19
1 Ɔbɔɔkɛ Apolɔsɩ kɔɔ hanɩ Korɛ̃tɩ, gɛr Pol kɔɔ kpaarɔ Ajɩ gɔ̃gɔnana sa dã Efɛjɩ. Dɩ le a caana ɩkhaa kpãkpãadara a bule wi ayɩ:
2 Sɩɩ do nɩ kɔɔ 'lɛr Thu Phuu ɔbɔɔkɛ nɩ kɔɔ pɛrnɩ haar bɛ? Dɩ wɩ birsee: Sa kɔɔ nɩɛ kpɩɩrakɛ dɩ Thu Phuu hala'.
3 Dɩ bir bule wi: Sɩ anyee yɔ kpɛɛ ca wɩ kɔɔ kpɛɛ nɩ? Dɩ wɩ birsee: Jãa yɔ kpɛɛ gɩ.
4 Dɩ Pol so war: Wɩrɛ debanɩ haar Jã n kɔɔ kpɛɛ nyʋɔnɔ da-n sona war dɩ yɩ, wɩ pɩɛr ʋrɛɛkɛ na kpa narnɩ haar, a thɩɛna gaa Jeju gɩ.
5 Dɩ ɔbɔɔkɛ wɩ nɩɛnɩ gele, wɩ kɔɔ gbaar Jeju Kɔ̃tɩnɩ i a kpɛɛna wɩ nyʋɔnɔ.
6 Ɔbɔɔkɛ Pol kɔɔ dɛ̃ɛ warnɩ nyɛ̃ɛ, Thu Phuu kɔɔ gbune a lõ war dɩ wa-n mɩɩ thɩmɩɩ kpɩɩsɔ, dɩ wa-n tinə Thãgba tukɩrʋ.
7 Konaale fɛʋ kɔɔ thɔɔrɛ yʋɔr yenyɔ.
8 Agɩpɩ Pol kɔɔ lʋʋn Juifisɔɔ Thãgba fʋɔr cɔra da-n mɩɩ na 'lar. Pora yẽther a kɔɔ mɩɩna wɩ thɩmɩɩrɩkɛ dɔnɩ Thãgbaa fãgadaar doda, da-n yɩrna wɩ wɩ pɩɛr haar.
9 Sɩ mɔ̃kɛ ɩkhasɔɔda bonɩ khɩɩr 'lo dɩ wɩ bo ha pɛrɛ, dɩ wa-n mɩɩna thɩmɩɩ puu dɩ wa-n pɛr Kɔ̃tɩnɩ hʋra tibil jɔɔ ƴɛra, Pol faa wɛr sa lee na kpãkpãadara kpɩɩ, sɩ agɩpɩ dɩ jal kũu bɩɛlɩkɛ wɩ-n wenɩ Tɩranusii lakol cɔra da-n yɩrna wɩ wɩ yɛ kɩrʋ.
10 Yɛna yenyɔ a kɔɔ cʋʋ, dɩ mɛ̃ wɩrɛ fɛʋʋkɛ hanɩle Ajɩ, kɛ dɔnɩ Juifisɔ na Gɩrɛkɩsɔ kɔɔ nɩɛ Kɔ̃tɩnɩ thɩmɩɩ.
11 Dɩ Thãgba har Pol punone da-n cʋʋna nɔ kpaa thɩ̃ kɔ̃tɩna.
12 Dɩ wɩ gba ƴɛ pɩɩndaa na kẽkenaakɛ kɔɔ thaanɩ Pol tomɩra, a pɔna na pɛr khodarara; dɩ mɛ̃ khoo n kpɛɛ wɩ dɩ kɔ̃tɛɛbi hɔ̃hɔla na-n thɩɩr dakha.
13 Sɩ wɩ̃ Juifisɔɔkɛ n kpaarɛnɩ mɔlɔ, kɛ dɔnɩ dɔdɔɔdaraakɛ n wɛanɩ kɔ̃tɛɛbiisɔ n dor bʋɔ, sɩ dɩ wɩ we Jeju Kɔ̃tɩnɩ i dɩ wa-n pɛ wɩrɛraakɛ hananɩ kɔ̃tɛɛbi hɔ̃hɔla dɩ wa-n so: Mɩ so narɛ, nɩ thɛ na Jejuu iikɛ Pol n gbanɩ da-n mɩɩ.
