13
1 Thãgba tukɩr tidara na dɩɩrdara kɔɔ har we gbɛbɩdararaakɛ hanɩ Ãtɩyɔsɩ; Barnabasɩ na Sɩmɛ̃ʋʋkɛ dɔnɩ tɩɩ biru, na Lusiyusiikɛ thɛnɩ Sɩrɛn, na Manahɛnɩkɛ wɩ haananɩ kha Ɛrɔɔdɩ fãgadaar buu, na Sɔl.
2 Mɔ̃kɛ wɩ lini nʋɔ dɩ wa-n fʋɔrna Kɔ̃tɩn, Thu Phuu sor: Nɩ lea mar Barnabasɩ na Sɔl kpɩɩ thɔmanaakɛ mɩ we warnɩ.
3 Dɩ ɔbɔɔkɛ wɩ lini nʋɔ sa bɩɛl Thãgba pɩ, wɩ dɛ̃ɛ warɛ nyɛ̃ɛ sa sɩ war dɩ wɩ jal.
4 Dɩ mɔ̃ Thu Phuu thɔnɩ Barnabasɩ na Sɔl, mɛ̃ wɩ jal a dã Seləsɩ, dɩ le wɩ gba bato a jal Sɩpɩr.
5 Ɔbɔɔkɛ wɩ danɩ Salamɩn, wɩ kɔɔ mɩɩrɛ Thãgbaa thɩmɩɩ Juifisɔɔ Thãgba fʋɔr cɔnanɔ; sɩ Jã wɩ kɔɔ hana kha da-n bul wi.
6 Ɔbɔɔkɛ wɩ kɔɔ kpaarnɩ yɔ dɩɩle fɛʋ a pɩ sa dã Pafɔsɩ, le wɩ kɔɔ caana Juifi dɔdɔɔdaar bɩɛlɩkɛ n sõsonenɩ dɩ yɩ bobon ha nɩ. Ɔɔ i n dʋɔn Barjeju;
7 a kɔɔ har kha na Sɛrjiyusi Polusiikɛ dɔnɩ gobanɛr, kɛ jɩɛnnɩ thɩ̃ɛ ka. Gobanɛrɩle kɔɔ wer Barnabasɩ na Sɔl, gɩdonɩ a kɔɔ ƴaalɛ ka a nɩ Thãgbaa thɩmɩɩ.
8 Sɩ Elɩmasɩɩkɛ dɔnɩ dɔdɔɔdaar, thale dɔ ɔɔ i na gɩrɛkɩ thɩmɩɩr, a-n bãbarã wɛr da-n ƴaal a pɩɛr gobanɛrɩle a na-n pɛ haara'.
9 Sɩ Sɔlɩkɛ wɩ-n wenɩ dakha Pol hinəne Thu Phuu da-n hɩɩn Elɩmasɩ kirkirkir sa sʋʋraa ayɩ:
10 Fɛrɛɛkɛ gõgolone na fɩɩlɛ n theronɩ, fɛr Satãa bi, fɛr fɩl sar lãlaardaar, fa thʋ̃ na sɩrɔ Kɔ̃tɩnɩ hʋ sarra fɩ-n golonaa?
11 Nɛnɛ̃ fa yɩ gaa, Kɔ̃tɩn na ga farɛ ɔɔ nyɔ̃bi dɩ fa yaar, fa yɩ wirə' phaphapha gɩ dana bɔɔ gbe. Dɩ dapaara dɩɩ haaraa gbibi dɩ dabirə thiirəə da-n bəər, dɩ le a ƴaal tɩbɩla dɩ wa-n halʋʋ.
12 Ɔbɔɔkɛ gobanɛr yɩnɩ gele dananɩ, a pɛrɛ haar sɩ nʋɔ kɔɔ kpagʋʋrɛ Kɔ̃tɩnɩ dɩɩra.
