23
1 Le Jeju kɔɔ mɩɩna tibil jɔɔle nakha ɔɔ kpãkpãadara ayɩwɔɔ:
2 Jɔfʋ dɩɩrdarasɔ na jɔfʋ bʋ dʋdarasɔ fien gba Mʋɩjɩɩ too pa dɩ wa-n mɩɛ tɩbɩla jɔfʋ kɩrʋ.
3 Gɛr gɩ, nɩ hɩnɛ a na cʋɛ thɩ̃ɛ fɛʋʋkɛ wɩ-n so narnɩ, sɩ na-n cʋʋ mɔ̃kɛ wɩ-n cʋʋna', gɩdonɩ nʋɔ wɩ-n sona sɩ wa-n cʋa'.
4 Wɩ-n lire heendaasɔɔkɛ dɩbarɔnɩ dɩ wɩ heen tɩbɩla, sɩ awɩ thɛthɛ na-n ƴaal wɩ tharna awɩ nyɛ̃ fɩɩʋraka'.
5 Wɩ-n cʋʋrɛ awɩ thɩ̃ fɛʋ tɩbɩla na-n yɛ wɩ. Gɛr n dɔ nɔɔ dɩ wɩ cʋʋ awɩ lo kɛra dɩɩ kɔ̃tɩ̃, dɩ wɩ cʋʋ dakha awɩ kẽkẽ kɔ̃tɩ̃ nɔsɔ dɩɩ gbaan jʋɔljʋɔl.
6 Wɩ-n nar ƴɛ kʋʋl too paar dɩko kho paar na ƴɛ kʋʋl too paar awɩ Thãgba fʋɔr cɔsɔra.
7 Wɩ-n nar tɩbɩla na-n fʋɔrɛ wɩ kɔ̃tɩ̃ fʋɔrʋʋ a na wɛna wɩ dakha dɩɩrdara.
8 Sɩ ne wer, na-n do tɩbɩla na-n we nɩ dɩɩrdara ga, gɩdonɩ bɩɛl dɩbara 'lẽ'lẽ'lẽ dʋɔn anɩ Dɩɩrdaar, sɩ nɛrɛ fɛʋ omɩna nɩ do.
9 Dɩ na-n we tibil thɩɩra anɩ tha', gɩdonɩ bɩɛl dɩbara haanle kɛ dɔnɩ anɩ Thɩ, ʋrɛɛkɛ hanɩ Thãgbaa dʋɔ gɩ.
10 Na-n do wa-n we nɩ kɔ̃tɩna ga, gɩdonɩ bɩɛl dɩbara haanle kɛ dɔnɩ anɩ Kɔ̃tɩ̃, Kirisiti gɩ.
11 Sɩ ʋrɛ dɔnɩ kɔ̃tɩn anɩ thɩ̃thɩɩn a jɔ, ɔr na ka na do anɩ thɔ̃daar.
12 Ʋrɛɛkɛ n kanɩ ire wa wuruure, sɩ ʋrɛɛkɛ n wuroni dɩbara, ɔr wa ɩɩr.
13 Ga puu narɛ nɛr jɔfʋ dɩɩrdara na jɔfʋ bʋ dʋdaraakɛ dɔnɩ bɩnɛ yenyɔdara, gɩdonɩ nɩ-n khaanɛ ƴũ fãgadaarɩ dɩ hʋ tɩbɩlala, nɛrɛɛ thɛthɛɛkɛ yɛnɩ na-n lõa', dɩ wɩrɛ n ƴaalɛnɩ wɩ lõ wo na-n sɩ war wɩ lona ga.
14 [Ga puu narɛ nɛr jɔfʋ dɩɩrdara na jɔfʋ bʋ dʋdaraakɛ dɔnɩ bɩnɛ yenyɔdara, gɩdonɩ nɩ-n phʋʋnɛ khikhɛra sɩɩ do fɩɩlɛ nɩ-n bɩɛlna Thãgba dɩ nɩ pʋɔrna ƴɛrr tɩbɩla na-n yɛ nɩ dɩphã. Gɛr dɔ kɩrʋ dɩ so kɔ̃tɩ̃ɩ na heen nɩ na khɩɩr na ka.]
