃sɔ wɩ do.
39 Dɩ wɩ pɔr a phʋʋr wɩ a pɛ wɩ hʋɛra, sa bɩɛl wɩ wɩ thɛ dɩɩra.
40 Ɔbɔɔkɛ wɩ thenɩ khaɩra wɩ kɔɔ jaal Lidii pa. A wɩ yɩ omɩna a mɩɩ wɩ ƴɛ kʋʋl jal thɩmɩɩr pɩ, wɩ gbaar kɔ̃.