13 Pol kɔɔ ther Pafɔsɩ na ɔɔ kpakpaarsɔ a lõ bato a jal Pãfɩlɩ Pɛɛrjɩ dɩɩra. Sɩ Jã kɔɔ faa wɛr sa kɛr bir Jerujalɛm.
14 Sɩ wɩ kɔɔ ther Pɛɛrjɩ wo a gba hʋɛ a jal Pisidi Ãtɩyɔsɩ. Dɩ hɩɩr wire wɩ kɔɔ lʋʋn Juifisɔɔ Thãgba fʋɔr cɔra a too.
15 Ɔbɔɔkɛ wɩ sonɩ jɔfʋ na Thãgbaa bobonasɔɔ sɛbɛ a pɩ, wɩrɛ dɔnɩ kɔ̃tɩna Juifisɔɔ Thãgba fʋɔr cɔra thʋɔn bule wi aa: Omɩna, ado nɩ hananɛ thɩmɩɩrɩkɛ na hananɩ tɩbɩla ƴɛ kʋʋl jaal, nɩ mɩa wɩ.
16 Le Pol ɩɩr a jɛ tibɩla na nyɛ̃ɛ wɩ pɩra sa so war: Nɛr Ɩjɩrayɛldara, na nɛrkɛ n maannɩ Thãgba, nɩ pɛ nũu.
17 Ɩjɩrayɛl Thãgba kɔɔ phire asɩ mama thɩ kɔ̃tɩ̃sɔ, dɩ a cʋʋ wɛr dɩ wɩ ler ɔbɔɔkɛ wɩ kɔɔ donɩ kpakpala Ejipiti dʋɔ, agɩpɩ dɩ pɛr ɔɔ fãga nyɛ̃ a ti wi le.
18 Dɩ a kɔɔ fʋ warɛ haar a cʋʋna yɛna kpalanyɔ le bəənnə,
19 dɩ ɔbɔɔkɛ a kɔɔ bũburoni caar makonyɔ Kanãa dɩɩra, a gbaar awɩ dɩ a ha ɔɔ too.
20 Gɩ pʋɔrɛ a thɔɔ yɛna taanã na kpalanyɔ yʋɔr. A gele pɩ, a kɔɔ ha wɛr so kɩɩldara dɩɩ dana Samʋɛl Thãgbaa bobonɩ bɔɔ.
21 Dɩ agɩpɩ wɛr kɔɔ bɩɛlnɛ fãgadaar. Dɩ Thãgba ha wɛr Sayʋl, Kɩsɩɩ bikuun, kɛ dɔnɩ Bɛ̃jamɛ̃ɛ ca dɩ do war fãgadaar a cʋʋna yɛna kpalanyɔ.
22 Ɔbɔɔkɛ Thãgba kɔɔ bʋʋnɩ faa, a kɔɔ gbaar Davɩdɩ a ha wɩ dɩ do fãgadaar. Ɔr a mɩɩrɔ sobɔ so jɩ thɩmɩɩrɩkɛ ayɩ: «Mɩ yɩrɛ Davɩdɩ Ɩjaɩɩ bikuun dɩphã, tibil gɩ a ha mɔ̃ ɩ̃ bɩ̃ pɛrnɩ haar, ɔr na cʋɛ ɩ̃ tuur fɛʋ.»
23 Dɩ Davɩdɩɩ məlla Thãgba kɔɔ cʋʋ Taadaarɩkɛ dɔnɩ Jeju dɩ the, dɩ ha Ɩjɩrayɛldara mɔ̃kɛ ɔɔ ʋlfɛ hanɩ.
24 Ɔbɔɔkɛ aa kɔɔ ɩnɩ pa', Jã n kɔɔ mɩa Ɩjɩrayɛldarara fɛʋ aa: Nɩ deba haar sa 'lɛ yɔ kpɛɛrɛ.
25 Dɩ ɔbɔɔkɛ Jãa thɔ̃ n wɔrɔnɩ pɩr, gɛr a kɔɔ sor ayɩ: Ma do tibil ʋrɛ nɩ-n pɛrnɩ haar gɩrɛ mɩ dora', sɩ nɩ hɩnɛ, tibil bɩɛl hale a na kpa mar, kɛ ma teenanɩnakɛ ɩ̃ fʋʋrʋʋ nɛfaa ga.
