12
1 Ga bɔɔlera Ɛrɔɔdɩ fãgadaar kɔɔ ɩɩrna wɩ̃ we gbɛbɩdarasɔ kpoore,
2 a fʋ Jakɩ, Jãa õkuun a kʋ na bajɩna.
3 Dɩ mɔ̃ a yɩɛnɩ dɩɩ do gɛr n da Juifisɔra, a fʋrɛ Pɩɛr wo a to khaɩra. Buruukɛ na hananɩ tabɩɩraa bɔ gɩ kɔɔ do.
4 Ɔbɔɔkɛ a kɔɔ fʋʋnɩ pɩ, khaɩra a tʋʋ sa pɛr sɔrasɛ yʋɔr maadõ, sɩ yenã yenã wɩ kɔɔ kʋʋr dɩ wa-n bɛrʋʋ kpa kha kpa kha, sa ƴaal a Pakɩ kara wɩ tii wɩ thena tɩbɩlala wɩ kɩɩlnaa.
5 Dɩ mɛ̃ Pɩɛr hale khaɩra dɩ wa-n bɛr, sɩ we gbɛbɩdara har dɩ wa-n gbɛ̃gbɛrɛ̃ Thãgba bɩɛlɛla dɩ wa-n pɩɛraa.
6 Ɔbɔɔkɛ Ɛrɔɔdɩ kpɩɛrnɩ ɩna tiirera na thena, ga dɩtɩnɔɔlera Pɩɛr hale da-n daar sɔrasɛ yenyɔɔ thɩ̃thɩɩn, na jɔrkɔ yenyɔɔkɛ wɩ linəəni, sɩ gardɛsɔ ha lõfonɔɔ dɩ wa-n bɛr khaɩ loo.
7 Dɩ hɩnɛ, Kɔ̃tɩnɩ thɔ̃thɔ̃daar thu pɔr dɩ dahɩrɛ carã duu. Dɩ thɔ̃thɔ̃daar thuule ber Pɩɛr gɛlʋ a jagʋʋ sa sʋʋraa: Ɩrɛ kɔrɔ. Dɩ jɔrkɔsɔ forʋʋ nyɛɛna a jiir.
8 Dɩ Thãgbaa thɔ̃thɔ̃daar thu sʋʋraa: Khɩma afɩ lophɛrɛ, a tɔna afɩ nɛfaa. Dɩ cʋʋ oti. Dɩ Thãgbaa thɔ̃thɔ̃daar thuulera bir sʋʋraa wo: Tɔ afɩ darã sɩ na kpa mar.
9 Dɩ Pɩɛr the da-n kpaaraa, sɩ aa jɩɛ gɩrɛ Thãgbaa thɔ̃thɔ̃daar thuule n cʋʋnɩ thɩ̃ɛ gɩ sobɔra', a ka jɩna thɩ̃ nɩrɔrɛ ɩnɩ yɩ.
10 Ɔbɔɔkɛ wɩ kpãasɛnɩ caca gardɛra na balanyɔdarara, wɩ daan lõfonʋɔɔkɛ wɩ-n thenanɩ dɩɩra, kɛ wɩ-n khaananɩ the loo, dɩ loole khɛr warɛ dɩbara, dɩ wɩ thɩɩr a gba hʋ kɔ̃tɩ̃ɩ dɩ wa-n jal. Dɩ dapaara Thãgbaa thɔ̃thɔ̃daar thuule faarɛ Pɩɛr.
11 Ɔbɔɔkɛ Pɩɛr jɩnɩ tue a sor: Mɩ jɩrɛ dɩphã waa dɩ Kɔ̃tɩn thɔna ɔɔ thɔ̃thɔ̃daar thu dɩ taa mɩ Ɛrɔɔdɩ nyɔ̃kɔɔ na gɩrɛra fɛʋʋkɛ Juifisɔ n pɛnɩ nũu.
12 A kpɩɛrnɩ thale na pɩ, a gbaar jal Marɩɩ cɔ; Jãakɛ wɩ-n wenɩ Markɩɩ nɩ gɩ, ka tɩbɩla bərəəm gbɛbɩnɩ kha dɩ wa-n bɩɛl Thãgba.