14 Welela n cʋɛnɩ gelela, Sevaakɛ dɔnɩ gbõdaarɩ bikuunsɔ wɛ makonyɔ.
15 Dɩ kɔ̃tɛɛbu hɔ̃hɔl birse wi: Mɩ jɩrɛ Jeju, dɩ Pol dakha mɩ jɩɩrɛ, sɩ nɛrɛ, amɛ nɩ do?
16 Sɩ tibilikɛ kɔ̃tɛɛbu hɔ̃hɔlla harɔnɩ ubire a wu war a puno wi fɛʋ, dɩ wɩ caalɛ thɩɩr cʋɔrɔɔle na sãɓɔlɔ̃ na khoisɔ.
17 Dɩ Juifisɔ na Gɩrɛkɩsɔɔkɛ hanɩ Efɛjɩ kɔɔ nɩɛrɛ thɩ̃ɛɛle, dɩ maar fʋlɛ wɩ fɛʋ dɩ Jeju Kɔ̃tɩnɩ i kɔɔ dʋbɩrɔrɛ.
18 Dɩ tibil jɔjʋɔɔkɛ kɔɔ pɩɛrnɩ haar pɔr a cã so gɩrɛɛkɛ wɩ kɔɔ cʋʋnɩ.
19 Dɩ wɛ bərəəmkɛ dʋɔnnɩ dɔdɔɔdara, wɩ pɔr na awɩ sɛbɛsɔ, a gbɛbɩ pa bɩɛl a thii tɩbɩlaa ƴɛra. Wɩ therre ga the nɔ dɩɩ thɔɔ war bɔrɔ kpalanyɔ yʋɔr.
20 Thale dɔ nɔɔ Kɔ̃tɩnɩ thɩmɩɩ kɔɔ kpaarnɩ dɩ ga-n pɛr jɔɔ, dɩ gɩ cʋʋrɛ thɩ̃ɛ ga do kpãkpalã ga.
21 A ga thɩ̃sɔɔle ka pɩ, Pol kpɩɛrɛ hi ɔɔ bɩnɔ sa yɩ, ɩna jaal Jerujalɛm, sɩ Masedʋan ɩna the na Akaɩ sɩ na jal. A sor ayɩ, ado ɩnɩ dã le dɔ ɩnɩ-n yɩ Rɔm dɩɩ dakha.
22 Dɩ a thʋɔn ɔɔ bubulsɔ yenyɔ Masedʋan, Timothe na Erasɩtɩ gɩ, sa too Ajɩ gbe.
23 Ɔbɔɔlera nyanyaanɛ kɔɔ lʋʋn Kɔ̃tɩnɩ hʋra dakɔ̃tɩ̃ɩ.
24 Kũu bɩɛl gɩ da-n do Demetiriyusi, dɛ bulo phebɩdaar gɩ; ɔr n pheba dɛ bulona dɩɩ do awɩ thɩl cɔ biikɛ hɔnɩ awɩ thɩl khɛr Artemɩsɩɩda, ga-n 'laa khor wa thɔ̃darasɔra kpãkpalã ga.
25 Dɩ a kpar wa thɔ̃darasɔra, na wɩrɛ wɩ-n donanɩ kha thɔ̃ bɩɛl a jɛ sa so: Kona, nɩ jɩrɛ ga thɔnaakɛ asɩ thɩ̃ 'lɛ n the,
26 dɩ nɩ yɩɛrɛ a nɩɛna dɩ ga do Efɛjɩ dɩɩra gɩ dɩbara ga, sɩ gɩ sɩrɛ fɩɩʋ sɩɩ do Ajɩra fɛʋ gɩ, Pol ʋrɛ n yɩrnanɛ tɩɩ jɔɔ dɩ fi wi na gɩrɛ a-n sonɩ dɩ yɩ, thãgbasɔɔkɛ tibil n cʋʋnɩ na nyɛ̃ɛ na do thãgba bɔsɔa'.
27 Sɩ gɩrɛ dɔnɩ puure, ga do gɩdonɩ asɩ thɔ̃ɔkɛ na debire na do mɔlɔ gɛr gɩ dɩbara ga, sɩ aa: Artemɩsɩ, thɩl khɛ kɔ̃tɩnɩkɛɛ cɔ na do thɩ̃ɛ 'lo bã, dɩrakɛ Artemɩsɩɩkɛ Ajɩdara ɓibi n fʋɔrnɩ na tɩbɩla thɩɩraakɛ fɛʋ aa, ɔɔ i the dakha na kʋɛrɛ koo.
