24
1 Mɔ̃kɛ Jeju thenɩ Thãgba fʋɔr cɔ kɔ̃tɩɩna da-n gba hʋɛ, ɔɔ kpãkpãadara tɔr pʋɔraa a nɩɩraa mɔ̃ wɩ mɩnɩ Thãgba fʋɔr cɔ kɔ̃tɩ̃ɩle.
2 Sɩ a birse wer ayɩ: Nɩ yɩrɛ gelesɔra fɛʋaa? Sobɔr mɩ so nar, na yɩ kɩɛr boka bɩɛl dɩ na bir na sɩ na dɛ̃ɛ ʋ̃ bokara ƴũ bã, fɛʋ na derre.
3 Mɔ̃ Jeju toonɩ gɔ̃gʋɔnaakɛ hananɩ olɩvɩ thɩra, kpãkpãadara kɔɔ pɔr a bulee hɛllɩ: So sar bɔɔkɛ gelela na danɩ, na gɩrɛ na dɔnɩ afɩ bir ɩ̃ bɔ jẽ, na thɩɩkɛɛ pɩ bɔda.
4 Dɩ Jeju birse wi: Na-n jɩɛ dʋ bʋrɛ, na-n do tibil n fɩɩl na';
5 gɩdonɩ tɩbɩla bərəəm na gbaar ɩ̃ i na ɩna wa-n so wɩ yɩ, ɩnɛr dʋɔn Kirisitira; dɩ mɛ̃ wa fɩɩl tɩbɩla jɔɔ.
6 Na nɩɛrɛ ko thɩmɩasɔ, na nɩɛrɛ wa-n mɩɩ aa, kʋʋr na hale. A nɩ jɩ, na-n do maar n fʋ na', gɩdonɩ dɔ gele n kɔɔ dã, sɩ ga do gɛr na dʋɔn thɩ pɩ paar pa'.
7 Ʋ ca na ɩɩrɛ a na-n kena ʋ̃ ca, ʋ̃ fãgadaarɩ dɩ bɩɛl n ɩɩr a na-n kena ʋ̃ fãgadaarɩ dɩ kpɩɩ. Dɩ kɔmɛ kɔ̃tɩnasɔ na thɩ jɩɩnsɔ na hale paar dɩɩdɩɩsɔ dakha.
8 Sɩ gele fɛʋ bɔ gaarɛɛ fʋ pa gɩ dɩbara.
9 Ɔbɔɔle tɩbɩla na fʋlɛ nɩ a na gaar nɩ bʋɔ dɩ wa kʋʋr nɛr, dɩ tibil caar fɛʋ na-n laar nɛr, gɩ do ɩ̃ i dɔ nɔɔ.
10 Dɩ mɛ̃ ga do nɛ baradaa tibil jɔjʋɔra, dɩ tɩbɩla na-n liire khasɔ wa-n laarna khasɔ dɩɩdɩɩ.
11 Sõso bobonasɔ na ɩɩrɛ wa-n fɩɩl tɩbɩla bərəəm.
12 Dɩ gɩdonɩ puure na jɔrɛ ga-n pɛr, ga dor nɔɔ dɩ tibil jɔjʋɔ na hana naʋ bã.
13 Sɩ ʋrɛɛkɛ na yɩranɩ na dana khu paar, ɔr na 'lɛ taarɛ.
14 Sɩ dɔ wɩ mɩɩ ƴũ fãgadaar tutugo bɔ thɩmɩɩkɛ thɩɩraakɛ koo, gɩ mɩɩ ha pɛdaa tibil caarra fɛʋ. Liir dɩphã na dɔ thɩ pɩ paar mɛ̃.
15 Gɛr dɔ kɩrʋ ɔbɔɔkɛ na yɩnɩ thɩ̃ thuurnəəkɛ na kʋɛanɩ thɩ̃ɛ, kɛ Thãgbaa bobon Danɩɛl kɔɔ mɩɩnɩ dɩ ga ha pa phuurə (dɔ ʋrɛ n hɩnɛnɩ sɛbɛɛkɛ n dʋ gar bʋrɛ),
16 le wɩrɛ hanɩ Jude n fuo ca jala gɔ̃gʋɔna,
17 dɩ ʋrɛɛkɛ na hanɩ nãsʋrɔ a na-n gbũ cʋɔrɔ a gba thɩ̃a',
18 dɩ ʋrɛɛkɛ dakha na hanɩ lɔɔ, a na-n kɛr bir a gba ɔɔ kẽkẽ kɔ̃tɩ̃ bã.
