22
1 Dɩ Jeju bire gba thɩmɩa wo da-n mɩɩna wɩ na sokpaa ayɩ:
2 Yũ fãgadaar do, gɩ hʋrɛ fãgadaarɩkɛ kɔɔ cʋɛnɩ fɛtɩ ɔɔ bikuuni herra.
3 Agɩpɩ a thʋɔn ɔɔ thɔ̃daarsɔ wɩ jala wɛ wɩrɛ wɩ kɔɔ soronɩ wɩ pɔ he fɛtɩrara, sɩ wa kɔɔ tu na pɔa'.
4 Dɩ a bire thɔ̃ thɔ̃daar kpɩɩsɔ wo a so war ayɩ: Nɩ sɔ wɩrɛrara wɩ wenɩ ayɛwɔɔ: Nɩ hɩnɛ, mɩ gbɛbɩrɛ he fɛtɩ dɩkorra pɩ, mɩ kʋʋrɛ nakena, a kʋʋrna nʋ̃ ƴɩkhasɔ wa khʋɔn kpãkpalã ga; thɩ̃ɛ fɛʋ gbɛbɩrɛ pɩ, nɩ ɩna he fɛtɩrara mɛ̃.
5 Sɩ wa thernanakɛ werɩle wɩ we wɩna'; sɩ ʋ n gbaar da-n jal ɔɔ lɔɔ, ʋ n gba da-n jal ɔɔ ƴabɩ pa.
6 Sɩ wɛ fʋ thɔ̃dara a hʋɔlɔ sa kʋʋr wɩ.
7 Dɩ nĩkhii fʋrɛ fãgadaarɩle dɩ thɔ̃ ɔɔ sɔrasɩsɔ, dɩ wɩ bũburõ tɩɩ kʋʋrdaraalera sa thii wi dɩɩ.
8 Dɩ agɩpɩ a sor ɔɔ thɔ̃daarsɔrara ayɩ: Gɩdonɩ he fɛtɩ dɩkɔ gbɛbɩrɛ pɩ, sɩ wɩrɛ wɩ kɔɔ wenɩ dɩ ga do wɩ teena gɛra',
9 gɛr gɩ, nɩ jala hʋ lee paarsɔ a wɛ wɩrɛ fɛʋʋkɛ nɩ yɩnɩ, wɩ ɩ̃ he fɛtɩra.
10 Dɩ thɔ̃daraale ɩɩr jal hʋɛsɔrara a khɩɩ wɩrɛ fɛʋʋkɛ wɩ yɩnɩ, tɩɩ puusɔ na tɩɩ bɔɩsɔ, dɩ welela wɩ wenɩ a pɔna wɩ hire he dɩko kho paar.
11 Dɩ fãgadaarɩle lʋʋn da-n hɩɩn wɩrɛ tɔɔnɩ dɩko kho paarra, dɩ a yɩrɛ le kũu bɩɛlɩkɛ na tɔnɩ he kɩ̃kɩɩna'.
12 Dɩ a buleele: Ɩ̃ kuun, mɔ̃ fɩ fʋ sa lõ kɩɛr, sɩ fa to he kɩ̃kɩɩna'; dɩ kuunile pɩr pɔbɩ.
13 Le fãgadaarɩle so thɔ̃darara: Nɩ fʋɔnɛɛ a le nɛɛ na nyɛ̃ɛ a dɔna faa jɩɛra dabirə paar, ka wa bɩnɩ wa-n yɩrna nyɩma.
14 Gɩdonɩ wɩrɛ wɩ wenɩ wɩ jɔrɛ kpɛ, sɩ wɩrɛ wɩ phiirni wa kpɛra'.
15 Le jɔfʋ bʋ dʋdarasɔ jal dɩ wa-n gʋʋr kha, mɔ̃ wa fʋnɩ sɩ na nɔ Jeju thɩmɩɩraakɛ a na mɩɩnɩ.
16 Dɩ wɩ thʋɔn ɔɔ pa awɩ kpãkpãadarasɔ na Ɛrɔɔdɩɩ too, dɩ wɩ sʋʋraa ayɩ: Dɩɩrdaar, sɩ jɩrɛ dɩ sobɔ tibil fɩ do, dɩ fɩ-n dɩɩrɛ dakha Thãgbaa hʋ na sobɔr sɩ fa-n ma tibilə', gɩdonɩ fa-n hɩɩn tɩbɩla dɩɩdɩa';
17 dɩ gɛr gɩ sɔ sar mɔ̃ fɩ yɩɛnɩ dɩɩ ha. Gɩ teere kha dɩ sa lɩmɩ Sejaar lãpho yaa, ga tee kha ga.
18 Sɩ gɩdonɩ Jeju jɩrɛ awɩ bɩ̃ kpal thɩmɩɩ, a birse wer: Nɛr bɩnɛ yenyɔdara, mɔ̃gɩdo dɩ na-n fifilə mi?
19 Nɩ nɛ mar warɩkɛra nɩ-n gbanɩ dɩ nɩ lɩmɩ lãphora. Dɩ wɩ gba war birera a pɔna.
20 Dɩ a bule wer: Amɛ ha ʋrɛ fotoraakɛ, dɩ amɛɛ khere ha gɩrɛ?
21 Dɩ wɩ birsee: Sejaar gɩ. Dɩ mɛ̃ a so war ayɩ: Nɩ 'laanɛ Sejaarra gɩrɛ dɔnɩ Sejaarɩda, a 'laanɛ Thãgbara gɩrɛ dɔnɩ Thãgbaada.
