11
1 Thɔ̃thɔna na omɩnaakɛ hanɩ Jude kɔɔ nɩɛrɛ dɩ ca kpala dakha kɔɔ 'lɛr Thãgbaa thɩmɩɩ.
2 Dɩ ɔbɔɔkɛ Pɩɛr kɛrnɩ bir Jerujalɛm, ha pɛdaraakɛ dɔnɩ khʋ̃ kurdara kɔɔ ɩɩrnanaanɛ thɩmɩɩr ayɩ,
3 a lʋʋn tɩbɩlaakɛ na kuroni khʋ̃aa pa, a khona wɩ dɩkor.
4 Dɩ Pɩɛr gba thɩmɩa a mɩɛ wɩ kpa kha kpa kha, mɔ̃kɛ thɩ̃ɛ kɔɔ danɩ ayɩ:
5 Jope dɩɩra mɩ kɔɔ ha dɩ ma-n bɩɛl Thãgba a yɩ thɩ̃ yɩr; ɩhɩ̃ɛ gɩ a ho kɩ̃kɩɩn phə̃kərə̃ə dɩ wɩ li li paar yenã, dɩɩ the ƴũ a gbũ dã mɩ.
6 Dɩ mɔ̃ mɩ-n hɩɩnnɩ kirkirkir sɩ ma-n kpɩɛr, mɩ yɩrɔrɛ le nɛbi kho thɩ̃ɛ, na nɛkɩɛr sɛ̃bi thɩ̃ɛsɔ thɩɩraakɛ, na hɔ̃ nʋma, na thɩ̃ɛsɔɔkɛ n puuloneni, na 'lominəsɔ.
7 Dɩ mɩ nɩɛrɛ nʋɔ dakha kɛ sɔ marnɩ: Pɩɛr, ɩrɛ kʋrɛ a khɔ.
8 Sɩ dɩ ɩ̃ birsee: Kpei Kɔ̃tɩn, gɩdonɩ ma kɔɔ kho thɩ̃ sãsɩnanɛ dɩ gɩrɛ biseneni gɩ a lõ mɩ nɔɔ yuuraka'.
9 Sɩ nʋɔ kɔɔ bire the ƴũ balanyɔ a so: Gɩrɛ Thãgba yɩnɩ gɩ phure, fa-n hɩɩn gɩ dɩɩ do far thɩ̃ sãsɩnana'.
10 Sɩ gɩ kɔɔ bire cʋʋ balãther wo, sɩ agɩpɩ gɩ bire hal koo a lõ thãgbara ƴũ.
11 Dɩ dapaara kona yẽtherɩkɛ thɛnɩ Sejare dɩ wɩ thɔ̃ wɩ ɩ̃ pa daan, a jɩɩl cʋɔrɔɔkɛ sɩ kɔɔ hanɩ.
12 Dɩ Thu Phuu kɔɔ so marɛ ɩ̃ jalana wɩ sɩ ma-n baalɔa'. Omɩna maadõokɛ kɔɔ thɔɔ mɩ dɩ sɩ kɔɔ jal a lõ Kɔrnɛɩɩ cɔ.
13 Dɩ a so sarɛ mɔ̃ a kɔɔ yɩnɩ ɔɔ cɔ Thãgbaa thɔ̃thɔ̃daar thu dɩ jɩɩlaa sa sʋʋraa, a thɔna Jope a wɛ Sɩmɔ̃ɔkɛ wɩ-n wenɩ Pɩɛr,
14 ɔr na mɩɛnɛɛ thɩmɩasɔɔkɛ na taanɩ ɔɔ thɛthɛ na ɔɔ cɔdara fɛʋ.
15 Dɩ ɔbɔɔkɛ mɩ manɩ dɩ ma-n mɩɩ, Thu Phuu kɔɔ gbune a lõ war mɔ̃kɛ gɩ kɔɔ ha sarnɩ dakha fʋ paar mamara.
16 Dɩ le mɩ jɩna Kɔ̃tɩnɩ thɩmɩɩkɛ a sonɩ ayɩ: Nyʋɔnɔ Jã n kɔɔ kpɛɛ tɩbɩla, sɩ ne wer na 'lɛr Thu Phuu kpɛɛrɛ.
17 Dɩ mɔ̃kɛ Thãgba ha wɩnɩ khaarda ca bɩɛlla na sɛrɛɛkɛ pɩɛrnɩ Jeju Kirisiti haar, amɛ mɛrkɛ do a na puno na pɩɛr Thãgba?