19 Ga wisɔɔle, ga puurore khɛ pɛmɛdarara na wɩrɛ n mamanɩ bibɔrɔsɔ.
20 Na-n bɩɛlnɛ Thãgba dɩ anɩ fuu bɔɔle na-n do yʋʋrɔa', agɩbo hɩɩr wirə'.
21 Gɩdonɩ bɔ gaarɛɛle na kɔ̃tɩnɛ na ka, bɔ gaar caa thale na kɔɔ hale kpɩɩrakɛ a fʋna bɔɔkɛ Thãgba tini thɩ̃ɛ dɩɩ ba dana nɛnɛ̃ka', dɩ ga bir na halerakɛ kpɩɩ bã.
22 Ado wiresɔɔle na kɔɔ tɔ a gburoə', tibil bɩɛllakɛ na mar na ta ga, sɩ wɩrɛ Thãgba phiirni dɔ kɩrʋ da tɔ wiresɔɔle dɩ ga gburo.
23 Dɩ dabɔɔle ado tibil na so nar nayɩ: Nɩ hɩnɛ, Kirisiti har kɩɛr agɩbo a ha pal, na-n pɛr haara'.
24 Gɩdonɩ wɩrɛ n sõsonenɩ dɩ wɩ yɩ, Kirisiti ha nɩ, agɩbo bobona ha nɩ, na ɩɩrɛ wa-n nɩna tɩbɩla nɔ kpaa thɩ̃ kɔ̃tɩnasɔ na ma kʋ thɩ̃ɛsɔ, wa-n fɩɩlnanakɛ tɩbɩlaakɛ Thãgba kɔɔ phiirni, adora hʋɛ hale.
25 Dɩ gɛr gɩ dɩ ɩ̃ kɔɔ mãa dɩ ma-n so nar gɩrɛ.
26 Ado wɩ so nar ayɩ: Bəənnə a ha, na-n jalaa dɛ, agɩbo: Du bɩnɔ a ha, na-n pɛ gɩ haara'.
27 Gɩdonɩ mɔ̃kɛ thãgba n lenɩ dɔɔ wi phã paar dɩɩ carbara a ka a dã wi lõ paar, thale mɛr tibili Bikuuni bir ɩ̃ na ha.
28 Kãkɛ thɩ̃ khire hanɩ, le dũusɔ na caan kha.
29 Ga bɔɔlera, a bɔ gaarɛ ka na pɩ, dapaara wire na birəre, por dakha na hɩrɛ bã, ƴepələ̃be na ther thãgbara ƴũ ga-n jɛ thɩɩra, dɩ gɩrɛ dɔnɩ fãgaakɛ hanɩ thãgbara ƴũ ga gbugbuyore.
30 Liiir dɩphã wa yɩ mɛr tibili Bikuuni jẽ dɩ ga yɩr thãgbara ƴũ, dɩ tibil caar fɛʋ thɩɩraakɛ na-n bɩrɛ, gɩdonɩ wa yɩrɛ mɛr tibili Bikuun ma-n ɩ̃ na ndɔlɔ̃pana na fãga, na carbararɛ jɔɔ.
31 Dɩ ma thʋɔn ɩ̃ thɔ̃thɔ̃daar thusɔ wa-n ʋ̃ tutuu kɔ̃tɩ̃ɩ, sɩ wɩ kpa wɩrɛ Thãgba phiirni, kɛ hanɩ kɩrrɔ, na gananɔ, na gɛla yenyɔra fɛʋ, wɩ jɛ pa bɩɛl gɩ fʋna ka thãgbara ƴũ khuni gɩ dana ʋ̃ khu pa.
32 Sɩ nɩ dɔ sokpaa thɩr khonanɛdara n dɩɩr nɩ thɩ̃ɛ. Ɔbɔɔkɛ nɩ yɩnɩ ɔɔ jɛ̃sɔ dɩɩ ɓol a na thɔɔ fa ƴolo, nɩ jɩrɛ dɩ ubulo n wɩla.