15 Ga puu narɛ nɛr jɔfʋ dɩɩrdara na jɔfʋ bʋ dʋdaraakɛ dɔnɩ bɩnɛ yenyɔdara, gɩdonɩ nɩ-n pɩrɛ paar fɛʋ thɩɩraakɛ na lanyʋɔnna tɩɩ bɩɛlla nɩ cʋgʋʋ a fe a hɔ Juifi. Dɩ ado a debi pɩ, dɩɩ do nɩ ka cʋgʋʋrɛ dɩ do bu paarɩ bɩsã dɩ jɔ nɩ balanyɔ.
16 Ga puu narɛ nɛr thɔthɔɔda yarasɔɔkɛ n sɔnɩ dɩ nɩ yɩ: Ado tibil ʋlfɛna Thãgba fʋɔr cʋɔr aa, ga do puure ga. Sɩ ado ntɛ ʋlfɛna dɛɛkɛ hanɩ Thãgba fʋɔr cʋɔr, a toorore.
17 Nɛr də̃bələ na yarasɔ, ʋmɔ̃ ka do dakɔ̃tɩ̃ɩ a jɔ? Dɛ gɩ yaa, Thãgba fʋɔr cʋɔrɩkɛ n cʋɛnɩ dɛ dɩɩ do thɩ̃ phuu gɩ?
18 Nɩ sor wo ayɩ: Ado tibil ʋlfɛna bonɩ ji paar aa, ga do puure ga. Sɩ ado ntɛ ʋlfɛna bonɩ ji thɩ̃ɛɛkɛ dɛɛnɛnɩ bonɩ ji paar, a toorore.
19 Yara ha nɩ bã, ʋmɔ̃ ka do dakɔ̃tɩ̃ɩ a jɔ? Bonɩ ji thɩ̃ɛ gɩ yaa, bonɩ ji paarɩkɛ n cʋɛnɩ bonɩ ji thɩ̃ɛ dɩɩ do daphuu gɩ?
20 Ʋrɛ ʋlfɛnanɩ bonɩ ji paar, bonɩ ji paarra a ʋlfɛna na gɩrɛ fɛʋʋkɛ harɔnɩ.
21 Dɩ ʋrɛ ʋlfɛnanɩ Thãgba fʋɔr cʋɔr, Thãgba fʋɔr cʋɔrra a ʋlfɛna na ʋrɛ n cɔrɔnɩ.
22 Dɩ ʋrɛ ʋlfɛnanɩ Thãgbaa dʋɔ, Thãgbaa fãga too pa a ʋlfɛna na ʋrɛɛkɛ n tɔɔrɔnɩ.
23 Ga puu narɛ nɛr jɔfʋ dɩɩrdara na jɔfʋ bʋ dʋdaraakɛ dɔnɩ bɩnɛ yenyɔdara, gɩdonɩ nɩ-n tire bɩɛl yʋɔr anɩ bi fara na anɩ thɩ̃ phulosɔraakɛ fɛʋ dʋɔnnɩ bii, sɩ dɩ nɩ ka hɛbɩ gɩrɛ dɔnɩ thɩ̃ kɔ̃tɩɩnaakɛ jɔfʋra a faa, kɛ dɔnɩ fɩl sarʋ, na bɔ jɩɩr, na sobɔ cʋʋrɛ. Sɩ gɛr ka do thɩ̃ɛɛkɛ nɩ kɔɔ teenanɩ nɩ cʋʋ, sɩ ga do wɩ yɩ nɩ hɛba gelela ga.
24 Nɛr thɔthɔɔda yarasɔ, nɩ-n tɛr cĩcinə a na faa, sɩ dɩ na-n dɩɩ nyɔɔmɛ.
25 Ga puu narɛ nɛr jɔfʋ dɩɩrdara na jɔfʋ bʋ dʋdaraakɛ dɔnɩ bɩnɛ yenyɔdara, gɩdonɩ nɩ-n cɔcɔɔrɛ thɩ̃ yɔdaa na dɩko khodaa khiru, sɩɩ do bɩnɔ nɩ ka hire na thɩ̃ tagɩrɩ kpɩɛrɛ na dɩbara fʋ thʋnɔnɛ.