18 Dɩ ɔbɔɔkɛ wɩ nɩɛnɩ gele, wɩ pɩrrɛ kɩrkɩrkɩr sɩ wa-n dʋbɩ Thãgbaa i ayɩ: Dɩ a thale gɩ, Thãgba 'laarɛ ha debire ca kpalala wɩ hanana yire.
19 Wɩrɛɛkɛ kpoore kɔɔ cʋʋnɩ dɩ wɩ bɩ̃bɩlã ɔbɔɔkɛ Etɩɛn kɔɔ khini, wɩ kɔɔ jaal a dana Fenɩsɩ, na Sɩpɩr, na Ãtɩyɔsɩ, dɩ wa-n mɩɩ Thãgbaa thɩmɩɩ Juifisɔra dɩbara.
20 Sɩ ɩkhasɔ wo wɛrraakɛ dɔnɩ Sɩpɩrdara na Sɩrɛndara kɔɔ jaal Ãtɩyɔsɩ a mɩɩna Gɩrɛkɩsɔ a mɩɛ wɩ Jeju Kɔ̃tɩnɩ tutugo bɔda.
21 Dɩ Kɔ̃tɩnɩ fãga kɔɔ ha warɛ, dɩ wɩrɛ kɔɔ pɩɛrnɩ haar a kpa Kɔ̃tɩnna wɩ jɔrɛ ka.
22 Dɩ ga tutugoole kɔɔ daan Jerujalɛm we gbɛbɩdara, dɩ wɩ thɔ̃ Barnabasɩ. dɩ pɔ le Ãtɩyɔsɩ.
23 Dɩ ɔbɔɔkɛ a danɩ le, a yɩrɛ gɩrɛ Thãgba cʋʋnɩ ɔɔ bɔ jɩra dɩ gɩ daaraa, dɩ a kɔɔ mɩɩ wɛr fɛʋ wa-n yɩrana ƴɛ kʋʋl jaal a tɔɔ dakha na ha tɩɩ a ma Kɔ̃tɩnna.
24 Gɩdonɩ tibil bʋɔ a do a hinə Thu Phuu na ha pɛrɛ, dɩ tibil jɔjʋɔ kɔɔ pɔr Kɔ̃tɩnna.
25 Sɩ agɩpɩ Barnabasɩ kɔɔ gbaar jal Tarsɩ a ƴaal Sɔl;
26 ɔbɔɔkɛ a yɩɩnɩ, a kpaarɛ dɩ wɩ jal Ãtɩyɔsɩ. Dɩ le wɩ too nakha we gbɛbɩdara dɩ wa-n dɩɩr tɩbɩla bərəəm a cʋʋna yɛ bɩɛl biləni; Ãtɩyɔsɩ dɔ caca bɔɔkɛ wɩ kɔɔ hanɩ kpãkpãadara ire Kirisitii too.
27 Ga bɔɔlera Thãgba tukɩr tidara kɔɔ ther Jerujalɛm a jal Ãtɩyɔsɩ.
28 Dɩ bɩɛl wɛrraakɛ wɩ-n wenɩ Agabusi ɩɩrɛ dɩ Thu Phuu kɔɔ cʋgʋʋ dɩ so ayɩ: Kɔmɛ kɔ̃tɩ̃ɩ na jire thɩɩra fɛʋ. Dɩ gɩ kɔɔ daan bɔɔkɛ Kʋloodɩ kɔɔ dɔnɩ fãgadaar kɔ̃tɩ̃ɩ.
29 Dɩ kpãkpãadara kɔɔ gʋʋrɛ kha, sa thɔna thɩ̃ɛ mɔ̃ wɛr bɩɛlbɩɛlɩ puno hanɩ a bulnə omɩnaakɛ hanɩ Jude.
30 Dɩ mɛna wɩ kɔɔ gʋʋr sa thɔna Barnabasɩ na Sɔl we gbɛbɩdaraa kɔ̃tɩ̃sɔra.