33 Mɛ̃ gɩ, nɛrɛ dakha, ado na yɩ thɩ̃ɛsɔɔle fɛʋ, nɩ jɛ dɩ mɛr tibili Bikuuni ɩ̃ bɔ n daan, dɩ mɩ har lõfonɔɔ.
34 Sobɔr mɩ so nar, nĩdaraakɛ na khiir koo, sɩ thɩ̃ɛsɔɔkɛ fɛʋ n dã ga.
35 Thãgbara ƴũ na thɩɩ na phor na ka, sɩ ɩ̃ thɩmɩɩsɔ na pho na ka kpɩɩraka'.
36 Sɩ ado wi jɩɩrra gɩ, na bɔɔkɛ ga thɩ̃ɩkɛ na danɩ, tibil bɩɛllakɛ na jɩ ga, thɔ̃thɔ̃daar thusɔrakɛ le Thãgbaa dʋɔ wa ja', Bikuunnakɛ na ja', sɩ Thɩrɛ dɩbara jɩɛn gɩ.
37 Mɔ̃kɛ thɩ̃ɛ kɔɔ hanɩ Noee bɔɔ, mɛna ga ha tibili Bikuuni ɩna.
38 Gɩdonɩ wiresɔɔkɛ kɔɔ kanɩ, sɩ thɩ̃ kʋɛ nyʋɔnɩle na-n kpaan, tɩbɩla n kɔɔ khor dɩkɔ, dɩ wa-n yɔna, dɩ wa-n hena kha, dɩ wa-n 'laana awɩ bisɔ herra, phaphapha dɩɩ ba dana wireekɛ Noe kɔɔ lonɩ batora.
39 Sɩrakɛ wa-n kɔɔ dɛna dɩkha ga, foo dɩ nyʋɔn phã a gbʋma wɩ dɩ wɩ khiir fɛʋ. Ɔmɛna ga ha tibili Bikuuni ɩna.
40 Ga wiile kona yenyɔɔkɛ na hanɩ lɛ bɩɛlla, Thãgba na gbaar bɩɛl sɩ na faa bɩɛl.
41 Dɩ khɛra yenyɔɔkɛ na hanɩ kha jʋ nã paar, Thãgba na gbaar bɩɛl sɩ na faa bɩɛl.
42 Gɛr gɩ a nɩ jɩ na-n jʋrɛ, gɩdonɩ na jɩ wireekɛ anɩ Kɔ̃tɩ̃ na ɩna'.
43 Nɩ jɩɛ jɩ gɩrɛɛkɛ bɔɔbɔɔ, ado cɔdaar kuun jɩrɛ bɔ dɔɔkɛ yu na pɔnɩ ɔɔ cɔ dɩtɩnɔ, a na-n bɛrɛ a na sɩɩraa a lʋʋn cʋɔrɔa'.
44 Gɛr gɩ nɛrɛ dakha, nɩ gbɛbɩrɛ pɛ, gɩdonɩ mɛr tibili Bikuun na bire na ɩ̃ bɔɔkɛ na kpɩɛrna mɩna'.
45 Ʋmɔ̃ dɔ sobɔ cʋʋ thɔ̃daar, kɛ kpɛsɛnɛnɩ, dɩ ɔɔ kɔ̃tɩ̃ na pɛr a na-n hɩnɛ ɔɔ cɔdara a na hana wɩ dɩkɔ bɔɔkɛ gɩ teenɩ kha?
46 Ga dar thɔ̃daar ca olela, ɔɔ kɔ̃tɩ̃ na-n danɩ a yɩɩ a na-n cʋʋ mɛ̃.
47 Sobɔr mɩ so nar, ɔɔ kɔ̃tɩ̃ na jɩɛ cʋgʋʋ a do ɔɔ thɩ̃sɔ fɛʋʋ hɩɩndaar.
48 Sɩ ado thɔ̃daar puu gɩ, a na sor ɔɔbarara nayɩ: Ɩ̃ kɔ̃tɩna n pʋɔrɛ ɩɩnna kpɛ;
49 dɩ ado a mar da-n bɩɩr ɔɔ 'walãkhasɔɔkɛ a-n donanɩ kha thɔma, dɩ khona da-n yɔna nakha ta 'laardara.
50 Thɔ̃daar ca olee kɔ̃tɩ̃ na phurore, dawiikɛ aa-n pɩɛrʋʋna', na bɔɔraakɛ aa kpɩɛrnana';
51 dɩ a na cɩɩrɛ yɩra yɩra, sɩ na gbaa na pɛ wɩrɛraakɛ dɔnɩ bɩnɛ yenyɔdara, paarɩkɛra wa bɩnɩ wa-n yɩrna nyɩma.