22 Dɩ nʋɔ kɔɔ kpaa wɛr thɩmɩɩraale wɩ kɔɔ nɩɛnɩ, dɩ wɩ gba faa sa jal kɔ̃.
23 Ga wi bɩɛlɩlera Sadʋsɛ̃ɛsɔɔkɛ n yɛnɩ khi ɩɩrɛ na hala', pɔr Jejura a bulee bulele thakɛ ayɩ:
24 Dɩɩrdaar, Mʋɩjɩ kɔɔ sor ayɩ: «A tibil hana khɛr sa khi sɩ bɩsaan na hala', ɔɔ õkuun n gba khikhɛrʋʋlera a hɛ a kɔna bɩsana wɩ do ɔɔ õkuuni məl.»
25 Sɩɩ do õkona makonyɔ wɛ a kɔɔ hale asɩ thɩ̃thɩɩn, dɩ cacadaar kɔɔ her khɛr a khi, sɩ gɩdonɩ bɩsaan na hala' dɩɩ do ɔɔ õkuunna a faa khɛrɩle mɛ̃.
26 Thalera gɩ kɔɔ ha na balanyɔdaar, agɩpɩ na balãtherdaar, a jalna thalera waa a ba dana makonyɔdaar.
27 A wele pɩ fɛʋ na pɩ, khɛr dakha khire.
28 Dɩ gɛr gɩ, ado khe na ɩɩrɛ na the khirera, ʋmɔ̃ wɛr makonyɔra na hɩna khɛrɩlera dɩphã gɩrɛ, gɩdonɩ wɛr fɛʋra kɔɔ hɩɛ.
29 Dɩ Jeju birse wi: Jaa, nɩ buure waa fĩi koe, gɩdonɩ na jɩ Thãgbaa sɛbɛ na Thãgbaa fãga ga, gɛr gɩ.
30 Gɩdonɩ ado khe na ɩɩr na the khirera, kona na he khɛra bã, dɩ khɛra dakha na he kona bã, sɩ wa hʋrɛ Thãgbaa thɔ̃thɔ̃daar thusɔɔkɛ hanɩle Thãgbaa dʋɔ.
31 Sɩ ado khee ɩɩr gɩ, na kɔɔ yɩɛ le Thãgbaa sɛbɛra gɩrɛɛkɛ Thãgba so narnaa?
32 Mee ayɩ: «Ɩnɛr dʋɔn Abɩrahamɩ Thãgba, na Ɩjakɩɩ Thãgba, na Jakɔbɩɩ Thãgba.» Thãgba na do khee Thãgba ga, sɩ wɩrɛ hananɩ yiree Thãgba a do.
33 Dɩ tibil jɔɔkɛ hande dɩ wa-n pɛ nũu, nʋɔ kɔɔ kpaa wɛr Jejuu dɩɩrra.
34 Mɔ̃ jɔfʋ bʋ dʋdara kɔɔ nɩɛnɩ dɩ wɩ yɩ, a cʋʋrɛ wɩrɛ n yɛnɩ khi ɩɩrɛ na hala', dɩ wa yɩ nʋɔ bã, wɩ kpar kha a pɔ.
35 Dɩ tibil bɩɛl wɛrraakɛ dɔnɩ jɔfʋ dɩɩrdaar ɩɩrnanaa bule ʋrɛ wo, da-n fifiləə a hɩɩn ayɩ:
36 Dɩɩrdaar, ʋmɔ̃ dɔrakɛ gɩrɛ jɔfʋ kɔ̃tɩ̃ɩ a jɔ jɔfʋsɔ fɛʋ?
37 Dɩ Jeju birsee: «Dɔ fa-n na Kɔ̃tɩn afɩ Thãgba na afɩ bɩ̃ fɛʋ, na afɩ ha fɛʋ, na afɩ kpɩɛr fɛʋ.»
38 Ɔr dʋɔn cacadaa, kɛ kɔ̃tɩnanɩ a jɔ jɔfʋsɔ fɛʋ.
39 Dɩ yɛ kɛ balanyɔdaa wo kɛ n hʋɔnɛɛnɩ: «Dɔ fa-n na afɩ 'walãkha tibil mɔ̃kɛ fɩ-n nanɩ afɩbara.»
40 Jɔfʋ yenyɔraakɛ jɔfʋ fɛʋ na Thãgbaa bobonasɔɔ so jəəro yʋʋ fɛʋ.
41 Mɔ̃ jɔfʋ bʋ dʋdarasɔ kpanɩ kha a jɛ, Jeju bule wer thɩ̃ɛ ayɩ:
42 Anye nɩ-n kpɩɛrna Kirisiti? Amɛɛ bikuun a do? Dɩ wɩ birsee: Davɩdɩɩ Bikuun gɩ.
43 Dɩ Jeju so war: Dɩ mɔ̃ gɩ fʋ sɩ Thu Phuu cʋʋ Davɩdɩ da-n wɩɩ Kɔ̃tɩn, ɔbɔɔkɛ a sonɩ ayɩ:
44 «Thãgba sor ɩ̃ Kɔ̃tɩna ayɩ: Tɔɔ ɩ̃ nyɔ̃bɔra, phaphapha ɩ̃ cʋʋ afɩ lãlaardara wɩ do afɩ nɛ jəəda.»
45 Dɩ ado Davɩdɩ n wɩɩrɛ Kɔ̃tɩn thale, mɔ̃ a na fʋ sɩ na do ɔɔ bikuun?
46 Dɩ tibil bɩɛllakɛ na puno na deeraa ga. Dɩ a fʋna ga wiile tibil na-n 'la dɩ bulee thɩ̃ɛ bã.