26 Omɩna, nɛrkɛ dɔnɩ Abɩrahamɩ məl na wɩrɛ hanɩ anɩ thɩ̃thɩɩn kɛ n maannɩ Thãgba, sɛrra wɩ thɔna taa thɩmɩɩrɩkɛ.
27 Gɩdonɩ Jerujalɛmdara na awɩ kɔ̃tɩ̃sɔ na kɔɔ jɩ Jeju, dɩ Thãgbaa bobonaa thɩmɩɩkɛ wɩ-n sonɩ wire fɛʋ hɩɩr wire ga, dɩ mɔ̃ wɩ kɔɔ heenuuni sor, wɩ kɔɔ cʋʋrɛ dɩɩ ha mɔ̃kɛ Thãgbaa bobona kɔɔ sonɩ ga har.
28 Sɩ gɩdonɩ wa yɩ thɩ̃ bɩɛllakɛ dɩɩ teena wɩ kʋa', sɩrakɛ wɩ kɔɔ bɩɛlɛ Pɩlatɩ a kʋɔ.
29 Dɩ mɛ̃ wɩ kɔɔ cʋʋ thɩ̃ɛ fɛʋ dɩɩ ha mɔ̃ gɩ khereraanɩ Thãgbaa sɛbɛra, agɩpɩ wɩ gbuune kʋkʋ thɩrʋra a dʋ.
30 Sɩ Thãgba kɔɔ ɩɩrʋʋrɛ khirera.
31 Dɩ wire jɔɔjɔɔ a-n kɔɔ nɩnanɛ ɔɔbara wɩrɛɛkɛ a-n kɔɔ thenanɩ kha Galile da-n jal Jerujalɛm, kɛ dɔnɩnakɛ gɩrɛ ɔɔ sobɔ so jɩdara tɩbɩlala.
32 Dɩ sɛrɛ, sɩ-n mɩɩ narɛ ga tutugo bʋɔɔ thɩmɩɩkɛ dɩ sɩ yɩ, gɩrɛ Thãgba kɔɔ ʋlfɛnanɩ asɩ mama thɩ kɔ̃tɩ̃sɔ,
33 a kɔɔ cʋʋ gɛr dɩɩ da otirə; dɩ ha sɛrɛɛkɛ dɔnɩ awɩ bɩsãsɔ mɔ̃ a kɔɔ ɩɩrnɩ Jeju khirera mɔ̃kɛ gɩ kherenɩ Khɩkhɩɩ nɩɛsɔ yenyɔra ayɩ: «Fɛr dʋɔn ɩ̃ Bikuun, mɛr Thãgba kɔna fɩ nĩ gɩrɛ.»
34 Dɩ a kɔɔ ɩɩrʋʋrɛ khirera dɩ mɛ̃ a na bir kʋɛrɛra ga, gɩdonɩ gɛrra a kɔɔ so ayɩ: «Mɛr Thãgba na ha nɛr thɩ̃ɛɛkɛ phonɩ, kɛ dɔnɩ Davɩdɩɩdaakɛ dɔnɩ thɩ̃ɛ waa gel.»
35 Dɩ gɛr gɩ gɩ bire so Thãgbaa sɛbɛra dɩkhãa pa wo ayɩ: «Fa tu dɩ afɩ Tɩɩ phu na yɩ kʋɛra'.»
36 Dɩ Davɩdɩ, ɔbɔɔkɛ a kɔɔ cʋʋnɩ Thãgbaa tuur ɔɔ bɔraalera pɩ, a kɔɔ khire dɩ wɩ dʋʋ ɔɔ mama thɩ kɔ̃tɩ̃sɔɔ kara dɩ yɩ kʋɛrɛ.
37 Sɩ ʋrɛɛkɛ wer Thãgba kɔɔ ɩɩrnɩ khirera, aa kɔɔ yɩ kʋɛra'.
38 Gɛr gɩ, nɛr omɩna, nɩ jɩɛ jɩ bɔɔbɔɔ dɩ sopugo faarɛɛkɛ wɩ-n mɩɩ narnɩ ɔɔ pa gɩ the;
39 sorɩkɛ Mʋɩjɩɩ jɔfʋ na kɔɔ punoni na hɛl nara', ʋrɛɛkɛ pɩɛrnɩ haar ɔrra, sorra na hɛlaalɛ.