28 Ɔbɔɔkɛ wɩ nɩɛnɩ gele, nĩkhii fʋlɛ wɛr dɩ wɩ ma dɩ wa-n hulẽ aa: Efɛjɩdaraa Artemɩsɩ thʋnɛ kɔ̃tɩ̃ ka.
29 Dɩ dɩɩraale koo nyanyaanɛ kɔɔ hale. Dɩ wɩ kha fɛʋ giri a lõ ɓol paarɩle a fʋ Gayʋsɩ na Arɩsɩtarkɩ, kɛ dɔnɩ Masedʋandaraakɛ dɔnɩ dakha Polɩ kpakpaarsɔ.
30 Sɩ Pol kɔɔ ƴaalɛ ɩnɩ-n lõ ɩnɩ-u yɩ tɩbɩlaale, sɩ kpãkpãadara kɔɔ pɩɛrʋʋrɛ.
31 Dɩ ɩkha kɔ̃tɩ̃sɔɔkɛ dɔnɩ Ajɩdaraakɛ dɔnɩ Polɩ kuunsɔ kɔɔ thʋɔn a sʋʋraa, a na-n lõ ɓol paarɩla'.
32 Ɩkhasɔ n hulene dɩ wa-n so awɩda kpɩɩ, wɛ n hulẽ dɩ wa-n so awɩda kpɩɩ, gɩdonɩ gɩ kɔɔ har bʋla bʋla bʋla tibil jɔɔlee thɩ̃thɩɩn, dɩ tibil jɔjʋɔ awɩ thɩ̃thɩɩn na jɩ gɩrɛ dɔnɩ nɔɔ dɩ wɩ kparɔ kha a ja'.
33 Dɩ wɩ ti Alesãdɩɩrɩkɛ Juifisɔ tɔnɩ dɩ wa-n pɛr ƴɛ bʋrɔ, dɩ ɩɩr tibil jɔɔlee thɩ̃thɩɩn da-n jɛ wɩ na nyɛ̃ɛ, a ƴaalɛ a mɩɩ tibil jɔɔlee thɩ̃ɛ.
34 Sɩ ɔbɔɔkɛ wɩ jɩnɩ dɩ Juifi gɩ, wɛr fɛʋ hulene nɔ bɩɛl a pʋɔrna dɩɩ thɔɔ lɩɛr yenyɔ dɩ wa-n so: Efɛjɩdaraa Artemɩsɩ thʋnɛ kɔ̃tɩ̃ ka.
35 Sɩ ɔbɔɔkɛ sɛbɛ kheredaar punoni tɩbɩla dɩ wɩ pɩr, a sor: Nɛr Efɛjɩdara, ʋmɔ̃ haankɛ na jɩɛnnɩ dɩ Efɛjɩ dɩɩ dʋɔn dɩɩkɛ n hɩnɛnɩ Artemɩsɩ kɔ̃tɩ̃ɩ cɔa', na ʋrɛ n hɩnɛnɩ bokaarɩkɛ thɛnɩ ƴũ a ji thɩɩra kɛ n nɛnanɩ dɩ Artemɩsɩ ga.
36 Dɩ gɩdonɩ thɩ̃ɛ gɩɩkɛ na hanɩ bana paara' gɩ teenanɛ nɩ pɩra, na-n ɩɩr na cʋʋ thɩ̃ɛ thaa birbirə'.
37 Gɩdonɩ nɩ kpar tɩbɩlaakɛ a ɩna, sɩ ga do thɩ̃ɛ wɩ kɔɔ yu thɩl cʋɔrɔa', wa kɔɔ kʋɛ dakha wo asɩ thɩl khɛrɩkɛɛ iə'.
38 Ado Demetiriyusi na ɔɔ thɔ̃daarsɔ wɛr hana sor na ntɛ, kɩɩl wire hale dɩ so kɩɩldara dakha hale, dɔ wɩ we kha kɩɩl paar.
39 Sɩ ado thɩ̃ kpɩɩ hale dɩ nɩ hana, tɩbɩlaakɛ gobanɛr hanɩ hʋɛ dɩ wɩ kpa na jɛ, wɛr na gʋrɛ gɩ.
40 A sa hɩɩna', wa pɛ sarɛ sor khʋɛnaakɛra kɔɔ dananɩ nĩ, gɩdonɩ sa jɩ mɔ̃ sa mɩɩnɩ a na nɩna khʋ̃ɛɛkɛɛ kɩra'.
41 A ga thɩmɩɩle pɩ, a bɩlanɛ tɩbɩlaale kpanɩ a jɛ.