13 Dɩ ɔbɔɔkɛ a benɩ phel ko loo, thɔ̃daar khɛ bɩɛlɩkɛ wɩ-n wenɩ Rɔɔdɩ pɔrra a jɩ ntɛ.
14 Dɩ a jɩrɛ Pɩɛrɩ wi; dɩ daʋ na-n haa lo khɛrʋa', dɩ ca bir so aa: Pɩɛr hale lõfonɔɔ.
15 Dɩ wɩ birsee: Yʋʋ bo fɩ yaa? Sɩ dɩ bo da-n ɩɩrɔ aa, gɩrɛ ɩnɩ sonɩ ɔmɛ̃ gɩ. Dɩ wɩ so: Ɔɔ thɔ̃thɔ̃daar thu ga do.
16 Sɩrakɛ Pɩɛr har da-n be loo. Dɩ ɔbɔɔkɛ wɩ khɛrnɩ loo a yɩɩ nʋɔ kpaa wɛr.
17 Sɩ a jɛ wɛr na nyɛ̃ɛ wɩ pɩra, sa mɩɛ wɩ mɔ̃ Kɔ̃tɩn kɔɔ cʋgʋʋnɩ dɩ the khaɩra. Sɩ a sor wo ayɩ, wɩ sɔ Jakɩra na omɩnana thɩ̃ɛɛlera. Sɩ agɩpɩ dɩ the da-n jal dɩkhãa pa.
18 Dɩ ɔbɔɔkɛ dɩɩ kpɛɛnɩ, khʋ̃ɛ kɔɔ ɩɩrɛ sɔrasɛɛ thɩ̃thɩɩn dakɔ̃tɩ̃ɩ aa: Mɔ̃ Pɩɛr do ya fɛ?
19 Dɩ Ɛrɔɔdɩ kɔɔ ƴaalʋʋlɛ ƴaal ƴaal ƴaal sɩ aa kɔɔ yɩa', dɩ a kɩɩlnanɛ gardɛsɔ sa 'laa hʋɛ wɩ kʋrɛ wɩ. A gele pɩ, Ɛrɔɔdɩ kɔɔ ther Jude a jal Sejare a too.
20 Ɛrɔɔdɩ kɔɔ hananɛ sor na Tɩɩrdara na Sɩdɔ̃dara. Sɩ wɩ kɔɔ gʋʋrɛ kha nɔ bɩɛl sa pɔna dɩkha a kurnə kuune na Bɩlasɩtɩɩkɛ dɔnɩ Ɛrɔɔdɩ fãgadaarɩ du hɩɩndaar, sa jal Ɛrɔɔdɩɩ pa a ƴɛgʋʋ ha ɩɩ n hana le gɩdonɩ fãgadaarɩ dɩɩle n haanɛ wɩ.
21 Dɩ Ɛrɔɔdɩ kɔɔ dʋrɛ wire sa to ɔɔ fãgadaar kẽkẽ a toona ɔɔ fãga too pa, a mɩɩ thɩmɩɩr tɩbɩla fɛʋʋ ƴɛra.
22 Dɩ tɩbɩla thʋ̃ hulẽ aa, ga do tibil n mɩa bã sɩ Thãgba a ho mɛ̃.
23 Dɩ le dapaara Kɔ̃tɩnɩ thɔ̃thɔ̃daar thu bɩɩ, gɩdonɩ Thãgbaa i a fi tee. Dɩ dokora ɩɩrnaanɛ dɩ khi.
24 Sɩ Kɔ̃tɩnɩ so kpaarɛ a ƴɛr dɩ a-n pɛr.
25 Dɩ ɔbɔɔkɛ Barnabasɩ na Sɔl kɔɔ donɩ awɩ thɔ̃ pɩ, wɩ kɔɔ ther Jerujalɛm sɩ wɩ kɔɔ kpar Jãakɛ wɩ-n wenɩ Markɩ a fʋrɔ kɔna.