40 Gɛr gɩ na-n jɩɛ dʋ bʋrɛ dɩ gɩrɛɛkɛ Thãgbaa bobona kɔɔ sonɩ na dã na'. Gɩdonɩ gɩ sor:
41 «Nɩ hɩnɛ, nɛr tɩɩ beesidara, nɩ dɔ nʋɔ n kpaa nɩ, dɩ dakha nɩ bũburone. Gɩdonɩ mɛr Thãgba na cʋʋrɛ thɔ̃ bɩɛl anɩ bɔra, thɔma gɩ ado wa mɩɩ nar na pɛr haara'.»
42 Ɔbɔɔkɛ Pol na Barnabasɩ n thenɩ, wɩ bire ƴaal wɩ wɩ birə mɩa ga thɩmɩɩle hɩɩr wireekɛ n kpaanɛnɩ.
43 Ɔbɔɔkɛ wɩ thenɩ Thãgba fʋɔr cʋɔrɔ, Juifisɔ bərəəm na kpakpalaakɛ fenɩ ho Juifisɔ, kɛ n cʋɔnnɩ Thãgba n kpar Polla na Barnabasɩra dɩ wa-n khʋɛ kha, dɩ wɩ kɔɔ yɩrna wɛr ƴɛ kʋʋl jaal dɩ wa mar yʋʋ Thãgbaa bɔ jɩra.
44 Hɩɩr wireekɛ n kpaanɛnɩ, fɩɩʋ sɛ sɩɩ do tɩbɩla dɩɩraale koo gbɛbɩrɛra kha a pɛ Thãgbaa thɩmɩɩ nũu.
45 Sɩ mɔ̃ Juifisɔ yɩnɩ tibil jɔɔle, gbugi fʋlɛ wɛr dɩ wa-n bana thɩ̃ banaa gɩrɛraakɛ Pol sonɩ dɩ wa-n kʋɛnaa ire.
46 Dɩ le Pol na Barnabasɩ so war na 'lar ayɩ: Nɛr Thãgbaa thɩmɩɩ kɔɔ teena gɩ mɩa ɓo, sɩ gɩdonɩ nɩ bor sa hɩɩn anɩbara dɩɩ do yire khorr na teena na', gɛr gɩ nɩ hɩnɛ, ca kpalaa pa sɩ-n jal gɩrɛ.
47 Gɩdonɩ mɛ̃ Kɔ̃tɩn kɔɔ 'laa sar jɔfʋ ayɩ: «Mɩ thɩɩn fɛr fɩ do dahɩrɛ tibil caar fɛʋra, dɩ fa gba taarɛ na jalna gɩ dana ka thɩɩ khuni.»
48 Dɩ ca kpala n kãkarɛ mɔ̃ wɩ nɩɛnɩ gele. Dɩ wɩ-n kpãgarɛ Kɔ̃tɩnɩ so, dɩ wɩrɛ fɛʋʋkɛ Thãgba phiirni dɩ wa 'lɛ yire khorr kɔɔ pɩɛr haar.
49 Dɩ Kɔ̃tɩnɩ so kɔɔ kpaarɛ dɩɩraale koo.
50 Khɛraakɛ jɩɛnnɩ too, kɛ n cʋɔnnɩ Thãgba dakha, Juifisɔ kɔɔ cʋr wɛr pɛr na kɔ̃tɩna dɩɩra dɩ wɩ ɩɩrna kpoore Polla na Barnabasɩra, a wee wɩ le ɩwɩ dɩra a faa.
51 Dɩ wɛr dakha kɔɔ kpɛɛrɛ thɩlãkobeekɛ ma wɩnɩ nɛɛ a faa war, sa gba jal Ɩkɔn.
52 Sɩ ado kpãkpãadara wer gɩ, daʋ na Thu Phuu kɔɔ he war.