26 Fɛr jɔfʋ bʋ dʋdaarɩkɛ yaarɛnɩ, dɔ fɩ cɔcɔɔ thɩ̃ yɔdaa na dɩko khodaa bɩnɛ ɓo, ɔmɛ̃ khiru na hɩrɛ.
27 Ga puu narɛ nɛr jɔfʋ dɩɩrdara na jɔfʋ bʋ dʋdaraakɛ dɔnɩ bɩnɛ yenyɔdara, gɩdonɩ nɩ hʋrɛ kaakɛ wɩ calnɩ mɩlɛ, dɩɩ do jɩɛra wer gɩ bɔrɛ hɩɩnɛna, sɩ dɩɩ do bɩnɔ khi khubo he le na thɩ̃ bise caar fɛʋ.
28 Mɛ̃ nɛrɛɛ thɛthɛ ha; jɩɛra wer, nɩ-n hʋrɛ tɩɩ sara tɩbɩlala, sɩ bɩnɔ, bɩnɛ yenyɔ fɩlɛ he le na sopugo.
29 Ga puu narɛ nɛr jɔfʋ dɩɩrdara na jɔfʋ bʋ dʋdaraakɛ dɔnɩ bɩnɛ yenyɔdara, gɩdonɩ nɩ-n mɩrɛ Thãgbaa bobonasɔɔ ka, dɩ na-n gbɛbɩ tɩɩ sarasɔɔ ka gɩ bʋɔnɔ,
30 sɩ dɩ na-n so dɩ nɩ yɩ aa: Ado sɛr kɔɔ haanle asɩ mama thɩ kɔ̃tɩ̃sɔɔ bɔɔle, sa kɔɔ tu awɩdaale a na deer Thãgbaa bobonasɔɔlee tɔmã'.
31 Thakɛrakɛ nɛrɛɛ thɛthɛ n nɩnanɛ, dɩ nɛr dʋɔn wɩrɛ kɔɔ kʋrɛnɩ Thãgbaa bobonasɔɔlee bɩsãsɔ.
32 Dɩ gɛr gɩ nɩ yɩra pɩɩrɛ anɩ mama thɩ kɔ̃tɩ̃sɔɔ thɔ̃ puurə mɛ̃.
33 Nɛr siisɔ, sikori bisɔ, mɔ̃ na cʋʋ sɩ na the so heenenaakɛ na jalana nɩnɩ bu paar dɔɔra?
34 Gɛrra dɔ nɔɔ dɩ ma thɔna nar Thãgbaa bobonasɔ, na tɩɩ kpɛsɛsɔ, na jɔfʋ dɩɩrdarasɔ, dɩ na kʋʋrɛ ɩkhasɔ, na gba ɩkhasɔ na kpa kʋkʋ thɩrʋra, na ciil ɩkhasɔ na khasa awɩ Thãgba fʋɔr cɔsɔra, na kpoo warɛ dɩɩ wo dɩɩra;
35 dɩ mɛ̃ sor na heen nɩ dɩphã dɩ pa 'leedaraa tɔmɩnaakɛ fɛʋ, kɛ kɔɔ deerenɩ thɩɩraakɛ dɩɩ fʋna Abɛl tɩɩ sarʋʋ tɔmɩ̃ a jalna waa a ba dana Barasɩɩ bikuun Jakarɩɩ tɔmɩ̃, kɛ dɔnɩ ʋrɛ nɩ kɔɔ kʋnɩ Thãgba fʋɔr cʋɔr na bonɩ ji pa thɩ̃thɩɩn.
36 Sobɔr mɩ so nar, gele fɛʋ na heene nĩdaraakɛ sor.
37 Pha Jerujalɛm, Jerujalɛm, fɛrkɛ n kʋrɛnɩ Thãgbaa bobona, dɩ fa-n dʋʋrna wɩrɛ Thãgba kɔɔ thɔ̃ farnɩ bokana, balamɔ̃ balamɔ̃ mɩ kɔɔ ƴaal ɩ̃ gbɛbɩra afɩ too mɔ̃kɛ yɔl nɩɩ n gbɛbɩnɩ ɔɔ bisɔ dɩ thiro gbɛla, sɩ na kɔɔ tuə'.
38 Dɩ nɩ hɩnɛ dɩphã, wa faa narɛ anɩ cɔra dɩ ga do cɔ kpoloo,
39 gɩdonɩ mɩ so narɛ ayɩ: A fʋna nɛnɛ̃kɛ na yɩ mɩ bã, phaphapha gɩ dana bɔɔkɛ na sonɩ nayɩ: «Ʋrɛ n ɩnanɩ na Kɔ̃tɩnɩ i hɩna khɩɩrɛ.»